Bendishoná Ta Esnan Ku Ta Duna Gloria na Dios
Bendishoná Ta Esnan Ku Ta Duna Gloria na Dios
“[Nan] lo bin adorá bo dilanti, o Señor, i nan lo glorifiká bo nòmber.”—Salmo 86:9.
1. Dikon nos por duna gloria na Dios den maneranan ku ta surpasá loke e kreashon sin bida por hasi?
YEHOVA ta meresé alabansa for di henter su kreashon. Miéntras ku e parti di su kreashon sin bida ta dun’é gloria silensiosamente, nos komo hende tin e kapasidat di rasoná, komprondé, apresiá i adorá. Pues anto, ta na nos e salmista ta bisa: “Grita di alegria na Dios, mundu henter; kanta e gloria di su nòmber; hasi su alabansa glorioso.”—Salmo 66:1, 2.
2. Ken a reakshoná faborabel riba e mandamentu pa duna gloria na Dios su nòmber, i dikon?
2 E mayor parti di humanidat ta nenga di rekonosé Dios òf dun’é gloria. Sin embargo, den 235 pais, mas ku seis mion Testigu di Yehova ta demostrá ku nan ta mira Dios su “atributonan invisibel” pa medio di e kosnan ku el a traha i ku nan ta ‘tende’ e testimonio silensioso di kreashon. (Romanonan 1:20; Salmo 19:2, 3) Tambe dor di studia Beibel, nan a bin konosé Yehova i stim’é. Salmo 86:9 i 10 a profetisá: “Tur nashon ku bo a traha lo bin adorá bo dilanti, o Señor, i nan lo glorifiká bo nòmber; pasobra bo ta grandi i ta hasi obranan maravioso; abo so ta Dios.”
3. Kon e “multitut grandi” ta ‘sirbi Dios di dia i anochi’?
3 Revelashon 7:9 i 15 tambe ta deskribí “un multitut grandi” di adoradó ku ta “sirbi [Dios] di dia i anochi den su tèmpel.” No ta asina ku Dios ta eksigí alabansa nònstòp for di su sirbidónan, pero mas bien su adoradónan ta un organisashon mundial. P’esei ora ta anochi den algun pais, Dios su sirbidónan na otro banda di mundu ta drùk bezig ta prediká. Pues por ser bisá ku di dia i anochi tin hende ta duna gloria na Yehova. Pronto “tur loke tin rosea” lo hisa nan bos den alabansa na Yehova. (Salmo 150:6) Pero miéntras tantu, kiko nos individualmente por hasi pa duna gloria na Dios? Ki retonan nos lo por konfrontá? I ki bendishon ta spera esnan ku duna gloria na Dios? Pa haña kontesta, laga nos konsiderá un relato bíbliko relashoná ku e tribu israelita di Gad.
Un Reto den Antigwedat
4. Ki reto e tribu di Gad a konfrontá?
4 Promé ku e miembronan di e tribu israelita di Gad a drenta e Tera Primintí nan a pidi pa establesé nan mes na e parti ost di Riu Hordan, ku tabata un tereno ku bon yerba pa krio di bestia. (Numbernan 32:1-5) Pero biba einan lo a nifiká ku nan lo a konfrontá retonan serio. E tribunan na wèst di e riu lo tabatin e protekshon di Vaye di Hordan, ku a forma un barera natural kontra invashon militar. (Josué 3:13-17) Sin embargo, pa loke ta e terenonan na ost di Riu Hordan, e buki The Historical Geography of the Holy Land (Geografia Históriko di e Tera Santu), skirbí pa George Adam Smith, ta bisa: “[E terenonan] tur tabata plat i ekstenso riba e gran plateau di Arabia, ku kasi ningun barera entremedio. Konsekuentemente, semper nan tabata eksponé na e invashon di e nomadonan hambrá, di kua algun grupo grandi tabata invadí nan tur aña pa haña yerba pa nan bestianan.”
5. Kon Jakòb a enkurashá e desendientenan di Gad pa reakshoná ora nan ta bou di atake?
5 Kon lo a bai ku e tribu di Gad bou di tal preshon implakabel? Siglonan mas promé, nan antepasado Jakòb a profetisá riba su kama di morto: “Pa loke ta Gad, bandidunan lo atak’é, ma e lo sali ataká nan hilchi.” (Génesis 49:19) Na promé bista e palabranan ei lo por parse pesimista. Pero en realidat, nan tabata un òrdu indirekto pa e gaditanan ataká bèk ora nan wòrdu ataká. Jakòb a sigurá nan ku si nan hasi esei, e invasornan lo a bati un retirada humiante, i ku e gaditanan lo a ataká nan hilchi, es desir, persiguí nan.
Retonan Ku Nos Adorashon Ta Konfrontá Awe
6, 7. Kon e situashon di kristiannan djawe ta similar na esun di e tribu di Gad?
6 Meskos ku e tribu di Gad, kristiannan djawe ta ser eksponé na e preshonnan i karganan di e sistema di Satanas; no tin un protekshon milagroso ku ta spar nos di lucha ku nan. (Jòb 1:10-12) Hopi di nos tin ku trata ku e preshon di bai skol, di gana nos pan di kada dia i di kria nos yunan. I no mester lubidá riba e preshonnan di un karakter personal òf interno. Tin ruman ta soportá “un sumpiña den karni” den forma di un desabilidat òf malesa grave. (2 Korintionan 12:7-10) Otro rumannan ta sufri di e sintimentu ku nan no ta bal nada. Kisas “e dianan malu” di behes ta stroba kristiannan di edat di sirbi Yehova ku e vigor ku un tempu nan tabatin.—Eklesiastés 12:1.
7 Tambe apòstel Pablo ta rekordá nos ku “nos lucha no ta kontra karni i sanger, sino . . . kontra e forsanan spiritual di maldat den e lugánan selestial.” (Efesionan 6:12) Konstantemente nos ta ser eksponé na “e spiritu di mundu,” e spiritu di rebelion i di korupshon moral ku Satanas i su demoñonan ta promové. (1 Korintionan 2:12; Efesionan 2:2, 3) Meskos ku e hòmber temeroso di Dios, Lòt, nos awe kisas ta sinti nos angustiá òf oprimí pa e kosnan inmoral ku e hendenan rònt di nos ta bisa i hasi. (2 Pedro 2:7) Tambe nos ta ser eksponé na atake direkto di Satanas. Satanas ta hibando un guera kontra e restu di e ungínan, ‘kendenan ta warda e mandamentunan di Dios i tin e trabou di duna testimonio di Hesukristu.’ (Revelashon 12:17) Hesus su “otro karnénan” tambe ta eksperensiá e atake di Satanas den forma di persekushon i prohibishon riba nos obra.—Juan 10:16.
Entregá òf Ataká Bèk?
8. Kon nos mester reakshoná riba e atakenan di Satanas, i dikon?
8 Kon nos mester reakshoná riba e atakenan di Satanas? Meskos ku e antiguo tribu di Gad, nos mester ta spiritualmente fuerte i ataká bèk na armonia ku e instrukshonnan di Dios. Lamentablemente, algun ruman a kuminsá entregá bou di e preshonnan di bida i ta neglishá nan responsabilidatnan spiritual. (Mateo 13:20-22) Un Testigu a bisa lo siguiente tokante pakiko asistensia na reunion den su kongregashon a baha: “E rumannan ta gewon kansá. Nan ta patapata di strès.” Ta bèrdat ku awendia hende tin hopi motibu pa ta kansá. P’esei ta fásil pa mira e adorashon di Dios komo un preshon mas, un obligashon pisá. Pero esei ta un punto di bista sano òf korekto?
9. Kon tuma Kristu su yugo riba nos ta hiba na sosiegu?
9 Konsiderá loke Hesus a bisa e multitutnan den su tempu, kendenan tambe tabata agotá dor di e preshonnan di bida: “Bin serka mi tur ku ta kansá i kargá, i lo mi duna boso sosiegu.” Akaso Hesus su deklarashon a indiká ku un hende lo a haña sosiegu dor di redusí su sirbishi na Dios? Al kontrario, Hesus a bisa: “Tuma mi yugo riba boso, i siña di mi, pasobra mi ta mansu i humilde di kurason; i boso lo haña sosiegu pa boso alma.” Un yugo ta un frame di palu òf di metal ku ta permití un hende òf un bestia karga un kos pisá. Ta ken lo ke aseptá un yugo asina? Nos no ta basta “kargá” kaba? Sí, pero un otro manera ku por tradusí e teksto griego ta: “Bin bou di mi yugo ku mi.” Djis pensa un ratu: Hesus ta ofresé pa yuda nos hala nos karga! Nos no tin ku hasié riba nos mes forsa.—Mateo 9:36; 11:28, 29; 2 Korintionan 4:7.
10. Nos esfuersonan pa duna gloria na Dios ta hiba na ki resultado?
10 Ora nos tuma e yugo ku Hesus ta ofresé nos pa ta su disipel, nos ta luchando kontra Satanas. Santiago 4:7 ta primintí: “Resistí Diabel i e lo hui for di boso.” Esaki no ke men ku ta fásil pa resistí Diabel. Sirbi Dios ta enserá basta esfuerso. (Lukas 13:24) Pero Beibel ta hasi e promesa aki na Salmo 126:5: “Esnan ku sembra ku awa na wowo lo kosechá ku gritu di alegria.” Sí, nos no ta adorá un Dios malagradesí. “E ta Esun ku ta rekompensá esnan ku ta busk’é,” i ta bendishoná esnan ku ta dun’é gloria.—Hebreonan 11:6.
Glorifikando Dios Komo Predikadó di Reino
11. Kon sirbishi di vèlt ta fungi komo un defensa kontra e atakenan di Satanas?
11 Hesus a manda: “Bai i hasi tur e nashonnan disipel di mi.” E trabou di prediká ta e manera prinsipal di ofresé Dios “un sakrifisio di alabansa.” (Mateo 28:19; Hebreonan 13:15) Un parti indispensabel di nos “armadura kompletu”—nos defensa kontra e atakenan di Satanas—ta di tin nos “pianan bistí ku e preparashon di e evangelio di pas.” (Efesionan 6:11-15) Alabá Dios den sirbishi di vèlt ta un manera ekselente pa nutri nos fe. (2 Korintionan 4:13) Tambe esei ta yuda kita nos mente for di pensamentunan negativo. (Filipensenan 4:8) Partisipashon den sirbishi di vèlt ta duna nos chèns di disfrutá di asosiashon edifikante ku nos rumannan den fe.
12, 13. Kon partisipashon regular den sirbishi di vèlt por benefisiá famianan? Duna un ehèmpel.
12 E trabou di prediká por ta ademas un aktividat sano di famia. Ta klaru ku mucha tin mester di rekreo balansá. Sin embargo, e tempu ku un famia ta pasa huntu den sirbishi di vèlt no mester ta un tempu laf i desagradabel. Mayornan por hasié mas dushi dor di entrená nan yunan pa ta efektivo den sirbishi. Muchanan sa gusta kosnan ku nan por hasi bon, no ta asina? Wèl, dor di ta balansá i no eksigí di e muchanan mas di loke nan por hasi, mayornan por yuda nan haña goso den sirbishi.—Génesis 33:13, 14.
13 Ademas, un famia ku ta alabá Dios huntu ta bira mas será ku otro. Tuma e ehèmpel di un ruman muhé, kende su kasa inkrédulo a bai lag’é ku sinku yu. E ruman muhé aki pues tabatin e reto di bai traha i perkurá materialmente pa su yunan. Akaso e tabata asina agotá ku el a ignorá e interesnan spiritual di su yunan? E ta konta: “Mi a studia e Beibel i publikashonnan bíbliko diligentemente i a purba apliká loke mi a lesa. Mi tabata bai reunion i den sirbishi di kas pa kas ku e muchanan riba un base regular. Kiko tabata e resultado di mi esfuerso? Tur sinku ta batisá.” Asina tambe un pleno partisipashon den sirbishi por yuda bo den bo esfuerso pa lanta bo yunan “den e disiplina i instrukshon di Señor.”—Efesionan 6:4.
14. (a) Kon hóbennan por duna gloria na Dios na skol? (b) Kiko por yuda hóbennan pa nan no tin “bèrgwensa di e evangelio”?
14 Hóbennan, si boso ta biba den un pais kaminda lei ta permití esei, boso ta duna gloria na Dios dor di duna testimonio na skol, òf boso ta laga miedu di hende stòp boso? (Proverbionan 29:25) Un hobensita Testigu di 13 aña di Puerto Rico a skirbi: “Nunka mi no a sinti bèrgwensa di prediká na skol pasobra mi sa ku esaki ta e bèrdat. Den klas, semper mi ta hisa man i konta kiko mi a siña for di Beibel. Ora mi no tin lès, mi ta bai den biblioteka di skol i lesa e buki Hovenan sa puntra.” * Yehova a bendishoná su esfuerso? E hobensita a konta: “Tin biaha e muchanan di mi klas ta hasi mi pregunta i asta nan sa pidi pa haña e buki.” Si abo no sa prediká na skol, podisé bo tin ku komprobá pa bo mes “kiko ta e bon i agradabel i perfekto boluntat di Dios” dor di hasi un studio personal diligente. (Romanonan 12:2) Unabes bo ta konvensí ku loke bo a siña ta e bèrdat, nunka lo bo no tin “bèrgwensa di e evangelio.”—Romanonan 1:16.
Un ‘Porta Habrí’ di Sirbishi
15, 16. Ki “porta hanchu i efikas” ku ta hiba na aktividat algun kristian a drenta, i den ki bendishon esei a resultá?
15 Apòstel Pablo a skirbi ku “un porta hanchu i efikas” ku ta hiba na aktividat a habri p’e. (1 Korintionan 16:9) Bo sirkunstansianan ta permití bo drenta un porta ku ta hiba na mas aktividat? Por ehèmpel, e sirbishi di pionero regular òf ousiliar ta enserá dediká 70 òf 50 ora pa luna na e trabou di prediká. Naturalmente, e otro rumannan ta apresiá e pioneronan pa nan sirbishi fiel. Pero e echo ku e pioneronan ta dediká mas tempu den sirbishi no ta laga nan sinti nan mes mas ku nan rumannan. Mas bien, nan ta kultivá e aktitut ku Hesus a enkurashá nos pa desplegá: “Nos ta esklabonan inútil; nos a hasi solamente loke nos mester a hasi.”—Lukas 17:10.
16 E sirbishi di pionero ta rekerí pa un hende tin disiplina propio, pa su kosnan ta organisá i pa e ta dispuesto pa hasi sakrifisio. Pero e bendishonnan ta bale la pena. Un pionero hóben ku yama Tamika a bisa: “Un berdadero bendishon ta e abilidat di por manehá e Palabra di Dios korektamente. Ora bo ta traha pionero, bo ta usa bo Beibel masha hopi. Awor, ora mi ta bai di kas pa kas, mi por kòrda tekstonan bíbliko ku ta pas pa kada doño di kas.” (2 Timoteo 2:15) Un pionero ku yama Mica a bisa: “Un otro bendishon asombroso ta di por mira kon e bèrdat ta influensiá bida di hende.” Un hóben ku yama Matthew tambe a papia di e goso di “mira un persona drenta den e bèrdat. No tin niun otro goso ku por remplasá esaki.”
17. Kon un kristian a superá sintimentunan negativo pa ku e sirbishi di pionero?
17 Abo lo por pensa pa drenta e porta di sirbishi di pionero? Podisé bo tin gana di hasié pero bo ta sinti ku bo no ta sufisientemente kapasitá. Un ruman muhé yòn ku yama Kenyatte a atmití: “Mi no tabata masha positivo pa ku e sirbishi di pionero. Mi no a sinti ku mi tabata kapasitá p’esei. Mi no tabata sa kon pa prepará introdukshon òf kon pa rasoná for di e Skritura.” Sin embargo, e ansianonan a asigná un ruman muhé pionero maduro pa traha ku Kenyatte. Anto segun Kenyatte: “Tabata masha dushi pa traha kuné. Esei a duna mi e deseo di traha pionero.” Ku un poko animashon i entrenamentu, kisas bo tambe lo ke traha pionero.
18. Ki bendishon esnan ku drenta sirbishi di misionero por risibí?
18 E trabou di pionero por habri porta pa otro privilegionan di sirbishi. Por ehèmpel, algun pareha kasá lo por kualifiká pa haña entrenamentu komo misionero pa bai prediká den eksterior. Misioneronan tin ku adaptá nan mes na un pais nobo, i podisé na un idioma nobo, un kultura nobo i kuminda nobo. Pero tal inkumbiniensianan no ta nada kompará ku e bendishonnan. Mildred, un misionero veterano na Mexico, a bisa: “Nunka mi no a lamentá mi desishon di bira misionero. Esei tabata mi deseo for di tempu ku mi tabata chikí.” Ki bendishonnan el a disfrutá di dje? “Den mi pais, tabata masha difísil pa haña studio di Beibel. Aki, tabatin biaha ku kuater studiante di mi a sali pareu pa promé bes den sirbishi di vèlt!”
19, 20. Kon hopi ruman den sirbishi di Bètel, sirbishi internashonal i Skol di Entrenamentu Ministerial a risibí bendishon?
19 Bendishonnan riku ta bini tambe pa esnan den sirbishi di Bètel na sukursalnan di Testigunan di Yehova. Sven, un ruman hòmber hóben ku ta sirbi na Alemania, a bisa di su trabou na Bètel: “Mi ta sinti ku mi ta hasiendo algu ku tin balor duradero. Lo mi por a usa mi abilidatnan den mundu. Pero lo tabata komo si fuera mi ta depositá mi plaka na un banko ku ta a punto di bati bankrut.” Ta bèrdat ku pa sirbi komo un boluntario ku no ta haña salario, ta enserá sakrifisio. Pero Sven a bisa: “Ora bo bai kas, bo sa ku tur loke bo a hasi e dia ei tabata pa Yehova. I esei ta laga bo sinti ‘super’ bon.”
20 Algun ruman a disfrutá di e bendishon di sirbishi internashonal, trahando riba konstrukshon di sukursal den paisnan den eksterior. Un pareha ku a sirbi den ocho asignashon den eksterior a skirbi: “E rumannan akinan ta maravioso. Lo ta doloroso ora nos tin ku bai. Ta di ocho biaha ku nos kurason ta wòrdu ‘kibrá.’ Pero ki un eksperensia fantástiko nos tabatin!” Anto tambe tin e Skol di Entrenamentu Ministerial. E ta ofresé entrenamentu spiritual na ruman hòmbernan soltero kualifiká. Un graduado a skirbi: “Mi no por haña palabra pa gradisí boso pa un skol asina maravioso. Ta ki otro organisashon lo a hasi asina tantu esfuerso pa duna entrenamentu?”
21. Ki reto tur kristian ta konfrontá den nan sirbishi na Dios?
21 Sí, tin hopi porta habrí ku ta hiba na aktividat. Ta sierto ku hopi di nos no por sirbi na Bètel òf den eksterior. Hesus mes a rekonosé ku kristiannan lo a produsí “fruta” na diferente kantidat debí na diferente sirkunstansia. (Mateo 13:23) Nos reto komo kristian ta anto pa saka lo mihó di nos situashon, es desir, sòru pa nos tin e partisipashon mas pleno posibel den Yehova su sirbishi segun nos sirkunstansianan ta permití. Ora nos ta hasi esei, nos ta dunando gloria na Yehova, i nos por tin sigur ku e ta keda hopi kontentu. Tuma e ehèmpel di Ethel, un ruman di edat ku ta den un kas di kuido. Regularmente e ta duna testimonio na e otro habitantenan di e kas di kuido i ta partisipá den predikashon via telefon. Apesar di su limitashonnan, e ta hasi su sirbishi di henter alma.—Mateo 22:37.
22. (a) Kua maneranan mas nos por duna gloria na Dios? (b) Ki tempu maravioso ta spera nos?
22 Pero kòrda ku e predikashon ta simplemente un di e maneranan den kua nos ta duna gloria na Yehova. Nos kondukta i aparensia ehemplar ora nos ta na trabou, na skol i na kas, ta hasi Yehova su kurason kontentu. (Proverbionan 27:11) Proverbionan 28:20 ta primintí: “Un hende fiel lo ta yen di bendishon.” P’esei nos mester “sembra generosamente” den nos sirbishi na Dios, sabiendo ku nos lo kosechá bendishon na abundansia. (2 Korintionan 9:6) Si nos hasi esei, nos lo tin e privilegio di ta na bida durante e tempu maravioso ora ku “tur loke tin rosea” lo duna gloria na Yehova, e gloria tan meresí!—Salmo 150:6.
[Nota]
^ par. 14 E buki Loke hovenan sa puntra—Contesta práctica ta ser publiká dor di Testigunan di Yehova.
Bo Ta Kòrda?
• Kon e pueblo di Dios ta sirbi Yehova “di dia i anochi”?
• Ki reto e tribu di Gad a konfrontá, i kiko esei ta siña kristiannan awe?
• Kon sirbishi di vèlt ta fungi komo un protekshon kontra e atakenan di Satanas?
• Kua ‘porta habrí’ algun ruman a drenta, i ki bendishon nan a disfrutá di dje?
[Preguntanan di Estudio]
[Plachi na página 15]
Meskos ku e gaditanan a lucha kontra bandidunan, asina kristiannan tin ku lucha kontra e atakenan di Satanas
[Plachi na página 17]
Nos ta disfrutá di asosiashon edifikante den sirbishi di vèlt
[Plachinan na página 18]
E trabou di pionero por habri porta pa otro privilegionan di sirbishi, entre otro:
1. Sirbishi internashonal
2. Sirbishi di Bètel
3. Sirbishi di misionero