Pregunta di Lektor

Kiko Hesus tabata kier men ora el a bisa su disipelnan: “Mi a mira Satanas kai for di shelu manera [werlek]”?

Hesus a kaba di skohe 70 disipel, i el “a manda nan dos-dos su dilanti pa tur stat i lugá, kaminda e mes tabata pa bai.” Ora e setentanan a bolbe bèk, nan tabata gososo dor ku nan tabatin éksito ku nan asignashon. Nan a bisa: “Señor, asta e demoñonan ta sometí na nos den bo nòmber.” Ta na e momentu ei Hesus a bisa: “Mi a mira Satanas kai for di shelu manera [werlek].”—Lukas 10:1, 17, 18.

Na promé instante por parse ku Hesus tabata referí na un suseso ku a tuma lugá kaba. Sin embargo, 60 aña despues ku Hesus a bisa loke tin skirbí aki riba, e biehitu apòstel Juan a usa palabranan similar ora el a skirbi: “E gran dragon a wòrdu tirá abou, e kolebra di antigwedat, kende ta wòrdu yamá Diabel i Satanas, kende ta gaña henter mundu; el a wòrdu tirá abou riba tera, i su angelnan a wòrdu tirá abou huntu kuné.”—Revelashon 12:9.

Ora ku Juan a skirbi e palabranan ei, ainda Satanas tabata biba den shelu. Kon nos por sa esei? Pasobra Revelashon ta un buki di profesia, no di historia. (Revelashon 1:1) Pues, den e dia di Juan, Satanas no a wòrdu tirá riba tera ainda. De echo, tin evidensia ku esaki a sosodé djis despues ku Hesus a wòrdu entronisá komo Rei di e Reino di Dios na 1914. *—Revelashon 12:1-10.

Dikon anto Hesus a papia komo si fuera ku Satanas su ekspulshon for di shelu a tuma lugá kaba? Tin eksperto ta bisa ku Hesus a reprendé su disipelnan pa motibu ku nan a reflehá un orguyo inapropiá. Nan ta kere ku den un sentido Hesus a bisa: ‘Boso a vense e demoñonan, pero no bira arogante. Satanas a bira orguyoso, i esei a hiba na su kaida.’

Nos no por bisa ku tur siguridat, pero muy probablemente Hesus a alegrá ku su disipelnan i a referí na Satanas su kaida den futuro. Mas ku kualke un di su disipelnan, Hesus tabata bon konsiente di Diabel su intenshon malisioso. Imaginá e goso ku Hesus a sinti ora el a tende ku su disipelnan humano imperfekto tabatin dominio riba e demoñonan poderoso! E kontròl aki riba e demoñonan ta duna djis un idea ta kiko lo a bai sosodé ora ku Hesus, komo Miguel e arkangel, lo a bringa kontra Satanas i sak’é for di shelu i tir’é riba tera.

Ora Hesus a bisa ku el a mira Satanas “kai” for di shelu, klaramente e tabata enfatisando ku Satanas lo a kai sigur. Esaki ta e kaso ku otro profesianan di Beibel ku ta papia di susesonan ku lo tuma lugá den futuro pero ku ta skirbí komo si fuera nan a tuma lugá kaba. Por ehèmpel, tuma nota kon e profesia tokante e Mesias na Isaias 52:13–53:12 ta usa tantu verbonan di tempu pasado komo futuro. Probablemente di e manera aki Hesus a mustra ku e tabatin konfiansa ku Satanas su kaida for di shelu lo a tuma lugá na armonia ku e propósito di Su Tata. Tambe Hesus tabatin sigur ku na Dios su debido tempu, Satanas i su demoñonan lo wòrdu tirá den abismo pa despues haña destrukshon pa semper.—Romanonan 16:20; Hebreonan 2:14; Revelashon 20:1-3, 7-10.

[Nota]