Kon pa Vense Desanimashon

BO TA desanimá? Den e era aki di insiguridat i konflikto, hopi hende ta desanimá. Algun ta desanimá pa motibu ku nan no tin trabou. Otronan ta sintiendo e efektonan di un aksidente. Tambe tin hende ku ta lucha ku problema di famia, enfermedat serio òf sintimentu di soledat.

Si bo ta desanimá, unda bo por akudí pa yudansa? Miónes di hende rònt mundu a haña konsuelo dor di lesa Beibel, e Palabra di Dios. Nan por haña esei den e palabranan di apòstel Pablo, kende a bisa: “Bendishoná sea e Dios i Tata di nos Señor Hesukristu, e Tata di miserikòrdianan i Dios di tur konsuelo, kende ta konsolá nos den tur nos aflikshon.” (2 Korintionan 1:3, 4) Pakiko no lesa e teksto aki i otro pasashinan bíbliko den bo mes Beibel? Esei lo ‘konsolá i fortalesé bo kurason.’—2 Tesalonisensenan 2:17.

Tambe nos por haña yudansa pa vense desanimashon mediante nos asosiashon ku personanan ku ta sirbi Yehova. Proverbionan 12:25 ta bisa: “Ansha den kurason di hende ta hasié abatí, ma un bon palabra ta hasié kontentu.” Ora nos asistí na reunionnan kristian, nos ta tende e “bon palabra” ei, ku ta “dushi pa alma i kuramentu pa wesu.” (Proverbionan 16:24) Pakiko bo no ta asistí na un reunion di Testigunan di Yehova na un Salòn di Reino pa bo mes por sinti e efekto fortalesedor ku un reunion asina por tin riba bo?

E poder di orashon tambe por yuda bo. Si bo ta sinti ku e ansiedatnan di bida a bira di mas pa bo, kompartí bo sintimentunan di mas profundo ku ‘Esun ku ta skucha orashon.’ (Salmo 65:2) Nos Kreadó, Yehova Dios, ta komprondé nos mihó ku nos ta komprondé nos mes. Nos por konta ku su yudansa. Su Palabra ta primintí nos: “Tira bo karga riba SEÑOR, i e lo sostené bo; nunka e lo no permití pa e hustu wòrdu moví.” (Salmo 55:22) Sí, “esnan ku spera riba SEÑOR lo haña forsa renobá.”—Isaias 40:31.

Yehova Dios a duna nos tur e medionan poderoso ku por yuda nos vense desanimashon. Abo lo hasi uso di nan?