Glorifiká Dios “den un Solo Bos”

“Den un solo bos . . . glorifiká e Dios i Tata di nos Señor Hesukristu.” —Romanonan 15:6.

1. Ki lès tokante kon pa atendé diferensia di opinion Pablo a siña su rumannan den fe?

NO TA tur kristian ta tuma e mesun desishonnan òf tin e mesun gustu. Sin embargo, tur kristian mester kana uní riba e kaminda ku ta hiba na bida. Esei ta posibel? Sí, basta nos no laga diferensianan di opinion chikitu bira problemanan grandi. Esei ta un lès ku apòstel Pablo a siña su rumannan den fe den e promé siglo. Kon el a splika e punto importante aki? I kon nos por apliká su konseho inspirá awe?

E Importansia di Unidat Kristian

2. Kon Pablo a enfatisá e nesesidat pa nos ta uní?

² Pablo tabata sa ku unidat kristian ta sumamente importante, i el a duna bon konseho pa yuda kristiannan soportá otro ku amor. (Efesionan 4:1-3; Kolosensenan 3:12-14) No opstante, despues ku el a establesé hopi kongregashon i a bishitá otronan durante un periodo di mas ku 20 aña, e tabata sa ku lo no tabata fásil pa nan a keda uní. (1 Korintionan 1:11-13; Galationan 2:11-14) P’esei el a animá e rumannan di fe ku tabata biba na Roma: “Ku e Dios di perseveransia i di enkurashamentu konsedé pa . . . di ún akuerdo boso, den un solo bos, por glorifiká e Dios i Tata di nos Señor Hesukristu.” (Romanonan 15:5, 6) Awe, nos tambe tin ku glorifiká Yehova Dios “den un solo bos” komo un pueblo uní. Te na ki grado nos ta hasiendo esaki?

3, 4. (a) Ki diferente background e kristiannan na Roma tabatin? (b) Kon e kristiannan na Roma por a sirbi Yehova “den un solo bos”?

³ Hopi kristian na Roma tabata amigu personal di Pablo. (Romanonan 16:3-16) Ounke nan tabatin diferente background, Pablo a aseptá tur su rumannan komo “Dios su stimánan.” El a skirbi: “Mi ta gradisí mi Dios pa medio di Hesukristu pa boso tur, pasobra boso fe ta wòrdu proklamá den henter mundu.” Sin duda e romanonan tabata ehemplar den hopi manera. (Romanonan 1:7, 8; 15:14) Pero ta bèrdat tambe ku algun miembro di e kongregashon tabatin otro punto di bista riba sierto asuntunan. Ya ku kristiannan djawe ta bini for di vários background i kultura, un análisis di e konseho inspirá di Pablo riba kon pa trata ku diferensia di opinion lo por yuda nan papia “den un solo bos.”

⁴ Na Roma tabatin tantu kreyente hudiu komo no-hudiu. (Romanonan 4:1; 11:13) Aparentemente algun kristian hudiu no por a stòp ku sierto kustumbernan ku nan tabata sigui bou di e Lei di Moisés, maske nan mester a realisá ku e práktikanan ei no tabata esensial pa salbashon. Di otro banda, un kantidat di kristian hudiu sí a aseptá ku e sakrifisio di Kristu a libra nan for di restrikshonnan ku nan tabata tene nan mes na dje promé ku nan a bira kristian. Komo resultado, nan a kambia algun di nan kustumbernan personal. (Galationan 4:8-11) Tòg, manera Pablo a mustra, tur tabata “Dios su stimánan.” Si nan a mantené e aktitut mental korekto pa ku otro, tur lo por a alabá Dios “den un solo bos.” Awe tambe kada ken por tin su propio punto di bista riba sierto asuntunan, pues lo ta bon pa nos analisá a fondo kon Pablo ta splika e prinsipio importante ei.—Romanonan 15:4.

 “Risibí Otro ku Gustu”

5, 6. Kon bin tabatin diferensia di opinion den e kongregashon di Roma?

⁵ Den su karta n’e Romanonan, Pablo a papia di un situashon riba kua e opinionnan tabata dividí. El a skirbi: “Esun ta kere ku e por kome tur kos, miéntras ku un otro ku ta débil ta kome bèrdura so.” Pa ki motibu? Wèl, bou di e Lei di Moisés, no tabatin mag di kome porko. (Romanonan 14:2; Levítiko 11:7) Sin embargo, despues di Hesus su morto, e Lei ei no tabata na vigor mas. (Efesionan 2:15) Anto, tres aña i mei despues ku Hesus a muri, un angel a bisa apòstel Pedro ku for di e punto di bista di Dios no mester a konsiderá ningun alimento komo kontaminá. (Echonan 11:7-12) Ku e faktornan aki na mente, algun kristian hudiu por a pensa ku nan lo por a kome porko—òf otro kos ku tabata prohibí bou di e Lei.

⁶ Sin embargo, e idea so di kome kosnan ku un tempu tabata impuru probablemente lo tabata repugnante pa otro kristiannan hudiu. E inklinashon natural di e rumannan delikado ei lo tabata di sinti nan ofendí ora nan a mira nan rumannan hudiu den Kristu kome e tipo di alimento ei. Ademas, sierto kristiannan no-hudiu, ku a lanta den religionnan ku probablemente nunka a prohibí nan di kome sierto kuminda, lo por a keda konfundí ku hende lo a forma problema tokante alimento. Klaru ku no tabatin nada malu si un hende kier a apstené di sierto alimento, basta e no a insistí ku e apstinensia ei tabata nesesario pa haña salbashon. Tòg, e vários puntonan di bista ei fásilmente por a lanta kontroversia den e kongregashon. E kristiannan na Roma lo mester a tene kuidou p’e diferensianan di opinion ei no stroba nan di glorifiká Dios “den un solo bos.”

7. Ki diferente punto di bista tabatin riba e asuntu di warda un dia spesial tur siman?

⁷ Pablo a duna un di dos ehèmpel: “Esun ta konsiderá un dia mas ku e otro; un otro ta konsiderá tur dia meskos.” (Romanonan 14:5a) Bou di e Lei di Moisés, no tabatin mag di traha riba sabat. Asta biahamentu tabata estriktamente prohibí riba e dia ei. (Eksodo 20:8-10; Mateo 24:20; Echonan 1:12) Sin  embargo, ora e Lei a ser poné un banda, e prohibishonnan ei no tabata aplikabel mas. Tòg, algun kristian hudiu no a sinti nan kómodo pa hasi ningun tipo di trabou òf pa biaha distansia largu riba un dia ku anteriormente nan tabata konsiderá sagrado. Asta despues ku nan a bira kristian, kisas nan a apartá e di shete dia eksklusivamente pa propósitonan spiritual, maske ku for di e punto di bista di Dios e sabat no tabata na vigor mas. Nan a hasi malu? Nò, basta nan no a insistí ku ta Dios ta eksigí pa nan warda sabat. P’esei, teniendo kuenta ku konsenshi di su rumannan kristian, Pablo a skirbi: “Laga kada hende ta kompletamente konvensí den su mes mente.”—Romanonan 14:5b.

8. Ounke e kristiannan na Roma por a tene kuenta ku e konsenshi di otro hende, kiko nan no mester a hasi?

⁸ No opstante, ounke Pablo a animá su rumannan di kurason pa tene pasenshi ku esnan ku tabata lucha ku asuntunan di konsenshi, el a kondená fuertemente esnan ku a purba forsa nan rumannan den fe pa someté nan n’e Lei di Moisés komo un kondishon pa haña salbashon. Por ehèmpel, rònt di aña 61 di nos era, Pablo a skirbi e buki di Hebreonan, un karta enérgiko dirigí na kristiannan hudiu ku ta splika masha kla ku no tabatin sentido pa someté na e Lei di Moisés pasobra kristiannan tin un speransa superior basá riba e sakrifisio di reskate di Hesus.—Galationan 5:1-12; Tito 1:10, 11; Hebreonan 10:1-17.

9, 10. Kiko kristiannan no mester hasi? Splika.

⁹ Manera nos a mira, Pablo a mustra ku tanten ku no ta falta ku un prinsipio kristian, e echo ku kada ken ta tuma su desishon no nesesariamente ta pone nos union na peliger. P’esei, Pablo a puntra e kristiannan ku un konsenshi mas débil: “Pakiko bo ta husga bo ruman?” I el a puntra esnan mas fuerte (tal bes esnan kende nan konsenshi a permití nan kome sierto alimento ku tabata prohibí bou di e Lei òf pa traha riba sabat): “Pakiko bo ta despresiá bo ruman?” (Romanonan 14:10) Segun Pablo, e kristiannan ku un konsenshi mas débil no mester kondená nan rumannan ku tin un mente mas habrí. Na mesun tempu, kristiannan ku ta fuerte no mester despresiá esnan kende nan konsenshi ta débil ainda den sierto áreanan. Tur hende mester respetá e motivashonnan korekto di otro i no “pensa mas haltu di su mes ku e mester pensa.”—Romanonan 12:3, 18.

¹⁰ Pablo a splika e punto di bista balansá den e manera aki: “No laga esun ku ta kome despresiá esun ku no ta kome, i no laga esun ku no ta kome husga esun ku sí ta kome, pasobra Dios a asept’é.” Mas aleu el a bisa: “Kristu  tambe a aseptá nos [“risibí nos ku gustu,” NW] pa e gloria di Dios.” Siendo ku tantu hende fuerte komo hende débil ta aseptabel pa Dios i Kristu, nos mester tin e mesun aktitut i “risibí otro ku gustu.” (Romanonan 14:3; 15:7) Ken por tin derecho di bai kontra esei?

Amor Fraternal Ta Produsí Unidat Awe

11. Ki situashon úniko a eksistí den tempu di Pablo?

¹¹ Den su karta n’e Romanonan, Pablo a papia di un situashon úniko. Yehova a kaba di abolí un aliansa i a establesé un nobo. Pa algun kristian tabata difísil pa nan adaptá n’e kambio. E situashon spesífiko ei no ta eksistí awe, pero tin biaha por surgi kuestionnan similar.

12, 13. Kua ta algun situashon den kua kristiannan awe por tene kuenta ku konsenshi di nan rumannan?

¹² Por ehèmpel, podisé un señora kristian tabata pertenesé un tempu na un religion ku a boga pa su miembronan bisti di e manera mas simpel posibel. Ora e ta aseptá e bèrdat, kisas e tin problema pa biba ku e idea ku na okashonnan apropiá ta permití pa bisti paña modesto pero kolorido òf pa usa makiahe di bon gustu. Siendo ku no tin niun prinsipio di Beibel enbolbí, lo no ta korekto pa niun hende purba konvensé e señora kristian ei p’e bai kontra su konsenshi. Na mes momentu, e ta realisá ku e no mester kritiká otro muhénan kristian kende nan konsenshi sí ta permití nan usa e kosnan ei.

¹³ Konsiderá un otro ehèmpel. Kisas un hòmber kristian a lanta den un komunidat ku ta desaprobá uso di alkohòl. Despues ku e yega na un konosementu di e bèrdat, e ta siña e punto di bista di Beibel, esta, ku biña ta un don di Dios i ku hende por bebe ku moderashon. (Salmo 104:15) E ta aseptá e punto di bista ei. Sin embargo, pa motibu di su background, e ta preferá di apstené kompletamente for di bebida alkohóliko, pero e no ta kritiká esnan ku ta bebe ku moderashon. Den e forma ei, e ta apliká e palabranan di Pablo: “Laga nos buska e kosnan ku ta trese pas i edifikashon di otro.”—Romanonan 14:19.

14. Den ki situashonnan kristiannan por apliká e spiritu di e konseho di Pablo dirigí n’e Romanonan?

¹⁴ Por surgi otro situashonnan den kua nos mester apliká e spiritu di e konseho di Pablo n’e Romanonan. E kongregashon kristian ta konsistí di hopi persona, i nan kada un tin nan preferensianan. P’esei, nan kada un por tuma nan desishon—por ehèmpel, den e manera di bisti i di peña. Klaru ku Beibel ta deskribí prinsipionan kla ku tur kristian sinsero mester sigui. Ningun di nos mester bisti paña òf peña estilonan ku ta ekstrabagante òf inmodesto òf ku ta identifiká nos ku elementonan indeseabel di mundu. (1 Juan 2:15-17) Kristiannan ta kòrda ku na tur momentu, asta ora nan ta relahá, nan ta ministernan ku ta representá e Soberano Universal. (Isaias 43:10; Juan 17:16; 1 Timoteo 2:9, 10) Sin embargo, den hopi área tin un variedat amplio di desishonnan aseptabel ku kristiannan por tuma. *

Evitá di Pone Otro Hende Trompeká

15. Ki ora un kristian por keda sin hasi uso di su derecho pa benefisio di su rumannan?

¹⁵ Finalmente, den e konseho ku el a duna e kristiannan na Roma, tin un prinsipio importante ku Pablo a hala nos atenshon riba dje. Tin biaha, un kristian ku un konsenshi bon entrená por disidí di opta pa keda sin hasi algu ku riba su mes no ta malu. Dikon? Pasobra e ta realisá ku un desishon asina lo por perhudiká otro hende. Kiko nos tin ku hasi den un kaso asina? Pablo a bisa: “Ta bon pa no kome karni ni bebe biña, òf hasi kualke kos ku ta hasi bo ruman trompeká.” (Romanonan 14:14, 20, 21) Pues, “nos ku ta fuerte mester soportá e debilidatnan di esnan ku ta sin forsa, i no djis agradá nos mes. Laga kada  un di nos agradá su próhimo pa su bon, pa su edifikashon.” (Romanonan 15:1, 2) Ora nos por ofendé konsenshi di un ruman kristian ku loke nos ta hasi, amor fraternal lo impulsá nos pa tene kuenta kuné i keda sin hasi loke nos tin derecho di hasi. Un ehèmpel di esaki por ta uso di bebida alkohóliko. Un kristian tin mag di bebe biña ku moderashon. Pero si esei ta pone su ruman spiritual trompeká, lo e no insistí riba su derechonan.

16. Kon nos por tene kuenta ku otro hende den nos teritorio?

¹⁶ Nos por apliká e prinsipio aki tambe den nos trato ku hende pafó di e kongregashon kristian. Por ehèmpel, kisas nos ta biba den un área kaminda e religion dominante ta siña su miembronan pa konsiderá un dia di siman komo un dia di sosiegu. P’e motibu ei, esta, pa no pone nos bisiñanan trompeká i krea opstákulo pa e trabou di prediká, nos lo evitá mas tantu posibel di hasi kualke kos riba e dia ei ku lo por ofendé nos bisiñanan. Den un otro situashon, un kristian riku lo por muda bai sirbi kaminda e nesesidat ta mas grandi den un pueblo kaminda e hendenan ta di poko rekurso. Lo e por opta pa tene kuenta ku su bisiñanan nobo dor di bisti masha simpel òf dor di hiba un estilo di bida hopi mas modesto ku su rekursonan ta permitié.

17. Pakiko ta rasonabel pa tene kuenta ku otro hende den e desishonnan ku nos ta tuma?

¹⁷ Ta rasonabel pa ferwagt ku esnan “ku ta fuerte” ta hasi e ahustenan ei? Wèl, pensa riba e ilustrashon aki: Koriendo riba un kaminda grandi, nos ta mira nos dilanti algun mucha ta kana na un manera peligroso pegá ku e kaminda. Nos ta sigui kore n’e mesun velosidat máksimo djis pasobra nos tin e derecho legal di hasi esei? Nò, nos ta slow pa evitá posibel peliger p’e muchanan. Meskos tambe, tin biaha nos tin ku slow, òf sede, den nos relashon ku nos rumannan den fe òf ku otro hende. Kisas nos ta hasiendo algu ku nos tin e pleno derecho di hasi. Nos no ta faltando ku ningun prinsipio di Beibel. No opstante, si nos por ofendé otro hende òf perhudiká esnan ku tin ku un konsenshi mas débil, amor kristian lo impulsá nos pa aktua ku koutela. (Romanonan 14:13, 15) Mantené unidat i  promové interesnan di Reino ta mas importante ku ehersé un derecho ku nos tin.

18, 19. (a) Ora nos ta tene kuenta ku otro hende, kon nos ta sigui e ehèmpel di Hesus? (b) Den ki asuntunan nos tur ta aktua den un forma uní, i kiko nos lo konsiderá den e siguiente artíkulo?

¹⁸ Ora nos ta aktua den e manera aki, nos ta siguiendo e ehèmpel di mas sublime. Pablo a bisa: “Ni Kristu no a agradá su mes; ma manera ta pará skirbí: ‘E reprochenan di esnan ku a reprochá bo a kai riba mi.’” Hesus tabata dispuesto pa sakrifiká su bida pa nos. Siguramente nos ta dispuesto pa sakrifiká algun di nos derechonan si esei ta permití ‘esnan ku no ta fuerte’ glorifiká Dios den union ku nos. En bèrdat, ora nos ta tolerante i generoso pa ku e kristiannan ku tin un konsenshi mas débil—òf limitá nos preferensianan boluntariamente i no insistí riba nos derechonan—esei ta demostrá “e mesun aktitut mental ku Kristu Hesus tabatin.”—Romanonan 15:1-5, NW.

¹⁹ Ounke kada un di nos por tin nos propio punto di bista riba asuntunan kaminda no tin prinsipio di Beibel enbolbí, den asuntunan di adorashon, nos ta aktua kompletamente uní. (1 Korintionan 1:10) Por ehèmpel, e unidat ei ta bisto den nos reakshon riba esnan ku ta oponé adorashon berdadero. E Palabra di Dios ta yama e opositornan ei hende straño i ta spièrta nos pa tene kuidou ku “bos di hende straño.” (Juan 10:5) Kon nos por identifiká hende straño? Kiko mester ta nos reakshon? E siguiente artíkulo lo kontestá e preguntanan aki.

[Nota]

Kon Lo Bo Kontestá?

• Pakiko e echo ku kada ken tin su punto di bista riba asuntunan personal no ta pone nos union na peliger?

• Pakiko nos komo kristian mester laga amor impulsá nos pa tene kuenta ku otro?

• Menshoná algun manera den kua nos por apliká e konseho di Pablo riba unidat awe. Kiko lo motivá nos pa hasi esei?

[Preguntanan di Estudio]

[Plachi na página 9]

E konseho di Pablo tokante unidat tabata hopi importante p’e kongregashon

[Plachi na página 10]

Kristiannan ta uní apesar di nan diferente background

[Plachi na página 12]

Kiko e shofùr aki mester hasi awor?