E Milagernan di Hesus—Realidat òf Fantasia?

“NAN a trese serka dje [Hesukristu] hopi hende ku tabata poseí pa demoño; i ku un palabra el a saka e spiritunan afó i a kura tur ku tabata malu.” (Mateo 8:16) “El [Hesus] a lanta, el a reprendé e bientu i a bisa e laman: ‘Silensio, keda ketu!’ I e bientu a kai i a bira kompletamente kalmu.” (Marko 4:39) Kiko bo ta pensa di e deklarashonnan aki? Bo ta kere ku tabata trata aki di susesonan real i históriko, òf bo ta haña ku nan ta puru kuenta i fantasia?

Awe hopi hende ta duda seriamente ku si di bèrdat e milagernan di Hesus a tuma lugá. Den e era aki di avansenan sientífiko riba tereno di teleskop i mikroskop, di eksplorashon di espasio i di ingenieria genétiko, hende no ta muchu inkliná pa kere informenan di milager i fenómenonan sobrehumano.

Tin hende ta haña ku relatonan tokante milager ta kuenta i fantasia. Segun e eskritor di un buki ku supuestamente ta eksplorá e “berdadero” Hesus, e kuentanan tokante Kristu su milagernan ta nada mas ku “propaganda” pa promové kristianismo.

Otronan ta mira e milagernan di Hesus komo puru engaño i ta bai asina leu di asta akusá Hesus di tabata un impostor. Segun Justino Mártir di siglo 2 di nos era, esnan ku tabata  kuestioná Hesus a “asta tribi yam’é un mago i un gañadó di pueblo.” Algun hende ta pretendé ku Hesus “no a hasi su milagernan komo un profeta hudiu, sino komo un mago ku a ser instruí den tèmpelnan pagano.”

Definishon di Loke Ta Imposibel

Kisas bo ta sinti ku tras di e dudanan ei tin un motibu fundamental pakiko hende no ta muchu inkliná pa kere den milager. Nan ta haña ku ta simplemente difísil, asta imposibel, pa aseptá e idea ku ta forsanan sobrehumano por a produsí e milagernan ei. Un persona hóben ku a bisa ku e ta un agnóstiko a laga sa: “Simplemente no ta eksistí milager. Punto!” Anto el a sita e palabranan di e filósofo eskoses di siglo 18, David Hume, kende a skirbi: “Un milager ta un violashon di e leinan di naturalesa.”

Di otro banda, tin hopi hende ku lo no ke para ariba ku un sierto fenómeno ta imposibel. The World Book Encyclopedia ta bisa ku un milager ta “un suseso ku nos no por splika a base di e leinan di naturalesa ku nos konosé.” Ku e definishon ei, biahenan espasial, komunikashon sin kabel òf “wireless” i nabegashon via satélite lo tabata “milager” pa mayoria hende di apénas un siglo pasá. P’esei, sigur no ta sabí pa deskartá milager komo algu imposibel djis pasobra nos no por splika nan a base di nos konosementu aktual.

Kiko un análisis di algun di e detayenan bíbliko rònt di e milagernan atribuí na Hesukristu ta revelá? Hesus su milagernan ta realidat òf fantasia?