Tene Kuidou ku “Bos di Hende Straño”
Tene Kuidou ku “Bos di Hende Straño”
“Un hende straño sigur nan lo no sigui, ma lo hui bai for di dje, pasobra nan no konosé bos di hende straño.”—JUAN 10:5.
1, 2. (a) Kon Maria a reakshoná ora Hesus a yam’é na su nòmber, i e suseso aki ta ilustrá ki deklarashon ku Hesus a hasi na un okashon anterior? (b) Kiko ta yuda nos sigui Hesus mashá di aserka?
HESUS resusitá a mira un muhé pará banda di su graf bashí. E tabata konos’é bon. Tabata Maria Magdalena. Kasi dos aña mas promé, el a libr’é di demoño. Desde e dia ei e muhé a kompañá Hesus i su apòstelnan i a perkurá pa nan nesesidatnan di tur dia. (Lukas 8:1-3) Pero awor Maria tabata yora, e tabata tristu pasobra el a mira Hesus muri, i awor asta su kurpa a disparsé! P’esei Hesus a puntr’é: “Muhé, pakiko bo ta yora? Ta ken bo ta buska?” Keriendo ku tabata trata aki di e kuidadó di e hòfi, Maria a kontest’é: “Señor, si ta bo a karg’é bai kuné, bisa mi unda bo a pon’é, i lo mi koh’é bai kuné.” E ora ei Hesus a bisa: “Maria!” Mesora e muhé a rekonosé su manera akustumbrá di papia kuné. Kontentu di su alma, el a sklama: “Rabuni [“Maestro,” NW]!” I el a yega serka Hesus.—Juan 20:11-18.
2 E relato aki ta ilustrá na un manera konmovedor loke Hesus a bisa na un okashon anterior. Komparando su mes ku un wardadó i su siguidónan ku karné, el a bisa ku e wardadó ta yama su mes karnénan na nan nòmber i ku nan konosé su bos. (Juan 10:3, 4, 14, 27, 28) En bèrdat, meskos ku un karné ta rekonosé su wardadó, asina Maria a rekonosé su Wardadó, Kristu. Esaki ta konta pa Hesus su siguidónan djawe tambe. (Juan 10:16) Meskos ku un karné su orea skèrpi ta yud’é keda serka di su wardadó, asina nos disernimentu spiritual ta permití nos sigui e pasonan di nos Bon Wardadó, Hesukristu, mashá di aserka.—Juan 13:15; 1 Juan 2:6; 5:20.
3. Kua ta algun pregunta ku Hesus su ilustrashon tokante e kurá di karné ta trese na nos mente?
3 Sin embargo, segun e mesun ilustrashon ei, e kapasidat di un karné pa rekonosé bos di hende ta permitié haña sa no solamente ken ta su amigu sino tambe ken ta su enemigu. Esei ta sumamente importante pasobra nos tin oponentenan engañoso. Ken nan ta? Kon nan ta aktua? Kon nos por protehá nos mes? Pa nos haña sa, laga nos mira kiko mas Hesus a bisa den su ilustrashon tokante e kurá di karné.
‘Esun Ku No Ta Drenta dor di e Porta’
4. Segun e ilustrashon di e wardadó, ken e karnénan ta sigui, i ken nan no ta sigui?
4 Hesus a bisa: “Esun ku drenta dor di e porta ta un wardadó di karné. Pa esaki e wardadó di porta ta habri porta, i e karnénan ta tende su bos, i e ta yama su mes karnénan na nan nòmber i ta saka nan hiba pafó. Ora ku e saka tur ku ta di dje hiba pafó, e ta bai nan dilanti, i e karnénan ta siguié, pasobra nan konosé su bos. I un hende straño sigur nan lo no sigui, ma lo hui bai for di dje, pasobra nan no konosé bos di hende straño.” (Juan 10:2-5) Tuma nota ku Hesus a usa e palabra “bos” tres bes. Dos bes el a papia tokante e bos di un wardadó, pero e di tres biaha, el a referí na “bos di hende straño.” Ki tipo di hende straño Hesus a referí na dje?
5. Pakiko nos no ta mustra hospitalidat na e tipo di hende straño menshoná den Juan kapítulo 10?
5 Hesus no tabata papiando di e tipo di hende straño na ken nos ke mustra hospitalidat—un palabra ku den e idioma original di Beibel ta nifiká “amor pa hende straño.” (Hebreonan 13:2) Den Hesus su ilustrashon, e hende straño no ta un persona invitá. E “no [ta] drenta den e kurá di karné dor di e porta, ma ta subi drenta pa un otro kaminda.” E ta “un ladron i un hòrtadó.” (Juan 10:1) Ken ta e promé individuo menshoná den e Palabra di Dios ku a bira un ladron i un hòrtadó? Satanas e Diabel. Nos ta haña evidensia di esaki den e buki di Génesis.
Dia A Tende e Bos di un Hende Straño pa Promé Bes
6, 7. Pakiko nos por yama Satanas korektamente un hende straño i un ladron?
6 Génesis 3:1-5 ta deskribí kon a tende e bos di un hende straño pa promé bes aki riba tera. E relato ta konta kon Satanas, pa medio di un kolebra, a aserká e promé muhé, Eva, i a papia kuné i engañ’é. Ta bèrdat ku den e relato aki Satanas no ta ser yamá literalmente “un hende straño.” No opstante, su akshonnan ta mustra ku den hopi sentido e tabata manera e hende straño deskribí den Hesus su ilustrashon registrá den Juan kapítulo 10. Laga nos wak algun di e similaridatnan.
7 Hesus a bisa ku e hende straño ta aserká su víktimanan den e kurá di karné den un forma indirekto. Meskos tambe, Satanas a aserká su víktima indirektamente, usando un kolebra. E método astuto aki a saka na kla loke Satanas ta realmente—un intruso engañoso. Ademas, e hende straño den e kurá di karné ta buska moda di hòrta e karnénan for di nan doño legítimo. De echo, e ta pió ku un ladron, pasobra su meta ta “pa mata i pa destruí” tambe. (Juan 10:10) Di igual manera, Satanas tabata un ladron. Engañando Eva, el a ‘hòrt’é’ òf kit’é for di su lealtat na Dios. Ademas, Satanas a trese morto tambe pa humanidat. P’esei, e ta un asesino.
8. Kon Satanas a trose Yehova su palabra- i motibunan?
8 E desonestidat di Satanas tabata bisto den e manera ku el a trose e palabranan i motibunan di Yehova. El a puntra Eva: “Di bèrdat Dios a bisa: ‘Bo no mag kome di ningun palu?’” Satanas kier a duna e impreshon ku el a keda sorprendí. Ta komo si fuera el a bisa: ‘Kon Dios por ta irasonabel asina?’ El a agregá: “Dios sa ku e dia ku boso kome di dje, boso wowo lo habri.” Ripará su palabranan: “Dios sa.” Na moda di papia, Satanas a bisa: ‘Mi sa loke Dios sa. Mi sa su motibunan, i nan ta malu.’ (Génesis 2:16, 17; 3:1, 5) Lamentablemente, Eva i Adam no a alehá for di e bos di e hende straño aki. Mas bien, nan a hasi kaso di dje i a trese kalamidat tantu pa nan mes komo pa nan yunan.—Romanonan 5:12, 14.
9. Pakiko nos por ferwagt ku hende ta tende bos di hende straño awe?
9 Satanas ta usa métodonan similar pa engañá e pueblo di Dios awe. (Revelashon 12:9) E ta “e tata di mentira,” i esnan ku ta purba engañá sirbidónan di Dios meskos kuné, ta su yunan. (Juan 8:44) Laga nos tuma nota di algun manera den kua hende por tende bos di hende straño awe.
Kon e Bos di Hende Straño Ta Ser Tendé Awe
10. Den ki manera hende ta tende bos di hende straño?
10 Rasonamentu engañoso. Apòstel Pablo a deklará: “No laga boso wòrdu hibá p’aki p’aya dor di tur sorto di siñansa straño.” (Hebreonan 13:9) Ki sorto di siñansa? Siendo ku nan por ‘hiba nos,’ ta opvio ku aki Pablo a referí na siñansanan ku ta debilitá nos balansa spiritual. Ken ta bosiferá e siñansanan straño ei? Pablo a bisa un grupo di ansiano kristian: “For di meimei di boso mes lo lanta hòmbernan ku ta papia kosnan pèrvèrso [“trosí,” NW], pa desviá e disipelnan i hasi nan bai nan tras.” (Echonan 20:30) Sí, meskos ku den tempu di Pablo, algun individuo ku un tempu tabata forma parti di e kongregashon kristian awor ta purba engañá e karnénan dor di papia “kosnan pèrvèrso,” esta, mitar bèrdat i mentira flagrante. Manera apòstel Pedro a ekspres’é, nan ta usa “palabranan di engaño,” esta, palabranan ku ta parse bèrdat, pero ku en realidat no tin ningun balor.—2 Pedro 2:3.
11. Kon e palabranan na 2 Pedro 2:1 i 3 ta deskribí e métodonan i meta di apóstatanan?
11 Mas aleu, Pedro a deskribí e métodonan di apóstatanan dor di bisa ku nan ta “introdusí na skondí herehianan [sektanan] destruktivo.” (2 Pedro 2:1, 3) Meskos ku e ladron den Hesus su ilustrashon di e kurá di karné no ta drenta “dor di e porta, ma ta subi drenta pa un otro kaminda,” asina apóstatanan ta slùip drenta den nos. (Galationan 2:4; Hudas 4) Ku ki meta? Pedro a agregá: “Nan lo eksplotá [“probechá di,” NW] boso.” En bèrdat, maske kuantu apóstatanan ta purba hustifiká nan mes, e berdadero meta di intrusonan ta “pa hòrta, pa mata i pa destruí.” (Juan 10:10) Tene kuidou ku tal hende straño!
12. (a) Kon nos asosiashonnan por eksponé nos na bos di hende straño? (b) Ki similaridat tin entre e táktikanan di Satanas i esnan di hende straño awe?
12 Asosiashon perhudisial. Bos di hende straño por ser tendé tambe pa medio di e personanan ku nos ta asosiá kuné. Asosiashon perhudisial ta spesialmente peligroso pa hóbennan. (1 Korintionan 15:33) Kòrda, den kaso di e promé pareha humano Satanas a mek riba Eva—esun mas hóben i ku ménos eksperensia. El a konvensé Eva ku Yehova a limitá su libertat demasiado, siendo ku realmente ta lo kontrario tabata e bèrdat. Yehova a stima su kreashon humano i a perkurá pa nan bienestar. (Isaias 48:17) Meskos tambe awe, hende straño ta purba konvensé boso, hóbennan, ku boso mayornan kristian ta duna boso muchu tiki libertat. Kon tal hende straño por afektá bo? Un mucha muhé kristian ta atmití: “Pa un tempu e muchanan di mi klas a suak mi fe bastante. Kada bes nan tabata bisa mi ku mi religion ta muchu strèng i irasonabel.” Pero e bèrdat ta ku bo mayornan stima bo. Pues ora e muchanan di bo skol ta purba konvensé bo pa deskonfiá bo mayornan, no laga nan engañá bo, manera Eva a laga su mes wòrdu engañá.
13. Ki rumbo sabí David a sigui, i den ki manera nos por imit’é?
13 Relashoná ku asosiashon perhudisial, e salmista David a deklará: “Mi no ta sinta huntu ku hòmbernan gañadó, tampoko lo mi no anda ku hipókritanan.” (Salmo 26:4) Bo a nota atrobe e karakterístika típiko di hende straño? Nan ta skonde loke nan ta—meskos ku Satanas a skonde su identidat dor di usa un kolebra. Awe, algun hende inmoral ta skonde nan identidat i berdadero intenshonnan dor di usa Internet. Den chat room, adultonan pèrvèrso por asta laga parse ku nan ta hóbennan pa lòk bo den un trampa. Hóbennan por fabor, si boso no ke sufri daño spiritual, tene masha kuidou.—Salmo 119:101; Proverbionan 22:3.
14. Kon medionan di komunikashon sa publiká e bos di hende straño?
14 Akusashon falsu. Ounke algun informe di notisia tokante Testigunan di Yehova ta basá riba bèrdat, tin biaha medionan di komunikashon ta laga bos di hende straño ventilá nan prehuisio. Por ehèmpel, den un pais, un informe di notisia a deklará falsamente ku e Testigunan a apoyá e régimen di Hitler durante Segundo Guera Mundial. Den un otro pais, un informe a akusá e Testigunan di aktonan di vandalismo kontra iglesianan. Den vários pais e medionan di komunikashon a akusá e Testigunan di ta nenga di duna tratamentu médiko na nan yunan i tambe di ta sera wowo deliberadamente pa e pikánan serio ku nan rumannan di fe ta kometé. (Mateo 10:22) Pero apesar di esei, hende sinsero ku konosé nos personalmente ta rekonosé ku e akusashonnan ei ta falsu.
15. Pakiko no ta sabí pa kere tur loke ser presentá den medionan di komunikashon?
15 Kiko nos mester hasi si nos haña nos konfrontá ku akusashonnan ku e bos di hende straño ta plama? Ta bon pa nos hasi kaso di e konseho di Proverbionan 14:15: “E hende simpel ta kere tur kos, ma e hòmber prudente ta wak bon unda e ta bai.” No ta sabí pa kere tur loke ser presentá komo bèrdat den medionan di komunikashon. Ounke sigur nos no ta deskonfiá tur informashon seglar, nos ta rekonosé sí ku “henter mundu ta bou di kontròl di e malbado.”—1 Juan 5:19.
“Pone e Ekspreshonnan Inspirá na Prueba”
16. (a) Kon e komportashon di karné literal ta ilustrá ku e palabranan di Hesus na Juan 10:4 ta bèrdat? (b) Kiko Beibel ta animá nos pa hasi?
16 Pero kon nos por sa sigur si nos ta tratando ku un amigu òf un enemigu? Wèl, Hesus a bisa ku e karnénan ta sigui e wardadó “pasobra nan konosé su bos.” (Juan 10:4) No ta e aparensia di wardadó di karné ta impulsá e karnénan pa siguié; ta su bos. Un buki tokante teranan di Beibel ta konta di un bishitante ku a yega di pretendé ku karnénan ta rekonosé nan wardadó na su paña, no na su bos. Un wardadó di karné a kontestá ku ta e bos e karnénan konosé. Pa proba esaki, el a kambia paña ku e hende straño. Bistí ku paña di e wardadó di karné, e hende straño a yama e karnénan, pero nan no a hasi kaso di dje. Nan no tabata konosé su bos. Pero ora e wardadó a yama nan, ounke e no tabata bistí ku su paña di wardadó, e karnénan a bini mesora. Pues, un hende por parse un wardadó di karné, pero p’e karnénan esei no ta nifiká ku en bèrdat e ta un wardadó. Básikamente, e karnénan ta analisá e bos di esun ku ta yama nan i kompar’é ku e bos di e wardadó. E Palabra di Dios ta bisa nos pa hasi meskos, esta, “pone e ekspreshonnan inspirá na prueba pa mira si nan ta originá di Dios.” (1 Juan 4:1, NW; 2 Timoteo 1:13) Kiko lo yuda nos hasi esei?
17. (a) Kon nos por siña konosé e bos di Yehova? (b) Kiko konosementu di Yehova ta yuda nos hasi?
17 Ta lógiko anto ku mas nos konosé e bos òf mensahe di Yehova, mas mihó nos por detektá e bos di hende straño. Beibel ta mustra nos kon nos por desaroyá e konosementu ei. E ta bisa: “Bo orea lo tende un palabra tras di bo ta bisa: ‘Esaki ta e kaminda, kana den dje.’” (Isaias 30:21) E “palabra” ei ku ta nos tras ta bini di e Palabra di Dios. Kada biaha ku nos lesa e Palabra di Dios, nos ta tende, na moda di papia, e bos di nos Gran Wardadó, Yehova. (Salmo 23:1) P’esei, mas nos studia Beibel, mas nos ta siña konosé e bos di Dios. En buèlta, e konosementu profundo ei ta yuda nos detektá e bos di hende straño instantáneamente.—Galationan 1:8.
18. (a) Kiko konosé e bos di Yehova ta enserá? (b) Segun Mateo 17:5, pakiko nos tin ku obedesé e bos di Hesus?
18 Kiko mas konosé e bos di Yehova ta enserá? Ademas di tende, e ta enserá obedesé. Tuma nota di Isaias 30:21 atrobe. E Palabra di Dios ta deklará: “Esaki ta e kaminda.” Sí, pa medio di un estudio di Beibel, nos ta tende e instrukshonnan di Yehova. Siguientemente, e ta manda nos: “Kana den dje.” Yehova ke pa nos praktiká loke nos ta tende. Pues dor di apliká loke nos ta siña, nos ta mustra ku nos no ta djis tende e bos di Yehova sino ta obedes’é tambe. (Deuteronomio 28:1) Obedesé e bos di Yehova ta nifiká tambe obedesé e bos di Hesus, pasobra Yehova mes a bisa nos pa hasi esei. (Mateo 17:5) Kiko Hesus, e Bon Wardadó, ta bisa nos pa hasi? E ta siña nos pa hasi disipel i pa konfia “e esklabo fiel i prudente.” (Mateo 24:45; 28:18-20) Obedesé su bos ta nifiká bida eterno pa nos.—Echonan 3:23.
‘Nan Lo Hui Bai for di Dje’
19. Kon nos mester reakshoná riba e bos di hende straño?
19 Kon anto nos tin ku reakshoná riba e bos di hende straño? Meskos ku karné. Hesus a bisa: “Un hende straño sigur nan lo no sigui, ma lo hui bai for di dje.” (Juan 10:5) Nos lo reakshoná na dos manera. Pa kuminsá, nos “sigur . . . lo no sigui” un hende straño. Sí, nos lo rechasá un hende straño sin vasilá. De echo, den e idioma griego di Beibel, e palabranan “sigur . . . lo no” ta ekspresá e rechaso di mas fuerte posibel den e idioma ei. Na di dos lugá, nos “lo hui bai for di dje,” òf hala leu for di dje. Esei ta e úniko manera korekto pa reakshoná riba esnan kende nan siñansanan no ta na armonia ku e bos di e Bon Wardadó.
20. Kon nos lo reakshoná ora nos haña nos konfrontá ku (a) apóstatanan engañoso, (b) asosiashon perhudisial, (c) informenan basá riba mitar bèrdat den medionan di komunikashon?
20 P’esei, ora nos haña nos konfrontá ku personanan ku ta bosiferá ideanan apóstata, nos kier hasi loke e Palabra di Dios ta deklará: “Tene na bista esnan ku ta kousa divishon i strobashon kontrario na e siñansa ku boso a haña, i apartá boso for di nan.” (Romanonan 16:17; Tito 3:10) Meskos tambe, hóbennan kristian ku ta enfrentá e peligernan di koleganan perhudisial kier apliká e konseho ku Pablo a duna e hóben Timoteo: “Hui pa e pashonnan di hubentut.” I ora nos haña nos konfrontá ku akusashonnan falsu den medionan di komunikashon, nos lo kòrda Pablo su siguiente konseho na Timoteo: “[Esnan ku ta skucha bos di hende straño] lo bolbe na fábula. Ma abo, sea sobrio den tur kos.” (2 Timoteo 2:22; 4:3-5) Maske kon agradabel e bos di hende straño por parse, nos ta hui for di tur loke por korumpí nos fe.—Salmo 26:5; Proverbionan 7:5, 21; Revelashon 18:2, 4.
21. Ki rekompensa ta spera hende ku ta rechasá bos di hende straño?
21 Dor di rechasá e bos di hende straño, kristiannan ungí ku spiritu ta respondé na e palabranan di e Bon Wardadó na Lukas 12:32. Ei Hesus ta bisa nan: “No tene miedu, tou chikitu, pasobra a agradá boso Tata pa duna boso e reino.” Meskos tambe, e “otro karnénan” ta antisipá ansiosamente pa tende e palabranan di Hesus: “Bin, boso ku ta bendishoná di mi Tata, heredá e reino ku ta prepará pa boso desde e fundashon di mundu.” (Juan 10:16; Mateo 25:34) Ki un rekompensa alentador ta spera nos si nos rechasá “bos di hende straño”!
Bo Ta Kòrda?
• Kon Satanas ta kuadra ku e deskripshon di e hende straño menshoná den Hesus su ilustrashon tokante e kurá di karné?
• Kon e bos di hende straño ta ser tendé awe?
• Kon nos por rekonosé e bos di hende straño?
• Kon nos mester reakshoná riba e bos di hende straño?
[Preguntanan di Estudio]
[Plachi na página 15]
Maria a rekonosé Kristu
[Plachi na página 16]
E hende straño no ta aserká e karnénan direktamente
[Plachi na página 18]
Kon nos ta reakshoná riba e bos di hende straño?