Yehova Ta Revelá Su Gloria n’e Humildenan
Yehova Ta Revelá Su Gloria n’e Humildenan
“E rekompensa di humildat i e temor di SEÑOR ta rikesa, onor i bida.”—Proverbionan 22:4.
1, 2. (a) Kon e buki di Echonan ta mustra ku Esteban tabata “un hòmber yen di fe i di spiritu santu”? (b) Ki prueba tin ku Esteban tabata humilde?
ESTEBAN tabata “un hòmber yen di fe i di spiritu santu.” Tambe e tabata “yen di grasia i di poder” [NW]. Komo un di e promé disipelnan di Hesus, el a hasi maravianan i milagernan grandi den e pueblo. Na un okashon, algun hòmber a lanta pa diskutí ku Esteban, sin embargo, “nan no tabata por a resistí e sabiduria i e spiritu pa medio di kual e tabata papia.” (Echonan 6:5, 8-10) Klaramente Esteban tabata un bon studiante di e Palabra di Dios, i el a defend’é maestralmente dilanti di e lidernan religioso hudiu di su tempu. E testimonio detayá ku Esteban a duna, ku nos ta haña na Echonan kapítulo 7, ta prueba ku e tabata intensamente interesá den Dios su propósito ku tabata ser revelá gradualmente.
2 Esteban tabata humilde. E tabata distinto for di e lidernan religioso ei, kende debí na nan puesto i konosementu, a sinti nan mas superior ku e pueblo komun. (Mateo 23:2-7; Juan 7:49) Ounke Esteban tabata versá den e Skritura, el a keda masha kontentu ku e tarea di “sirbi mesa” ya asina e apòstelnan por a dediká nan mes “na orashon i na e ministerio di e palabra.” Esteban tabatin un bon nòmber serka e rumannan i ta p’esei nan a skoh’é komo un di e shete hòmbernan di bon reputashon ku lo mester a atendé e partimentu aki di e kuminda di tur dia. Humildemente el a aseptá e tarea.—Echonan 6:1-6.
3. Ki demostrashon sobresaliente di Dios su bondat inmeresí Esteban a eksperensiá?
3 Yehova a tuma nota di Esteban su karakter humilde, kombiná ku su integridat i interes den asuntunan relashoná ku Dios. Ora ku Esteban tabata duna testimonio na e multitut di lidernan hudiu rabiá den e Konsilio, su opositornan “a mira su kara manera kara di angel.” (Echonan 6:15) Su ekspreshon di kara tabata manera di angel, un mensahero di Dios, ku tabatin e pas ku ta bin di e Dios di gloria, Yehova. Despues di duna testimonio ku kurashi na e miembronan di e Konsilio, Esteban a eksperensiá un demostrashon sobresaliente di Dios su bondat inmeresí. “Siendo yen di spiritu santu, el a fiha su bista na shelu i a mira e gloria di Dios, i Hesus pará na man drechi di Dios.” (Echonan 7:55) Pa Esteban, e vishon espektakular aki a reafirmá Hesus su posishon komo Yu di Dios i Mesias. E vishon a duna humilde Esteban fortalesa i a sigur’é ku e tabatin Yehova su aprobashon.
4. Na ken Yehova ta revelá su gloria?
4 Manera e vishon ku Esteban a risibí ta mustra, Yehova ta revelá su gloria i su propósito na personanan temeroso di Dios ku ta humilde i ku ta apresiá nan amistat kuné. Beibel ta bisa: “E rekompensa di humildat i e temor di SEÑOR ta rikesa, onor [òf, “gloria,” NW] i bida.” (Proverbionan 22:4) P’esei ta masha krusial pa nos komprondé kiko berdadero humildat ta, kon nos por kultivá e kualidat importante aki, i kon nos ta benefisiá dor di despleg’é den tur aspekto di bida.
Humildat—Un Kualidat Ku Dios Ta Desplegá
5, 6. (a) Kiko ta humildat? (b) Kon Yehova a desplegá humildat? (c) Ki efekto Yehova su humildat mester tin riba nos?
5 Kisas pa algun hende ta un sorpresa ku Yehova Dios, e persona di mas elevá i glorioso den universo, ta e ehèmpel di mas grandi di humildat. Rei David a bisa Yehova: “Bo a duna mi e eskudo di bo salbashon, i bo man drechi ta sostené mi, i bo gentilesa [òf, “humildat,” NW] ta hasi mi grandi.” (Salmo 18:35) Ora David a deskribí Yehova komo humilde, el a usa un palabra hebreo ku tin e nifikashon básiko di “baha kabes.” Fuera di e palabra “humildat,” tin mas ekspreshon ligá ku e palabra básiko ei, entre otro, “mansedumbre,” i ‘baha bo mes na nivel di otro.’ Pues Yehova a desplegá humildat ora ku el a baha su mes pa trata ku e hòmber imperfekto David i a us’é komo Su rei representativo. Manera e título riba Salmo 18 ta mustra, Yehova a protehá i sostené David, i a libr’é “for di man di tur su enemigunan i for di man di Saul.” David na su turno, tabata sa ku kualke grandesa òf gloria ku lo e por logra komo rei a dependé di si Yehova ta aktua humildemente na su fabor. E realisashon aki a yuda David keda humilde.
6 Kon nos por apliká esaki? Yehova a haña ta bon pa siña nos e bèrdat, i podisé el a duna nos privilegionan spesial di sirbishi mediante su organisashon, òf el a usa nos den un òf otro manera pa kumpli ku su boluntat. Kon tur esaki mester laga nos sinti? Akaso esaki no mester hasi nos humilde? Nos no mester ta gradisidu pa Yehova su humildat i evitá di halsa nos mes, lokual siguramente lo hiba na desaster?—Proverbionan 16:18; 29:23.
7, 8. (a) Kon Yehova su humildat a bin dilanti den su trato ku Manasés? (b) Den ki manera tantu Yehova, komo Manasés, a pone un ehèmpel di humildat ku nos por imitá?
7 Yehova no solamente a demostrá gran humildat dor di trata ku hende imperfekto, sino ku tambe el a demostrá di ta dispuesto pa mustra miserikòrdia na esnan di kondishon humilde. E ta asta lanta òf halsa, esnan ku humiá nan mes. (Salmo 113:4-7) Tuma por ehèmpel e kaso di Rei Manasés di Huda. El a hasi mal uso di su posishon privilegiá komo rei pa promové adorashon falsu i “a hasi hopi maldat den bista di SEÑOR i a provok’é na rabia.” (2 Krónikanan 33:6) Finalmente, Yehova a kastigá Manasés dor di permití rei di Asiria kit’é for di riba trono. Den prizon, Manasés “a roga na SEÑOR su Dios i a humiá su mes grandemente,” di manera ku Yehova a pon’é atrobe riba e trono na Yerusalèm, i Manasés ‘a rekonosé ku Yehova ta e Dios berdadero.’ (2 Krónikanan 33:11-13) Sí, na final, Manasés su humildat a agradá Yehova, ku na su turno a demostrá humildat dor di pordoná Manasés i reinstal’é komo rei.
8 E echo ku Yehova tabata dispuesto pa pordoná, i e aktitut arepentí di Manasés, ta sirbi komo lèsnan importante di humildat pa nos. Nos mester kòrda semper ku e manera ku nos ta trata hende ku kisas a ofendé nos i e aktitut ku nos ta desplegá ora nos peka, por influensiá e manera ku Yehova ta trata ku nos. Si di buena gana nos ta pordoná e erornan di otro hende i humildemente ta atmití nos erornan, e ora ei Yehova por mustra miserikòrdia na nos.—Mateo 5:23, 24; 6:12.
Gloria Divino Revelá na Esnan Humilde
9. Humildat ta un señal di debilidat? Splika.
9 Sin embargo, ta un ekibokashon pa pensa ku humildat i e kualidatnan ligá kuné ta un señal di debilidat òf ta e tendensia di aprobá loke ta robes. Manera e Santu Skritura ta proba, Yehova ta humilde, pero e ta desplegá indignashon hustu i poder ekstraordinario ora ta nesesario. Komo ku Yehova ta humilde, e ta duna atenshon faborabel, òf konsiderashon spesial, na hende humilde, miéntras ku e ta distansiá su mes for di hende orguyoso. (Salmo 138:6) Kon Yehova a mustra konsiderashon spesial na su sirbidónan humilde?
10. Manera 1 Korintionan 2:6-10 ta indiká, kiko Yehova ta revelá na hende humilde?
10 Na Yehova su debido tempu i mediante e kanal di komunikashon ku el a skohe, el a revelá na hende humilde detayenan relashoná ku e realisashon di su propósito. E detayenan glorioso aki ta keda skondí pa hende ku orguyosamente ta stèns riba sabiduria i pensamentu humano, òf ku kabesuramente ta pega na nan. (1 Korintionan 2:6-10) Pero komo ku hende humilde a risibí un komprondementu eksakto di Yehova su propósito, nan ta sinti nan motivá pa engrandesé Yehova ya ku nan a haña mas apresio ainda pa su gloria impreshonante.
11. Den promé siglo, kon algun hende a mustra falta di humildat, i kon esaki a perhudiká nan?
11 Den promé siglo, hopi hende, entre nan algun ku a pretendé di ta kristian, a mustra falta di humildat i a trompeká pa motibu di loke apòstel Pablo a revelá na nan tokante e propósito di Dios. Pablo a bira “apòstel di e paganonan,” pero esei no tabata debí na su nashonalidat, edukashon, edat òf registro largu di bon obra. (Romanonan 11:13) E kosnan ei ta loke hopi bes personanan ku tin nan mente fihá riba kos karnal ta konsiderá komo e faktornan ku ta determiná ken Yehova lo usa komo su instrumento. (1 Korintionan 1:26-29; 3:1; Kolosensenan 2:18) Sin embargo, ta Yehova a skohe Pablo, na armonia ku Su bondat inmeresí i propósito hustu. (1 Korintionan 15:8-10) Tantu e personanan ku Pablo a deskribí komo “super-apòstelnan,” komo otro opositor, a nenga di aseptá Pablo i su rasonamentu for di e Skritura. Nan falta di humildat a stroba nan di siña konosé i komprondé e manera glorioso ku Yehova ta kumpli ku su propósito. Laga nos nunka balotá òf kore husga esnan ku Yehova a skohe pa kumpli ku su boluntat.—2 Korintionan 11:4-6.
12. Kon e ehèmpel di Moisés ta mustra ku Yehova ta faboresé hende ku ta humilde?
12 Di otro banda, tin hopi ehèmpel bíbliko ku ta enfatisá kon hende humilde ta haña e privilegio pa mira maske ta un punta di e gloria di Dios. Moisés, kende “tabata masha humilde,” a mira e gloria di Dios i tabatin un amistat íntimo ku Dios. (Numbernan 12:3) Moisés a pasa 40 aña komo un humilde wardadó di karné, i mayor parti di e tempu ei el a pasa probablemente riba e Península di Arabia. E Kreadó a faboresé e hòmber humilde aki den hopi manera. (Eksodo 6:12, 30) Ku e respaldo di Yehova, Moisés a bira bosero i organisadó prinsipal di e nashon di Israel. Moisés tabatin komunikashon kara-kara ku Dios, na moda di papia. Mediante un vishon, el a mira e “aparensia di SEÑOR.” (Numbernan 12:7, 8; Eksodo 24:10, 11, NW) E hendenan ku a aseptá e humilde sirbidó i representante aki di Dios tambe a haña bendishon. Di igual manera, nos tambe lo haña bendishon si nos aseptá i obedesé e profeta mas grandi ku Moisés, esta, Hesus, i “e esklabo fiel i prudente” ku Hesus a apuntá.—Mateo 24:45, 46; Echonan 3:22.
13. Kon Yehova su gloria a keda revelá na wardadónan humilde den promé siglo?
13 Ta riba ken ‘e gloria di Yehova a resplandesé’ na momentu ku un angel a anunsiá e bon notisia di e nasementu di “un Salbadó, kende ta Kristu e Señor”? No tabata riba e lidernan religioso arogante ni riba e hendenan den puesto haltu, sino riba e humilde wardadónan di karné ku “tabata keda den e sabananan, i ku anochi tabata tene warda riba nan tou di karné.” (Lukas 2:8-11) E personanan aki no a haña masha rèspèt pa nan abilidat ni pa nan trabou. Sin embargo, ta nan tabata esnan ku Yehova a tuma nota di dje i a skohe pa notifiká promé tokante e nasementu di e Mesias. Sí, Yehova ta revelá su gloria na hende humilde i temeroso di Dios.
14. Kon Dios ta rekompensá hende ku ta humilde?
14 Kiko e ehèmpelnan aki ta siña nos? Nan ta mustra nos ku Yehova ta faboresé i revelá konosementu i komprondementu di su propósito na hende humilde. E ta skohe personanan ku kisas no tin e kualifikashonnan ku sierto hende ta ferwagt, i ta usa nan komo su medio pa komuniká su propósito glorioso na otronan. Esaki mester motivá nos pa sigui akudí na Yehova, na su Palabra profétiko i na su organisashon pa haña guia. Nos por tin sigur ku Yehova lo mantené su humilde sirbidónan informá di e manera ku su propósito glorioso ta desaroyá. Profeta Amos a deklará: “Siguramente, SEÑOR Dios no ta hasi nada, sin ku e revelá su konseho sekreto na su sirbidónan, e profetanan.”—Amos 3:7.
Kultivá Humildat i Risibí Dios Su Aprobashon
15. Dikon nos tin ku hasi esfuerso pa keda humilde, i kon e kaso di Rei Saul di Israel ta enfatisá esaki?
15 Pa nos tin Dios su aprobashon eterno, nos mester keda humilde. Unabes humilde no ta nifiká semper humilde. Ta posibel pa un persona pèrdè su humildat i entregá na orguyo i kuminsá halsá su mes, lokual ta hiba na aktonan di arogansia i desaster. Esei ta presis loke a pasa ku Saul, e promé persona ungí komo rei di Israel. Na prinsipio ora a skoh’é, e ‘tabata chikitu den su mes bista.’ (1 Samuel 15:17) Sin embargo, despues di a goberná pa apénas dos aña, el a aktua ku arogansia. El a pasa Yehova su areglo di ofresé sakrifisio mediante profeta Samuel por haltu, i a bin ku èksküs pa hustifiká dikon el a tuma asuntunan den su mes man. (1 Samuel 13:1, 8-14) Esaki tabata e komienso di un seri di akontesimentu ku a revelá inekibokablemente su falta di humildat. Komo resultado Saul a pèrdè Dios su spiritu i aprobashon, lokual ku tempu a hiba na su morto bergonsoso. (1 Samuel 15:3-19, 26; 28:6; 31:4) E lès ta bon kla: Nos tin ku hasi esfuerso pa keda humilde i sumiso, i dominá e sintimentu di ku nos ta masha importante. Di e manera ei nos ta evitá aktonan di arogansia ku ta resultá den Yehova su desaprobashon.
16. Kon meditando riba nos relashon ku Yehova i ku nos próhimo por yuda nos kultivá humildat?
16 Ounke humildat no ta ser menshoná komo un parti di e fruta di Dios su spiritu, e ta un kualidat ku Dios ta desplegá i ku nos mester kultivá. (Galationan 5:22, 23; Kolosensenan 3:10, 12) Siendo ku humildat ta enserá un kondishon di nos mente—esta, kon nos ta mira nos mes i otro hende—nos tin ku hasi un esfuerso konsiente pa nos por kultiv’é. Un kos ku por yuda nos keda humilde ta di rasoná i meditá riba nos relashon ku Yehova i ku nos próhimo. Den bista di Dios, tur karni imperfekto ta manera yerba bèrdè ku ta krese pa un periodo di tempu, despues ta seka i marchitá. Hende ta manera simpel dalakochi (òf tirakochi) den un kunuku. (Isaias 40:6, 7, 22) Akaso un sprichi di yerba tin motibu pa e ta orguyoso djis pasobra e ta un tiki mas largu ku e otro sprichinan? Un dalakochi tin motibu pa broma ku su abilidat djis pasobra e por bula un tiki mas leu ku e otro dalakochinan? Djis pensa esei so ta apsurdo. P’esei apòstel Pablo a rekordá su kompañeronan kristian: “Ta ken ta konsiderá bo superior? I kiko bo tin ku bo no a risibí? Ma si bo a risibié, pakiko bo ta gaba komo si fuera bo no a risibié?” (1 Korintionan 4:7) Meditando riba tekstonan bíbliko manera esaki por yuda nos kultivá i desplegá humildat.
17. Kiko a yuda profeta Daniel kultivá humildat, i kiko por yuda nos hasi meskos?
17 Un angel a deklará ku profeta hebreo Daniel tabata un “hòmber masha stimá” den bista di Dios dor ku el a “humiá” su mes, esta, pa motibu di su humildat. (Daniel 10:11, 12) Kiko a yuda Daniel kultivá humildat? Na promé lugá, el a desplegá un konfiansa total den Yehova, i regularmente a akudí na dje den orashon. (Daniel 6:10, 11) Ademas, Daniel a studia e Palabra di Dios diligentemente i ku e motivashon korekto, lokual a yud’é mantené un bista bon kla di Dios su propósito glorioso. Tambe Daniel tabata dispuesto pa atmití su propio faltanan, no solamente esnan di su pueblo. I e tabata realmente interesá den promové Dios su hustisia, no su mes hustisia. (Daniel 9:2, 5, 7) Nos lo por siña for di Daniel su ehèmpel sobresaliente i hasi esfuerso pa kultivá i demostrá humildat den tur aspekto di nos bida?
18. Ki gloria ta spera hende ku ta desplegá humildat awe?
18 Proverbionan 22:4 ta deklará: “E rekompensa di humildat i e temor di SEÑOR ta rikesa, onor i bida.” Sí, Yehova ta faboresé esnan ku ta humilde, i e resultado ta gloria òf onor i bida. E salmista Asaf a hera di bandoná su sirbishi na Dios, pero despues ku el a laga Yehova reahustá su manera di pensa, el a rekonosé humildemente: “Ku bo konseho lo bo guia mi, i despues risibí mi den gloria.” (Salmo 73:24) Kon esaki ta apliká awe? Ki gloria ta spera esnan ku ta desplegá humildat? Fuera di disfrutá di un amistat privilegiá i bendishoná ku Yehova, nan por antisipá di mira kumplimentu di e palabranan inspirá aki di Rei David: “E humildenan lo heredá e tera, i lo deleitá nan mes den pas abundante.” Esei en bèrdat ta un futuro glorioso!—Salmo 37:11.
Bo Ta Kòrda?
• Kon Esteban ta un ehèmpel di un persona humilde na ken Yehova a revelá Su gloria?
• Den ki maneranan Yehova Dios a desplegá humildat?
• Ki ehèmpelnan ta mustra ku Yehova ta revelá su gloria na hende humilde?
• Kon e ehèmpel di Daniel por yuda nos kultivá humildat?
[Preguntanan di Estudio]
[Kuadro na página 12]
Ku Konvikshon Firme Pero Humilde
Na aña 1919 Studiantenan di Beibel (konosí awe komo Testigunan di Yehova) a tene un kongreso na Cedar Point, Ohio, Merka. E tempu ei J. F. Rutherford di 50 aña tabata supervisá e trabou di prediká, i gustosamente el a ofresé pa fungi komo kargadó di maleta i a eskoltá e delegadonan di kongreso na nan kuartonan. Riba e último dia di e kongreso, el a kousa gran emoshon serka e 7.000 hendenan presente ku e palabranan: “Boso ta embahador di e Rei di reinan i Señor di señornan, anunsiando na hende . . . e glorioso reino di nos Señor.” Ounke Ruman Rutherford tabata un hòmber ku konvikshon firme, konosí pa su manera di papia ku kurashi i sin komprometé loke e tabata kere ta e bèrdat, e tabata tambe berdaderamente humilde dilanti di Dios. Esei a keda reflehá hopi bes den e orashonnan ku e tabata hasi na Bètel durante e programa di adorashon di mainta.
[Plachi na página 9]
Esteban, versá den e Skritura, humildemente a parti kuminda
[Plachi na página 10]
Manasés su humildat a agradá Yehova
[Plachi na página 12]
Kiko a hasi Daniel un “hòmber masha stimá”?