E Gobernashon di e Reino di Dios​—⁠Un Realidat Awe

“Kon ta posibel pa asina tantu nashon, ku kulturanan asina distinto i den diferente etapa di desaroyo, yega na un akuerdo ku otro? Aparentemente, e rasa humano lo uni solamente si un otro planeta atak’é.”—The Age, korant oustraliano.

UN OTRO planeta atak’é? Sea ku esei lo uni tur nashon òf nò, profesia di Beibel sí ta papia di un krísis ku ta menasando i ku lo pone e nashonnan di mundu uni. I ta podernan ekstraterestre lo kousa e krísis aki.

Rei David di Israel di antigwedat a papia profétikamente di e situashon mundial aki. Bou di inspirashon divino el a skirbi: “E reinan di mundu ta tuma nan posishon, i e gobernantenan ta konsultá huntu [“reuní huntu manera unu,” NW] kontra SEÑOR i kontra su ungí, bisando: ‘Laga nos kibra nan kadenanan i tira nan kabuyanan for di nos!’” (Salmo 2:2, 3; Echonan 4:25, 26) Tuma nota ku e gobernantenan di mundu lo uni kontra Yehova, e Kreadó di universo, i su ungí òf su Rei nombrá, Hesukristu. Kon esei lo tuma lugá?

Segun kronologia bíbliko i profesianan ku a kumpli, na aña 1914 e Reino di Dios a wòrdu establesí den shelu ku Hesukristu komo Rei. * E tempu ei e nashonnan di mundu  tabatin un pensamentu en komun. En bes di someté nan mes na e soberania di e Reino di Dios resien establesí, nan tabata metí den un lucha pa poder, esta, den e Guera Grandi òf Promé Guera Mundial.

Kiko Yehova Dios ta pensa di e reakshon di gobernantenan humano? “Esun ku ta sinta den e shelunan ta hari; Señor ta hasi bofon di nan. Anto e lo papia ku nan den su rabia i terorisá nan den su furia.” Despues, Yehova lo bisa su Yu, e Rei ungí di e Reino: “Pidi mi, i siguramente lo mi duna bo e nashonnan komo bo herensia, i e finnan di tera komo bo poseshon. Lo bo kibra nan ku bara di heru, lo bo kibra nan na pida-pida manera kos trahá di klei.”—Salmo 2:4, 5, 8, 9.

E derota final aki di nashonnan enemigu ku un bara di heru lo tuma lugá na Armagedón. E último buki di Beibel, Revelashon, ta deskribí e suseso kulminante aki komo “e guera di e gran dia di Dios Todopoderoso,” na kua “reinan di henter mundu” lo ser reuní huntu. (Revelashon 16:14, 16) Bou di influensia demoniako, e nashonnan di tera finalmente lo uni ku un solo meta, esta, pa bringa kontra e Dios Todopoderoso.

E momentu ku hende lo uni forsa pa bringa kontra Dios su soberania ta aserkando rápidamente. Pero ta un ironia ku nan “unidat” lo no trese ningun benefisio personal pa nan. Na lugá di esei nan akshon lo habri kaminda pa henter humanidat haña e pas tan anhelá. Kon asina? Den e bataya final ei, e Reino di Dios “lo garna i pone un fin na tur e reinonan [di e mundu] aki, ma e mes lo dura pa semper.” (Daniel 2:44) E Reino di Dios, i no kualke organisashon humano, lo ta e gobièrnu ku lo kumpli ku humanidat su deseo pa pas mundial.

E Gobernante Prinsipal di e Reino di Dios

Esei ta e Reino ku hopi hende sinsero ta pidi p’e den orashon. Nan ta resa: “Ku bo reino bin. Ku bo boluntat sosodé na tera meskos ku den shelu.” (Mateo 6:10) E Reino di Dios no ta un kondishon apstrakto di e kurason, mas bien e ta un gobièrnu real ku a logra obranan maravioso desde ku el a wòrdu establesí den shelu na 1914. Laga nos konsiderá algun faktor importante ku ta proba ku e Reino di Dios ta un realidat i ku e ta kompletamente aktivo awe.

Na promé lugá, e tin un rei poderoso i efisiente: Hesukristu entronisá. Na aña 33 di nos era, Yehova Dios a nombr’é komo Kabes di e kongregashon kristian. (Efesionan 1:22) Desde e tempu ei, Hesus a ehersé su outoridat komo kabes, i di e manera ei a demostrá su kapasidat komo gobernante. Por ehèmpel, tempu ku un hamber pisá a afektá Judea den e promé siglo, mesora e kongregashon kristian a yuda su miembronan. Nan a hasi areglo pa perkurá yudansa, i for di Antiokia nan a manda Barnabas i Saulo ku un kontribushon komo un sosten pa e rumannan.—Echonan 11:27-30.

Awor ku e Reino di Dios ta gobernando nos por spera asta mas di Hesukristu. Ki ora ku sosodé un desaster manera temblor, hamber, inundashon, horkan, mal tempu òf erupshon di volkan, mesora e kongregashon  kristian di Testigunan di Yehova ta perkurá pa e nesesidatnan di nan kompañeronan i di otro hende den e áreanan afektá. Por ehèmpel, ora ku e temblor devastador a asotá El Salvador na yanüari i febrüari di 2001, den tur parti di e pais ei a hasi areglo pa duna yudansa, i gruponan di Testigunan di Yehova di Canada, Guatemala i Merka tambe a duna un man. Den un periodo di tempu masha kòrtiku a rekonstruí tres lugá di adorashon i mas ku 500 kas.

Súpditonan di e Reino di Dios

Desde ku e Reino a wòrdu establesí na 1914, Dios su Reino selestial ta organisando i reuniendo su súpditonan rònt mundu. Esaki ta un kumplimentu di e profesia remarkabel skirbí dor di Isaias: “Lo sosodé den e último dianan ku e seru di e kas di SEÑOR [su adorashon berdadero i elevá] lo wòrdu establesí komo e seru prinsipal, . . . i tur nashon lo basha bai na dje.” E profesia ta indiká ku “hopi pueblo” lo subi bai na e seru ei i aseptá Yehova su instrukshon i lei.—Isaias 2:2, 3.

E aktividat aki a forma e movementu mas notabel di tempu moderno, un hermandat internashonal di mas ku 6.000.000 kristian den mas ku 230 nashon di e tera. Na kongresonan internashonal di Testigunan di Yehova hopi bes opservadónan ta keda impreshoná ora nan mira e amor, e pas, i unidat di e multitutnan inmenso di hende, surpasando e bareranan di nashonalidat, kultura i idioma. (Echonan 10:34, 35) Bo no ta eens ku pa un gobièrnu logra trese sentenáres di grupo étniko huntu den pas i armonia, e mester ta efektivo, stabil i real?

E Reino di Dios i Edukashon

Tur gobièrnu tin rekisitonan ku su siudadanonan tin ku kumpli kuné, i tur hende ku ke biba bou di e gobièrnu ei tambe mester kumpli ku su rekisitonan. Di igual manera, e Reino di Dios tin rekisitonan i tur hende ku kier ta un súpdito di dje mester kumpli ku nan. Sin embargo, pa yuda asina hopi hende ku antesedentenan asina diferente aseptá i biba na armonia ku e mesun rekisitonan ta un tarea inmenso. Pues aki nos ta mira un otro prueba ku e Reino di Dios ta real: su programa efektivo di edukashon ku ta touch i transformá no solamente e mente sino tambe e kurason di hende.

Kon e Reino ta logra kumpli ku e tarea difísil aki? Dor di sigui e método apostóliko di prediká “di kas pa kas” i siña hende individual e Palabra di Dios. (Echonan 5:42; 20:20) Kon efektivo e manera aki di eduká hende ta? Jacques Johnson, un pastor katóliko, a skirbi den un korant kanades kiko a pasa ora el a purba konvensé un señora pa no studia ku Testigunan di Yehova. El a bisa: “Mi a keda basta pasmá i a realisá ku mi tabata den un bataya pèrdí. . . . Mi a bin realisá ku  durante un par di luna e señoranan Testigu di Yehova aki a forma un relashon signifikativo ku e mama hóben aki ku no por a sali for di kas. Nan a forma un laso kuné dor di yud’é, bira su amiga, i di e manera aki a establesé un amistat íntimo. No a dura hopi ku el a bira un miembro aktivo den nan religion i mi no por a hasi nada pa prevení esei.” Meskos ku e kondukta kristian di Testigunan di Yehova i e mensahe di Beibel ku nan ta siña hende a konmové e kurason di e eks-katóliko aki, asina tambe e ta touch kurason di miónes di hende mas.

E tipo di edukashon aki—edukashon di Reino—ta basá riba Beibel, i ta mantené su balor- i normanan enkuanto moralidat na haltu. E ta siña hende pa stima i onra otro hende sin importá nan background. (Juan 13:34, 35) Tambe e ta yuda hende pa hasi kaso di e instrukshon: “No sea konforme e mundu aki, ma sea transformá pa medio di e renobamentu di boso mente, pa boso por komprobá kiko ta e bon i agradabel i perfekto boluntat di Dios.” (Romanonan 12:2) Pa motibu ku miónes di hende no ta biba manera ántes mas i gustosamente ta biba segun e lei- i prinsipionan di e Reino, nan a haña pas i felisidat awor i perspektivanan maravioso pa futuro.—Kolosensenan 3:9-11.

Un ekselente medio pa logra e unidat mundial aki ta mediante e revista aki, E Toren di Vigilansia. Dor di usa métodonan di tradukshon sistemátiko i ekipo di imprenta plurilingwe, e artíkulonan prinsipal den E Toren di Vigilansia ta sali simultáneamente den 135 idioma i, mas ku 95 porshento di e lektornan rònt mundu por studia e informashon den nan mes idioma na e mesun momentu.

Un eskritor mormon a traha un lista di e mishonnan eksitoso mas eksepshonal fuera di su mes iglesia. El a klasifiká E Toren di Vigilansia i Spièrta! publiká dor di Testigunan di Yehova, komo e mihó revistanan pa prediká e evangelio i a bisa: “Nunka ningun hende por akusá Toren di Vigilansia òf Spièrta! di fomentá indiferensia—al kontrario nan ta hasi hende konsiente di nan nesesidat spiritual; algu ku masha poko mi a yega di topa den otro publikashonnan religioso. E kontenido di Toren di Vigilansia i Spièrta! ta refreskante pa motibu ku nan ta realístiko, basá riba echo i investigashon amplio.”

Tin masha hopi evidensia ku e Reino di Dios ta un realidat i ta aktivo. Testigunan di Yehova ku alegria i yen di energia ta papia ku otro hende tokante “e evangelio aki di e reino” i ta invitá nan pa bira su súpditonan. (Mateo 24:14) E idea ei ta atraé bo? Bo por disfrutá di e bendishonnan ku bo ta haña ora bo asosiá ku personanan ku ta siñando normanan di Reino i ku ta trata pa biba na armonia ku nan. Pero mas mihó ainda, lo bo por gosa di e perspektiva di biba bou di gobernashon di e Reino den e mundu nobo primintí den kua ‘hustisia ta biba.’—2 Pedro 3:13.

[Nota]

[Plachi na página 4, 5]

Na 1914 e nashonnan tabata metí den un guera mundial

[Plachinan na página 6]

E trabou di duna yudansa boluntario ta un prueba di amor kristian

[Plachi na página 7]

Testigunan di Yehova rònt mundu ta benefisiá di e mesun programa di edukashon