Bo Ta Kòrda?

Bo a disfrutá di e edishonnan resien di E Toren di Vigilansia? Wèl, wak si bo por kontestá e siguiente preguntanan:

• Kiko e Políglota Complutense tabata, i dikon e tabata importante?

E tabata un Beibel multilingwe ku nan a imprimí. El a kontené e mihó teksto ku tabatin disponibel e tempu ei na hebreo, griego i latin, huntu ku algun pasashi na arameo, kada un den kolumnanan paralelo banda di otro. E Beibel políglota òf multilingwe aki tabata un adelanto grandi den produsí un teksto mas eksakto di e idiomanan original.—15/4, página 28-31.

• Kon hende por hasi Dios kontentu?

Komo un persona bibu i real, Yehova por pensa i aktua i e tin sintimentu. E ta “e Dios felis” i e tin deleite den kumpli ku su propósito. (1 Timoteo 1:11, NW; Salmo 104:31) Mas nos siña konosé Dios su sintimentunan, mas konsiente nos lo bira di loke nos por hasi pa alegrá su kurason.—15/5, página 4-7.

• Dikon David a permití pa su kasá Mikal tin un ídolo òf imágen di terafin?

Ora ku Rei Saul a traha un kòmplòt pa mata David, Mikal a yud’é skapa dor di pone un imágen riba kama ku aparentemente tabatin forma di un hende. Mikal kisas tabatin un imágen di terafin pasobra su kurason no tabata kompletu pa ku Dios. Podisé David no tabata sa tokante e imágen di terafin òf el a permitié pasobra Mikal tabata yu muhé di Rei Saul. (1 Krónikanan 16:25, 26)—1/6, página 29.

• Dios su dekretonan tokante sanger a dirigí atenshon na kua bèrdat básiko?

Mediante loke Dios a deklará despues di Diluvio, den e Lei di Moisés i den e dekreto ku tin na Echonan 15:28 i 29, el a dirigí atenshon na e sakrifisio ku a enserá Hesus su sanger dramá. Ta solamente pa medio di e sanger ei nos por haña pordon i tin pas ku Dios. (Kolosensenan 1:20, NW)—15/6, página 14-19.

• Kuantu milager di Hesus Beibel ta menshoná?

E Evangelionan ta referí na 35 milager di Hesus. Pero, e kantidat eksakto di milager ku Hesus a hasi, entre nan esnan ku no ta ser menshoná, Beibel no ta revelá. (Mateo 14:14)—15/7, página 5.