Bo Sirkunstansianan Ta Kontrolá Bo Bida?

SIRKUNSTANSIANAN angustioso i problema ta komun den e “tempunan trabahoso” aki. (2 Timoteo 3:1) Algun problema kisas ta temporal i pues ku tempu nan ta pasa bai. Otro problemanan ta persistí pa lunanan òf asta añanan largu. Komo resultado, hopi hende ta sinti manera e salmista David, kende a sklama na Yehova: “E angustianan di mi kurason ta oumentá; saka mi for di mi anshanan.”—Salmo 25:17.

Abo ta luchando ku problemanan aplastante? Si ta asina, bo por haña yudansa i animashon den Beibel. Laga nos konsiderá bida di dos fiel sirbidó di Yehova kendenan tabatin éksito den trata ku difikultat: Hosé i David. Dor di analisá kon nan a reakshoná den situashonnan difísil, nos por siña lèsnan práktiko ku lo yuda nos trata ku retonan similar awe.

Konfrontá ku Difikultatnan Serio

Pa ora Hosé tabatin 17 aña, e tabatin un problema serio den su propio famia. Su ruman hòmbernan grandi a mira ku Jakòb, nan tata, “tabata stima [Hosé] mas ku tur su otro ruman hòmbernan.” Konsekuentemente, “nan a odi’é i no por a papia kuné ku kariño.” (Génesis 37:4) Nos por imaginá e ansha i tenshon ku e situashon aki a kousa Hosé. Ku tempu, e odio di e rumannan di Hosé a bira asina intenso ku nan a bend’é komo katibu.—Génesis 37:26-33.

Komo katibu den Egipto, Hosé tabatin ku resistí e proposishonnan inmoral di esposa di su shon. Rabiá pasobra Hosé a rechas’é, e muhé a akusá Hosé falsamente di a purba viol’é. Nan a kohe Hosé “ser’é den prizon,” kaminda “nan a lastimá su pianan ku bui, i su nèk nan a sera den heru.” (Génesis 39:7-20; Salmo 105:17, 18) Esta difísil esaki lo mester tabata p’e! Pa mas o ménos 13 aña, Hosé tabata sea katibu òf prezu debí na inhustisia ku el a sufri na man di otro hende, inkluso miembronan di su propio famia.—Génesis 37:2; 41:46.

 David di antiguo Israel tambe a konfrontá prueba tempu e tabata yòn. Pa vários aña el a hañ’é obligá ta biba komo fugitivo, persiguí manera un bestia dor di Rei Saul. David su bida tabata konstantemente den peliger. Na un okashon, el a bai serka Ahimelek e saserdote pa buska kuminda. (1 Samuel 21:1-7) Ora Saul a haña sa ku Ahimelek a yuda David, el a ordená pa ehekutá no solamente Ahimelek sino tambe tur e saserdotenan i nan famia. (1 Samuel 22:12-19) Bo por imaginá e doló ku David lo mester a sinti komo ku indirektamente el a kousa e tragedia aki?

Pensa riba e añanan di difikultat i maltrato ku Hosé i David a soportá. Nos por siña lèsnan balioso dor di analisá kon nan a manehá nan situashonnan difísil. Laga nos konsiderá tres manera ku e hòmbernan aki ta digno di imitashon.

Stòp di Karga Renkor i Amargura

Na promé lugá, e hòmbernan fiel aki a nenga di kai den e trampa di amargura i renkor. Miéntras ku Hosé tabata den prizon, fásilmente lo e por a sinta pensa ku amargura riba e manera ku su rumannan a traishon’é, kisas planiando kon lo e tuma vengansa riba nan si un dia e bolbe mira nan. Pero kon nos por sa ku Hosé a resistí tal manera di pensa destruktivo? Wak kon el a reakshoná ora ku el a haña chèns di tuma vengansa riba su rumannan ku a bin Egipto pa kumpra grano. E relato ta bisa: “Hosé a kita bai for di [su rumannan] i a yora. . . . E ora ei Hosé a duna òrdu pa yena nan saku ku maishi i pa pone kada un su plaka bèk den su saku, i pa duna nan provishon pa na kaminda.” Despues, ora ku Hosé a manda su rumannan bai buska nan tata pa tres’é Egipto, el a animá nan ku e palabranan: “No pleita na kaminda.” Ku palabra i akshon, Hosé a duna prueba ku e no a laga amargura i renkor venená su bida.—Génesis 42:24, 25; 45:24.

Di igual manera, David tampoko no a karga renkor kontra Rei Saul. Na dos okashon David a haña oportunidat pa mata Saul. Sin embargo, ora ku David su hòmbernan a enkurash’é pa hasi esei, el a bisa: “Ku esaki sea leu di mi di hasi un kos asin’aki ku mi señor, [Yehova] su ungí, di lanta mi man kontra dje, siendo ku e ta [Yehova] su ungí.” David a laga e asuntu den man di Yehova, i a bisa su hòmbernan: “Manera SEÑOR ta biba, siguramente SEÑOR lo dal é, òf su dia di muri lo yega, òf e lo bai den bataya i peresé.” Mas despues, David a asta komponé un kantika di lamento pa yora e morto di Saul i di Saul su yu hòmber Jonatan. Meskos ku Hosé, David no a laga renkor apsorb’é.—1 Samuel 24:3-6; 26:7-13; 2 Samuel 1:17-27.

 Nos ta karga renkor i amargura ora ku algun inhustisia kousa nos doló? Esaki por sosodé fásilmente. Si nos permití nos emoshonnan dominá nos, e resultado por ta mas dañino pa nos ku e inhustisia mes. (Efesionan 4:26, 27) Ounke kisas nos no tin masha kontròl riba loke otro hende ta hasi, nos reakshon sí nos por kontrolá. Ta mas fásil pa legumai renkor i amargura ora ku nos tin fe ku Yehova lo atendé e asuntu na su debido tempu.—Romanonan 12:17-19.

Saka Lo Mihó for di Bo Situashon

E di dos lès ku nos por siña ta pa no laga nos sirkunstansianan paralisá nos bida. Nos por bira asina preokupá pa loke nos no por hasi, ku nos ta pèrdè for di bista loke sí nos por hasi. De echo, nos sirkunstansianan ta kuminsá kontrolá nos. Esaki lo por a pasa ku Hosé. Pero na lugá di esei, Hosé a skohe pa saka lo mihó for di su situashon. Miéntras ku Hosé tabata sirbi komo katibu pa Potifar, el “a haña grasia den [Potifar] su bista i a bira su sirbidó personal; i el a hasié mayordomo di su kas, i tur loke ku e tabatin el a pone na su enkargo.” Den prizon tambe Hosé tabatin mesun aktitut. Debí na Yehova su bendishon i Hosé su aktitut diligente, “e hefe di prizon a pone tur e prezunan ku tabata den prizon bou di enkargo di Hosé, asina ku e tabata responsabel pa tur loke tabata pasa ayanan.”—Génesis 39:4, 21-23.

Durante e añanan ku David a biba komo fugitivo, e tambe a saka lo mihó for di su sirkunstansia. Miéntras e tabata biba den e desierto di Paran, e ku su hòmbernan a protehá e tou di Nabal kontra bandidu. Un di Nabal su wardadónan di karné a bisa: “Nan tabata un muraya pa nos di dia i anochi.” (1 Samuel 25:16) Mas despues, durante su estadia na Ziklag, David a invadí statnan ku tabata den poder di enemigunan di Israel den zùit, i asina a tuma poseshon di e fronteranan di Huda.—1 Samuel 27:8; 1 Krónikanan 12:20-22.

Kisas den nos kaso, nos lo tin ku hasi mas esfuerso pa saka lo mihó for di nos sirkunstansia? Ounke esei podisé ta un reto, nos por tin éksito. Ora apòstel Pablo tabata reflekshoná riba su bida, el a skirbi: “Mi a siña di ta kontentu den ki sirkunstansia ku mi haña mi aden. . . . Den kualke i den tur sirkunstansia mi a siña e sekreto di ta barika yen i di pasa hamber, tantu di tin abundansia komo di pasa nesesidat.” Kon Pablo a logra kultivá e aktitut aki pa ku bida? Dor di dependé kontinuamente riba Yehova. El a rekonosé: “Tur kos mi por den [“Esun,” NW], kende ta duna mi fortalesa.”—Filipensenan 4:11-13.

Spera Riba Yehova

E di tres lès ta ku nos mester spera riba Yehova, en bes di usa medionan ku no ta kuadra ku Beibel pa kambia nos sirkunstansia. Disipel Santiago a skirbi: “Laga perseveransia tin su resultado perfekto, pa boso por ta perfekto i kompletu, sin falta di nada.” (Santiago 1:4) Nos mester laga perseveransia “tin su resultado perfekto” òf kompletu, dor di permití un prueba sigui su rumbo sin rekurí na medionan ku no ta kuadra ku Beibel pa pone un fin rápido na dje. E ora ei nos fe lo ser di tèst i refiná, i esei lo revelá su poder di sostené nos. Hosé i David tabatin e tipo di perseveransia aki. Nan no a purba bin ku un solushon ku lo por a hasi Yehova malkontentu. Al kontrario, nan a traha pa saka lo mihó for di nan situashon. Nan a spera riba Yehova, i a risibí bendishonnan grandi dor di a hasi esei. Yehova a usa nan tur dos pa libra i dirigí su pueblo.—Génesis 41:39-41; 45:5; 2 Samuel 5:4, 5.

Kisas nos tambe ta konfrontá situashonnan pa kua nos lo por sinti e tentashon pa buska solushonnan ku no ta kuadra ku Beibel. Por ehèmpel, bo ta sinti bo desanimá pasobra ainda bo no a haña un bon kasá? Si ta asina, evitá kualke tentashon pa desobedesé  Yehova su mandamentu di kasa “basta ta den Señor.” (1 Korintionan 7:39) Bo tin problema den bo matrimonio? En bes di entregá na e spiritu di mundu ku ta promové separashon i divorsio, hasi esfuerso pa resolvé e difikultatnan huntu. (Malakias 2:16; Efesionan 5:21-33) Bo tin problema pa perkurá pa bo famia debí na bo situashon ekonómiko? Spera riba Yehova ta enserá ku bo ta evitá aktividatnan kuestionabel òf ilegal den bo intento pa haña plaka. (Salmo 37:25; Hebreonan 13:18) Sí, nos tur tin ku traha duru pa saka lo mihó for di nos sirkunstansia i hasi esfuerso pa duna Yehova algu ku e por bendishoná. Segun ku nos ta hasi esei, laga nos ta desididu pa spera riba Yehova pa trese e solushon perfekto.—Mikeas 7:7.

Yehova Lo Sostené Bo

Meditando riba kon personahenan bíbliko manera Hosé i David a trata ku desepshon i situashonnan difísil ku éksito por tin un efekto positivo riba nos. Ounke Beibel ta relatá nan historia den simplemente un par di página, nan pruebanan a dura hopi aña. Puntra bo mes: ‘Kon e sirbidónan ei di Dios a siña aseptá nan sirkunstansia? Kon nan a mantené nan goso? Ki kualidatnan nan a desaroyá?’

Tambe ta bon pa nos konsiderá e perseveransia di sirbidónan di Yehova den nos tempu. (1 Pedro 5:9) Tur aña ta sali hopi historia di bida den e revistanan Toren di Vigilansia i Spièrta! Bo ta lesa nan i meditá riba e ehèmpel di e kristiannan fiel aki? Ademas, den nos kongregashonnan tin ruman ku fielmente ta soportá sirkunstansia desagradabel. Bo ta asosiá regularmente ku nan i siña for di nan na reunionnan di kongregashon?—Hebreonan 10:24, 25.

Ora bo ta konfrontá sirkunstansianan difísil, bo por tin sigur ku Yehova ta interesá den bo i lo sostené bo. (1 Pedro 5:6-10) Hasi esfuerso pa no laga bo sirkunstansia kontrolá bo bida. Sigui e ehèmpel di Hosé, David i otro rumannan dor di legumai renkor, saka lo mihó for di bo situashon i spera riba Yehova pa e solushon perfekto. Hala serka Yehova pa medio di orashon i aktividatnan spiritual. Den e manera aki, bo tambe lo mira ku bo por tin goso i felisidat asta den tempu difísil.—Salmo 34:8.

[Plachi na página 20, 21]

Hosé a hasi esfuerso pa saka lo mihó for di su sirkunstansia

[Plachi na página 23]

David a spera riba Yehova pa haña solushon pa su problemanan