Perkurá pa Rumannan di Edat Ta un Responsabilidat Kristian

“Te na boso behes ami lo ta meskos, i te na boso añanan di kabei blanku lo mi karga boso!”—ISAIAS 46:4.

1, 2. Kon e kuido di nos Tata selestial ta diferensiá for di e kuido ku mayornan humano ta duna?

MAYORNAN dediká ta perkurá pa nan yunan for di ora nan ta beibi, tambe durante nan infansia i adolesensia. Asta ora hóbennan bira adulto i tin nan propio famia, nan tata i nan mama ku amor ta sigui duna nan atenshon i sosten.

² Ounke tin un límite na loke hende por hasi pa nan yunan, nos Tata selestial sí semper ta den posishon pa duna su sirbidónan fiel atenshon i sosten ku amor. Papiando ku su pueblo skohí di antigwedat, Yehova a deklará: “Te na boso behes ami lo ta meskos, i te na boso añanan di kabei blanku lo mi karga boso!” (Isaias 46:4) E palabranan ei ta un garantia masha alentador pa kristiannan di edat. Yehova no ta bandoná esnan ku keda fiel na dje. Al kontrario, el a primintí di sostené, apoyá i guia nan henter nan bida, te den behes.—Salmo 48:14.

3. Kiko nos lo konsiderá den e artíkulo aki?

³ Kon nos por imitá Yehova su interes i amor pa hende di edat? (Efesionan 5:1, 2) Laga nos konsiderá algun manera ku yunan, superintendentenan di kongregashon i kristiannan individual por perkurá pa e nesesidatnan di miembronan di edat den nos hermandat mundial.

 Nos Responsabilidat Komo Yu

4. Ki responsabilidat yunan kristian tin pa ku nan mayornan?

⁴ “Onra bo tata i bo mama.” (Efesionan 6:2; Eksodo 20:12) Sitando e palabranan simpel aki i tòg profundo di e Skritura Hebreo, apòstel Pablo ta rekordá yunan di e responsabilidat ku nan tin pa ku nan mayornan. Pero kon e palabranan aki ta apliká na kuido di hende di edat? Un ehèmpel konmovedor di e era prekristian lo yuda nos kontestá e pregunta aki.

5. (a) Kiko ta indiká ku Hosé no a lubidá su debernan komo yu? (b) Kiko ke men onra nos mayornan, i ki ekselente ehèmpel Hosé tabata den esaki?

⁵ Pa mas ku 20 aña, Hosé no tabatin kontakto ku su tata ansiano, e patriarka Jakòb. Sin embargo, Hosé evidentemente no a pèrdè su amor di yu pa Jakòb. De echo, na momentu ku Hosé a revelá su berdadero identidat na su rumannan, el a puntra nan: “Mi tata ta na bida ainda?” (Génesis 43:7, 27; 45:3) Na e tempu ei, e tera di Kánaan tabata den e gara di hamber. Pues, Hosé a manda bisa su tata: “Bin serka mi, no tarda. Lo bo biba na tera di Gosen i lo bo ta serka di mi . . . Aya lo mi proveé tambe pa bo.” (Génesis 45:9-11; 47:12) Sí, onra mayornan di edat ta enserá protehá nan i perkurá pa nan materialmente ora ku nan no ta den posishon pa kuida nan mes. (1 Samuel 22:1-4; Juan 19:25-27) Gustosamente Hosé a aseptá e responsabilidat aki.

6. Kon Hosé a demostrá berdadero amor pa su tata, i kon nos por imitá su ehèmpel?

⁶ Ku e bendishon di Yehova, Hosé a bira un di e hòmbernan mas riku i mas poderoso di Egipto. (Génesis 41:40) Tòg e no a sinti ku e tabata muchu importante òf muchu okupá pa onra su tata ku tabatin 130 aña. Ora el a tende ku Jakòb (Israel) tabata serka di yega, “Hosé a prepará su garoshi i a bai Gosen pa kontra ku su tata Israel; asina ku el a presentá su dilanti, el a kai den su brasa i a yora den su brasa pa un bon ratu.” (Génesis 46:28, 29) E bonbiní aki tabata mas ku djis un muestra di rèspèt pa formalidat. Hosé a stima su tata bieu sinfin i e no tabatin bèrgwensa di demostrá su amor. Si nos tin mayornan di edat, nos tambe ta asina generoso den ekspresá nos kariño pa nan?

7. Dikon Jakòb tabata ke pa nan der’é na Kánaan?

⁷ Jakòb su deboshon na Yehova a keda fuerte te na fin di su bida. (Hebreonan 11:21) Debí na su fe den e promesanan di Dios, Jakòb a pidi pa nan dera su restunan na Kánaan. Hosé a onra su tata dor di kumpli ku e petishon aki, apesar di e gran kosto i esfuerso ku esaki a enserá.—Génesis 47:29-31; 50:7-14.

8. (a) Kiko ta nos motivashon prinsipal pa perkurá pa nos mayornan di edat? (b) Kiko un sirbidó di tempu kompletu a hasi pa e por a perkurá pa su mayornan di edat? (Wak e kuadro na página 17.)

⁸ Kiko a motivá Hosé pa perkurá pa su tata? Ounke amor i un sentido di deber pa ku esun ku a dun’é bida i ku a kuid’é a hunga un ròl, Hosé sin duda a sinti tambe un deseo profundo pa agradá Yehova. Nos tambe mester sinti meskos. Pablo a skirbi: “Si un biuda tin yu òf nietu, laga nan siña promé di praktiká piedat pa ku nan mes famia, i di rekompensá nan mayornan [“i abuelonan,” NW], pasobra esaki ta aseptabel den bista di Dios.” (1 Timoteo  5:4) Sí, amor pa Yehova i tambe un temor respetuoso p’e lo motivá nos pa perkurá pa nos mayornan di edat, sin importá ki difikultatnan esei lo por enserá. *

Kon Ansianonan Ta Demostrá Ku Nan Ta Interesá

9. Ken Yehova a nombra pa pastoriá e tou, ku ta inkluí kristiannan di edat?

⁹ Na final di su bida largu, Jakòb a referí na Yehova komo “e Dios, kende tabata mi wardadó henter mi bida te dia djawe.” (Génesis 48:15) Awe, Yehova ta pastoriá su sirbidónan riba tera pa medio di superintendentenan kristian (ansianonan), bou di guia di su Yu Hesukristu, “e wardadó prinsipal.” (1 Pedro 5:2-4) Kon superintendentenan por imitá Yehova segun ku nan ta perkurá pa e miembronan di edat di e tou?

10. Kiko a yega di ser hasí pa perkurá yudansa material pa kristiannan di edat? (Wak e kuadro na página 19.)

¹⁰ Djis despues ku e kongregashon kristian a keda establesí, e apòstelnan a nombra “shete hòmber di bon reputashon, yen di spiritu santu” pa supervisá “partimentu di e kuminda di tur dia” entre e biudanan kristian ku tabata pober. (Echonan 6:1-6) Despues, Pablo a instruí e superintendente Timoteo pa pone biudanan di edat ku ta ehemplar, riba e lista di esnan ku tabatin derecho di haña yudansa material. (1 Timoteo 5:3, 9, 10) Di igual manera, superintendentenan di kongregashon djawe boluntariamente ta kordiná yudansa práktiko pa kristiannan di edat ora ku esaki ta nesesario. Sin embargo, perkurá pa rumannan fiel di edat ta enserá mas kos.

11. Kiko Hesus a bisa tokante e biuda pober ku a duna un kontribushon chikí?

¹¹ Kasi na final di su sirbishi riba tera, Hesus a bai sinta den e tèmpel i “tabata opservá kon e multitut tabata tira plaka den e kaha di ofrenda.” Anto un hende a kapta su atenshon. E relato ta bisa: “Un biuda pober a bin i a tira dos sèn di koper aden, kualnan ta suma ún plaka.” Hesus a yama su disipelnan serka dje i a bisa nan: “Di bèrdat mi ta bisa boso, e biuda pober aki a tira mas den e kaha di ofrenda ku tur e otronan ku a tira algu aden; pasobra nan tur a tira aden for di nan abundansia, ma el a tira aden, for di su pobresa, tur loke ku e tabatin, tur loke ku e tabatin pa biba di dje.” (Marko 12:41-44) Pa loke ta e kantidat di plaka, e kontribushon di e biuda tabata chikí, pero Hesus tabata sa kuantu apresio su Tata  selestial tabatin pa tal ekspreshonnan di deboshon hasí di henter alma. Sin importá e edat di e biuda pober, Hesus no a pasa por haltu di loke el a hasi.

12. Kon ansianonan por demostrá nan apresio pa loke kristiannan di edat ta kontribuí kuné?

¹² Meskos ku Hesus, superintendentenan kristian no ta pasa por haltu di loke rumannan di edat ta hasi pa promové adorashon berdadero. Ansianonan tin motibu pa elogiá rumannan di edat pa nan partisipashon den sirbishi i den reunion, pa nan influensia positivo den e kongregashon i pa nan perseveransia. Un palabra sinsero di animashon por yuda esnan di edat haña “motibu pa alegrá” den nan sirbishi sagrado. I esei lo evitá ku nan ta sinti nan frustrá dor ku nan ta kompará nan mes ku loke otro kristiannan por hasi òf ku loke nan mes tabata por a hasi den pasado.—Galationan 6:4, NW.

13. Menshoná algun manera ku ansianonan por hasi uso di e talentonan i eksperensia di rumannan di edat.

¹³ Ansianonan por mustra ku nan ta aseptá e aporte balioso ku kristiannan di edat ta duna dor di hasi uso di nan eksperensia i talentonan. De bes en kuando por usa rumannan di edat avansá ehemplar den demostrashon òf entrevista. Un ansiano a bisa: “E ouditorio ta ègt lanta sinta i skucha ora mi entrevistá un ruman hòmber òf ruman muhé di edat ku a lanta yunan den e bèrdat.” Ansianonan den un otro kongregashon a informá ku un ruman muhé pionero di 71 aña tabatin éksito den yuda publikadónan di Reino bira regular atrobe den sirbishi di vèlt. Tambe e ruman muhé ta animá nan pa hasi e “kosnan básiko,” manera lesa Beibel i e teksto di dia, anto meditá riba loke nan lesa.

14. Kon un kuerpo di ansiano a mustra apresio pa un superintendente di mas edat entre nan?

¹⁴ Tambe ansianonan ta balorá e aporte di superintendentenan di edat. José, kende tin 70’i piku aña i a sirbi pa vários dékada komo ansiano, resientemente a hasi un operashon grandi. Komo ku e tabatin un periodo largu di rekuperashon su dilanti, el a pensa di entregá su privilegio di sirbi komo superintendente presidente. José a bisa: “E reakshon di e otro ansianonan a sorprendé mi. En bes di aseptá  mi sugerensia, nan a puntra mi ki yudansa práktiko mi tabatin mester pa por sigui atendé mi responsabilidatnan.” Anto ku yudansa di un ansiano mas yòn, José por a sigui sirbi gososamente komo superintendente presidente, i esaki tabata un bendishon pa e kongregashon. Un ansiano di su kongregashon a bisa: “E rumannan tin masha apresio pa José su trabou komo ansiano. Nan stim’é i ta respet’é pa su eksperensia i fe ehemplar. E ta enrikesé nos kongregashon.”

Perkurando Un pa Otro

15. Dikon tur kristian mester ta interesá den bienestar di e rumannan di edat meimei di nan?

¹⁵ No ta solamente yunan ku tin mayornan di edat i sirbidónan nombrá mester ta interesá den rumannan di edat. Komparando e kongregashon kristian ku e kurpa humano, Pablo a skirbi: “Dios a komponé e kurpa di tal manera ku el a duna mas hopi onor na e miembro ku tabata falta onor, pa no tin divishon den e kurpa, ma pa e miembronan tin e mesun perkurashon un pa otro.” (1 Korintionan 12:24, 25) Un otro tradukshon ta bisa: “Pa tur e miembronan preokupá pa otro.” (Versión Reina-Valera, 1960) Pa e kongregashon kristian funshoná armoniosamente, kada miembro mester ta preokupá pa e bienestar di su rumannan den fe, inkluso e rumannan di edat.—Galationan 6:2.

16. Kon nos por mustra interes den rumannan di edat ora nos asistí na reunionnan kristian?

¹⁶ Reunionnan kristian ta duna nos un bon oportunidat pa mustra interes den e rumannan di edat. (Filipensenan 2:4; Hebreonan 10:24, 25) Nos ta tuma tempu pa kòmbersá ku esnan di edat na e okashonnan ei? Ounke kisas ta na su lugá pa puntra nan kon ta bai ku nan salú, nos lo por “kompartí algun don spiritual” ku nan? Nos lo por konta nan un eksperensia edifikante òf kompartí un pensamentu bíbliko ku nan? Ya ku algun ruman di edat no por move dje bon ei, lo ta un muestra di bondat pa nos aserká nan en bes di ferwagt ku ta nan mester bin serka nos. Si algun di nan tin problema ku oido, nos lo tin ku papia mas slow i pronunsiá e palabranan bon kla. I pa por tin un berdadero interkambio di estímulo, nos tin ku skucha atentamente na loke e persona di edat tin di bisa.—Romanonan 1:11, 12.

17. Kon nos por mustra nos interes pa kristiannan di edat ku no por sali for di kas?

¹⁷ Kiko si sierto rumannan di edat no por asistí na e reunionnan kristian? Santiago 1:27 ta mustra ku ta nos deber di “bishitá huérfano i biuda den nan aflikshon.” I rumannan di  edat ta apresiá nos bishitanan masha hopi! Tempu ku Pablo, e “hòmber di edat,” tabata enkarselá na Roma rònt di aña 65 di nos era, e tabata práktikamente su so. El a anhelá di mira su kolaboradó Timoteo i el a skirbi: “Hasi tur esfuerso pa bin serka mi pronto.” (Filemon 9; 2 Timoteo 1:3, 4; 4:9) Ounke nan no ta literalmente prezu, tin rumannan di edat ku no por sali for di kas debí na problema di salú. De echo, kisas nan ta bisando: ‘Por fabor, hasi tur boso esfuerso pa bishitá mi pronto.’ Nos ta hasi kaso di tal apelashon?

18. Bishitá rumannan di edat por resultá den ki benefisio?

¹⁸ Nunka balotá e efektonan probechoso di bishitá un ruman hòmber òf ruman muhé di edat. Ora ku un kristian ku yama Onesíforo tabata na Roma, el a buska Pablo diligentemente te ora el a hañ’é, i despues ‘hopi biaha el a refresk’é.’ (2 Timoteo 1:16, 17) Un ruman muhé di edat a bisa: “Mi gusta kompania di rumannan yòn. Loke mi ta gusta mas tantu ta ora nan ta trata mi manera un miembro di nan famia. Esei ta animá mi masha hopi mes.” Un otro kristian di edat a deklará: “Mi ta apresiá masha tantu ora ku un hende manda un karchi pa mi, òf yama mi na telefon pa djis un par di minüt òf bishitá mi pa un ratu. Ta manera un bientu fresku.”

Yehova Ta Rekompensá Esnan Ku Ta Mustra Interes i Duna Kuido

19. Ki bendishon nos ta risibí dor di perkurá pa rumannan di edat?

¹⁹ Perkurá pa rumannan di edat ta resultá den hopi bendishon. E echo ku nos por asosiá ku esnan di edat i hasi uso di nan konosementu i eksperensia, riba su mes ta un privilegio. Esnan ku ta duna e kuido ta sinti e gran felisidat ku ta bini di dunamentu, i tambe nan tin un sintimentu di logro i e pas interno di ku nan a kumpli ku nan responsabilidat bíbliko. (Echonan 20:35) Ademas, esnan ku ta perkurá pa rumannan di edat no mester tin miedu ku nan mes lo ser bandoná ora nan bira bieu. E Palabra di Dios ta sigurá nos: “E hende generoso lo prosperá, i esun ku duna di bebe tambe lo haña di bebe.”—Proverbionan 11:25.

20, 21. Kon Yehova ta mira esnan ku ta perkurá pa rumannan di edat, i kiko mester ta nos determinashon?

²⁰ Yehova ta rekompensá yunan temeroso di Dios, superintendentenan i otro kristiannan amoroso ku generosamente ta perkurá pa e nesesidatnan di rumannan di edat. Tal aktitut ta na armonia ku e proverbio aki: “Esun ku tene miserikòrdia di un hende pober ta fia SEÑOR, i E lo pag’é bèk pa su bon obra.” (Proverbionan 19:17) Si amor motivá nos pa mustra miserikòrdia na hende pober i humilde, Dios ta konsiderá tal dunamentu komo un fiansa ku lo e paga bèk ku hopi bendishon. Asina tambe e ta paga nos bèk pa e kuido amoroso ku nos ta duna na nos rumannan kreyente di edat, di kua hopi ta entre ‘e pobernan di e mundu aki pero siendo riku den fe.’—Santiago 2:5.

²¹ Esta generoso Dios su pago ta! E ta inkluí bida eterno. Pa e gran mayoria di sirbidó di Yehova, esei lo ta bida eterno riba e tera kombertí den Paradeis, kaminda e efektonan di piká heredá lo ser eliminá i sirbidónan fiel di edat lo ser restorá na nan vigor hubenil. (Revelashon 21:3-5) Miéntras ku nos ta spera riba e tempu bendishoná ei, laga nos sigui kumpli ku nos responsabilidat kristian di perkurá pa rumannan di edat.

[Nota]

Kiko Ta Bo Kontesta?

• Kon yunan por onra mayornan di edat?

• Kon ansianonan ta mustra apresio pa miembronan di edat di e tou?

• Kiko kristiannan individual por hasi pa mustra nan interes sinsero den esnan di edat?

• Ki bendishon nos ta risibí dor di perkurá pa kristiannan di edat?

[Preguntanan di Estudio]

[Kuadro na página 17]

Ora Ku Su Mayornan Tabatin Mester di Yudansa

Philip tabata sirbi komo boluntario den e trabou di konstrukshon na Liberia na 1999 ora ku el a risibí notisia ku su tata tabata gravemente malu. Konvensí ku su mama so lo no por a trata ku e situashon, Philip a disidí di bolbe na su pais pa regla kuido médiko pa su tata.

Philip ta kòrda: “No tabata fásil pa mi bai bèk, pero mi a sinti ku mi promé obligashon tabata ku mi mayornan.” Durante e siguiente tres añanan, el a perkurá pa su mayornan muda pa un kas mas apropiá i ku yudansa di e rumannan kristian lokal, el a adaptá e kas pa akomodá e nesesidatnan spesial di su tata.

Awor Philip su mama ta mihó prepará pa trata ku e problemanan serio di salú di su tata. Resientemente, Philip por a aseptá un invitashon pa bai traha komo boluntario na e ofisina di sukursal di Testigunan di Yehova na Masedonia.

[Kuadro na página 19]

Nan No A Ignorá Su Nesesidatnan

Ora ku Ada, un kristian di 85 aña na Oustralia, no por a sali mas for di kas debí na problemanan ku salú, e ansianonan di kongregashon a hasi areglo pa dun’é un man. Nan a organisá un grupo di rumannan kreyente ku lo por a yud’é. E rumannan aki gustosamente tabata limpia, laba, kushiná i hasi rospondi pa Ada.

E yudansa ei a kuminsá kasi dies aña pasá. Te asina leu, mas ku 30 Testigu di Yehova a yuda kuida Ada. Nan ta sigui bishit’é, lesa p’e for di publikashonnan bíbliko, ten’é al tantu di e progreso spiritual di e rumannan den kongregashon, i ku regularidat ta hasi orashon kuné.

Un ansiano kristian lokal a komentá: “Esnan ku ta kuida Ada ta konsiderá ku ta un privilegio di por yud’é. Ada su sirbishi fiel durante vários dékada tabata un inspirashon pa hopi di nan, i simplemente nan no por imaginá nan mes ku nan lo ignorá su nesesidatnan.”

[Plachi na página 16]

Nos ta generoso den ekspresá nos kariño pa mayornan di edat?

[Plachinan na página 18]

Tur hende den kongregashon por demostrá nan amor pa rumannan di edat