Hasiendo Loke Ta Bon den Tempu di Nesesidat

“LAGA nos hasi bon na tur hende, i spesialmente na esnan ku ta di e famia di fe,” apòstel Pablo a urgi. (Galationan 6:10) Rònt mundu, Testigunan di Yehova ta hasi esfuerso diligentemente pa apliká e prinsipio ei den nan bida dor di hasi bon na tur hende, spesialmente na nan rumannan den fe. Nos ta mira esaki bes tras bes den tempu di nesesidat. Laga nos konsiderá algun ehèmpel resien for di tres pais.

Na desèmber 2002, un tifon poderoso a suta Guam ku bientunan di mas ku 300 kilometer pa ora. Hopi kas a sufri daño, i algun di nan a keda kompletamente destruí. Rápidamente kongregashonnan lokal a organisá grupo di limpiesa pa yuda e famianan Testigu ku a ser afektá mas severamente. E sukursal di Guam a suministrá material i trahadó pa drecha kasnan ku a sufri daño, i e sukursal di Hawai tambe a duna sosten. Denter di algun siman, un tim di karpinté a yega for di Hawai pa yuda ku e trabou di rekonstrukshon, i algun ruman lokal a tuma fakansi di nan trabou pa yuda nan. E spiritu di koperashon gososo tabata un testimonio pa tur hende den e komunidat.

Den un bario di e stat Mandalay, na Myanmar, a surgi un kandela no muchu leu for di un Salòn di Reino. Pegá ku e kandela tabatin kas di un ruman muhé inaktivo i su famia. Bientu tabata supla den direkshon di su kas, p’esei el a kore bai na e salòn pa pidi yudansa. Na e momentu ei nan tabata renobando e salòn, pues tabatin hopi ruman hòmber presente. Nan a keda sorprendí di topa e ruman muhé pasobra nan no tabata sa mes ku e ta biba eibanda. Rápidamente, e rumannan a yuda saka e pertinensianan di e famia i hiba nan na un lugá safe. Ora ku e esposo, ku no ta Testigu, a tende di e kandela, el a kore bin kas i a topa e rumannan ta perkurando pa su famia. El a keda impreshoná i gradisidu, pero tambe aliviá pasobra hopi bes sakeadónan ta probechá di situashonnan asina. E manera aki ku e rumannan a manifestá bondat a motivá e ruman muhé i su yu hòmber pa bolbe kuminsá asosiá ku e kongregashon kristian, i awor nan ta asistí na tur reunion.

Durante e aña di sirbishi ku a pasa, hopi hende na Mozambique tabata bai konfrontá hamber debí na sekura i kosechanan ku a bai pèrdí. E sukursal lokal di Testigunan di Yehova a reakshoná rápidamente dor di perkurá kuminda pa esnan den nesesidat. Nan tabata parti kuminda na Salònnan di Reino, tin biaha  despues di reunion di kongregashon. Un ruman muhé ku ta un mayor soltero a bisa: “Mi a bin reunion tur deprimí, pasobra mi no tabata sa kiko lo mi a duna mi yunan pa kome ora nos bai kas.” E yudansa amoroso ku e rumannan a perkurá a lanta su ánimo mesora. El a bisa: “Tabata manera mi a resusitá!”

Tambe e Testigunan ta “hasi bon” den un manera spiritual dor di kompartí Beibel su mensahe di konsuelo i speransa ku otro hende. Nan ta kere meskos ku e hòmber sabí di pasado: “Ma esun ku skucha [sabiduria divino] lo biba konfiadamente, i lo biba trankil, sin miedu di maldat.”—Proverbionan 1:33.

[Plachinan na página 31]

1, 2. Partimentu di kuminda na esnan den nesesidat na Mozambique

3, 4. E tifon na Guam a destruí hopi kas

[Rekonosementu]

Mucha, banda robes: Andrea Booher/FEMA News Photo; señora, ariba: AP Photo/Pacific Daily News, Masako Watanabe