‘El A Siña Nos Respetá Su Religion’

UN Testigu di Yehova di e provinsia di Rovigo, Italia, a haña sa ku e tabatin un tumor i ku su kondishon tabata krítiko. Despues ku e tabata vários biaha den hospital, durante kua el a pidi pa trat’é sin dun’é transfushon di sanger, enfermeronan di e servisio di kuido pa pashènt di kanser a sigui dun’é asistensia na kas.

E fe firme di e pashènt aki di 36 aña i tambe su boluntat pa koperá, a impreshoná e dòkter- i enfermeronan ku a trat’é profundamente. Djis promé ku e kanser a kousa morto di e pashènt, un dje enfermeronan ku a asistié a skirbi den un revista di kuido médiko tokante nan eksperensia ku e pashènt aki ku yama Angela.

“Angela ta yen di bida i e ke biba. E ta masha konsiente di su kondishon i di su enfermedat serio, i meskos ku kualke un di nos lo a hasi, e ta buskando un solushon, un remedi. . . . Nos ku ta enfermero pokopoko pero sigur a siña konos’é. Nos no a topa niun resistensia. Al kontrario, komo ku Angela tabata un persona habrí ku tur hende, no tabata difísil pa kuid’é. Tabata un plaser pa atendé kuné, ya ku nos tabata sa ku e okashonnan ei lo tabata momentunan di berdadero kontakto humano i benefisio mutuo. . . . Nos a realisá mesora ku su religion lo a bai bira un opstákulo pa trata ku su enfermedat.” Esei tabata opinion di e enfermero aki, pasobra na su pareser Angela mester a haña un transfushon di sanger, lokual Angela a rechasá.—Echonan 15:28, 29.

“Komo profeshonalnan den kuido di salú, nos a bisa Angela ku nos no ta di akuerdo ku su desishon, pero el a yuda nos komprondé kiko bida a nifiká p’e. Tambe nos a komprondé e importansia di su religion tantu p’e komo pa su famia. Angela no a entregá. E no a laga su enfermedat vens’é. E ta fuerte. E ke biba i lucha pa sigui biba. El a ekspresá su determinashon, su konvikshon. E tin un determinashon ku hopi bes nos no tin, un fe, ku den nos kaso no ta mes firme. . . . Angela a siña nos e importansia di respetá su religion, algu hopi distinto di nos étika profeshonal. . . . Nos ta kere ku loke Angela a siña nos ta di gran importansia, pasobra nos ta topa tur tipo di hende, tur tipo di sirkunstansia, i tur tipo di religion, i nos por siña for di tur hende i duna algu na ken ku nos topa.”

Despues e artíkulo dje revista a hala atenshon n’e Kódigo di Étika Profeshonal pa Enfermeronan Italiano, aprobá na 1999, ku ta bisa: “E enfermero ta hasi su trabou teniendo kuenta ku e pashènt su religion, su balornan étiko i kultural, i tambe su rasa i sekso.” Tin biaha kisas ta difísil pa dòkter- i enfermeronan respetá e konvikshonnan religioso di un pashènt. Nos sigur ta gradisí esnan ku sí ta dispuesto pa hasi esei.

Testigunan di Yehova ta analisá kuidadosamente e desishonnan ku nan tin ku tuma relashoná ku nan salú i kuido médiko. Nan ta tuma masha na serio loke e Skritura ta bisa, i manera e kaso di Angela ta ilustrá, nan no ta hende fanátiko. (Filipensenan 4:5, NW) Rònt mundu, mas i mas profeshonal di kuido di salú ta dispuesto pa respetá e konsenshi di nan pashèntnan ku ta Testigu di Yehova.