Kiko Ta Duna Bida Berdadero Propósito?

ORA nan a puntra Jesse, un alumno di 17 aña di skol sekundario, kiko ta e propósito di bida, el a kontestá: “Gosa mas tantu ku bo por, tanten ku bo ta na bida.” Suzie tabatin un otro punto di bista. El a bisa: “Ami ta kere onestamente ku e propósito di bida ta loke abo skohe pa e ta.”

Abo a yega di puntra bo mes kiko ta e propósito di bida? Ta un solo propósito universal tin pa henter humanidat? Òf Suzie tin rason, esta, ku bida ta básikamente loke kada un di nos hasi kuné? Sin importá kon sofistiká nos sosiedat bira, tin algu den nos ku aparentemente ta anhelá pa haña sa e propósito di bida. Na dado momentu den nos bida, mayoria di nos ta puntra nos mes: ‘Pakiko nos ta na mundu?’

Siensia moderno a lucha pa kontestá e pregunta ei. Ku ki resultado? David P. Barash, un profèser di sikologia i di mundu animal, a deklará: “Ser na bida, riba su mes no tin ningun propósito den e proseso di evolushon.” Pa biólogonan ku ta kere den evolushon, kriaturanan tin un solo propósito: sobrebibí i reprodusí. P’esei Profèser Barash a sugerí: “Den un universo inmenso ku no tin propósito i ku no tin kunes ku hende, ta e responsabilidat di hende pa duna nos bida propósito mediante e desishonnan liber, konsiente i deliberá ku nos ta tuma.”

E Fuente di e Nifikashon i Propósito di Nos Eksistensia

Akaso esei anto ta e úniko propósito di bida, esta, ku kada un di nos ta hasi loke e ke? En bes di laga nos dual rònt sin rumbo den un universo sin propósito òf nifikashon, Beibel a revelá hopi tempu pasá ku nos ta aki na mundu pa un motibu. Nos eksistensia no ta debí na un òf otro aksidente kósmiko. Beibel ta informá nos ku e Kreadó a tuma años pa prepará e tera pa hende su yegada. E no a laga nada na kasualidat. El a hasi sigur ku tur kos tabata “masha bon.” (Génesis 1:31; Isaias 45:18) Dikon? Pasobra Dios tabatin un propósito pa hende.

Sin embargo, un punto interesante ta ku Dios no a predestiná e futuro di kada persona, ni mediante intervenshon divino ni mediante un proseso biológiko. Ounke nos herensia genétiko tin influensia riba nos, pa gran parti nos tin kontròl riba nos akshonnan. Nos tur ta liber pa skohe nos propio rumbo den bida.

Maske kada un di nos por skohe kiko nos ke hasi ku nos bida, lo ta un eror pa laga e Kreadó afó ora nos ta plania nos asuntunan. De echo, hopi hende a deskubrí ku berdadero nifikashon i propósito den bida ta estrechamente ligá ku un relashon ku Dios. E konekshon krusial aki entre Dios i nos propósito den bida ta keda destaká den Dios su nòmber personal, Yehova, ku literalmente ta nifiká, “E Ta Kousa  pa Bira.” (Eksodo 6:3, NW; Salmo 83:18, NW) Es desir, progresivamente Dios ta kumpli ku loke sea e primintí i semper e ta logra su propósito. (Eksodo 3:14, NW; Isaias 55:10, 11) Pensa un ratu riba esei. E nòmber Yehova ta un garantia pa nos tur ku é ta e Fuente original i eterno di propósito ku tin sentido.

Djis rekonosé ku e Kreadó ta eksistí por tin un impakto profundo riba un persona su manera di mira bida. Linet, un mucha muhé di 19 aña, a bisa: “Mirando tur e kosnan maravioso ku Yehova a krea i nan propósito, ta demostrá mi ku mi tambe a ser kreá pa un motibu.” Amber a agregá: “Ora hende ta papia di ‘lo deskonosí,’ esei semper ta pone mi kòrda ku ami sí sa. E prueba ku Yehova ta eksistí ta simplemente e kosnan ku el a traha.” (Romanonan 1:20) Klaru ku ta bon pa rekonosé ku tin un Kreadó, pero kultivá un relashon signifikativo kuné ta un otro kos.

Amistat ku Dios

Atrobe Beibel por yuda. Den su promé kapítulonan Beibel ta duna evidensia kla ku Yehova Dios ta un Tata amoroso. Por ehèmpel, e no a krea Adam ku Eva anto kaba laga pa nan mes rei ta ken e ta. Al kontrario, ku regularidat el a komuniká ku nan. E no a laga nan den Edén pa nan kuenta, miéntras ku el a sigui tras di otro interesnan. Mas bien, Yehova a duna nan instrukshon spesífiko tokante kua ta e mihó manera pa biba. El a duna nan trabou pa hasi ku lo a satisfasé nan, i el a hasi areglo pa nan sigui siña. (Génesis 1:26-30; 2:7-9) Esaki no ta loke bo ta ferwagt di un mayor amoroso i kapas? Awor pensa un ratu ta kiko esei ta nifiká. Denielle a bisa: “E echo ku mi sa ku Yehova a krea e tera i a diseñá nos ku e kapasidat di disfrutá di su kreashon, ta demostrá mi ku e ke pa nos ta felis.”

Mas ku esei, meskos ku kualke bon tata, Yehova ke pa tur su yunan tin un relashon personal kuné. Pa logra esei, Echonan 17:27 ta sigurá nos: “E no ta leu di kada un di nos.” Ki diferensia esei ta hasi? Amber a bisa: “Siña konosé Yehova a duna mi e konfiansa ku nunka mi no ta kompletamente mi so. Sin importá den ki situashon mi ta, semper mi tin un persona ku mi por akudí na dje.” Mas ainda, segun ku bo ta siña konosé Yehova, lo bo haña sa ku e ta bondadoso, hustu i bon. Bo por stèns riba dje. Jeff a bisa: “Ora Yehova a bira mi amigu íntimo, mi tabata sa ku lo no tin ningun otro persona mihó kuné pa yuda mi ora mi ta den pèrtá.”

Desafortunadamente, hende ta bisa hopi kos malu di Yehova. Nan ta kulp’é pa gran parti di sufrimentu humano i pa mal komportashon di hende religioso. Algun di e pió atrosidatnan ku a tuma lugá den historia ta ser atribuí na Yehova. Pero Deuteronomio 32:4 i 5 [NW] ta splika: “Tur su kamindanan ta hustisia. . . . Nan a obra ruinosamente riba nan propio kuenta; nan no ta su yunan, e defekto ta di nan mes.” P’esei nos ta obligá na investigá e echonan pa nos mes.—Deuteronomio 30:19, 20.

Dios Su Propósito Kumplí

Sin embargo, no ta importá kiko nos disidí di hasi. Nada lo no stòp Dios di kumpli plenamente ku su propósito pa e tera i pa humanidat. Al fin i al kabo, t’e ta e Kreadó. Kiko anto ta e propósito ei? Hesukristu a referí na dje den su Sermon Riba Seru ora el a bisa: “Bendishoná ta esnan humilde, pasobra nan lo heredá e tera.” Mas despues el a indiká na apòstel Juan ku Dios ta determiná pa “destruí esnan ku ta destruí e tera.” (Mateo 5:5; Revelashon 11:18) Komo ku Hesus tabata huntu ku Dios durante kreashon, e sa ku for di prinsipio Dios su propósito tabata p’e tin un famia humano perfekto, bibando riba tera pa semper den un paradeis. (Génesis 1:26, 27; Juan 1:1-3) I Dios no ta kambia. (Malakias 3:6) Dios ta primintí nos: “Siguramente, manera mi a pensa, asina a sosodé, i manera mi a plania, asina lo pasa.”—Isaias 14:24.

Den nos tempu, Yehova ya a kuminsá pone e fundeshi kaba di un komunidat uní ku ta  basá riba amor pa Dios i pa próhimo, i no riba golosidat i interes propio manera gran parti di nos mundu awe. (Juan 13:35; Efesionan 4:15, 16; Filipensenan 2:1-4) Esaki ta un asosiashon boluntario di personanan progresivo i sumamente motivá pa kumpli ku nan propósito, esta, di prediká e bon notisia di e binidero Reino di Dios promé ku fin di e sistema di kosnan aki. (Mateo 24:14; 28:19, 20) Den mas ku 230 pais, mas ku seis mion kristian ya kaba ta adorá Dios huntu den un hermandat uní, amoroso i internashonal.

Duna Bo Bida Propósito

Si bo ta buskando mayor propósito den bo bida, ta bon pa bo sa ku Yehova Dios ta invitá bo pa asosiá ku su pueblo—su “nashon hustu”—awor. (Isaias 26:2) Pero kisas bo ta puntra bo mes: ‘Kon bida ta den e komunidat kristian aki? Di bèrdat lo mi ke ta parti di esei?’ Skucha kiko algun hóben tin di bisa:

Quentin: “E kongregashon ta mi refugio kontra mundu. Realisando ku Yehova ta enbolbí den mi bida ta yuda mi mira ku e ta eksistí i ke pa mi ta felis.”

Jeff: “E kongregashon ta e mihó lugá ku mi por bai pa haña animashon. Mi rumannan spiritual ta einan, i nan ta duna mi sosten i elogio. Di bèrdat nan ta mi famia.”

Linet: “No tin nada ku por para banda di e goso di mira un hende aseptá e bèrdat di Beibel i tuma e desishon pa sirbi Yehova. Esaki ta duna mi gran satisfakshon den bida.”

Cody: “Sin Yehova, mi bida lo no ta bal nada. Lo mi ta dual rònt sin rumbo meskos ku hopi hende, di un kos pa otro, en buska di felisidat i sin por hañ’é. Na lugá di esei, Yehova a duna mi e privilegio inkreibel di por tin un amistat kuné, i esei ta duna mi bida propósito.”

Dikon bo no ta investigá esaki pa bo mes? Lo bo deskubrí ku dor di hala serka bo Kreadó, Yehova Dios, bo bida ta haña berdadero propósito.

[Plachinan na página 31]

Amistat ku Dios ta duna bo bida propósito

[Rekonosementu pa Potrèt na página 29]

Potrèt di NASA