Pregunta di Lektor

Pakiko Testigunan di Yehova ta mira e sifra 144.000 menshoná den e buki di Revelashon komo algu literal i no simbóliko?

Apòstel Juan a skirbi: “Mi a tende e kantidat di esnan ku a wòrdu seyá, 144.000.” (Revelashon 7:4) Den Beibel, e frase “esnan ku a wòrdu seyá” ta referí na un grupo di persona ku a ser skohé for di humanidat pa reina ku Kristu den shelu riba e binidero Paradeis terenal. (2 Korintionan 1:21, 22; Revelashon 5:9, 10; 20:6) Nan kantidat, 144.000, ta un sifra literal pa vários motibu. Un di e motibunan ei ta den e konteksto direkto di Revelashon 7:4.

Despues ku apòstel Juan a mira e grupo aki di 144.000 persona den un vishon, el a mira un otro grupo. Juan ta deskribí e di dos grupo aki komo “un multitut grandi ku ningun hende no por a konta, di tur nashon i tur tribu i pueblo i lenga.” E multitut grandi aki ta referí na esnan ku lo sobrebibí e binidero “gran tribulashon,” ku lo destruí e mundu malbado djawe.—Revelashon 7:9, 14.

Sin embargo, tuma nota di e kontraste ku Juan ta hasi entre versíkulo 4 i 9 di Revelashon kapítulo 7. E ta bisa ku e promé grupo, “esnan ku a wòrdu seyá,” ta un kantidat definí. Sin embargo, e di dos grupo, “un multitut grandi,” no ta un kantidat definí. Ku esei na mente, ta lógiko anto pa mira e kantidat di 144.000 komo algu literal. Si e sifra 144.000 ta algu simbóliko i ta referí na un grupo ku en realidat ta indefiní, e efekto di e kontraste entre e dos versíkulonan ei lo bai pèrdí. Pues, e konteksto ta duna indikashon fuerte ku e sifra 144.000 mester ta algu literal.

Vários eksperto den Beibel, tantu di pasado komo di awe, a yega n’e mesun konklushon, esta, ku e sifra ta literal. Por ehèmpel, komentando riba Revelashon 7:4 i 9, e eskritor di dikshonario britániko dr. Ethelbert W. Bullinger a remarká rònt di 100 aña pasá: “Ta e simpel deklarashon di un echo: un kantidat definí na kontraste ku e kantidat indefiní den e mesun kapítulo aki.” (The Apocalypse or “The Day of the Lord” [Apokalípsis òf “Dia di Señor”], página 282) Mas resientemente, Robert L. Thomas, Jr., profèser di Tèstamènt Nobo na e Seminario di Master na Merka, a skirbi: “No tin un base sólido pa mira e kantidat di 144.000 komo algu simbóliko.” El a agregá: “Ta un kantidat definí [na 7:4] na kontraste ku e kantidat indefiní di 7:9. Si mir’é komo algu simbóliko, anto no por mira ningun otro sifra den e buki aki komo algu literal.”—Revelation: An Exegetical Commentary, Volúmen 1, página 474.

Algun eksperto ta bisa ku ya ku Revelashon ta kontené idioma sumamente simbóliko, tur sifra den e buki aki, inkluyendo e sifra 144.000, mester ta simbóliko. (Revelashon 1:1, 4; 2:10) Sin embargo, ta bisto ku e  konklushon ei no ta korekto. Ta bèrdat ku Revelashon ta kontené vários sifra simbóliko, pero tambe e ta inkluí sifranan literal. Por ehèmpel, Juan ta papia di “e diesdos nòmbernan di e diesdos apòstelnan di e Lamchi.” (Revelashon 21:14) Ta opvio ku e sifra 12 menshoná den e versíkulo aki ta literal, no simbóliko. Mas aleu, apòstel Juan ta skirbi tokante “e mil añanan” di e reinado di Kristu. Manera un investigashon kuidadoso di Beibel ta mustra, e sifra ei tambe ta literal. * (Revelashon 20:3, 5-7) P’esei, ta e konteksto i marko di sirkunstansia ta determiná si mester mira un sifra den Revelashon komo algu literal òf simbóliko.

E idea ku e sifra 144.000 ta literal i ku e ta referí na un kantidat limitá di persona, un grupo relativamente chikitu kompará ku e “multitut grandi,” ta kuadra tambe ku otro pasashinan di Beibel. Por ehèmpel, mas despues den e vishon ku apòstel Juan ta risibí, e 144.000 ta ser deskribí komo esnan ku “a wòrdu kumprá for di entre hende komo e promé frutanan.” (Revelashon 14:1, 4) E ekspreshon “promé frutanan” ta referí na un grupo chikitu representativo. Tambe, tempu ku Hesus tabata riba tera, el a papia di esnan ku lo reina kuné den su Reino selestial i a yama nan un “tou chikitu.” (Lukas 12:32; 22:29) En bèrdat, e personanan skohí for di entre humanidat ku lo reina den shelu ta poko na komparashon ku e hendenan ku lo biba den e binidero Paradeis riba tera.

P’esei, e konteksto di Revelashon 7:4 i otro deklarashonnan den Beibel relashoná ku esaki ta konfirmá ku e sifra 144.000 ta literal. E ta referí na esnan ku lo goberná den shelu ku Kristu riba un paradeis terenal, ku lo ta habitá pa un kantidat grandi no-determiná di hende felis ku ta adorá Yehova Dios.—Salmo 37:29.

[Nota]

[Komentario na página 31]

E kantidat di heredero selestial ta limitá na 144.000

[Plachi na página 31]

E “multitut grandi” ta un kantidat indefiní

[Rekonosementu pa Potrèt na página 31]

Streanan: Pa kortesia di Anglo-Australian Observatory, potrèt di David Malin