Hende Tin Mester di Bon Konseho?

AWENDIA, hopi hende ta kere ku nan mes por distinguí bon for di malu i ku nan tin derechi di hasi loke nan ke. Otronan ta bisa ku tur kos mag, basta e persona mes ta sintié bon. Matrimonio i bida di famia, areglonan ku pa hopi tempu hende a konsiderá fundeshi di e sosiedat humano, ta ser afektá drástikamente.—Génesis 3:5.

Tuma por ehèmpel, Verónica, * kende ta biba na Mexico. El a konta: “Djis promé ku nos hasi 15 aña kasá, mi kasá a bisa mi ku e tin un otro muhé. El a bisa mi ku e muhé ei ta mas yòn i ta hasié mas felis, p’esei lo e no lag’é. E pensamentu ku mi mihó amigu lo no ta na mi lado mas pa kompañá mi, a shòk mi. Ántes mi tabata pensa ku e morto di un ser kerí ta kousa e doló di mas grandi. Pero pa mi, adulterio tabata asta mas pió, pasobra no solamente mi a pèrdè e persona ku mi tabata stima profundamente, ma huntu ku esei e persona aki a sigui hasi kosnan ku ta hasi mi doló.”

Un otro kaso ta e situashon di un yònkuman di 22 aña ku ya kaba ta divorsiá i tin un yu hòmber pero ku no ta dispuesto pa karga su responsabilidatnan komo tata. E ta stèns ku ta su mama mester perkurá p’e i pa su yu. Si e mama no kumpli ku tur su eksigensianan, e ta bira furioso i ta zundr’é i ofend’é, meskos ku un yu malkriá. E mama no sa kiko pa hasi ora e yu ta komport’é di e manera ofensivo aki.

E kasonan aki no ta úniko. Tur kaminda tin mas i mas kasonan di separashon legal i divorsio. Hopi mucha ta mira kon un di nan mayornan ta bandoná nan hogar pa kuminsá un bida nobo. Tin hóbennan ku a pèrdè tur rèspèt pa otro hende, asta pa nan mayornan, i  ta komportá nan mes di un manera ku den pasado tabata kasi inimaginabel. Den hopi pais, a bira basta komun ku muchanan ta eksperimentá ku sèks, usa droga, ataká hende i asesiná maestronan òf mayornan. I podisé bo a ripará ku no ta riba e tereno di kriamentu di yu i matrimonio so hende ta konfrontá difikultat den e mundu djawe.

Segun ku nos ta mira e desaroyonan aki, podisé nos ta puntra nos mes ta kiko a sosodé ku e sosiedat humano. Si hende realmente por distinguí bon for di malu, kon bin tin asina tantu problema sin solushon? Hende tin mester di bon konseho? Tin un fuente di tal bon konseho, unu ku a resultá di ta konfiabel? Ounke hopi hende ta bisa ku nan ta kere den Dios i den su Palabra skirbí, no ta parse ku esaki tin masha influensia riba e desishonnan ku nan ta tuma. Pero ki benefisionan nos por saka ora nos buska i optené konseho for di Dios? Laga nos konsiderá esei den e siguiente artíkulo.

[Nota]