Kansá, Pero Nos No Ta Entregá
Kansá, Pero Nos No Ta Entregá
“[Yehova] e Kreadó di e finnan di tera . . . ta duna forsa na esun kansá, i e ta oumentá poder pa esun ku ta falta poder.” —Isaias 40:28, 29.
1, 2. (a) Ki invitashon atraktivo ta ser ekstendé na tur ku ke praktiká adorashon puru? (b) Kiko por ta un peliger serio pa nos spiritualidat?
KOMO disipelnan di Hesus, nos ta bon konosí ku su invitashon atraktivo: “Bin serka mi tur ku ta kansá i kargá, i lo mi duna boso sosiegu. . . . Pasobra mi yugo ta suave i mi karga ta lihé.” (Mateo 11:28-30) Tambe Beibel ta ofresé kristiannan ‘tempunan di refreskamentu for di e presensia di Yehova.’ (Echonan 3:19) Abo mes tambe sin duda a eksperensiá personalmente e efektonan refreskante di siña bèrdatnan bíbliko, di tin un speransa briante pa futuro i di apliká e prinsipionan di Yehova den bo bida.
2 Sin embargo, algun adoradó di Yehova ta pasa den periodonan di kansansio emoshonal. Den algun kaso e periodo di desanimashon ta kòrtiku. Pero den otro kasonan e sintimentu di ta agotá, por dura pa periodonan largu. Ku pasamentu di tempu, algun ruman por kuminsá sinti ku nan responsabilidatnan kristian a bira un peso en bes di un karga refreskante manera Hesus a primintí. Tal sintimentunan negativo por ta un peliger serio pa un kristian su relashon ku Yehova.
3. Dikon Hesus a ofresé e konseho ku nos ta haña na Juan 14:1?
3 Poko promé ku nan a arestá Hesus i ehekut’é, el a bisa su disipelnan: “No laga boso kurason bira intrankil; kere den Dios, kere tambe den mi.” (Juan 14:1) Hesus a bisa e palabranan aki pasobra e apòstelnan tabata a punto di konfrontá susesonan trágiko. Despues lo a bin un ola di persekushon. Hesus tabata sa ku su apòstelnan lo por a trompeká di puru desanimashon. (Juan 16:1) Si e apòstelnan no kontrolá nan tristesa, esei lo por a pone nan bira spiritualmente débil i pèrdè nan konfiansa den Yehova. Esaki ta konta tambe pa kristiannan djawe. Un periodo largu di desanimashon por kousa hopi tristesa i angustia, i nos kurason por bira pisá. (Jeremias 8:18) E persona ku nos ta di paden por bira débil. Bou di e preshon aki, nos por paralisá emoshonalmente i spiritualmente, i asta pèrdè nos deseo di adorá Yehova.
4. Kiko nos por hasi pa nos kurason figurativo no kansa i entregá?
4 P’esei e siguiente konseho bíbliko ta na su lugá: “Warda bo kurason riba tur kos, pasobra e ta e fuente di bida.” (Proverbionan 4:23) Beibel ta ofresé konseho práktiko ku ta yuda nos protehá nos kurason figurativo kontra desanimashon i kansansio spiritual. Sin embargo, promé nos tin ku identifiká e kousa di nos kansansio.
Kristianismo No Ta Opresivo
5. Kiko ta parse un kontradikshon relashoná ku ser un disipel kristian?
5 Ta bèrdat ku ser un kristian ta rekerí esfuerso vigoroso. (Lukas 13:24) Hesus a asta deklará: “Ken ku no karga su staka di tormento i sigui mi no por ta mi disipel.” (Lukas 14:27, NW) Na promé instante e palabranan aki por parse di ta kontradisí loke Hesus a bisa tokante ku su karga ta lihé i ta duna sosiegu. Pero en realidat e no ta un kontradikshon.
6, 7. Dikon nos por bisa ku nos forma di adorashon no ta kousa kansansio?
6 Ounke nos kurpa ta kansa ora nos ta hasi esfuerso vigoroso i ta traha duru, tòg esei por duna nos satisfakshon i laga nos sinti nos refreská ora nos ta hasié pa un bon kousa. (Eklesiastés 3:13, 22) I no por tin mihó kousa ku kompartí bèrdatnan bíbliko maravioso ku nos próhimo. Ademas, nos lucha pa biba na armonia ku Dios su normanan moral haltu no ta nada na komparashon ku e benefisionan ku nos ta risibí dor di hasi esei. (Proverbionan 2:10-20) Asta ora hende ta persiguí nos, nos ta konsider’é un onor pa sufri pa kousa di e Reino di Dios.—1 Pedro 4:14.
7 Hesus su karga en bèrdat ta refreskante, foral ora kompar’é ku e skuridat spiritual di e hendenan ku ainda ta bou di e yugo di religion falsu. Dios ta stima nos tiernamente i e no ta eksigí kosnan irasonabel for di nos. Yehova “su mandamentunan no ta pisá.” (1 Juan 5:3) Kristianismo berdadero, manera e Skritura ta deskribié, no ta opresivo. Pues, klaramente nos forma di adorashon no ta kousa kansansio i desanimashon.
“Pone un Banda Tur Strobashon”
8. Kiko hopi bes ta e kousa di kansansio spiritual?
8 Kualke kansansio spiritual ku nos ta sinti, hopi bes ta debí na e peso èkstra ku e sistema di kosnan korupto aki ta pone riba nos. Komo ku “henter mundu ta bou di kontròl di e malbado,” nos ta rondoná pa forsanan negativo ku por kansa nos i kaba ku nos balansa kristian. (1 Juan 5:19) Aktividatnan innesesario por kompliká i stroba nos rutina kristian. E pesonan èkstra aki por bira un karga pisá pa nos i asta kibra nos spiritu. Apropiadamente, Beibel ta konsehá nos pa “pone un banda tur strobashon.”—Hebreonan 12:1-3.
9. Kon metanan materialista por bira un karga pisá pa nos?
9 Por ehèmpel, mundu su preokupashon ekstremo ku prominensia, plaka, entretenimentu, biahenan di plaser i otro metanan materialista por influensiá nos manera di pensa. (1 Juan 2:15-17) Algun kristian di promé siglo ku tabata kore tras di rikesa a kompliká nan bida severamente. Apòstel Pablo a splika: “Esnan ku kier bira riku ta kai den tentashon i den trampa i den hopi deseonan loko i dañino, kualnan ta hundi hende den ruina i destrukshon. Pasobra amor pa plaka ta rais di tur sorto di maldat, i algun hende, dor di deseá esaki, a desviá for di e fe, i a traspasá nan mes ku hopi doló.”—1 Timoteo 6:9, 10.
10. Kiko nos por siña tokante rikesa for di Hesus su komparashon di e sembradó?
10 Si nos ta sinti nos kansá i desanimá den nos sirbishi na Dios, e motibu lo por ta pasobra nos ta asina okupá ku kosnan material ku no ta sobra tempu pa nos kosnan spiritual? Manera Hesus su komparashon di e sembradó ta indiká, esaki por ta un posibilidat masha real. Hesus a kompará “e preokupashonnan di mundu, i e engaño di rikesa, i e deseonan pa otro kosnan” ku mata di sumpiña ku “ta drenta i ta hoga” e simia di e palabra di Dios ku tin den nos kurason. (Marko 4:18, 19) P’esei Beibel ta konsehá nos: “Laga boso karakter ta liber di amor pa plaka i sea kontentu ku loke boso tin; pasobra e mes a bisa: ‘Nunka lo mi no bandoná bo, i nunka lo mi no laga bo desampará.’”—Hebreonan 13:5.
11. Kon nos por eliminá kosnan ku por ta un karga pisá pa nos?
11 Tin biaha e kos ku ta kompliká nos bida no ta ku nos ta kore tras di mas kos, sino ta loke nos ta hasi ku e kosnan ku nos tin kaba. Tin ruman kisas ta sinti nan emoshonalmente agotá debí na problemanan serio di salú, òf morto di un ser kerí òf otro problemanan angustioso. Nan a mira ku ta nesesario pa de bes en kuando nan hasi algun ahuste. Un pareha kasá a disidí di stòp ku sierto hòbi i proyektonan personal innesesario. De echo nan a pasa dor di nan kosnan i literalmente a paketá tur material relashoná ku e proyektonan ei i a warda nan kaminda nan no ta mira nan. Periódikamente, ta bon pa nos tur hasi un inventario di nos kustumbernan i poseshonnan, i pone un banda tur peso innesesario pa asina nos no kansa, pèrdè ánimo i entregá.
Ta Importante pa Nos Ta Rasonabel i Konsiente di Nos Limitashonnan
12. Kiko nos mester rekonosé tokante nos propio erornan?
12 Nos propio erornan, asta den asuntunan chikí, pokopoko por hasi nos bida kompliká. E siguiente palabranan di David ta hopi sierto: “Pasobra mi inikidatnan [“erornan,” NW] a pasa riba mi kabes; manera un karga pisá nan ta pisa muchu pa mi.” (Salmo 38:4) Hopi bes, un par di kambio práktiko lo aliviá nos di karganan pisá.
13. Kon ser rasonabel ta yuda nos tin un punto di bista balansá di nos sirbishi?
13 Beibel ta animá nos pa kultivá “sabiduria sano i diskreshon.” (Proverbionan 3:21, 22) Segun Beibel, ‘e sabiduria di ariba ta rasonabel.’ (Santiago 3:17) Algun ruman a sinti nan preshoná pa hasi mes tantu ku otro rumannan ta hasi den sirbishi kristian. Sin embargo, Beibel ta konsehá nos: “Laga kada un saminá su mes obra, i e ora ei e lo tin motibu pa gaba solamente enkuanto su mes, i no enkuanto un otro. Pasobra kada un lo karga su mes karga.” (Galationan 6:4, 5) Ta bèrdat ku e bon ehèmpel di nos rumannan kristian por animá nos pa sirbi Yehova di henter alma, pero sabiduria sano i ser rasonabel lo yuda nos pone metanan realístiko, segun nos propio sirkunstansianan.
14, 15. Kon nos por desplegá sabiduria sano dor di perkurá pa nos nesesidatnan físiko i emoshonal?
14 Si nos ta rasonabel asta den kosnan ku por parse di ménos importansia, esei por yuda ku nos no ta sinti nos kansá. Por ehèmpel, nos ta kultivá kustumbernan balansá ku ta kontribuí na bon salú físiko? Konsiderá e ehèmpel di un pareha kasá ku ta sirbi na un di e sukursalnan di Testigunan di Yehova. Nan a mira e balor di sabiduria sano pa prevení agotamentu. E esposa a bisa: “Sin importá kon hopi trabou nos tin, nos ta purba di bai drumi tur anochi rònt di e mesun ora. Tambe nos ta hasi ehersisio ku regularidat. Esaki realmente a yuda nos. Nos a siña kiko ta nos limitashonnan, i nos ta aktua di akuerdo ku esei. Nos no ta purba kompará nos mes ku e rumannan ku ta parse di tin energia pa no kaba.” Nos ta kome kuminda nutritivo regularmente i ta haña sufisiente sosiegu? Si nos ta duna atenshon rasonabel na nos salú en general, lo tin ménos chèns ku nos ta sinti nos agotá emoshonalmente i spiritualmente.
15 Algun di nos tin nesesidatnan spesial. Por ehèmpel, un ruman muhé kristian tabata den sirbishi di tempu kompletu den vários asignashon basta difísil. El a konfrontá problemanan serio di salú, inkluso kanser. Kiko a yud’é trata ku situashonnan ku ta kousa tenshon? El a bisa: “Pa mi, ta importante pa mi tin momentunan ku mi por ta mi so i ku rònt di mi ta totalmente ketu. Mas mi ta sinti strès i kansansio ta akumulá den mi, mas urgente ta pa mi haña momentunan ku mi ta so i trankil, kaminda mi por lesa i sosegá.” Sabiduria sano i diskreshon ta yuda nos rekonosé nos nesesidatnan individual i satisfasé nan, i asina nos ta evitá kansansio spiritual.
Yehova Dios Ta Duna Nos Energia
16, 17. (a) Dikon ta masha importante pa kuida nos salú spiritual? (b) Kiko nos mester inkluí den nos rutina diario?
16 Naturalmente ta masha importante pa nos kuida nos salú spiritual. Ora nos tin un amistat íntimo ku Yehova Dios, nos por bira físikamente kansá, pero nunka nos lo kansa di ador’é. Yehova ta esun ku “ta duna forsa na esun kansá, i e ta oumentá poder pa esun ku ta falta poder.” (Isaias 40:28, 29) Apòstel Pablo, kende personalmente a eksperensiá ku e palabranan aki ta bèrdat, a skirbi: “Nos no ta pèrdè ánimo, ma maske nos hende eksterior ta degenerá, tòg nos hende interior ta wòrdu renobá dia pa dia.”—2 Korintionan 4:16.
17 Tuma nota di e ekspreshon “dia pa dia.” Esaki ta indiká ku nos tin ku hasi uso di Yehova su perkurashonnan riba un base diario. Un kristian ku a sirbi fielmente komo misionero pa 43 aña, a konfrontá periodonan di kansansio físiko i di desanimashon. Pero e no a entregá. El a bisa: “Mi a hasié un kustumber pa lanta trempan ya asina promé ku mi kuminsá ku kualke trabou, mi por a dediká tempu na hasi orashon na Yehova i lesa su Palabra. E rutina diario aki a yuda mi perseverá te ku awor.” En bèrdat nos por konta riba Yehova su poder sostenedor si regularmente, sí “dia pa dia,” nos ta hasi orashon na dje i meditá riba su kualidatnan elevá i su promesanan.
18. Ki konsuelo Beibel ta duna kristiannan fiel ku ta di edat avansá òf ku ta malu?
18 Spesialmente pa kristiannan ku ta sinti nan desanimá debí na edat avansá i problema ku salú, esaki ta masha útil. Rumannan asina por bira deprimí, no pasobra nan ta kompará nan mes ku otro hende, sino pasobra nan ta kompará nan mes ku loke nan tabata. Ta un gran konsuelo pa sa ku Yehova ta onra hende di edat! Beibel ta bisa: “Kabei blanku ta un korona di gloria; den e kaminda di hustisia e ta wòrdu hañá.” (Proverbionan 16:31) Yehova konosé nos limitashonnan i ta duna gran balor na e adorashon di henter kurason ku nos ta rindi apesar di nos krekechénan. I e bon obranan ku ya nos a hasi kaba ta keda permanentemente grabá den su memoria. E Skritura ta sigurá nos: “Dios no ta inhustu pa lubidá boso trabou i e amor ku boso a mustra pa su nòmber, dor ku boso a sirbi i ainda ta sirbi e santunan.” (Hebreonan 6:10) Nos tur ta masha kontentu ku den nos seno nos tin rumannan ku pa hopi dékada a duna prueba di nan fieldat na Yehova!
No Entregá
19. Ki benefisio nos ta saka dor di keda okupá hasiendo loke ta bon?
19 Hopi hende ta kere ku aktividat físiko vigoroso riba un base regular por aliviá kansansio. Di igual manera, aktividatnan spiritual regular por yuda aliviá kualke sintimentu di kansansio emoshonal òf spiritual. Beibel ta bisa: “No laga nos kansa di hasi bon, pasobra na debido tempu nos lo kosechá, si nos no desmayá. Asina anto, miéntras nos tin oportunidat, laga nos hasi bon na tur hende, i spesialmente na esnan ku ta di e famia di fe.” (Galationan 6:9, 10) Tuma nota ku e teksto ta bisa “laga nos hasi bon.” Esaki ta indiká akshon di nos parti. Hasi bon pa otro hende en bèrdat por yuda nos pa no kansa den nos sirbishi na Yehova i entregá.
20. Pa kombatí desanimashon, ken su kompania nos mester evitá?
20 Na kontraste, asosiashon i aktividatnan ku hende ku no ta hasi kaso di e leinan di Dios, por bira un karga pisá. Beibel ta spièrta nos: “Piedra ta pisá, i santu ta pisa hopi, ma furia di un bobo [òf, “iritashon kousá pa un bobo,” NW] ta mas pisá ku tur dos.” (Proverbionan 27:3) Pa kombatí sintimentunan di desanimashon i kansansio, nos mester evitá kompania di hende ku ta pensa riba kosnan negativo so i ku ta gusta piki pieu i kritiká otro hende.
21. Kon nos por ta un animashon pa otro hende na reunionnan kristian?
21 Reunionnan kristian ta un perkurashon di Yehova ku por yena nos ku energia spiritual. Na e reunionnan nos tin un ekselente oportunidat pa animá otro ku instrukshon i asosiashon refreskante. (Hebreonan 10:25) Tur ruman den kongregashon mester hasi esfuerso pa nan palabranan ta edifikante ora nan ta duna komentario na reunion òf ora nan tin parti den e programa riba plataforma. Spesialmente esnan ku ta hiba delantera komo maestro tin e responsabilidat di ta un animashon pa otro rumannan. (Isaias 32:1, 2) Asta ora ku ta nesesario pa nan ekshortá òf reprendé, nan mester hasié na un manera refreskante. (Galationan 6:1, 2) Nos amor pa otro hende realmente lo yuda nos sirbi Yehova sin entregá.—Salmo 133:1; Juan 13:35.
22. Apesar di nos naturalesa humano imperfekto, dikon nos por tin bon ánimo?
22 Adorá Yehova den e tempu aki di fin ta enserá trabou. I kristiannan tambe ta sinti e efektonan di agotamentu mental, doló emoshonal i sirkunstansianan ku ta kousa tenshon. Nos naturalesa humano imperfekto ta delikado, meskos ku kos trahá di klei. Sin embargo, Beibel ta bisa: “Nos tin e tesoro aki den pòchi di klei, pa e ekselensia di e poder por ta di Dios i no di nos mes.” (2 Korintionan 4:7) Sí, nos lo kansa, pero laga nos nunka entregá. Mas bien, laga nos tin bon ánimo i ‘bisa ku tur konfiansa: “Yehova ta mi yudadó.”’—Hebreonan 13:6.
Un Repaso Kòrtiku
• Menshoná algun karga hopi pisá ku nos lo por pone un banda.
• Kon nos por “hasi bon” na nos rumannan kristian?
• Kon Yehova ta sostené nos ora nos ta sinti nos kansá òf desanimá?
[Preguntanan di Estudio]
[Plachi na página 23]
Hesus tabata sa ku periodonan largu di desanimashon por a deskurashá e apòstelnan
[Plachi na página 24]
Algun kristian a stòp ku sierto hòbi i proyektonan personal innesesario
[Plachi na página 26]
Apesar di nos limitashonnan, Yehova ta duna gran balor na e adorashon ku nos ta rindi di henter kurason