E Reto di Eduká Yu Awe

ANOCHI lat, doño di un restorant ta preparando pa sera su negoshi p’e bai kas. Nèt e ora ei dos señora huntu ku un mucha ta drenta i ta pidi un kuminda. E doño ta haña gana di bisa nan ku e restorant ta será ya ku e ta hopi kansá, pero e ta disidí di sirbi nan numa. Miéntras ku e dos señoranan ta papia ku otro i ta kome, e mucha ta kore rònt den e restorant i ta laga buskuchi kai riba flur i ta plècha nan. En bes di stòp e, e mama ta hari. Finalmente ora e klientenan bai, e doño ku ta morto kansá tin ku limpia e desaster ku e mucha a laga atras.

Manera lo bo sa, e kaso aki ta mustra ku den hopi famia kriamentu di yu ta laga hopi di deseá. E motibunan ta varia. Tin algun mayor ta laga nan yunan hasi i deshasí, pensando ku e yunan mester lanta den un ambiente di libertat. Òf e mayornan ta asina drùk ku nan no ta dediká tempu pa duna nan yunan e debido atenshon i e entrenamentu nesesario. Algun mayor ta pensa ku e kos mas importante ta pa e mucha siña bon na skol. Pues, nan ta duna nan yu libertat kasi total tanten ku e ta haña bon punto na skol i ta logra bai un universidat renombrá.

Di otro banda, tin otro hende ta bisa ku ta mayornan i sosiedat en general mester ahustá nan norma i balornan. Nan ta rasoná ku muchanan ta haña nan enbolbí den tur tipo di krímen, i ku violensia na skol ta oumentando ketu bai. P’esei, un kabes di skol di brugklas na Seul, Repúblika di Korea, a enfatisá ku e kos di mas importante ta pa siña yunan mehorá nan personalidat. El a bisa: “Promé ku bo kuminsá duna un mucha konosementu, bo mester yud’é forma un bon karakter.”

Hopi mayor ku kier pa nan yunan bai universidat i logra algu den bida no ta hasi kaso di palabranan di spièrtamentu. Si bo ta un mayor, ki klase di persona lo bo deseá pa bo yu ta? Un adulto ku un sentido di moralidat i responsabilidat? Un persona ku ta mustra konsiderashon na otro hende, ku ta adaptabel i ku tin un aktitut positivo? Si ta asina, por fabor wak kiko e siguiente artíkulo ta bisa relashoná ku esei.