Resèpt pa un Bida Largu i Felis

TIN un dicho ku ta bisa ku “tur hende ke bira bieu, pero niun no ke ta bieu.” Hopi hende ku ta yegando edat di bai ku penshon ta anhelá e dia ku nan por tin mas tempu pa nan mes i ménos responsabilidat. Pero nan tin miedu di bira inútil i pèrdè propósito den bida. Tambe nan tin miedu di haña nan nan so, infelis i ku un salú ku ta bai atras.

Kiko anto ta e sekreto di un bida felis? Loke sigur por yuda trese felisidat pa grandi i chikí ta bon amigu i un famia amoroso. Pero loke otro hende por hasi pa enrikesé bida di un persona di edat no ta tur loke ta konta. Asta mas importante ainda ta loke un persona di edat por hasi pa otro hende.

Un estudio di término largu di 423 pareha di edat a indiká ku “ora nos kontribuí ku algu n’e bida di otro hende, esei por yuda alargá nos mes bida.” Stephanie Brown, kende a kondusí e investigashon, ta splika: “E resultadonan aki ta indiká ku no ta loke nos ta saka for di nos relashon ku otro hende ta asina benefisioso; sino ta loke nos ta duna.” E dunamentu ei por inkluí yuda otro hende ku trabou di kas, wak yu, hasi rospondi pa nan, yuda ku transpòrt, òf skucha un persona ku tin nesesidat di papia.

Rònt di 2.000 aña pasá, Hesukristu a bisa: “Ta mas bendishoná pa duna ku pa risibí.” (Echonan 20:35) E resèpt pa un bida largu i felis no ta dependé di kuantu plaka bo tin na banko, ni di terapia i dieta kontra biramentu bieu. Mas bien, e ta konsistí di keda aktivo i duna di bo tempu, energia i forsa pa enrikesé bida di otro hende.

Tòg, maske kuantu nos duna, nos no por evitá di bira bieu, bira malu i muri. Ta e Reino di Dios so por eliminá e kosnan ei. Bou di su gobernashon, enfermedat lo disparsé i asta “lo no tin morto mas.” (Revelashon 21:3, 4; Isaias 33:24) De echo, hende obediente lo biba pa semper den felisidat den un paradeis riba tera. (Lukas 23:43) Testigunan di Yehova ta kontentu di por duna otro hende e resèpt basá riba Beibel aki, ku por hiba na un bida largu i felis.