Rumannan di Edat Ta Miembronan Balioso di Nos Hermandat Kristian

“Plantá den e kas di SEÑOR, nan lo floresé . . . Asta den nan behes nan lo duna fruta.”—SALMO 92:13, 14.

1. Kon hopi hende ta mira personanan di edat?

YEHOVA stima tur su sirbidónan fiel, inkluso esnan di edat avansá. Sin embargo, segun un kálkulo nashonal, na Merka tur aña nan ta abusá di kasi mei mion persona di edat òf ta neglishá nan. Informenan similar for di tur parti di mundu ta indiká ku abusu di hende di edat ta un problema mundial. Segun un organisashon, e kousa fundamental di e problema ta “e aktitut ku ta reina den hopi hende . . . ku personanan di edat ya no ta útil mas, tambe nan ta improduktivo i ta dependé muchu di otro hende.”

2. (a) Kon Yehova ta mira su sirbidónan fiel di edat? (b) Ki deskripshon alentador nos ta haña na Salmo 92:12-15?

² Yehova Dios sí ta balorá su sirbidónan fiel di edat. E ta konsentrá riba e “hende interior”—nos kondishon spiritual—en bes di riba nos limitashonnan físiko. (2 Korintionan 4:16) Den su Palabra, Beibel, nos ta haña e siguiente garantia alentador: “E hende hustu lo floresé manera palma, e lo krese manera palu di seda na Líbano. Plantá den e kas di SEÑOR, nan lo floresé den e plenchinan di nos Dios. Asta den nan behes nan lo duna fruta; nan lo ta yen di vigor i bèrdè-bèrdè, pa deklará ku SEÑOR ta rekto.” (Salmo 92:12-15) Un análisis di e versíkulonan aki lo revelá vários aspekto di e aporte balioso ku boso, rumannan di mas edat, por duna na e hermandat kristian.

“Den Nan Behes Nan Lo Duna Fruta”

3. (a) Dikon hende hustu ta ser kompará ku palma òf palu di dader? (b) Kon rumannan di mas edat por ‘duna fruta asta den nan behes’?

³ E salmista ta kompará hende hustu ku palma—manera por ehèmpel palu di dader—‘plantá den e plenchinan di nos Dios.’ “Asta den nan behes nan lo duna fruta.” Bo tambe no ta haña esaki un pensamentu animador? Den tempu bíbliko, palunan di dader elegante i stret tabata un bista komun riba plenchinan. Fuera di nan balor komo dekorashon, hende tabata balorá palu di dader pa e abundansia di fruta ku nan tabata pari, i tabatin palu ta sigui pari pa mas ku shen aña. * Dor di keda firmemente plantá den adorashon berdadero, bo tambe  por sigui ‘duna fruta den tur bon obra.’—Kolosensenan 1:10.

4, 5. (a) Ki fruta importante kristiannan tin ku produsí? (b) Menshoná algun ehèmpel bíbliko di personanan di edat ku a produsí “e fruta di lepnan.”

⁴ Yehova ta ferwagt di kristiannan ku nan ta produsí “e fruta di lepnan,” esta, palabranan ku ta ekspresá alabansa na dje i na su propósito. (Hebreonan 13:15) Esaki ta apliká na abo komo un persona di mas edat? Sigur ku sí.

⁵ Den Beibel tin ehèmpel di personanan di edat ku sin miedu a duna testimonio di Yehova su nòmber i propósito. Moisés tabata riba “setenta aña” ora ku Yehova a nombr’é komo su profeta i representante. (Salmo 90:10; Eksodo 4:10-17) Edat avansá no a stroba profeta Daniel di duna testimonio tokante Yehova su soberania, i el a hasié sin miedu. Daniel probablemente tabatin 90’i piku aña ora ku Belsasar a manda yam’é pa interpretá e skirbimentu misterioso riba muraya. (Daniel, kapítulo 5) I kiko di apòstel Juan den su behes? Na final di su bida largu di sirbishi fiel, e tabata enkarselá riba e isla di Patmos “pa motibu di e palabra di Dios i e testimonio di Hesus.” (Revelashon 1:9) Muy probablemente bo ta kòrda hopi personahe bíbliko mas ku a produsí “e fruta di lepnan” den nan behes.—1 Samuel 8:1, 10; 12:2; 1 Reinan 14:4, 5; Lukas 1:7, 67-79; 2:22-32.

6. Kon Yehova a usa “ansianonan” pa profetisá den e último dianan aki?

⁶ Sitando e profeta hebreo Joel, apòstel Pedro a deklará: “‘Lo sosodé den e último dianan,’ Dios ta bisa, ‘ku lo mi basha di mi spiritu riba henter humanidat [inkluso riba hende di edat, e “ansianonan”]; . . . i nan lo profetisá.’” (Echonan 2:17, 18; Joel 2:28) Na armonia ku esei, den e último dianan aki Yehova a usa miembronan di edat di e ungínan i di e “otro karnénan” pa deklará su propósito. (Juan 10:16) Algun di nan ya pa vários dékada ta produsiendo fruta di Reino fielmente.

7. Duna un ehèmpel kon rumannan di edat por sigui produsí fruta di Reino apesar di limitashonnan físiko.

⁷ Tuma por ehèmpel Sonia, kende a bira un publikadó di Reino di tempu kompletu na aña 1941. Apesar di un lucha largu ku malesa króniko, el a kondusí studionan di Beibel ku regularidat na su kas. Sonia a splika: “Predikashon di e bon nobo ta parti di mi bida. De echo, esei ta mi bida. Mi ta nenga di bai ku penshon.” No muchu tempu pasá, Sonia ku su ruman muhé, Olive, a kompartí e mensahe di speransa ku tin den Beibel ku Janet. Janet tabata un pashènt ku un malesa terminal ku nan a topa den sala di espera na hospital. Mama di Janet, un katóliko deboto, a keda asina impreshoná ku e interes amoroso aki ku nan a mustra den su yu muhé, ku e mama a aseptá un studio di Beibel i awor e ta hasiendo ekselente progreso. Abo lo por probechá di oportunidatnan similar pa produsí fruta di Reino?

8. Kon Kalèb den su behes a demostrá konfiansa den Yehova, i kon kristiannan di edat por imitá su ehèmpel?

⁸ Dor di sigui persistí den e predikashon di Reino apesar di e limitashonnan di edat avansá, kristiannan di mas edat ta imitando ehèmpel di e fiel israelita Kalèb, ku pa 40 aña largu a kompañá Moisés den desierto. Kalèb tabatin 79 aña ora ku el a krusa Riu Hordan i  a drenta den e Tera Primintí. Despues di a lucha pa seis aña komo sòldá den e ehérsito viktorioso di Israel, lo e por a keda satisfecho ku su logronan i no hasi nada mas. Pero nò, ku kurashi el a pidi un asignashon difísil. Esta, pa kapturá e “statnan grandi i fortifiká” den e serunan di Huda, un área habitá pa e anakeonan, hòmbernan di tamaño ekstraordinario. Ku yudansa di Yehova, Kalèb a “kore ku nan manera SEÑOR a papia.” (Josué 14:9-14; 15:13, 14) Bo por tin sigur ku Yehova ta ku bo, meskos ku e tabata ku Kalèb, segun ku bo ta sigui produsí fruta di Reino den bo behes. I si bo keda fiel, lo e duna bo un lugá den su mundu nobo primintí.—Isaias 40:29-31; 2 Pedro 3:13.

“Nan Lo Ta Yen di Vigor i Bèrdè-Bèrdè”

9, 10. Kon kristiannan di mas edat por keda sano den fe i mantené nan vigor spiritual? (Wak e kuadro na página 13.)

⁹ Halando atenshon na e produktividat di Yehova su sirbidónan di edat avansá, e salmista a kanta: “E hende hustu lo floresé manera palma, e lo krese manera palu di seda na Líbano. Asta den nan behes nan lo duna fruta; nan lo ta yen di vigor i bèrdè-bèrdè.”—Salmo 92:12, 14.

¹⁰ Kon bo por mantené bo vigor spiritual apesar di edat avansá? E sekreto di e palma su beyesa kontinuo ta un fuente konstante di awa dushi. Di igual manera, abo por saka sosten for di e awanan di bèrdat bíbliko dor di studia e Palabra di Dios i dor di asosiá ku su organisashon. (Salmo 1:1-3; Jeremias 17:7, 8) Bo vitalidat spiritual ta hasi bo un rekurso balioso pa otro rumannan den fe. Ban wak kon esaki tabata e kaso ku Sumo Saserdote Joiada ora ku ya e tabata un hòmber di edat avansá.

11, 12. (a) Ki papel importante Joiada a hunga den e historia di e reino di Huda? (b) Kon Joiada a usa su influensia pa promové adorashon berdadero?

¹¹ Joiada tabatin probablemente mas ku shen aña ora ku Reina Atalía, un reina ambisioso, a tuma kontròl di Huda dor di asesiná su propio nietunan. Kiko e hòmber bieu Joiada por a hasi? Pa seis aña largu e ku su kasá a skonde Joas den e tèmpel. Joas tabata e úniko heredero real ku a sobrebibí. Anto ora Joas tabatin shete aña, Joiada a dal un paso dramátiko, i a proklam’é komo rei, i a laga ehekutá Atalía.—2 Krónikanan 22:10-12; 23:1-3, 15, 21.

¹² Komo tutor di e rei, Joiada a usa su influensia pa promové adorashon berdadero. El “a sera un aliansa entre su mes i henter e pueblo i rei, ku nan lo ta e pueblo di SEÑOR.” Riba òrdu di Joiada, e pueblo a basha e kas di e dios falsu Baal abou i a eliminá su altarnan, su imágennan i su saserdote. Tambe ta bou di guia di Joiada ku Joas a restorá e servisionan di tèmpel i a hasi e reparashonnan tan nesesario di e tèmpel. “Joas a hasi bon den bista di SEÑOR tur e dianan ku saserdote Joiada tabata instruyé.” (2 Krónikanan 23:11, 16-19; 24:11-14; 2 Reinan 12:2) Ora ku Joiada a muri na edat di 130 aña, el a haña e onor eksepshonal di ser derá huntu ku e reinan pasobra “el a hasi loke ta bon den Israel i na Dios i Su kas.”—2 Krónikanan 24:15, 16.

13. Kon kristiannan di edat por ‘hasi loke ta bon na Dios i su kas’?

¹³ Podisé problema ku salú i otro sirkunstansianan ta limitá loke bo por hasi pa promové adorashon berdadero. Asta si ta asina, bo tin chèns pa ‘hasi loke ta bon na Dios i su kas.’ Bo por desplegá selo pa Yehova su kas spiritual dor di asistí i partisipá na reunionnan di kongregashon i dor di sali den sirbishi di vèlt ki ora ku ta posibel. E echo ku bo ta aseptá konseho bíbliko di buena gana i ta duna fiel apoyo na “e esklabo fiel i prudente” i na e kongregashon, lo kontribuí na fortalesé e hermandat kristian. (Mateo 24:45-47) Tambe bo por stimulá rumannan den fe “pa stima i hasi bon obra.” (Hebreonan 10:24, 25; Filemon 8, 9) Anto lo bo ta un bendishon pa otro hende si bo aktua na armonia ku e siguiente konseho di apòstel Pablo:  “Hòmbernan di edat mester ta moderá, digno, huisioso, sano [“vigoroso,” An American Translation] den fe, den amor, den perseveransia. Di e mesun manera, muhénan di edat mester ta reverente den nan komportashon, no kalumniadó, ni sklabisá na biña, siñando loke ta bon.”—Tito 2:2-4.

14. Kiko superintendentenan kristian ku ta sirbi pa hopi aña por hasi pa promové adorashon berdadero?

¹⁴ Bo tin hopi aña ta sirbi komo ansiano di kongregashon? “E sabiduria ku bo a akumulá atraves di añanan us’é desinteresadamente,” ta e konseho di un ruman ku tin hopi aña komo ansiano di kongregashon. Tambe el a bisa: “Delegá responsabilidat, i kompartí bo eksperensia ku otro rumannan ku ta ansioso pa siña . . . Wak e potensial ku otro rumannan tin. Ekspandé i kultivá e potensial ei. Prepará pa futuro.” (Deuteronomio 3:27, 28) Bo interes sinsero den e trabou di prediká e Reino, un trabou ku ta kresiendo konstantemente, lo resultá den hopi bendishon pa otro rumannan den nos hermandat kristian.

‘Deklará Ku Yehova Ta Rekto’

15. Kon kristiannan di edat ta ‘deklará ku Yehova ta rekto’?

¹⁵ Dios su sirbidónan di edat ku goso ta kumpli ku nan responsabilidat di “deklará ku SEÑOR ta rekto.” Si bo ta un kristian di edat, bo palabra- i echonan por mustra otro hende ku Yehova ‘ta bo Baranka, i no tin inhustisia den dje.’ (Salmo 92:15) E palu di dader ta duna testimonio silensioso di e kualidatnan sobresaliente di su Kreadó. Pero Yehova a duna abo e privilegio di duna testimonio ku boka tokante dje na hende ku awor ta aseptá adorashon berdadero. (Deuteronomio 32:7; Salmo 71:17, 18; Joel 1:2, 3) Dikon esaki ta importante?

16. Ki ehèmpel bíbliko ta ilustrá e importansia di ‘deklará ku Yehova ta rekto’?

¹⁶ Ora ku e lider israelita Josué “tabata bieu i di edat avansá,” el “a manda yama henter Israel, nan ansianonan, nan kabesantenan, nan huesnan i nan ofisialnan,” i a rekordá nan di Dios su trato rekto. El a bisa: “Ni un palabra di tur e bon palabranan ku SEÑOR boso Dios a papia tokante di boso no a faya;  tur a keda kumplí pa boso.” (Josué 23:1, 2, 14) Pa un tempu, e palabranan aki a fortalesé e pueblo su determinashon pa keda fiel. Sin embargo, despues di Josué su morto, “a lanta un otro generashon . . . ku no tabata konosé SEÑOR, ni e obra ku el a hasi pa Israel. Anto e yunan di Israel a hasi maldat den bista di SEÑOR i a sirbi e Baalnan.”—Huesnan 2:8-11.

17. Kon Yehova a trata ku su pueblo den tempu moderno?

¹⁷ E integridat di e kongregashon kristian djawe no ta dependé di e testimonio oral di Dios su sirbidónan. Sin embargo, nos fe den Yehova i den su promesanan ta ser reforsá ora ku nos tende relatonan personal di e “gran obra” ku Yehova a hasi pa su pueblo den e último dianan aki. (Huesnan 2:7; 2 Pedro 1:16-19) Si bo tin hopi aña ta asosiá ku Yehova su organisashon, kisas bo ta kòrda tempu ku tabatin masha tiki proklamadó di Reino den bo region òf pais òf tempu ku e trabou di prediká tabata konfrontá vários problema. Ku tempu, bo a mira kon Yehova a eliminá sierto opstákulonan i a aselerá òf “pura” kresementu di e kantidat di publikadónan. (Isaias 54:17; 60:22) Tambe bo a mira kon bèrdatnan bíbliko a wòrdu klarifiká i bo tabata testigu di e refinamentunan progresivo di e parti visibel di Dios su organisashon. (Proverbionan 4:18; Isaias 60:17) Bo sa purba enkurashá otro rumannan dor di konta nan kon bo a eksperensiá Yehova su trato rekto? Esei por tin un efekto hopi positivo i fortalesedor riba e hermandat kristian!

18. (a) Duna un ehèmpel di e efekto riba término largu di ‘konta otro hende ku Yehova ta rekto.’ (b) Kon abo personalmente a eksperensiá Yehova su rektitut?

¹⁸ Kiko di e okashonnan ku bo a eksperensiá Yehova su kuido i guia amoroso den bo bida personal? (Salmo 37:25; Mateo 6:33; 1 Pedro 5:7) Un ruman muhé di edat ku yama Martha tabatin kustumber di enkurashá otro hende ku e palabranan: “Kiko ku pasa, nunka bandoná Yehova. Lo e sostené bo.” E konseho aki tabatin un efekto profundo riba Tolmina, un di Martha su studiantenan di Beibel ku a batisá na prinsipio di dékada di 1960. Tolmina a konta: “Ora ku mi kasá a muri, mi a sinti mi hopi desanimá, pero e palabranan ei a hasi mi desididu pa no falta ni un solo reunion. I Yehova realmente a fortalesé mi pa sigui padilanti.” Atraves di añanan Tolmina a duna e mesun konseho ei na hopi di su propio studiantenan di Beibel. Sí, dor di duna animashon i konta tokante Yehova su trato rekto, bo por kontribuí masha hopi na edifiká e fe di e rumannan.

 Yehova Ta Balorá Rumannan Fiel di Edat

19, 20. (a) Kon Yehova ta mira e aktividat di su sirbidónan di edat? (b) Kiko nos lo konsiderá den e siguiente artíkulo?

¹⁹ E mundu ingrato djawe, no ta tene masha konsiderashon ku hende di edat. (2 Timoteo 3:1, 2) Asta si nan kòrda mes riba hende di edat, hopi bes ta debí na nan logronan di pasado; pa loke nan tabata, en bes di pa loke nan ta. Na kontraste, Beibel ta bisa: “Dios no ta inhustu pa lubidá boso trabou i e amor ku boso a mustra pa su nòmber, dor ku boso a sirbi i ainda ta sirbi e santunan.” (Hebreonan 6:10) Klaru ku Yehova Dios ta kòrda bo registro di obranan fiel ku bo a hasi den pasado. Pero tambe e ta balorá bo pa loke bo ta sigui hasi den su sirbishi. Sí, Yehova ta mira rumannan fiel di edat komo kristiannan produktivo, spiritualmente sano i vigoroso, un testimonio bibu di su poder.—Filipensenan 4:13, NW.

²⁰ Abo ta mira e miembronan di mas edat di nos hermandat kristian manera Yehova ta mira nan? Si bo ta hasié, anto lo bo sinti bo motivá pa demostrá bo amor pa nan. (1 Juan 3:18) Den e siguiente artíkulo nos lo konsiderá algun manera práktiko pa demostrá tal amor dor di perkurá pa nan nesesidatnan.

[Nota]

Kiko Ta Bo Kontesta?

• Kon rumannan di edat ta “produsí fruta”?

• Dikon e vitalidat spiritual di kristiannan di edat ta un rekurso balioso?

• Kon esnan di edat por ‘deklará ku Yehova ta rekto’?

• Dikon Yehova ta balorá su sirbidónan ku tin hopi tempu ta sirbié?

[Preguntanan di Estudio]

[Kuadro na página 13]

Kon Nan A Keda Sano den Fe

Kiko a yuda kristiannan ku tin hopi tempu den e bèrdat, pa keda sano den fe i mantené nan vigor spiritual? At’akí loke algun di nan a bisa:

“Ta masha importante pa lesa tekstonan bíbliko ku ta enfoká riba nos relashon ku Yehova. Kasi tur anochi mi ta resitá Salmo 23 i 91.”—Olive, batisá na 1930.

“Mi tabata hasi sigur pa mi ta presente na tur diskurso di boutismo i pa mi skucha nan bon, komo si fuera ta mi propio boutismo. Manteniendo mi dedikashon fresku den mi mente tabata un paso importante ku a yuda mi keda fiel.”—Harry, batisá na 1946.

“Ta sumamente importante pa hasi orashon tur dia, pidiendo Yehova tur ora bai pa su yudansa, protekshon i bendishon, i ‘tumando nota di dje den tur nos kamindanan.’” (Proverbionan 3:5, 6)—Antônio, batisá na 1951.

“Ora mi skucha eksperensia di rumannan ku ainda ta sirbi Yehova fielmente despues di asina tantu aña, esei ta renobá mi determinashon pa keda fiel na dje.”—Joan, batisá na 1954.

“Ta importante pa nos no pensa muchu di nos mes. Tur loke nos tin ta debí na Dios su bondat inmeresí. Si nos tin e punto di bista aki, nos lo sigui buska den e direkshon korekto pa haña e alimento spiritual nesesario pa perseverá te na fin.”—Arlene, batisá na 1954.

[Plachi na página 11]

Rumannan di edat ta produsí fruta di Reino balioso

[Plachi na página 14]

E vitalidat spiritual di e rumannan di edat ta un rekurso balioso