Kon pa Haña e Mihó Konseho

BIDA eksitoso ta algu ku tur hende ke. E faktornan klave pa logra un bida asina den e mundu kompliká aki ta bon konseho i e deseo pa aktua na armonia ku tal konseho. Sin embargo, hende no tabata semper dispuesto pa presta atenshon na bon konseho. Hopi hende a yega di pretendé ku un persona mester biba su bida manera e ke. De echo, e registro bíbliko ta mustra ku Satanas, e enemigu original di soberania divino, a ofresé independensia na e promé pareha. Na Génesis 3:5 tin pará skirbí loke el a deklará na Eva: “Dios sa ku e dia ku boso kome di [e palu di konosementu di bon i malu], boso wowo lo habri i boso lo ta manera Dios, konosiendo bon i malu.”

Despues di esei, Adam ku Eva a logra hiba un bida eksitoso, sin konsekuensianan serio, siendo guiá únikamente pa nan propio opinion? Definitivamente ku nò. Mesora nan a keda desapuntá ku e resultadonan di e supuesto abilidat di sa loke ta bon i malu. Dios, ku rason, a desaprobá nan akto i nan a kuminsá un bida duru komo hende imperfekto ku morto komo e resultado final. (Génesis 3:16-19, 23) Morto ta afektá nos tur. Beibel ta bisa: “Dor di ún hende [Adam] piká a drenta den mundu, i morto dor di piká, i asina morto a pasa pa tur hende, pasobra tur a peka.”—Romanonan 5:12.

Ounke loke Adam ku Eva a skohe tabatin mal konsekuensia, tin hopi hende ku ainda no ta konvensí ku ta sabí pa pone na práktika e konseho di Dios, Esun ku a krea hende. Sin embargo, Beibel ta deklará ku e “ta inspirá pa Dios,” i ku e por yuda nos pa ta “perfekto [òf “plenamente kompetente,” NW], ekipá pa tur bon obra.” (2 Timoteo 3:16, 17) Sigur-sigur nos lo ta mas felis si nos sigui e konseho di Beibel. Un área prinsipal den kua esaki ta e kaso ta bida di famia.

 Fieldat den Matrimonio

Segun Beibel, Dios su propósito tabata pa matrimonio ta un union permanente. (Génesis 2:22-24; Mateo 19:6) Ademas, e Skritura ta bisa ku “e kama matrimonial [mester] ta sin mancha.” Esei ta nifiká ku no mester kontaminá e union aki ku relashon seksual pafó di e matrimonio. (Hebreonan 13:4) Sin embargo, probablemente bo sa ku awe mayoria matrimonio no ta kumpli ku e norma aki. Algun hende tin e kustumber di flirt na trabou ku hende ku no ta nan kasá. Otronan ta gaña nan famianan pa asina nan por pasa tempu ku un persona ku no ta nan kasá, pero ku ken nan tin un relashon romántiko. Tin hende ku ta asta bandoná nan kasá pa bai biba ku un partner mas yòn, pretendiendo ku asina nan ta sinti nan mes mas yòn i mas felis, manera a sosodé den e kaso di Verónica ku e artíkulo anterior a menshoná.

Sin embargo, un determinashon pa agradá bo mes kueste loke kueste lo no trese felisidat duradero. Ronald por duna testimonio di esei. Konvensí ku su bida lo bira mihó, el a bandoná su kasá pa kuminsá un famia nobo ku un muhé ku tabata su amante sekreto pa seis aña largu i ku ken e tabatin dos yu kaba. Sin embargo, algun tempu despues ku Ronald a pone fin na su matrimonio, su amante a bandon’é! Finalmente Ronald a bai biba huntu ku su mayornan. El a deskribí e situashon komo “humiante.” Esei ta djis ún ehèmpel. E klase di kondukta ei, motivá pa deseonan egoista, a kontribuí na un ola sin presedente di divorsio i famia kibrá, ku ta resultá den sufrimentu pa hopi hende, tantu adulto komo mucha.

Di otro banda, si nos sigui konseho di Beibel esei ta resultá den berdadero felisidat. Esei tabata e kaso ku Roberto, kende a bisa: “Ta danki na e konseho di Beibel ku mi no a pèrdè mi kasá. Nos no ta logra berdadero felisidat dor di entregá na tentashon i drenta ku un hende ku no ta nos kasá, ounke kon atraktivo e persona ei por parse. Edukashon bíbliko a yuda mi balorá mi kasá, kende tin hopi aña na mi lado.” E konseho bíbliko pa “no laga ningun hende trata e esposa di su hubentut ku traishon,” a hunga un papel importante den bida di Roberto. (Malakias 2:15) Den ki otro aspekto nos por benefisiá di e konseho di Dios?

Kon pa Kria Nos Yunan

Dékadanan pasá, tabatin e idea popular ku mayornan no mester pone muchu límite ora nan ta kria nan yunan. A parse ku tabata rasonabel pa laga yunan tuma nan propio desishonnan tokante kon pa pensa i kon pa komportá nan mes. E meta tabata pa no frena nan desaroyo. Den algun lugá, nan a establesé  asta sistemanan di edukashon ménos strukturá den kua entre otro, e alumnonan por a disidí si nan ta bai lès òf nò i nan por a skohe kuantu nan ta rekreá òf kuantu instrukshon nan ke haña. E maneho di un di e tipo di skolnan aki tabata “pa laga e muchanan ekspresá nan sintimentunan sin ser influensiá pa e opinion i intervenshon di un adulto.” Awendia, ainda tin algun konsehero di komportashon humano ku no ta kere ku ora nos duna mucha sierto grado di disiplina esei ta trese benefisio, ni asta ora ku mayornan ta pensa ku ta nesesario pa duna disiplina amoroso.

Kiko tabata e resultado? Tin hopi hende ta kere ku e sistema permisivo di kria yu a duna e muchanan demasiado libertat. Segun nan, esaki a hiba na un oumento di kriminalidat i uso di droga. Un enkuesta na Merka a revelá ku kasi 70 porshento di esnan entrevistá tabata pensa ku mucha- i hóbennan no ta haña sufisiente guia di nan mayornan. Ora hende ta purba splika e kousa di tiroteonan na skol i di otro krímennan horibel ku teenagernan a kometé, hopi di nan ta kulpa e “falta di disiplina firme di parti di mayornan.” Anto asta ora e resultadonan no ta asina trágiko, mayornan i yunan ta kosechá e frutanan amargo di e manera inkorekto di kria yu.

Kiko Beibel ta bisa relashoná ku e asuntu aki? E Skritura ta konsehá mayornan pa nan ehersé nan outoridat ku amor i firmesa. Beibel ta bisa: “Lokura ta mará den kurason di un mucha; bara di korekshon lo alehá esaki for di dje.” (Proverbionan 22:15) Klaru ku tur disiplina ku un mayor ta duna mester ta apropiá pa e sirkunstansia. Kualke disiplina ku nan duna mester ta karakterisá prinsipalmente pa suavedat, dominio propio i konsiderashon. Di e manera ei, e disiplina ta un muestra di amor. Ora mayornan ta ehersé nan outoridat den un manera amoroso i no na un manera kruel i brutu, nan tin mas chèns di logra éksito.

Aplikashon di e konseho aki a duna resultadonan bisto. Arturo, un hòmber di 30 aña di edat na Mexico ku a kasa resientemente, a bisa: “Mi tata a laga ami ku mi rumannan komprondé bon kla ku ta é i mi mama ta esnan ku ta ehersé outoridat den nos famia. Nunka nan a vasilá pa disipliná nos. Pero semper nan tabatin tempu pa kòmbersá ku nos. Awor ku mi ta adulto, mi ta balorá e bida stabil ku mi tin, i mi sa ku pa gran parti esaki ta e resultado di e bon guia ku mi a risibí.”

 Probechá di e Mihó Konseho

Dios su Palabra, Beibel, ta kontené e mihó konseho ku hende por haña. No ta pa e sírkulo di famia so e tin guia. E ta yuda ekipá nos den hopi manera pasobra e ta siña nos kon pa aktua den un mundu kaminda mayoria hende no ta dispuesto pa aseptá ku ta un Fuente superior di sabiduria mester goberná nan bida pa nan por saka probecho.

Yehova Dios, e Kreadó di hende, a duna e garantia aki mediante salmista David: “Lo mi instruí bo i siña bo e kaminda ku bo tin ku kana; lo mi konsehá bo; mi wowo ta riba bo.” (Salmo 32:8) Bo por imaginá bo kiko ta nifiká ku e Kreadó tin su bista riba nos pa asina e por protehá nos di peliger? Pero, e pregunta ku nos kada un tin ku hasi nos mes ta: ‘Lo mi aseptá Yehova su guia protektor humildemente?’ Su Palabra ta bisa nos amorosamente: “Konfia den SEÑOR ku henter bo kurason, i no dependé riba bo mes komprondementu. Den tur bo kamindanan rekonos’é, i e lo dirigí bo bereanan.”—Proverbionan 3:5, 6.

Pa nos siña konosé Yehova ta rekerí esfuerso i dedikashon, pero ku yudansa di Beibel hende por logr’é. E estilo di bida ku Yehova ta rekomendá “ta kontené promesa pa e bida presente i pa esun ku ta bin.” Konsiderando tur e benefisionan ku e estilo di bida ei ta ofresé, esaki sigur ta un medio di gran ganashi.—1 Timoteo 4:8; 6:6.

Kisas bo ta haña e komprondementu penetrante ku Beibel ta ofresé i e bendishonnan ku biba di akuerdo ku esaki ta trese kuné masha atraktivo. Si ta asina, pone komo bo prioridat pa lesa i meditá riba e Palabra di Dios. Esaki lo yuda bo enfrentá ku éksito e desafionan djawendia i tambe esnan ku por bin den futuro. Ademas, lo bo siña di e speransa pa biba den Dios su mundu nobo, kaminda tur hende lo ta siñá pa Yehova i lo disfrutá di pas abundante.—Isaias 54:13.

[Plachi na página 5]

Konseho di Beibel por fortalesé e banchi matrimonial

[Plachinan na página 6]

Konseho di Beibel ta e base pa guia ekselente, i tòg e ta laga lugá pa hende relahá tambe

[Plachinan na página 7]

Hende ku ta apliká konseho di Beibel por disfrutá di un bida bon balansá