Yehova, Nos “Fortalesa den Tempu di Angustia”

“Salbashon di e hustunan ta bin for di SEÑOR; e ta nan fortalesa den tempu di angustia.”—SALMO 37:39.

1, 2. (a) Kiko Hesus a pidi den orashon na fabor di su disipelnan? (b) Kiko ta Dios su boluntat pa ku su pueblo?

YEHOVA ta todopoderoso. E tin e poder pa protehá su fiel adoradónan den kualke manera ku e ke. Lo e por asta separá su pueblo físikamente for di e restu di mundu i pone nan den un ambiente safe i trankil. Sin embargo, Hesus a pidi relashoná ku su disipelnan den orashon na su Tata selestial: “Mi no ta pidi bo pa saka nan for di mundu, ma pa bo warda nan di e malbado.”—Juan 17:15.

² Yehova a skohe pa no saka nos “for di mundu.” Mas bien, ta su boluntat pa nos biba meimei di e poblashon general di e mundu aki afin di proklamá su mensahe di speransa i konsuelo na otro hende. (Romanonan 10:13-15) Pero, manera Hesus a indiká indirektamente den su orashon, dor di biba den e mundu aki, nos ta keda eksponé na “e malbado.” Humanidat desobediente i forsanan spiritual malbado ta kousa hopi doló i angustia, i kristiannan no ta liber di angustia.—1 Pedro 5:9.

3. Asta adoradónan fiel di Yehova mester konfrontá ki realidat, pero ki konsuelo nos ta haña den e Palabra di Dios?

³ Ta natural ku ora nos ta bou di pruebanan asina, nos ta pasa dor di periodonan di desanimashon. (Proverbionan 24:10) E registro bíbliko ta kontené vários relato di sirbidónan fiel ku a pasa angustia. E salmista a bisa: “Hopi ta e aflikshonnan di e hustu, ma SEÑOR ta libr’é for di nan tur.” (Salmo 34:19) Sí, kos malu ta sosodé asta ku “e hustu.” Meskos ku salmista David, tin biaha nos por bira “agotá i mashá kibrá.” (Salmo 38:8) Sin embargo, ta un konsuelo pa sa ku Yehova “ta serka di e hende di kurason kibrá, i ta salba esnan di spiritu abatí.”—Salmo 34:18; 94:19.

4, 5. (a) Na armonia ku Proverbionan 18:10, kiko nos tin ku hasi pa por risibí Dios su protekshon? (b) Menshoná algun paso spesífiko ku nos tin ku tuma pa risibí Dios su yudansa.

⁴ Na armonia ku Hesus su orashon, Yehova di bèrdat ta warda nos. E ta nos “fortalesa den tempu di angustia.” Aki “fortalesa” ta referí literalmente na un fòrti. (Salmo 37:39; BPK) E buki di Proverbionan ta usa mesun tipo di  ekspreshon ora e ta bisa: “E nòmber di SEÑOR ta un toren fuerte; e hustu ta kore drenta den dje i ta sigur.” (Proverbionan 18:10) E teksto aki ta revelá un bèrdat básiko relashoná ku Yehova su tierno interes den su kriaturanan. Dios ta ofresé protekshon spesialmente na hende hustu ku aktivamente ta busk’é, komo si fuera nos ta kore drenta un toren fuerte pa haña refugio.

⁵ Ora nos ta konfrontá problemanan angustioso, kon nos por kore bai serka Yehova pa haña protekshon? Laga nos konsiderá tres paso sumamente importante ku nos por tuma pa risibí Yehova su yudansa. Promé, nos tin ku akudí na nos Tata selestial den orashon. Di dos, nos tin ku obra na armonia ku su spiritu santu. I di tres, nos tin ku someté nos mes na Yehova su areglo dor di buska asosiashon ku rumannan kristian ku por aliviá nos angustia.

E Poder di Orashon

6. Kon kristiannan berdadero ta mira orashon?

⁶ Algun eksperto di salú ta rekomendá orashon pa trata depreshon i strès. Ounke kisas ta sierto ku un ratu ketu di reflekshon manera ora di hasi orashon por aliviá strès, un hende por logra meskos tambe dor di skucha sierto zonidunan di naturalesa òf asta dor di haña un masashi. Kristiannan berdadero no ta minimisá e balor di orashon dor di mir’é komo djis un terapia pa laga nan sinti bon. Pa nos, orashon ta komunikashon respetuoso ku e Kreadó. Orashon ta enserá nos deboshon na Dios i nos konfiansa den dje. Sí, orashon ta parti di nos adorashon.

7. Kiko ke men hasi orashon ku konfiansa, i kon e tipo di orashonnan ei ta yuda nos trata ku angustia?

⁷ Nos orashonnan mester ta kompañá pa un sintimentu di konfiansa den Yehova. Apòstel Juan a skirbi: “Esaki ta e konfiansa ku nos tin su dilanti, ku si nos pidi kualke kos konforme su boluntat, e ta tende nos.” (1 Juan 5:14) Yehova, e Ser Supremo, e úniko Dios berdadero i todopoderoso, de echo ta duna atenshon spesial na e orashonnan sinsero di su adoradónan. E solo echo ku nos sa ku nos Dios amoroso ta tende nos ora nos ta kont’é nos preokupashon- i problemanan, ta un konsuelo.—Filipensenan 4:6.

8. Dikon kristiannan fiel nunka mester sinti nan mes tímido òf indigno ora nan ta aserká Yehova den orashon?

⁸ Kristiannan fiel nunka mester sinti nan mes tímido, indigno òf insigur di nan mes ora nan ta aserká Yehova den orashon. Ta bèrdat ku ora nos ta desepshoná ku nos mes òf nos ta sinti ku nos ta hoga den problema, nos lo no ta semper inkliná pa aserká Yehova den orashon. Na okashonnan asina ta bon pa nos kòrda ku Yehova “tin kompashon di su afligínan” i ku e “ta konsolá esnan abatí.” (Isaias 49:13; 2 Korintionan 7:6) Ta foral den tempu di tristesa i angustia nos tin ku akudí  ku konfiansa na nos Tata selestial komo nos fortalesa.

9. Ki papel fe ta hunga ora nos ta aserká Dios den orashon?

⁹ Pa nos benefisiá plenamente di e privilegio di orashon, nos mester tin berdadero fe. Beibel ta bisa ku “esun ku bin serka Dios mester kere ku e ta, i ku e ta Esun ku ta rekompensá esnan ku ta busk’é.” (Hebreonan 11:6) Fe ta nifiká mas ku djis kere ku Dios ta eksistí, ku “e ta.” Berdadero fe ta enserá kere firmemente ku Dios tin e abilidat i deseo di rekompensá e bida ku nos ta hiba di obedensia na dje. “E wowonan di SEÑOR ta riba e hustunan, i su oreanan ta atento pa skucha nan orashon.” (1 Pedro 3:12) Teniendo tur ora bai na mente Yehova su interes amoroso den nos, ta duna nos orashonnan un nifikashon spesial.

10. Kon nos orashonnan mester ta pa nos por risibí sosten spiritual for di Yehova?

¹⁰ Yehova ta skucha nos orashonnan ora nos ofresé nan ku un kurason kompletu. E salmista a skirbi: “Mi a sklama ku henter mi kurason; kontestá mi, o SEÑOR!” (Salmo 119:145) Distinto for di e orashonnan ritual di hopi religion, nos orashonnan no ta djis un rutina ni ta ser hasí sin grasia. Ora nos ta hasi orashon na Yehova ku ‘henter nos kurason,’ nos palabranan ta yen di nifikashon i propósito. Despues di hasi orashonnan sinsero asina, nos ta kuminsá sinti e alivio ku ta bin dor di tira nos ‘karga riba Yehova.’ Manera Beibel ta primintí, ‘e lo sostené nos.’—Salmo 55:22; 1 Pedro 5:6, 7.

E Spiritu di Dios Ta Nos Ayudante

11. Kua ta un manera ku Yehova ta kontestá nos ora nos ta “sigui pidi” su yudansa?

¹¹ Yehova no ta simplemente Esun ku ta skucha orashon, sino tambe Esun ku ta kontestá orashon. (Salmo 65:2) David a skirbi: “Den e dia di mi angustia lo mi sklama na bo, pasobra abo lo kontestá mi.” (Salmo 86:7) Di akuerdo ku esei, Hesus a animá su disipelnan pa “sigui pidi” [NW] Yehova su yudansa pasobra e “Tata selestial” lo “duna e spiritu santu na esnan ku pidié.” (Lukas 11:9-13) Sí, Dios su forsa aktivo ta aktua komo un ayudante, òf konsoladó, pa su pueblo.—Juan 14:16.

12. Kon Dios su spiritu por yuda nos ora problemanan ta parse aplastante?

¹² Asta ora nos ta konfrontá prueba, Dios su spiritu por yena nos ku “poder mas ayá di loke ta normal.” (2 Korintionan 4:7, NW) Apòstel Pablo, kende a soportá hopi situashon difísil, a bisa ku konfiansa: “Pa tur kos mi tin e forsa den birtut di esun ku ta duna mi poder.” (Filipensenan 4:13, NW) Di igual manera, hopi kristian awe a sinti kon nan forsa spiritual i emoshonal a ser renobá komo kontesta riba nan súplikanan. Hopi bes, problemanan angustioso no ta parse dje aplastante ei despues ku nos risibí yudansa di Dios su spiritu. Debí na e fortalesa aki ku Dios ta duna, nos por bisa, meskos ku e apòstel: “Nos ta wòrdu primí di tur banda, ma nos no ta keda plèchá; nos no ta mira salida, ma no ta desesperá; nos ta wòrdu persiguí, ma no ta keda desampará; nos ta wòrdu tumbá abou, ma no destruí.”—2 Korintionan 4:8, 9.

13, 14. (a) Kon Yehova a duna prueba di ta nos fortalesa pa medio di su Palabra skirbí? (b) Kon abo personalmente a haña yudansa dor di apliká prinsipionan bíbliko?

¹³ Tambe spiritu santu a inspirá i konserbá Dios su Palabra skirbí pa nos benefisio. Kon Yehova a resultá di ta nos fortalesa den tempu di angustia mediante e páginanan di su Palabra? Un manera ta dor di duna nos sabiduria sano i diskreshon òf kapasidat di pensa. (Proverbionan 3:21-24) Beibel ta entrená nos fakultatnan mental i ta mehorá nos poder di rasoná. (Romanonan 12:1, NW) Nos por tin nos “mente entrená pa diserní loke ta bon i loke ta malu” dor di lesa i studia e Palabra di Dios riba un base regular, i tambe dor di apliká loke nos ta siña. (Hebreonan 5:14) Podisé bo a eksperensiá personalmente kon prinsipionan bíbliko a yuda bo tuma  desishonnan sabí ora bo a konfrontá difikultatnan. Beibel ta duna nos prudensia, lokual por yuda nos haña solushonnan práktiko pa problemanan angustioso.—Proverbionan 1:4.

¹⁴ E Palabra di Dios ta proveé nos ku un otro fuente di fortalesa: e speransa di salbashon. (Romanonan 15:4) Beibel ta konta nos ku kos malu lo no sigui sosodé pa tempu indefiní. Kualke tribulashon ku nos ta sufri di dje ta un kos temporal. (2 Korintionan 4:16-18) Nos tin “e speransa di bida eterno, ku Dios, kende no por gaña, a primintí hopi siglonan pasá.” (Tito 1:2) Si nos ta alegrá den e speransa ei, teniendo tur ora bai na mente e futuro briante ku Yehova ta primintí, nos por perseverá bou di tribulashon.—Romanonan 12:12; 1 Tesalonisensenan 1:3.

E Kongregashon —Un Ekspreshon di Dios Su Amor

15. Kon kristiannan por ta un bendishon pa otro?

¹⁵ Un otro perkurashon di Yehova ku por yuda nos den tempu di angustia ta e kompañerismo ku nos ta gosa di dje den e kongregashon kristian. Beibel ta bisa: “Un amigu ta stima tur ora bai, i un ruman ta nasí pa tempu di atversidat.” (Proverbionan 17:17) E Palabra di Dios ta animá tur hende den kongregashon pa onra otro i stima otro. (Romanonan 12:10) Apòstel Pablo a skirbi: “No laga ningun hende buska su mes interes, sino esun di su próhimo.” (1 Korintionan 10:24) Si nos tin tal aktitut, esei por yuda nos konsentrá riba e nesesidatnan di otro hende en bes di riba nos propio pruebanan. Ora nos ta duna di nos mes na otro hende, nos no solamente ta yuda nan sino ku nos tambe ta sinti un sierto grado di felisidat i satisfakshon ku ta hasi nos karga mas soportabel.—Echonan 20:35.

16. Kon kada kristian por ta un animashon pa otro?

¹⁶ Rumannan spiritualmente maduro—sea hòmber òf muhé—por hunga un papel importante den fortalesé otro. Pa nan por hasi esei, nan ta hasi nan mes aserkabel i disponibel. (2 Korintionan 6:11-13) E kongregashon ta realmente bendishoná ora ku tur ruman ta traha tempu pa elogiá e hóbennan, pa edifiká kreyentenan nobo i pa animá esnan ku ta deprimí. (Romanonan 15:7) Amor fraternal tambe lo yuda nos evitá di tin e aktitut di deskonfiá otro. Nos lo no ta lihé pa konkluí ku difikultatnan personal ta un señal di debilidat spiritual. Pablo apropiadamente a urgi kristiannan pa “enkurashá esnan ku ta falta ánimo.” (1 Tesalonisensenan 5:14) Beibel ta mustra ku asta kristiannan fiel ta eksperensiá angustia.—Echonan 14:15, NW.

17. Ki oportunidatnan nos tin pa fortalesé e banchi di hermandat kristian?

¹⁷ Reunionnan kristian ta duna nos un bon  chèns pa konsolá otro i animá otro. (Hebreonan 10:24, 25) Pero e interkambio amoroso aki no ta keda limitá na reunionnan di kongregashon. Mas bien, e pueblo di Dios ta buska tambe oportunidat pa nan por asosiá huntu den un manera saludabel den ambientenan informal. Ora situashonnan angustioso surgi, nos lo ta kla pa yuda otro pasobra ya kaba ta eksistí entre nos un banchi fuerte di amistat. Apòstel Pablo a skirbi: “Pa no tin divishon den e kurpa, ma pa e miembronan tin e mesun perkurashon un pa otro. I si un miembro ta sufri, tur e miembronan ta sufri huntu kuné; si un miembro wòrdu onrá, tur e miembronan ta regosihá huntu kuné.”—1 Korintionan 12:25, 26.

18. Ki tendensia nos mester evitá ora nos ta sinti nos deprimí?

¹⁸ Tin biaha nos por sinti nos muchu deprimí pa asosiá ku otro rumannan kristian. Nos tin ku lucha kontra tal sintimentu ya nos no ta priva nos mes di e konsuelo i yudansa ku otro rumannan den fe por ofresé. Beibel ta spièrta nos: “Esun ku isolá su mes ta buska su mes deseo; su furia ta lanta kontra tur sabiduria sano.” (Proverbionan 18:1) Nos rumannan ta un ekspreshon di Dios su interes i kuido pa nos. Si nos ta rekonosé e perkurashon amoroso ei, nos lo haña alivio den tempu di angustia.

Mantené un Aktitut Positivo

19, 20. Kon e Skritura ta yuda nos rechasá pensamentunan negativo?

¹⁹ Ora un hende ta desanimá i tristu, ta fásil p’e pensa riba kosnan negativo. Por ehèmpel, ora algun ruman ta eksperensiá kontratempu, kisas nan ta kuminsá kuestioná nan propio spiritualidat, i ta konkluí ku nan difikultatnan ta un indikashon di Dios su desaprobashon. Pero kòrda ku Yehova no ta pone ningun hende na prueba ku “maldat.” (Santiago 1:13) Beibel ta bisa: “[Dios] no ta afligí boluntariamente, ni ta hasi yunan di hende bira tristu.” (Lamentashonnan 3:33) Al kontrario, Yehova ta bira masha tristu ora su sirbidónan ta sufri.—Isaias 63:8, 9; Zakarias 2:8.

²⁰ Yehova ta “e Tata di miserikòrdianan i Dios di tur konsuelo.” (2 Korintionan 1:3) E ta perkurá pa nos, i lo halsa nos na e debido tempu. (1 Pedro 5:6, 7) Teniendo tur ora bai na mente Dios su kariño pa nos, lo yuda nos mantené un aktitut positivo, i asta yuda nos alegrá. Santiago a skirbi: “Konsiderá esaki komo puru goso, mi rumannan, ora boso haña boso mes den diferente pruebanan.” (Santiago 1:2) Dikon? El a kontestá: “Pasobra unabes ku el a pasa e prueba, e lo risibí e korona di bida, ku Señor a primintí na esnan ku ta stim’é.”—Santiago 1:12.

21. Sin importá ki difikultatnan nos ta konfrontá, ki garantia Dios ta duna esnan ku resultá fiel na dje?

²¹ Manera Hesus a spièrta nos, den mundu nos lo tin tribulashon. (Juan 16:33) Pero Beibel ta primintí ku ningun ‘tribulashon, angustia, persekushon, hamber, sunú, òf peliger’ lo separá nos for di e amor di Yehova i e amor di su Yu. (Romanonan 8:35, 39) Ki un gran konsuelo pa sa ku kualke angustia ku nos ta konfrontá ta un kos temporal! Miéntras tantu, segun ku nos ta warda riba e fin di sufrimentu humano, nos Tata amoroso, Yehova, ta vigilá nos. Si nos kore bai serka dje pa haña protekshon, lo e resultá di ta “un refugio pa e oprimínan, un refugio den tempunan di angustia.”—Salmo 9:9.

Kiko Nos A Siña?

• Kiko kristiannan mester ferwagt tanten ku nan ta biba den e mundu malbado aki?

• Kon nos orashonnan ferviente por fortalesé nos ora nos ta konfrontá prueba?

• Kon Dios su spiritu ta un ayudante?

• Kiko nos por hasi pa yuda otro?

[Preguntanan di Estudio]

[Plachi na página 18]

Nos tin ku buska Yehova komo si fuera nos ta kore drenta den un toren fuerte

[Plachinan na página 20]

Rumannan spiritualmente maduro ta usa tur oportunidat pa elogiá i animá otro ruman