Historia di Bida

Un Bida Riku i Felis di Sakrifisio Boluntario

SEGUN E RELATO DI MARIAN I ROSA SZUMIGA

“Boluntariamente lo mi ofresé sakrifisio na bo,” Salmo 54:6 ta deklará. E deklarashon aki tabata e tema den bida di Marian Szumiga i su esposa, Rosa, kendenan ta biba na Fransia. Poko tempu pasá nan a sinta konta algun di e puntonan sobresaliente di nan bida largu i riku den e sirbishi di Yehova.

MARIAN: Mi mayornan tabata imigrante katóliko romano for di Polonia. Tata tabata un hòmber humilde. Nunka el a haña chèns di bai skol. Sin embargo, durante promé guera mundial, el a siña lesa i skirbi segun ku e tabata traha warda komo sòldá. Tata tabata un hòmber temeroso di Dios, pero hopi bes iglesia a desepshon’é.

Tabatin un insidente en partikular ku nunka el a lubidá. Un biaha durante e guera, un kapelan a bishitá Tata su unidat. Ora ku un granada a eksplotá djis eibanda, e kapelan a hui bai den pániko, batiendo su kabai ku un krusifiho pa e kore mas lihé. Tata a keda di shòk ku un “representante” di Dios a usa un opheto “sagrado” pa aselerá su huida. Apesar di e tipo di eksperensianan ei i e horornan di guera ku el a mira, Tata su fe den Dios no a debilitá. Hopi bes e tabata bisa ku ta Dios a yud’é regresá sano i salvo for di guera.

“Polonia Chikí”

Na 1911 mi tata a kasa ku un mucha muhé di un pueblito bisiña. E mucha muhé su nòmber tabata Anna Cisowski. Djis despues di guera, na 1919, Tata ku Mama a emigrá di Polonia pa Fransia, kaminda Tata a haña trabou den un mina di karbon. Ami a nase na mart  1926 den e pueblito Cagnac-les-Mines, parti zùitwèst di Fransia. Despues mi mayornan a establesé nan mes den un komunidat polako na Loos-en-Gohelle, serka di Lens den nort di Fransia. E panadero tabata polako, e karnisero tabata polako i e pastor di parokia tabata polako. P’esei no ta straño ku nan a yama e área aki Polonia Chikí. Mi mayornan tabata hopi enbolbí den aktividatnan di komunidat. Hopi bes Tata tabata organisá shownan, ku a konsistí di un presentashon teatral, músika i kantamentu. Tambe e tabatin diskushon regular ku e pastor, pero e no tabata keda satisfecho ora ku por lo general e pastor tabata kontestá: “Tin hopi misterio.”

Un dia na 1930, dos señora a bati na nos porta. Nan tabata Studiantenan di Beibel, manera Testigunan di Yehova tabata konosí e tempu ei. Mi tata a haña un Beibel serka nan, un buki ku pa años e tabatin gana di lesa. Tambe ku smak e ku Mama a lesa e publikashonnan basá riba Beibel ku e señoranan a laga. Mi mayornan a keda hopi impreshoná ku loke nan a lesa den e publikashonnan aki. Apesar di nan bida okupá, mi mayornan a kuminsá asistí na reunionnan organisá dor di e Studiantenan di Beibel. E diskushonnan ku e pastor a bira mas kayente, te ku un dia el a menasá di saka mi ruman muhé Stéphanie for di katisashi si mi mayornan sigui asosiá ku e Studiantenan di Beibel. “No preokupá bo,” Tata a kontest’é. “Djawe padilanti mi yu muhé i mi otro yunan lo bai huntu ku nos na e reunionnan di Studiantenan di Beibel.” Tata a kita su nòmber for di iglesia, i na prinsipio di 1932, mi mayornan a batisá. E tempu ei tabatin solamente un 800 publikadó di Reino na Fransia.

Rosa: Mi mayornan tabata di Hungria i meskos ku e famia di Marian, nan a establesé nan mes den nort di Fransia pa traha den e minanan di karbon. Ami a nase na 1925. Na 1937, un Testigu di Yehova, Auguste Beugin, òf Papa Auguste manera nos tabata yam’é, a kuminsá trese E Toren di Vigilansia na húngaro pa mi mayornan. Nan a haña e revistanan interesante, pero niun di dos no a bira Testigu di Yehova.

Ounke mi tabata yòn, e loke mi a lesa den E Toren di Vigilansia a konmové mi kurason, i Papa Auguste su suegra, Suzanne Beugin, a enkargá su mes di mi. Mi mayornan a laga mi bai reunion kuné. Despues, ora ku mi a kuminsá traha, mi tata no tabata gusta pa mi bai reunion riba djadumingu. Ounke normalmente e tabata un hende masha amabel, el a keha: “Henter siman bo no ta na kas, anto djadumingu bo ta bai bo reunionnan!” Sin embargo, mi a sigui bai. Wèl, riba un dia mi tata di: “Piki bo kosnan bo bai fo’i djaki!” Tabata anochi lat. Mi tabatin 17 aña so, i mi no tabata sa unda pa bai. Finalmente mi a bai kas di  Suzanne, yorando awa kuater-kuater. Mi a keda serka Suzanne pa mas o ménos un siman, promé ku Tata a manda mi ruman muhé bin buska mi pa bin kas bèk. Di naturalesa mi tabata tímido, pero e pensamentu ekspresá na 1 Juan 4:18 a yuda mi para firme. E teksto ei ta bisa ku “amor perfekto ta kore ku miedu.” Na 1942, mi a batisá.

Un Herensia Spiritual Presioso

Marian: Mi a batisá na 1942, huntu ku mi rumannan muhé Stéphanie ku Mélanie i mi ruman hòmber Stéphane. Na kas, nos bida di famia a konsentrá riba e Palabra di Dios. Ku nos tur sintá rònt di mesa, Tata tabata lesa Beibel pa nos na polako. Hopi bes nos tabata pasa nos anochinan skuchando nos mayornan konta nan eksperensianan den e trabou di prediká e Reino. E okashonnan spiritualmente riku aki a siña nos stima Yehova i konfia den dje mas i mas. Problema ku salú a obligá mi tata stòp di traha, pero el a sigui perkurá pa nos den sentido spiritual i material.

Komo ku awor Tata tabatin tempu liber, e tabata kondusí un biaha pa siman un studio di Beibel na polako ku e hóbennan di kongregashon. Einan mi a siña lesa polako. Tambe Tata tabata animá e hóbennan den otro manera. Un biaha ku Ruman Gustave Zopfer, kende e tempu ei tabata supervisá e trabou di Testigunan di Yehova na Fransia, a bishitá nos kongregashon, Tata a organisá un kor i un drama bíbliko na trahe di ántes basá riba e bankete di Rei Belsasar i e skirbimentu riba muraya. (Daniel 5:1-31) Esun ku a hunga e papel di Daniel tabata Louis Piéchota, kende despues a tuma un posishon firme kontra e nazinan. * Ta den e tipo di ambiente aki nos a lanta komo mucha. Nos a mira kon nos mayornan tur ora bai tabata okupá ku asuntunan spiritual. Awe mi ta realisá ku ta un herensia masha presioso nos mayornan a laga pa nos.

Ora ku Segundo Guera Mundial a kuminsá na 1939, nan a prohibí e aktividat di prediká di Testigunan di Yehova na Fransia. Na un okashon, nan a tene un razia den nos pueblito. Tur kas tabata rondoná pa sòldánan aleman. Tata a traha un bòm falsu den un kashi di paña, i nos a skonde vários publikashon bíbliko den dje. Sin embargo, tabatin vários ehemplar di e foyeto Fasismo òf Libertat den un lachi di e bufèt. Tata a skonde nan rápidamente den saku di un yas ku tabatin kologá den gang. Dos sòldá i un polis franses a listra nos kas. Nos tabata den suspenso. Un di e sòldánan a kuminsá listra e pañanan kologá den gang, i djis despues el a drenta den kushina, kaminda nos tabata, ku e foyetonan den su man. El a wak nos duru den nos kara, pone e foyetonan riba mesa i a sigui buska otro kaminda. Rápidamente mi a kue e foyetonan i pone nan den un lachi ku e sòldánan a listra kaba. E sòldá no a puntra mas pa e foyetonan, ta komo si fuera el a lubidá kompletamente riba nan!

Den Sirbishi di Tempu Kompletu

Na 1948 mi a disidí di pone mi mes disponibel pa sirbi Yehova di tempu kompletu den e sirbishi di pionero. Un par di dia despues, mi a haña un karta di e sukursal di Testigunan di Yehova na Fransia. E karta tabatin e asignashon pa mi bai sirbi komo pionero den e kongregashon di e stat Sedan, serka di Bèlgika. Mi mayornan tabata masha kontentu di mira mi tuma e rumbo ei den e sirbishi di Yehova. No opstante, Tata a kòrda mi ku sirbishi di pionero lo no ta un piknik. Lo e enserá trabou duru. Sin embargo, el a bisa ku semper su kas lo ta habrí pa mi i ku lo mi por a konta kuné si mi haña mi den problema. Ounke mi mayornan no tabatin hopi plaka, nan a kumpra un baiskel nobis-nobis pa mi. Ainda mi tin e resibu di e baiskel ei, i ki ora ku mi wak e, mi wowo ta yena ku awa. Tata ku Mama a muri na 1961, pero ainda e palabranan sabí di Tata ta resoná den mi orea; nan a animá mi i konsolá mi  durante tur mi añanan di sirbishi.

Un otro fuente di animashon tabata Elise Motte, un ruman muhé kristian di 75 aña den e kongregashon di Sedan. Den zomer, mi tabata bai prediká riba baiskel na e pueblitonan pafó di stat, i Elise tabata kue trein pa djòin mi. Pero un dia e trahadónan di trein tabata wèlga, i Elise no por a bai kas. E úniko solushon ku mi por a pensa ta di tou e riba baiskel. El a sinta patras kaminda di pone ekipahe, i esei no tabata un kareda kómodo. E siguiente mainta mi a bai ku un kusinchi i a pasa buska Elise na su kas. El a stòp di kue trein, i ku e sèn di trein ku el a spar, e por a kumpra kos di bebe kayente ora nos a kome mèrdia. Ken lo por a pensa ku mi baiskel lo a fungi komo transporte públiko?

Mas Responsabilidat

Na 1950 e rumannan a pidi mi pa sirbi komo superintendente di sirkuito pa henter e parti nort di Fransia. Komo ku mi tabatin 23 aña so, mi promé reakshon tabata miedu. Mi a pensa ku sukursal a hasi un fout! Mi kabes tabata kargá ku pregunta: ‘Mi ta spiritualmente i físikamente kualifiká pa e tarea ei? Kon lo mi hasi ku e echo ku tur siman lo tabatin un otro alohamentu?’ Es mas, for di ku seis aña, mi ta sufri di un problema ku mi bista. Mi tin un wowo skel ku ta tira pafó. Semper mi tabata sinti mi masha inkómodo debí na esaki, komo ku mi tabata preokupá kon hende lo reakshoná. Afortunadamente, mi a haña hopi yudansa na e okashon ei di Stefan Behunick, un graduado di e skol di misionero di Galaad. Nan a deportá Ruman Behunick for di Polonia debí na su aktividat di prediká i el a ser reasigná na Fransia. Su kurashi realmente a impreshoná mi. E tabatin rèspèt profundo pa Yehova i pa e bèrdat. Tabatin hende ta haña ku e tabata muchu duru ku mi, pero mi a siña masha hopi for di dje. Su kurashi a yuda mi haña mas konfiansa.

E trabou di sirkuito a duna mi chèns di gosa di algun eksperensia maravioso den sirbishi di vèlt. Na 1953 e rumannan a pidi mi bishitá un sierto Sr. Paoli, ku tabata biba zùit di Paris i ku tabata aboná riba E Toren di Vigilansia. Nos a topa, i mi a haña sa ku el a baha ku penshon for di ehérsito i ku e tabata fasiná ku E Toren di Vigilansia. El a konta mi ku despues ku el a lesa un artíkulo tokante e Memorial di e morto di Kristu den un edishon resiente, el a konmemorá e Memorial su so i a pasa e restu di e anochi lesando e buki di Salmo. Nos kòmbersashon a dura kasi henter mèrdia. Promé ku mi a bai, mi a papia brevemente tokante boutismo. Despues mi a manda un invitashon pa e asistí na nos asamblea di sirkuito ku mester a tuma lugá na prinsipio di 1954. El a bin, i entre e 26 personanan ku a batisá na e asamblea ei tabatin Ruman Paoli. Eksperensianan asina te ainda ta alegrá mi kurason.

Rosa: Na òktober 1948, mi a kuminsá sirbi komo pionero. Despues di a sirbi na Anor, pegá ku Bèlgika, mi a ser asigná na Paris, huntu ku un otro pionero, Irène Kolanski (awor Leroy). Nos tabata biba den un kuarto chikititu  den e bario Saint-Germain-des-Près den kurason di e stat. Siendo un mucha di kunuku, mi tabata hopi impreshoná ku e hendenan di Paris. M’a imaginá mi ku nan tur tabata sofistiká i masha inteligente. Pero no a tarda hopi ku dor di prediká na nan mi a siña ku nan no tabata distinto for di otro hende. Hopi bes e konsèrshe tabata kore ku nos, i tabata difísil pa kuminsá studionan di Beibel. Pero asina mes algun hende a aseptá nos mensahe.

Durante un asamblea di sirkuito na 1951, ami ku Irène a ser entrevistá relashoná ku nos sirbishi di pionero. Rei ken a entrevistá nos? Un superintendente di sirkuito yòn ku yama Marian Szumiga. Nos a yega di topa un biaha promé, pero despues di e asamblea ei, nos a kuminsá skirbi otro. Ami ku Marian tabatin hopi kos en komun, inkluso e echo ku nos a batisá na e mesun aña i a bira pionero na e mesun aña. Pero mas importante ainda, nos tur dos kier a keda den sirbishi di tempu kompletu. Pues, despues di konsiderá e asuntu den orashon, nos a kasa dia 31 di yüli 1956. Ku e paso ei, un estilo di bida kompletamente nobo a kuminsá pa mi. Mi mester a kustumbrá no solamente di ta un esposa, sino tambe di kompañá Marian den e trabou di sirkuito, lokual a nifiká ku tur siman nos tabata drumi den un otro kama. Na prinsipio no tabata niun tiki fásil, pero tabatin gosonan grandi nos dilanti.

Un Bida Riku

Marian: Atraves di añanan, nos tabatin e privilegio di yuda den preparashon di vários kongreso. Mi tin grato rekuerdo spesialmente di unu ku nos a tene na 1966 na Bordeaux. E tempu ei e aktividatnan di Testigunan di Yehova na Portugal tabata prohibí. P’esei nos a presentá e programa di asamblea na portugues tambe pa benefisio di e Testigunan ku lo por a bin Fransia. Sentenáres di nos rumannan  kristian a bini di Portugal, pero e problema tabata unda pa alohá nan. Komo ku e Testigunan na Bordeaux no tabatin sufisiente lugá den nan kas, nos a hür un sine bashí pa nos usa komo dormitorio. Nos a saka tur stul, i a usa e kortina di e esenario pa kombertí e sala den dos dormitorio, unu pa e ruman hòmbernan i unu pa e ruman muhénan. Tambe nos a instalá ducha i wasbak, pone yerba seku riba e flur di semènt, i tap’é ku paña di bela. Tur hende a keda satisfecho ku e areglo aki.

Despues di e seshonnan di kongreso, nos tabata bishitá e rumannan den e dormitorio. Tabatin un ambiente maravioso. E eksperensianan ku nan tabatin apesar di a soportá años di oposishon, a animá nos masha hopi. Na final di e asamblea, nos tur tabata awa na wowo ora nan tabata bai.

Mi a haña un otro privilegio dos aña promé, na 1964, tempu ku e rumannan a pidi mi pa sirbi komo superintendente di distrito. Un biaha mas mi tabata puntra mi mes si mi ta kualifiká pa hasi e tarea ei. Pero mi a bisa mi mes ku si e rumannan responsabel a pidi mi pa aseptá e asignashon, ta pasobra nan mester a pensa ku mi tabata sufisiente kapas pa hasié. Tabata un dushi eksperensia pa sirbi den asosiashon estrecho ku otro superintendentenan biahero. Mi a siña hopi for di nan. Hopi di nan ta berdadero ehèmpel di pasenshi i perseveransia, kualidatnan sumamente importante den bista di Yehova. Mi a bin komprondé ku si nos siña warda, Yehova sa unda pa haña nos.

Na 1982 sukursal a pidi nos pa atendé tambe un grupo chikí di 12 publikadó polako na Boulogne-Billancourt, pafó di Paris. Esei tabata un sorpresa. Mi tabata konosé e palabranan teokrátiko na polako, pero mi tabatin difikultat pa formulá frase. Sin embargo, e bondat i koperashon boluntario di e rumannan ei a yuda mi masha hopi. Awe, tin rònt di 170 publikadó den e kongregashon ei, entre nan, 60 pionero. Despues, ami ku Rosa a bishitá tambe gruponan i kongregashonnan polako na Alemania, Dinamarka i Oustria.

Kambio di Sirkunstansia

Bishitá diferente kongregashon tabata nos bida, pero mi problemanan di salú a pone ku nos a stòp ku nos sirbishi biahero na aña 2001. Nos a haña un apartamento den e stat Pithiviers, kaminda mi ruman muhé Ruth ta biba. Bondadosamente sukursal a nombra nos komo pionero spesial ku un rekisito di ora adaptá na nos sirkunstansia.

Rosa: E promé aña despues ku nos a stòp ku e trabou di sirkuito tabata masha difísil pa mi. E kambio tabata asina drástiko ku mi a sinti mi inútil. Despues mi a rekordá mi mes: ‘Ainda bo por hasi bon uso di bo tempu i di e forsa ku bo tin dor di sirbi komo pionero.’ Awe, mi ta felis di por traha huntu ku otro pioneronan den nos kongregashon.

Yehova Semper A Perkurá pa Nos

Marian: Mi ta masha gradisidu na Yehova ku Rosa tabata mi kompañera pa e último 48 añanan. Atraves di tur e añanan ei den e trabou biahero, e tabata un gran sosten pa mi. Ni un solo biaha mi a tend’é bisa: ‘Mare nos por stòp di biaha i tin nos propio kas.’

Rosa: Tin biaha hende tabata bisa mi: “E bida ku bo ta hiba ei no ta un bida normal. Semper bo ta biba ku otro hende.” Pero kiko realmente ta un “bida normal”? Hopi bes nos ta rondoná nos mes ku un kantidat di kos ku por stroba nos di sigui tras di aktividatnan spiritual. Tur loke nos realmente tin mester ta un  bon kama, un mesa i un par di otro kos básiko. Komo pionero nos tabatin masha tiki kos material, pero tòg nos tabatin tur loke nos mester pa hasi e boluntat di Yehova. Tin biaha hende tabata puntra mi: “Kiko lo bo hasi ora bo bira bieu, sin bo propio kas i sin penshon?” E ora ei mi tabata sita e palabranan di Salmo 34:10: “Esnan ku ta buska [Yehova] lo no tin falta di ningun kos bon.” Yehova semper a perkurá pa nos.

Marian: Asina mes! De echo, Yehova a duna nos hopi mas di loke ta nesesario. Por ehèmpel, na 1958 mi a ser selektá pa representá nos sirkuito na un kongreso internashonal na New York. Sin embargo, nos no tabatin sèn pa kumpra pasashi pa Rosa. Un anochi un ruman hòmber a duna nos un ènvelòp ku “New York” skirbí riba dje. E regalo den dje a hasi posibel ku Rosa por a kompañá mi!

Ami ku Rosa no tin niun tiki duele di e añanan ku nos a pasa den sirbishi di Yehova. Nos no a pèrdè nada pero sí a gana tur kos: un bida riku i felis den sirbishi di tempu kompletu. Yehova ta un Dios masha maravioso. Nos a siña konfi’é kompletamente, i nos amor p’e a bira mas profundo. Algun di nos rumannan kristian a paga pa nan fieldat ku nan bida. Sin embargo, mi ta kere ku atraves di añanan, un persona por sakrifiká su bida tambe tiki-tiki. Esei ta loke ami ku Rosa a purba di hasi te ku awor, i esei ta loke nos ta desididu pa hasi den futuro.

[Nota]

[Plachi na página 20]

François ku Anna Szumiga i nan yunan, Stéphanie, Stéphane, Mélanie i Marian rònt di 1930. Marian ta pará riba e stul chikí

[Plachi na página 22]

Ariba: Presentando publikashonnan bíbliko na un stènt di merkado na Armentières, nort di Fransia, na 1950

[Plachi na página 22]

Banda robes: Stefan Behunick ku Marian na 1950

[Plachi na página 23]

Marian ku Rosa, un dia promé ku nan kasa

[Plachi na página 23]

Rosa (na man robes te na punta) ku su kompañera pionero Irène (di kuater na man robes), anunsiando un asamblea na 1951

[Plachi na página 23]

Durante bishitanan di sirkuito, e medio prinsipal di transporte tabata baiskel