E Herensia di Mas Balioso Ku Ta Eksistí

ORA e biehitu apòstel Juan tabata den su último añanan di bida, el a skirbi: “No tin goso mas grandi pa mi ku di tende ku mi yunan ta kana den e bèrdat.”—3 Juan 4.

E apòstel fiel aki tabata referí na su yunan den e sentido spiritual. Sin embargo, hopi mayor por bisa e mesun kos di nan yunan. Nan a hasi hopi esfuerso pa lanta nan yunan “den e disiplina i instrukshon di Señor” i awor nan ta kontentu pa mira nan yunan grandi kaba sigui “kana den e bèrdat.” (Efesionan 6:4) De echo, siña bo yunan e kaminda pa bida eterno ta nifiká duna nan e herensia di mas balioso ku ta eksistí. Esei ta pa motibu ku deboshon na Dios, ku ta enserá entre otro biba manera Yehova ke pa un kristian biba, “ta kontené promesa pa e bida presente i pa esun ku ta bin.”—1 Timoteo 4:8.

E Tata perfekto Yehova, tin masha hopi apresio pa mayornan deboto ku ta hasi tur nan esfuerso pa eduká na yunan spiritualmente. Ora e yunan ta reakshoná faborablemente, nan lo haña hopi goso den e kaminda di e bèrdat huntu ku nan mayornan. Segun ku yunan asina ta madurá, nan lo keda ku dushi rekuerdo di e momentunan huntu ei. Tin di nan ta kòrda yen di alegria e promé bes ku nan a partisipá den e Skol di Ministerio Teokrátiko. * Òf kisas nan ta kòrda e promé bes ku nan por a lesa un teksto bíbliko den nan trabou di prediká di kas pa kas, den kompania di un di nan mayornan. Kon nan por lubidá e momentunan ku nan mayornan tabata lesa for di Mi buki di relato bíblico òf for di Scuchando e Gran Maestro? * Gabriel ta kòrda algu ku e tabata gusta masha hopi: “Tempu ku mi tabatin kuater aña so, tur dia miéntras ku mi mama tabata kushiná, e tabata kanta pa mi. Ainda mi ta kòrda ku sintimentunan profundo un sierto kantika di Reino. Mas despues, e kantika aki a yuda mi mira e importansia di sirbi Yehova.” Podisé abo tambe ta kòrda e kantika bunita ku Gabriel ta referí na dje. E ta kantika 157 den e buki di kantika Canta Alabanza na Jehova, i e ta titulá “Adorá Yehova den Bo Hubentut.”

E kantika ta kuminsá: “Boka di mucha Dios a konmové;/Kristu a haña elogio fo’i dje.” Sí, tin mucha ku tabatin e privilegio di asosiá ku Hesus, i no kabe duda ku el a keda enkantá ku  nan manera refreskante i onesto. Dor ku mucha ta kla pa siña, Hesus a asta usa nan komo un ehèmpel pa su siguidónan imitá. (Mateo 18:3, 4) Kier men anto ku mucha tin nan debido lugá den e adorashon di Yehova. De echo, e palabranan di e kantika ta sigui bisa: “Sí, asta mucha por rindi onor, halsa Yehova uní ku mayor.”

Mediante nan bon kondukta, na kas, na skol i na otro lugánan, hopi mucha a trese onor pa Dios i pa nan famia. Esta un bendishon ku nan tin “tata i mama ku stima e bèrdat.” (Deuteronomio 6:7) Mayornan deboto ta hasi loke Dios ta bisa i siendo ku e ta un Tata amoroso, e ta siña su kriaturanan pa kana den e kaminda ku nan mester kana. Anto ki un bendishon nan ta haña! Si nan na nan turno siña nan yunan, esta felis nan lo ta di tin yunan ku ta “alegrá nan i skucha nan bos”! (Isaias 48:17, 18) Angélica, kende aktualmente ta sirbi na e ofisina di sukursal di Testigunan di Yehova na Mexico, ta bisa: “Mi mayornan semper a hasi esfuerso pa apliká prinsipionan bíbliko. Esei a hasi mi infansia masha plasentero. Mi tabata felis.”

Kristiannan asina ta di akuerdo ku ta bale la pena pa kuida bo herensia spiritual bon. Kisas bo ta un hóben ku ta lantando den un famia ku berdadero normanan kristian. Si ta asina, e mesun kantika aki ta animá bo: “Hóben kristian keda limpi i moral.” Lo yega e momentu ku bo mes tin ku tuma bo propio desishonnan, pues awor “siña di mucha cu Dios ta vital./Nenga anhelo pa ser popular.”

Si bo kometé e ekibokashon di pone popularidat na promé lugá den bo bida, henter e edukashon ku bo a haña lo por resultá di ta pòrnada i lo bo por pèrdè loke ta warda bo den futuro. E deseo pa bira popular por pone ku bo no ta keda vigilá. Komo resultado algun hóben a kuminsá asosiá ku otro hóbennan ku aparentemente tabata parse inofensivo, asta ku bon manera i un aparensia atraktivo, pero ku no tin ningun interes den normanan kristian. Esei a wòrdu ilustrá den e kaso di Tara, kende a hunga un di e ròlnan prinsipal den e vidio Hóbennan Sa Puntra—Kon Mi Por Haña Berdadero Amigu? Meskos ku Tara, kualke hóben kristian ku asosiá ku personanan ku no ta balorá adorashon berdadero lo deskubrí tardi òf trempan ku “no tin bienestar” ku mal amigu, manera e kantika ta bisa. Ta dura añanan largu di esfuerso pa desaroyá bon kustumbernan, pero den un ratu di ora nan por bai pèrdí.

Sin duda, no ta fásil pa hiba un bida ku ta reflehá temor pa Dios. Pero, manera e kantika ta sigui bisa, si un hóben“den hubentut hasi  Su boluntat./I sirbi Dios ku spiritu i bèrdat,” lo e traha un fundeshi sólido pa berdadero éksito. I “goso ta krese pareu ku edat.” Lo bo realisá mas ainda ku bou di Yehova su kuido amoroso, nada por stroba bo di hasi loke ta bon den su bista. Esei ta e manera pa bira un adulto madurá i ku tin temor di Dios. Ademas, dor di saka probecho sabiamente di edukashon kristian ku bo ta risibí, bo ta haña e oportunidat pa “duna Dios felisidat.” Kua otro privilegio mas grandi un hende lo por tin?—Proverbionan 27:11.

P’esei, hóbennan, nunka lubidá kon balioso e edukashon di Yehova i di bo mayornan kristian ta. Ta di spera ku nan gran amor lo konmové bo pa hasi loke ta bon den Yehova su bista. E ora ei, meskos ku Hesukristu i e hóben fiel Timoteo, lo bo alegrá bo Tata selestial i bo mayornan aki riba tera. I si un dia abo mes bira un mayor, probablemente lo bo bai di akuerdo ku Angélica (menshoná anteriormente) ku a bisa: “Si un dia mi haña un yu, lo mi hasi mi máksimo esfuerso pa for di infansia inkulká amor pa Yehova den su kurason, pa esei ta e kos di mas importante den su bida.” No tin ningun duda ku e kaminda rekto ku ta hiba na bida eterno ta e herensia di mas balioso ku ta eksistí!

[Nota]