Historia di Bida

Un Bida Ku A Duna Mi Satisfakshon Apesar di Tristesa

SEGUN E RELATO DI AUDREY HYDE

Rekordando e 63 añanan ku mi a pasa den sirbishi di tempu kompletu—di kua 59 aña na e sede mundial di Testigunan di Yehova—mi por bisa ku mi tabatin un bida ku a duna mi satisfakshon. Ta bèrdat sí ku tabata masha doloroso pa mi para wak mi promé kasá muri lentamente di kanser i mi di dos kasá sufri di e efektonan teribel di malesa di Alzheimer. Pero laga mi konta bo kon mi a mantené mi goso apesar di e kalamidatnan aki.

MI A lanta riba un boerderij serka di e pueblito Haxtun riba e sabananan ekstenso den parti nortost di Colorado, pegá ku e frontera di Nebraska. Mi mayornan, Orille ku Nina Mock, tabatin seis yu, i ami tabata e di sinku yu. Russell, Wayne, Clara i Ardis a nase entre 1913 i 1920, i ami a nase e siguiente aña. Curtis a nase na 1925.

Na 1913, Mama a bira un Studiante di Beibel, manera nan tabata yama Testigunan di Yehova e tempu ei. Ku tempu, nos tur den e famia tambe a bira Testigu.

Un Bida Sano den Sabana

Tata tabata masha habrí pa ideanan nobo. Nos tabatin lus di koriente den tur nos edifisionan riba e boerderij, algu ku kasi bo no tabata mira e tempu ei. Tambe nos a disfrutá di e produktonan komun di bida di kunuku: webu di nos propio galiñanan, i lechi, krema i manteka di nos propio bakanan. Nos a usa kabai pa plug e tera i nos a planta strawberry, batata, i tambe trigu ku maishi.

Tata tabata di opinion ku tur su yunan mester siña traha. Promé ku mi a kuminsá bai  skol mes, ya nan a siña mi traha den kunuku. Mi ta kòrda kon den zomer, den higra di solo, mi tabatin ku chapi yerba for di kanalnan largu den nos hòfi. Mi tabata puntra mi mes: ‘Ta ki dia mi ta yega na fin di e kanal?’ Sodó tabata kore den mi lomba, i abeha tabata piká mi. Tin biaha mi tabata sinti duele di mi mes pasobra otro muchanan no tabatin ku traha dje duru manera nos. Pero en realidat, ora mi wak bèk riba mi infansia, mi ta gradisidu ku mi mayornan a siña nos traha.

Nos tur tabatin tarea pa hasi. Ardis por a hala lechi mihó ku mi, p’esei mi trabou tabata di limpia stal di e kabainan, i saka e mèst pafó. Sin embargo, nos a pasa prèt tambe i tabata hunga wega. Ami ku Ardis a hunga den un tim lokal di softball. Ami tabata picha òf hunga tersera base, anto Ardis tabata hunga primera base.

Anochi riba e sabananan ekstenso, e shelu sin nubia tabata masha bunita mes. E míles di streanan ku bo por a mira a laga mi kòrda riba nos Kreadó, Yehova Dios. Asta komo mucha mi tabata pensa riba Salmo 147:4, ku ta bisa: “E [Yehova] ta determiná e kantidat di e streanan; e ta yama nan tur na nan nòmber.” Durante hopi di e anochinan aki ku shelu kla, nos kachó, Judge, tabata pone su kabes den mi skochi i kompañá mi. Atardi, hopi bes mi tabata sinta riba nos pòrch i atmirá e kunukunan di trigu bèrdè segun ku bientu tabata supla nan i laga nan parse plata den e lus di solo.

E Bon Ehèmpel di Mi Mama

Mi mama tabata un esposa masha dediká. Pa Mama, Tata tabata semper e kabes di kas, i el a siña nos respet’é. Na 1939 Tata tambe a bira un Testigu di Yehova. Nos tabata sa ku Tata stima nos maske el a pone nos traha duru i no a malkriá nos. Hopi biaha den wenter e tabata laga dos kabai hala un slee i tabata bai keiru ku nos den e slee. Nos tabata gosa sinfin di e sneu briante!

Sin embargo, ta Mama ta esun ku a siña nos stima Dios i respetá Beibel. Nos a siña ku Dios su nòmber ta Yehova i ku e ta e Fuente di bida. (Salmo 36:9; 83:18, NW) Tambe nos a siña ku Yehova a perkurá guia pa nos, no pa stroba nos di gosa, sino pa nos probecho. (Isaias 48:17) Mama konstantemente a kòrda nos ku nos tin un trabou spesial pa hasi. Nos a siña ku Hesus a bisa su siguidónan: “E evangelio aki di e reino lo wòrdu prediká den henter mundu komo un testimonio na tur nashon, i e ora ei e fin lo yega.”—Mateo 24:14.

Tempu mi tabata chikí, asina ku mi yega kas for di skol i mi mama no ta den kas, mi tabata sali bai busk’é. Un biaha, mi tabatin mas o ménos seis òf shete aña, mi a bin hañ’é den  mangasina. Áwaseru a kuminsá kai masha duru mes. Nos tabata den e zòlder kaminda ta warda yerba seku, i mi a puntr’é si ta un otro Diluvio Dios tabata bai trese. El a sigurá mi ku Dios a primintí ku nunka mas lo e bolbe destruí e tera ku un diluvio. Tambe mi ta kòrda kon hopi biaha nos mester a kore bai skonde den bodega, ya ku hos tabata pasa tur ora.

Mama a partisipá den e trabou di prediká for di promé ku mi a nase. Tabatin un grupo ta reuní den nos kas, i nan tur tabatin e speransa di biba ku Kristu den shelu. Ounke e predikashon di kas pa kas tabata difísil pa Mama, el a laga su amor pa Dios vense su miedu. Mama a keda fiel te dia el a muri na edat di 84 aña, dia 24 di novèmber 1969. Mi tabata masha kontentu di por tabata serka Mama e dia ei i kompartí kuné mi konfiansa den su speransa selestial! Mi a flùister den su orea: “Mama, bo ta bai shelu, i lo bo ta ku e hendenan ku bo konosé.” Ku un stèm abou el a bisa: “Mi ta apresiá kon bo ta trata mi.”

Nos A Kuminsá Prediká

Na 1939, Russell a bira pionero, manera nos ta yama predikadónan di tempu kompletu den Testigunan di Yehova. El a traha pionero na Oklahoma i Nebraska te ku 1944, ora ku el a haña invitashon pa bin sirbi na e sede mundial di Testigunan di Yehova (yamá Bètel), na Brooklyn, New York. Ami a kuminsá traha pionero dia 20 di sèptèmber 1941, i mi a sirbi na vários lugá den Colorado, Kansas i Nebraska. E añanan ei den e sirbishi di pionero tabata añanan felis, no solamente pasobra mi por a yuda otro hende siña tokante Yehova, sino tambe pasobra mi a siña tene pleno konfiansa den Yehova.

Pa un tempu Wayne tabatin un trabou, i despues el a bai universidat, nèt rònt di e tempu ku Russell a kuminsá traha pionero. Despues Wayne a haña invitashon pa bin Bètel. El a sirbi pa basta tempu na Kingdom Farm, serka di Ithaca, New York. Einan, nan tabata planta kuminda pa e famia chikí di e boerderij i tambe pa e staf di mas o ménos 200 trahadó na Bètel di Brooklyn. Wayne a usa su abilidatnan i eksperensia den e sirbishi di Yehova te na su morto na aña 1988.

Mi ruman muhé Ardis a kasa ku James Kern, i nan a haña sinku yu. Ardis a muri na 1997. Mi otro ruman muhé, Clara, a keda fiel na Yehova te awe, i te ainda ora mi tin fakansi mi ta bai bishit’é na su kas na Colorado. Nos ruman mas chikí, Curtis, a bin Bètel di Brooklyn meimei di dékada di 1940. E tabata kore un trùk entre Kingdom Farm i Brooklyn pa transportá material i vários produkto di kunuku. E no a kasa nunka, i a muri na 1971.

Mi Deseo: Sirbishi di Bètel

Mi ruman hòmbernan a bai Bètel promé, i mi tambe kier a sirbi einan. Mi tin sigur ku ta nan bon ehèmpel tabata e motibu ku mi a haña e invitashon pa bin. Loke a lanta den mi e deseo pa bai sirbi na Bètel tabata di tende mi mama papia tokante e historia di Dios su organisashon i di mira pa mi mes e kumplimentu di profesianan bíbliko relashoná ku e  último dianan. Mi a primintí Yehova solemnemente den orashon ku si e laga mi sirbi na Bètel, lo mi no bai for di einan nunka, a ménos ku mi tabatin obligashonnan kristian pa kumpli kuné.

Mi a yega Bètel dia 20 di yüni 1945, i mi asignashon tabata pa traha den limpiesa. Tur dia mi tabatin 13 kamber pa limpia, ku 26 kama pa drecha, plùs limpia gang, trapi i bentana. E trabou tabata pisá. Tur dia, segun ku mi tabata traha, mi tabata bisa mi mes: ‘Bo ta kansá, ta bèrdat, pero bo ta na Bètel, e kas di Dios!’

Na prinsipio di mi sirbishi di Bètel, mi a pasa un bèrgwensa grandi. Mi a lanta den kunuku, ke men mi no tabata sa ku un “dumbwaiter” (weter bobo) ta un left chikí ku nan ta usa pa transportá artíkulo di un piso pa otro. Wèl, un dia na trabou mi a haña un yamada ku e petishon: “Bo por manda e dumbwaiter abou, por fabor?” E ruman ku a bèl a sera e telefon asina lihé, ku mi no tabata sa kiko pa hasi. Pero e ora ei mi a kòrda ku riba e piso ku mi ta limpia tin un ruman ta biba ku ta weter. Pues, mi a bai bati na su porta i mi di kuné: “Nan ke pa bo bin abou den kushina.”

Mi Ta Kasa ku Nathan Knorr

For di dékada di 1920, bètelitanan ku tabata deseá di kasa mester a sali for di Bètel i sirbi interesnan di Reino un otro kaminda. Pero na prinsipio di dékada di 1950, nan a permití un par di pareha ku tabatin basta tempu ta sirbi na Bètel pa kasa i keda na Bètel. P’esei ora Nathan H. Knorr, kende e tempu ei tabata hiba delantera den e trabou mundial di Reino, a mustra interes den mi, mi a pensa: ‘Esaki sí ta un ku sigur lo keda Bètel!’

Nathan tabatin hopi responsabilidat pa por a supervisá e aktividat mundial di Testigunan di Yehova. P’esei e tabata masha franko ku mi, i a duna mi hopi motibu pakiko mi tin ku pensa bon promé ku mi aseptá su proposishon pa kasa. Den e tempu ei, e tabata biaha hopi pa bishitá e sukursalnan di Testigunan di Yehova rònt mundu i hopi bes e tabata bai pa vários siman. P’esei el a splika mi ku nos lo ta separá pa periodonan largu.

Tempu mi tabata hobensita, mi a soña di kasa den lènte i bai pasa luna di miel riba e islanan di Hawai. Wèl, nos a kasa den kurason di wenter, dia 31 di yanüari 1953, i nos a pasa nos luna di miel e djasabra atardi ei i su djadumingu na New Jersey. Djaluna nos a kuminsá traha bèk. Sin embargo, un siman despues, sí nos a tuma un siman liber pa pasa nos luna di miel.

Un Kompañero Trahadó

Nathan tabatin 18 aña ora ku el a bin Bètel na 1923. El a haña entrenamentu balioso serka veteranonan manera Joseph F. Rutherford, kende tabata enkabesá e obra di e Testigunan,  i serka e manager di e drùkerei Robert J. Martin. Ora ku Ruman Martin a muri na sèptèmber 1932, Nathan a bira manager di e drùkerei. E siguiente aña, Ruman Rutherford a hiba Nathan huntu kuné ora el a bai bishitá sukursalnan di Testigunan di Yehova na Europa. Na yanüari 1942 ora ku Ruman Rutherford a muri, Nathan a risibí e responsabilidat di supervisá e obra mundial di Testigunan di Yehova.

Nathan tabata gusta mira padilanti, i semper tabata plania pa kresementu den futuro. Algun ruman a konsiderá esaki inapropiá, ya ku nan a pensa ku fin di e sistema aki tabata hopi serka. De echo, un ruman ku a mira e plannan di Nathan a puntr’é: “Kiko esaki ta Ruman Knorr? Bo no tin fe ku e fin ta serka?” Nathan a kontestá: “Sí, mi tin fe, pero den kaso ku e fin no bin mes lihé ku nos ta spera, nos lo ta prepará.”

Un idea ku Nathan tabata hopi konvensí di dje ta pa establesé un skol pa misionero. Pues, dia 1 di febrüari 1943, un skol di misionero a kuminsá na e boerderij grandi kaminda mi ruman Wayne tabata sirbi e tempu ei. Ounke e skol a konsistí di un kurso intenso di studio di Beibel ku a dura aproksimadamente sinku luna, Nathan a sòru pa e studiantenan haña poko rekreo tambe. Durante e promé añanan di e skol, e mes tambe tabata hunga den e weganan di softball. Pero despues el a stòp di hunga ya ku e tabatin miedu di haña leshon ku lo por a strob’é di asistí na e kongresonan di distrito den zomer. Na lugá di hunga, el a opta pa fungi komo umpire. E studiantenan tabata pasa masha prèt foral ora ku abiertamente e tabata kambia e reglanan di wega na fabor di e studiantenan di eksterior ku tabata hunga.

Mi Biahenan ku Nathan

Ku tempu mi a kuminsá kompañá Nathan durante su biahenan den eksterior. Mi tabata gusta kompartí eksperensia ku e boluntarionan ku ta traha na sukursal i ku e misioneronan. Mi por a mira personalmente nan amor i deboshon, i mi a siña tokante nan rutina i kondishon di bida den nan paisnan asigná. Atraves di añanan i te ku awor, mi ta haña karta ku ta ekspresá apresio pa e bishitanan ei.

Reflekshonando riba nos biahenan, mi ta kòrda hopi eksperensia. Por ehèmpel, tempu ku nos a bishitá Polonia, dos ruman muhé tabata flùister ku otro ku ami pará einan. Mi a puntra nan: “Dikon boso ta flùister?” Nan a pidi mi despensa, i a splika ku nan a kustumbrá di flùister, ya ku e obra di Testigunan di Yehova tabata prohibí na Polonia i nan kasnan tabata wòrdu di tap.

Ruman Adach tabata un di e hopi ruman muhénan ku a sirbi bou di prohibishon na Polonia. E tabatin kabei ku hopi krùl i un poina. Un biaha el a hisa su poina i a mustra mi e sikatris di un kap hundu ku el a haña di un persiguidó ku a gòlpi’é. Mi tabata di shòk pa mira ku mi mes wowo e resultadonan di trato kruel ku nos rumannan tabatin ku soportá.

Despues di Bètel, ta Hawai ta mi lugá preferí. Mi ta kòrda e kongreso einan den e stat Hilo na 1957. Tabata un okashon memorabel, i asistensia tabata mas grandi ku e kantidat total di Testigunan lokal. E alkalde a asta duna Nathan yabi di e stat. Hopi ruman a bin kumindá nos i bisti nos ku koyar di flor.

Un otro kongreso emoshonante tabata na Nuremberg, Alemania, na 1955, tené den e lugá kaminda Hitler tabatin kustumber di reuní su tropanan pa parada. Ta bon konosí ku Hitler a hura ku lo el a eksterminá e pueblo di Yehova for di Alemania, pero awor e stadion aki tabata kankan ku Testigu di Yehova! Mi no por a kontené mi  lágrimanan. E plataforma tabata inmenso i tabatin un background impreshonante ku a konsistí di 144 pilá grandi. Mi tabata riba plataforma i mi por a mira e ouditorio inmenso di mas ku 107.000 persona. E distansia tabata asina grandi ku apénas mi por a mira e último rei.

Nos por a sinti e integridat di e rumannan aleman i e fortalesa ku nan a risibí di Yehova durante nan persekushon bou di gobernashon nazi. Esei a fortalesé nos propio determinashon pa keda fiel i mantené nos integridat na Yehova. Nathan a duna e diskurso final, i ora el a terminá el a zuai man pa yama e ouditorio ayó. Mesora e rumannan a reakshoná dor di zuai ku nan lensunan pa yama ayó. Esei a keda meskos ku un bunita tereno tur na flor.

Un otro bishita inolvidabel tabata nos bishita na Portugal na desèmber 1974. Nos tabata presente na e promé reunion di Testigunan di Yehova na Lisboa despues ku nos trabou di prediká a bira legal. E tabata prohibí pa 50 aña! Ounke tabatin solamente 14.000 publikadó di Reino den e pais na e tempu ei, mas ku 46.000 hende tabata presente pa e dos reunionnan ku nan a tene. Mi wowo a yena ku awa ora ku e rumannan a bisa: “Nos no tin ku skonde mas. Nos ta liber.”

For di tempu ku mi tabata biaha ku Nathan te ku awe, mi ta gusta duna testimonio informal—den avion, na restorant—i prediká riba kaya. Semper mi ta kana ku literatura ya asina mi ta prepará pa duna testimonio. Un biaha ku nos tabata warda riba un avion ku tabata retrasá, un señora a puntra mi unda mi ta traha. Esei a hiba na un kòmbersashon kuné i ku otro hendenan rònt di nos ku tabata skucha. Sirbishi di Bètel i mi aktividat di prediká a tene mi okupá i masha felis.

Malesa i Animashon di Despedida

Na 1976, Nathan a bira malu ku kanser, i ami, huntu ku e personal di Bètel, a yud’é trata ku esei. Apesar ku su salú tabata bayendo atras, nos tabata invitá vários miembro di ofisinanan di sukursal di rònt mundu na nos kamber, kendenan e tempu ei tabata na Brooklyn pa haña entrenamentu. Mi ta kòrda e bishitanan di Don ku Earlene Steele, Lloyd ku Melba Barry, Douglas ku Mary Guest, Martin ku Gertrud Poetzinger, Pryce Hughes i hopi otro mas. Hopi bes nan tabata konta nos algun eksperensia di nan pais. Mi tabata keda spesialmente impreshoná ku e eksperensianan ku ta mustra e firmesa di nos rumannan bou di prohibishon.

Ora ku Nathan a realisá ku e tabata serka di muri, el a duna mi algun bon konseho pa yuda mi ora mi bira biuda. El a bisa: “Nos tabatin un matrimonio felis. Hopi hende nunka ta eksperensiá esei.” Un kos ku a hasi nos matrimonio felis tabata ku Nathan a tene hopi konsiderashon ku mi. Por ehèmpel, ora nos tabata topa diferente ruman durante nos biahenan, e tabata bisa mi: “Audrey, si de bes en kuando mi no introdusí bo na nan, ta pasobra mi no por kòrda nan nòmber.” Mi tabata hopi kontentu ku el a bisa mi esei di antemano.

Nathan a rekordá mi: “Despues di morto, nos speransa ta sigur, i nunka mas nos lo no sufri doló.” Anto el a bisa mi ku insistensia: “Wak padilanti, pasobra ta einan bo rekompensa ta. No biba den pasado, ounke lo bo keda ku rekuerdo. Tempu lo yuda bo rekuperá. No bira amargá ni sinti duele di bo mes. Keda kontentu ku bo tabatin e goso- i bendishonnan aki. Despues di un tempu, lo bo ripará ku e rekuerdonan ta duna bo goso. Rekuerdo ta un regalo ku Dios a duna nos.” El a agregá: “Keda okupá; purba usa bo bida hasiendo algu pa otro hende. Esaki lo yuda bo haña goso den bida.” Anto dia 8 di yüni 1977, Nathan a bandoná e mundu aki.

Mi Ta Kasa ku Glenn Hyde

Nathan a bisa mi ku sea mi ta biba den pasado ku mi rekuerdonan òf mi por a forma  un bida nobo. P’esei na 1978, despues ku mi a muda pa Watchtower Farms na Wallkill, New York, mi a kasa ku Glenn Hyde. E tabata un persona ketu i suave i ku masha bon tipo. Promé ku Glenn a bira Testigu, e tabata marinir tempu ku Merka tabata den guera ku Hapon.

Glenn a traha riba un boto ku a patruyá pa torpedo i tabata asigná na e machinekamer. Debí na e bochincha di motor, el a pèrdè un parti di su oido. Despues di guera, el a bira pagadó di kandela. Pa hopi aña el a sufri di pesadia debí na loke el a eksperensiá den guera. El a siña e bèrdat bíbliko serka su sekretaria, kende a dun’é testimonio informal.

Despues, na 1968, Glenn a haña invitashon pa bin Bètel pa traha komo bombero na Brooklyn. Anto ora ku Watchtower Farms a haña nan outo di paga kandela, el a ser transferí einan na 1975. Ku tempu el a haña e malesa di Alzheimer. Despues ku nos tabatin dies aña kasá, Glenn a muri.

Kon lo mi a trata ku e situashon? E palabranan sabí ku Nathan a duna mi ora ku e tabata sa ku e ta bai muri, a bolbe konsolá mi. Mi a keda lesa loke el a skirbi mi tokante kon pa trata ku mi situashon ora mi bira biuda. Te ainda mi ta kompartí e palabranan aki ku otro rumannan ku pèrdè nan kasá, i nan tambe a haña konsuelo for di Nathan su konseho. Sí, ta bon pa wak padilanti manera el a animá mi pa hasi.

Un Hermandat Presioso

Loke spesialmente a hasi mi bida felis i a duna mi satisfakshon ta amigunan stimá den e famia di Bètel. Un di nan en partikular ta Esther Lopez, kende a gradua na 1944 di e terser klas di e Skol Bíbliko di Galaad di Watchtower. El a bin bèk na Brooklyn na febrüari 1950 pa sirbi komo traduktor di nos publikashonnan bíbliko na spañó. Hopi bes ora ku Nathan tabata di biahe, Esther tabata mi kompañera íntimo. E tambe ta na Watchtower Farms. Awor e tin 90’i piku aña, i su salú ta bayendo atras i e ta ser kuidá den nos hospital di Bètel.

Di mi famia djaserka, ta Russell ku Clara so ta na bida ainda. Russell tin riba 90 aña i ta sirbi fielmente na Bètel di Brooklyn. E tabata un di e proménan ku tabatin mag di keda Bètel despues ku el a kasa. Na 1952, el a kasa ku un otro bètelita, Jean Larson. Jean su ruman hòmber Max a bin Bètel na 1939 i a bira superintendente di e drùkerei na lugá di Nathan na 1942. Max ainda tin hopi responsabilidat na Bètel, inkluso yuda kuida su kasá stimá, Helen, kende ta sufri di múltiple sklerósis.

Reflekshonando riba e 63 añanan di sirbishi di tempu kompletu na Yehova, mi por bisa ku di bèrdat mi tabatin un bida ku a duna mi satisfakshon. Bètel a bira mi kas, i mi ta sigui sirbi einan ku kurason kontentu. Mi tin ku duna mérito na mi mayornan pa e echo ku nan a inkulká den nos e importansia di traha i e deseo di sirbi Yehova. Pero loke realmente ta duna bida satisfakshon ta nos maravioso hermandat i e speransa di biba huntu ku nos rumannan riba un tera kombertí den paradeis, sirbiendo nos Magnífiko Kreadó, e úniko Dios berdadero, Yehova, pa eternidat.

[Plachi na página 24]

Mi mayornan, dia nan a kasa na yüni 1912

[Plachi na página 24]

Di robes pa drechi: Russell, Wayne, Clara, Ardis, ami i Curtis na 1927

[Plachi na página 25]

Ami ta pará entre Frances i Barbara McNaught, trahando pionero na 1944

[Plachi na página 25]

Na Bètel na 1951. Di robes pa drechi: Ami, Esther Lopez, i mi kuñá, Jean

[Plachi na página 26]

Ami ku Nathan i su mayornan

[Plachi na página 26]

Ami ku Nathan na 1955

[Plachi na página 27]

Ami ku Nathan na Hawai

[Plachi na página 29]

Ami ku mi di dos kasá, Glenn