Ki Herensia Bo Tin Ku Laga pa Bo Yunan?

PAVLOS, un kabes di famia di sur Europa, masha poko sa ta na kas huntu ku su kasá i yunan. E tin dos yu muhé di 13 i 11 aña, i un yu hòmber di 7 aña. Shete dia pa siman Pavlos ta traha dos warda di hopi ora, p’e purba gana sufisiente plaka pa e realisá su soño. E ke kumpra un apartamento pa kada un di su yu muhénan, i e ke kuminsá un negoshi chikitu pa su yu hòmber. Su esposa, Sofia, ta traha duru pa yega na kosnan di lino manera paña di mesa, paña di kama, i tambe kos di kushina, artíkulo di porselana i bestèk pa e futuro hogarnan aki. Ora puntra nan pakiko nan ta traha asina duru, nan ta kontestá pareu: “Pa nos yunan!”

Meskos ku Pavlos i Sofia, hopi mayor rònt  mundu ta hasi nan bèst pa duna nan yunan un bon komienso den bida. Algun ta spar pa futuro di nan yunan. Otronan ta hasi sigur ku nan yunan ta haña un edukashon adekuá i siña abilidatnan ku lo ta útil pa nan despues den bida. Ounke mayoria mayor ta mira e regalonan ei komo un herensia di amor, hopi bes e perkurashonnan aki ta pone mayornan bou di un preshon grandi pa kumpli ku e ekspektativanan di famia, amigu i e komunidat den kua nan ta biba. P’esei, mayornan ku tin interes di nan yunan na pechu tin bon motibu pa puntra: ‘Kiko nos tin ku laga pa nos yunan?’

Hasiendo Areglo pa Futuro

No ta solamente natural sino tambe bíbliko pa mayornan kristian laga algu pa nan yunan. Apòstel Pablo a bisa e kristiannan di su tempu: “No ta yunan mester spar pa nan mayornan, pero mayornan pa nan yunan.” (2 Korintionan 12:14, BPK) Pablo a bisa mas aleu ku mayornan tin un responsabilidat serio pa kuida nan yunan. El a skirbi: “Si un hende no proveé pa su mes hendenan, i spesialmente pa esnan di su kas, el a nenga e fe i ta pió ku un inkrédulo.” (1 Timoteo 5:8) Vários relato di Beibel ta ilustrá ku asuntunan di herensia tabata importante bou di e sirbidónan di Dios den tempunan bíbliko.—Ruth 2:19, 20; 3:9-13; 4:1-22; Jòb 42:15.

Sin embargo, tin biaha mayornan ta pensa ku nan mester laga un herensia grandi pa nan yunan. Pakiko? Manolis, un tata ku a muda for di sur Europa bai Merka, ta splika un di e motibunan: “Mayornan ku a yega di sufri di hamber i pobresa, i ku a pasa den e desaster di Segunda Guera Mundial ta determiná pa nan yunan tin un mihó futuro.” E ta agregá: “Pa motibu di nan sentido eksagerá  di responsabilidat i un deseo pa duna nan yunan e mihó komienso posibel den bida, tin biaha mayornan ta kousa daño na nan mes.” En bèrdat, algun mayor ta keda sin kumpli ku algun di nan nesesidatnan di bida òf ta priva nan mes di sierto kosnan pa por laga plaka i propiedat pa nan yunan. Pero ta sabí pa mayornan hiba un bida asina?

“Banidat i Gran Maldat”

Rei Salomon di Israel di antigwedat tabatin un palabra di spièrtamentu relashoná ku herensia. El a skirbi: “Mi tabata odia tur e fruta di mi trabou ku mi a traha p’e bou di solo, pasobra mi mester lag’é pa e hende ku lo bin despues di mi. I ken sa si e lo ta un hende sabí òf un hende bobo[?] Tòg e lo tin kontròl riba tur fruta di mi trabou ku mi a traha p’e dor di aktua ku sabiduria bou di solo. Esaki tambe ta banidat. . . . Despues ku un hende a traha ku sabiduria, konosementu i abilidat, e ta duna su propiedat na un hende ku no a traha ku esakinan. Esaki tambe ta banidat i gran maldat.”—Eklesiastés 2:18-21.

Manera Salomon ta splika, hende ku ta risibí un herensia kisas no ta realisá su balor kompletu pasobra no ta nan mes a traha duru p’e. Konsekuentemente, e herederonan por aktua na un manera bobo ku loke e mayornan a lucha duru pa akumulá pa nan. Nan por asta malgastá tur pertinensia ku nan grandinan a yega na dje ku sodó di nan frenta. (Lukas 15:11-16) Esta un “banidat i [un] gran maldat” esei lo ta!

Herensia i Golosidat

Tin algu mas ku mayornan tin ku pensa ariba. Den kulturanan ku ta duna hopi importansia na propiedatnan heredá i regalo di matrimonio, yunan por bira golos, i kuminsá eksigí propiedat, òf un bruidschat, riba loke e mayornan rasonablemente por duna. “Ai di e tata ku tin dos òf tres yu muhé,” Loukas, un tata di Gresia, ta bisa den forma di chansa. “Yu muhé por kompará loke nan tata por duna nan ku loke otro mayornan ‘di bon kurason’ ta akumulá pa nan yunan. Nan por bisa ku si nan no tin un bruidschat satisfaktorio, nan chèns di kasa lo bira mas chikitu.”

Manolis, menshoná anteriormente, ta bisa: “Un yònkuman lo por alargá e namorashon te ora e tata di e futuro brùit primintié algu pa e brùit, por lo general propiedat òf un suma konsiderabel di plaka. E por bira un tipo di chantahe.”

Beibel ta spièrta nos kontra tur forma di golosidat. Salomon a skirbi: “Un herensia  hañá muchu lihé na prinsipio lo no ta bendishoná na fin.” (Proverbionan 20:21) Apòstel Pablo a enfatisá: “Amor pa plaka ta rais di tur sorto di maldat.”—1 Timoteo 6:10; Efesionan 5:5, BPK.

“Sabiduria Huntu ku un Herensia”

Ta bèrdat ku un herensia tin sierto balor, pero sabiduria tin muchu mas balor ku kos material. Rei Salomon a skirbi: “Sabiduria huntu ku un herensia ta bon, i ta un probecho . . . Pasobra sabiduria ta protekshon meskos ku plaka ta protekshon. Ma e bentaha di konosementu ta ku sabiduria ta preservá bida di esnan ku ta pose’é.” (Eklesiastés 7:11, 12; Proverbionan 2:7; 3:21) Ounke plaka ta duna sierto protekshon, loke ta permití esun ku ta poseé haña loke e tin mester, e por bai pèrdí. En kambio, sabiduria—e kapasidat pa usa konosementu pa resolvé problema òf pa logra sierto meta—por protehá un persona di kore riesgonan imprudente. Ora e ta basá riba un temor di Dios ku ta na su lugá, e por yuda un persona haña bida eterno den Dios su mundu nobo ku lo bini pronto—un herensia presioso en bèrdat!—2 Pedro 3:13.

Mayornan kristian ta ehersé e sabiduria ei dor di establesé prioridatnan adekuá pa nan mes i pa nan yunan. (Filipensenan 1:10, BPK) Akumulashon di kos material pa yunan haña despues no mester ta mas importante ku kosnan spiritual. Hesus a animá su siguidónan: “Buska promé e reino di Dios i su hustisia, i tur e kosnan aki lo wòrdu añadí na boso.” (Mateo 6:33) Mayornan ku ta fiha metanan spiritual pa nan famia kristian por ferwagt ku nan lo ser rikamente rekompensá. E rei sabí Salomon a skirbi: “Tata di e hustu lo tin gran goso, i esun ku engendrá un yu sabí lo tin delisia den dje. Laga bo tata i bo mama ta kontentu, i laga esun ku a haña bo regosihá.”—Proverbionan 23:24, 25.

Un Herensia Duradero

Pa e israelitanan di antigwedat, asuntunan di herensia tabata hopi importante. (1 Reinan 21:2-6) Sin embargo, Yehova a atvertí nan: “E palabranan aki, ku mi ta ordená bo awe, mester ta riba bo kurason. Siña nan ku tur diligensia na bo yunan, i papia di nan ora bo ta sinta den bo kas, ora bo ta kana riba kaminda, ora bo ta bai drumi i ora bo ta lanta.” (Deuteronomio 6:6, 7) Meskos tambe, Beibel ta bisa mayornan kristian: “Lanta [bo yunan] den e disiplina i instrukshon di Señor.”—Efesionan 6:4.

Mayornan ku tin un punto di bista spiritual ta realisá ku proveé pa nan kas ta inkluí duna instrukshon for di Beibel. Andreas, un tata di tres yu, ta remarká: “Si yunan siña apliká prinsipionan di Dios den nan bida, nan lo ta mihó prepará pa futuro.” Un herensia asina ta enfoká tambe riba yuda nan establesé i kultivá un relashon personal ku nan Kreadó.—1 Timoteo 6:19.

Bo a pensa riba ki preparashon bo por hasi p’e futuro spiritual di bo yu? Por ehèmpel, kiko mayornan por hasi si nan yu tin meta pa drenta e sirbishi di tempu kompletu? Ounke un predikadó di tempu kompletu no mag di eksigí ni spera sosten finansiero, mayornan amoroso por disidí di ‘kontribuí na nesesidatnan’ di nan yunan pa yuda nan keda den e sirbishi di tempu kompletu. (Romanonan 12:13; 1 Samuel 2:18, 19; Filipensenan 4:14-18) Un aktitut asina sigur lo agradá Yehova.

Pues, anto, kiko mayornan tin ku laga pa nan yunan? Ademas, di perkurá pa nan nesesidatnan material, mayornan kristian lo hasi sigur ku nan yunan ta risibí un herensia spiritual riku ku lo benefisiá nan pa semper. Den e manera ei, e palabranan na Salmo 37:18 lo bira realidat: “SEÑOR konosé e dianan di e perfektonan; i nan herensia lo keda pa semper.”

[Plachinan na página 26, 27]

Ki futuro bo tin na mente pa bo yunan?