Pregunta di Lektor

Dikon David, un fiel sirbidó di Yehova, a permití pa su kasá Mikal tin un ídolo òf imágen [“di terafin,” NW; “di e dios di kas,” BPK], manera 1 Samuel 19:12 i 13 ta indiká?

Promé, laga nos konsiderá brevemente e konteksto. Ora ku e kasá di David a tende di e kòmplòt di Rei Saul pa mata David, el a aktua mesora. Beibel ta bisa: “Mikal a laga David baha dor di un bentana; i el a hui i a skapa. I Mikal a kohe e imágen [ku nan a yama terafin i ku aparentemente tabatin e tamaño i forma di un hende] pon’é riba e kama, i a pone un klechi di lana di kabritu na kabes di e kama i a habri un paña riba dje.” Ora e mensaheronan di Saul a bin pa kohe David, Mikal a bisa nan: “E ta malu.” E táktika aki a duna David èkstra tempu, i el a logra skapa.—1 Samuel 19:11-16.

Deskubrimentunan arkeológiko ta indiká ku posiblemente den tempu di antigwedat, hende tabatin e imágennan di terafin no solamente pa uso religioso sino tambe pa propósitonan legal. Meskos ku awe ta akta di propiedat i tèstamènt ta determiná ken tin derecho riba herensia, den pasado e imágennan di terafin tabatin e funshon ei. Evidentemente, den sierto sirkunstansia poseshon di e terafin por a duna un yerno e derecho di heredá e propiedat di su defuntu suegro. Esaki kisas ta splika dikon, na un okashon mas promé, Raquel a kue e imágennan di terafin di su tata i dikon e tata tabata asina anshá pa haña nan bèk. Den e kaso ei, Jakòb, kasá di Raquel, no tabata sa ku Raquel a kue e imágennan.—Génesis 31:14-34.

Ora e israelitanan a bira un nashon, nan a haña e Dies Mandamentunan, i e di dos mandamentu spesífikamente a prohibí pa traha imágen òf ídolo. (Eksodo 20:4, 5) Despues, profeta Samuel a referí indirektamente na e lei aki ora el a papia ku Rei Saul. El a bisa: “Rebeldia ta manera e piká di bruheria, i kapricho ta manera inikidat i idolatria [òf, “terafin,” NW].” (1 Samuel 15:23) Pa e motibu aki, no ta probabel ku terafin a sirbi p’e propósito di herensia den Israel. No opstante, ta parse ku e forma antiguo aki di superstishon hudiu a sigui eksistí den algun famia israelita. (Huesnan 17:5, 6; 2 Reinan 23:24) E echo ku Mikal tabatin un imágen di terafin den su poseshon ta indiká ku posiblemente su kurason no tabata kompletu pa ku Yehova. Podisé David no tabata sa tokante e imágen di terafin òf el a permitié pasobra Mikal tabata yu muhé di Rei Saul.

Pero David su punto di bista di rindi deboshon eksklusivo na Yehova ta ser ekspresá den e palabranan: “[Yehova] ta grandi i digno di supremo alabansa; tambe mester tin temor di dje mas ku di tur dios. Pasobra tur e diosnan di e pueblonan ta ídolo, ma SEÑOR a traha e shelunan.”—1 Krónikanan 16:25, 26.

[Plachi na página 29]

E di dos mandamentu di e Dies Mandamentunan a prohibí pa traha imágen, manera e terafin aki

[Rekonosementu]

For di e buki The Holy Land, Vol. II, 1859