“Bisti e Armadura Kompletu di Dios”

“Bisti e armadura kompletu di Dios, pa boso por para firme kontra e trampanan di Diabel.”—EFESIONAN 6:11.

1, 2. Deskribí ku bo mes palabra e armadura spiritual ku kristiannan tin ku bisti.

ROMA tabata na e punto kulminante di su poder durante e promé siglo di nos era. E poder di e legionnan romano a hasi posibel ku Roma por a kontrolá gran parti di e mundu konosí e tempu ei. Un historiadó a deskribí e ehérsito aki komo “e organisashon militar mas eksitoso den historia.” Roma su ehérsito profeshonal a konsistí di sòldánan bon disipliná ku a sigui un entrenamentu pisá, pero nan éksito komo un forsa di bataya efektivo a dependé tambe di nan armadura. Apòstel Pablo a usa e armadura di un sòldá romano pa ilustrá e ekipo spiritual ku kristiannan mester tin pa nan por lucha ku éksito kontra Diabel.

² Nos ta haña un deskripshon di e armadura spiritual aki na Efesionan 6:14-17. Pablo a skirbi: “Para firme . . . ku boso hep fahá ku bèrdat, i ku e korasa di hustisia bistí, i ku boso pianan bistí ku e preparashon di e evangelio di pas; i riba tur kos, tumando e eskudo di fe, ku kual boso lo por paga tur e flechanan sendí di e malbado. I tuma e hèlm di salbashon, i e spada di e spiritu, kual ta e palabra di Dios.” Mirá for di un punto di bista literal, e armadura aki ku Pablo a deskribí lo a duna un sòldá romano bastante protekshon. Es mas, e sòldá tabatin un spada, su arma prinsipal pa kombatenan individual.

3. Dikon nos mester obedesé e instrukshonnan di Hesukristu i sigui su ehèmpel?

³ E éksito di e ehérsito romano no a dependé solamente di nan ekipo i entrenamentu, sino tambe di e sòldánan su obedensia na nan komandante. Di igual manera, kristiannan tin ku obedesé Hesukristu, kende Beibel ta deskribí komo un “komandante pa e pueblonan.” (Isaias 55:4) Tambe e ta “kabes di e iglesia.” (Efesionan 5:23) Hesus a duna nos instrukshon pa nos guera spiritual i a perkurá un ehèmpel perfekto di e manera ku nos mester bisti e armadura spiritual. (1 Pedro 2:21) Siendo ku un personalidat semehante di Kristu ta hopi paresido na nos armadura spiritual, e Skritura ta konsehá nos pa “arma” nos mes ku e disposishon mental di Kristu.  (1 Pedro 4:1, NW) Segun ku nos ta bai analisá kada parti di nos armadura spiritual, nos lo usa e ehèmpel di Hesus pa demostrá e armadura ei su importansia i efektividat.

Protehá Nos Hep, Pechu i Pia

4. Ki papel e faha a hunga den e armadura di un sòldá, i kiko esei ta ilustrá?

⁴ Hep fahá ku bèrdat. Den tempu bíbliko, sòldánan tabata bisti un faha di kueru hanchu ku tabata entre 5 pa 15 centimeter hanchu. Algun traduktor ta sugerí ku eigenlijk e versíkulo mester bisa, “ku bèrdat komo faha pèrtá na bo sintura.” E faha di e sòldá a yuda protehá su hep, i e tabata un bon kaminda pa kologá su spada. Ora un sòldá a faha su hep, tabata p’e prepará pa bataya. Pablo a usa e faha di e sòldá pa ilustrá te na ki grado bèrdat bíbliko mester influensiá nos bida. Na moda di papia, e mester ta pèrtá mará na nos kurpa di manera ku nos ta biba na armonia ku e bèrdat i por defend’é na tur okashon. (Salmo 43:3; 1 Pedro 3:15) Ku esaki na bista, nos tin ku studia Beibel diligentemente i meditá riba su kontenido. Hesus tabatin e lei di Dios ‘den su kurason.’ (Salmo 40:8) P’esei ora opositornan a hasié pregunta e por a kontestá dor di sita e Skritura for di kabes.—Mateo 19:3-6; 22:23-32.

5. Splika kon konseho bíbliko por yuda nos ora nos ta konfrontá prueba òf tentashon.

⁵ Ora nos ta permití bèrdat di Beibel guia nos, e por protehá nos kontra rasonamentu inkorekto i yuda nos tuma desishonnan sabí. Ora nos ta konfrontá tentashon òf prueba, e instrukshonnan di Beibel lo fortalesé nos determinashon pa hasi loke ta korekto. Ta komo si fuera nos ta mira nos Magnífiko Instruktor, Yehova, i nos ta tende un palabra nos tras ta bisa: “Esaki ta e kaminda, kana den dje.”—Isaias 30:20, 21.

6. Dikon nos kurason figurativo tin mester di protekshon, i kon hustisia por proteh’é efektivamente?

⁶ Korasa di hustisia. E korasa di e sòldá a protehá un órgano masha importante, e kurason. Nos kurason figurativo—e persona ku nos ta di paden—tin mester di protekshon spesial pasobra e ta inkliná pa hasi loke ta malu. (Génesis 8:21) P’esei nos tin ku siña konosé i stima Yehova su normanan hustu. (Salmo 119:97, 105) Nos amor pa hustisia ta pone nos rechasá mundu su manera di pensa ku ta ignorá òf debilitá e instrukshonnan bon kla ku Yehova ta duna. Ademas, ora nos ta stima loke ta hustu i ta odia loke ta malu, nos ta evitá di sigui un rumbo ku por ruiná nos bida. (Salmo 119:99-101; Amos 5:15) Hesus ta un bon ehèmpel den esaki, pasobra e Skritura ta bisa relashoná kuné: “Bo a stima hustisia i a odia maldat.”—Hebreonan 1:9. *

7. Dikon un sòldá romano tabatin mester di bon sapatu, i kiko esei ta ilustrá?

⁷ Pianan bistí ku e preparashon di e evangelio di pas. Sòldánan romano tabatin mester di sapatu adekuá òf bon sandalia, pasobra durante un kampaña militar hopi bes nan a marcha 30 kilometer pa dia ku rònt di 30 kilo di armadura i ekipo bistí òf kargá. Pablo apropiadamente a usa sapatu na pia  pa representá e echo ku nos ta kla pa prediká e mensahe di Reino na tur ku ke skucha. Esaki ta importante pasobra kon hende lo por siña konosé Yehova si nos no ta kla i dispuesto pa prediká?—Romanonan 10:13-15.

8. Kon nos por imitá Hesus su ehèmpel komo predikadó di e bon nobo?

⁸ Kiko tabata e aktividat mas importante den bida di Hesus? El a bisa e gobernadó romano Ponsio Pilato: ‘Mi a bin den mundu pa duna testimonio di e bèrdat.’ Hesus a prediká na unda ku el a haña un orea ku kier a skuch’é, i el a disfrutá asina tantu di su sirbishi ku el a pon’é promé ku su nesesidatnan físiko. (Juan 4:5-34; 18:37) Si meskos ku Hesus, nos tambe ta ansioso pa deklará e bon nobo, nos lo haña hopi oportunidat pa kompartié ku otro hende. Ademas, ora nos ta kompletamente okupá den nos sirbishi, esei lo yuda nos keda spiritualmente fuerte.—Echonan 18:5.

E Eskudo, e Hèlm i e Spada

9. Ki protekshon un eskudo grandi a ofresé un sòldá romano?

⁹ E eskudo grandi di fe. E palabra griego tradusí “eskudo” ta referí na un eskudo ku tabata sufisiente grandi pa tapa gran parti di e kurpa. Lo el a duna protekshon kontra e “flechanan sendí” ku Efesionan 6:16 ta menshoná. Den tempu bíbliko, sòldánan tabata usa flecha trahá di richi hòl ku tabatin un kontenedor chikí di heru ku nan por a yena ku kombustibel na kandela. Un komentarista a deskribí e flechanan aki komo “un di e armanan mas peligroso den gueranan di antigwedat.” Si un sòldá no tabatin un eskudo grandi pa protehá su mes kontra e flechanan ei, lo e por a resultá gravemente heridá òf asta ser matá.

10, 11. (a) Kiko ta e “flechanan sendí” di Satanas ku lo por debilitá nos fe? (b) Kon Hesus su ehèmpel ta demostrá e importansia di fe durante tempu di prueba?

 ¹⁰ Kiko ta e “flechanan sendí” ku Satanas ta usa pa debilitá nos fe? E por fomentá persekushon òf oposishon den famia, na trabou òf na skol. Den kaso di algun kristian, ta e deseo pa haña mas i mas kos material i e atrakshon di inmoralidat a resultá spiritualmente desastroso pa nan. Pa protehá nos mes kontra tal menasanan ‘nos tin ku tuma, riba tur kos, e eskudo grandi di fe.’ Nos ta haña fe dor di siña tokante Yehova, dor di komuniká regularmente kuné den orashon i dor di tuma nota kon e ta protehá i bendishoná nos.—Josué 23:14; Lukas 17:5; Romanonan 10:17.

¹¹ Ora Hesus tabata riba tera, el a demostrá e importansia di tin un fe firme durante tempu krítiko. El a konfia plenamente e desishonnan di su Tata i gustosamente el a hasi Dios su boluntat. (Mateo 26:42, 53, 54; Juan 6:38) Asta ora Hesus tabata eksperensiá gran angustia den e hòfi di Getsemané, el a bisa su Tata: “No manera ami kier, ma manera abo kier.” (Mateo 26:39) Hesus nunka a pèrdè for di bista e importansia di mantené integridat i di hasi su Tata kontentu. (Proverbionan 27:11) Si nos tambe tin e mesun konfiansa den Yehova, nos lo no laga krítika òf oposishon debilitá nos fe. Mas bien nos fe lo bira mas fuerte si nos dependé riba Dios, demostrá amor p’e i warda su mandamentunan. (Salmo 19:7-11; 1 Juan 5:3) No tin ningun rekompensa material ni plaser sensual pasahero ku por para banda di e bendishonnan ku Yehova tin wardá pa esnan ku stim’é.—Proverbionan 10:22.

12. Nos hèlm figurativo ta protehá kua parti importante di nos kurpa, i dikon e protekshon ei ta sumamente importante?

 ¹² E hèlm di salbashon. Hèlm ta protehá e sòldá su kabes i selebro, su sentro di intelekto. Nos speransa kristian ta ser kompará ku un hèlm pasobra e ta protehá nos mente. (1 Tesalonisensenan 5:8) Ounke nos a transformá nos mente pa medio di konosementu eksakto di e Palabra di Dios, ainda nos ta hende imperfekto i débil. Ta masha fásil pa nos mente bira korupto. Metanan di e sistema di kosnan aki por distraí nos òf asta remplasá e speransa ku Dios a duna nos. (Romanonan 7:18; 12:2) Diabel a purba enbano di desviá Hesus dor di ofres’é “tur e reinonan di mundu i nan gloria.” (Mateo 4:8) Pero Hesus a rechasá e oferta firmemente, i Pablo a bisa di Hesus: “Pa motibu di e goso poné su dilanti, [el] a soportá e sufrimentu di [“e staka di tormento,” NW], sin hasi kaso di bèrgwensa, i a sinta na man drechi di e trono di Dios.”—Hebreonan 12:2.

13. Kon nos por mantené nos konfiansa den e speransa ku tin nos dilanti?

¹³ E klase di konfiansa ku Hesus tabatin no ta bin outomátikamente. Si nos yena nos mente ku e soñonan i metanan di e sistema di kosnan aki, en bes di enfoká riba e speransa ku tin nos dilanti, nos fe den e promesanan di Dios lo bira mas débil. Ku tempu, nos lo por asta pèrdè nos speransa kompletamente. Di otro banda, si nos ta meditá ku regularidat riba e promesanan di Dios, nos lo sigui alegrá den e speransa ku tin poné nos dilanti.—Romanonan 12:12.

14, 15. (a) Kiko nos spada figurativo ta, i kon nos por us’é? (b) Ilustrá kon e spada di spiritu por yuda nos resistí tentashon.

¹⁴ E spada di spiritu. Dios su palabra, òf mensahe, ku tin pará skirbí den Beibel ta manera un spada poderoso di dos fila ku por kaba ku falsedat religioso i yuda hende di kurason sinsero haña libertat spiritual. (Juan 8:32; Hebreonan 4:12) E spada spiritual aki por defendé nos tambe ora nos ta ser ataká pa tentashon òf pa personanan apóstata ku ta purba destruí nos fe. (2 Korintionan 10:4, 5) Nos ta masha gradisidu ku ‘tur Skritura ta inspirá pa Dios i ta ekipá nos kompletamente pa tur bon obra’!—2 Timoteo 3:16, 17.

¹⁵ Ora ku Satanas a tenta Hesus den desierto, Hesus a hasi bon uso di e spada di spiritu pa rechasá rasonamentu falsu i tentashonnan tramposo. Kada un tentashon di Satanas, el a kontestá ku: “Ta pará skirbí.” (Mateo 4:1-11) David, un Testigu di Yehova na Spaña, tambe a deskubrí ku e Skritura a yud’é superá tentashon. Tempu ku e tabatin 19 aña, un mucha muhé atraktivo ku tabata traha huntu kuné den e mesun kompania di limpiesa a sugerí pa nan dos “ban pasa un tempu dushi huntu.” David a rechasá su avansenan i a pidi su supervisor pa e bai traha un otro kaminda pa asina e situashon no bolbe presentá. David a bisa: “Mi a kòrda riba e ehèmpel di Hosé. El a rechasá inmoralidat i mesora a sali bai for di einan. Mi a hasi meskos.”—Génesis 39:10-12.

16. Splika dikon nos tin mester di training pa por “parti e palabra di bèrdat na un manera korekto.”

¹⁶ Hesus a usa e spada di spiritu tambe pa yuda otro hende skapa for di e kontròl di  Satanas. Hesus a bisa: “Mi siñansa no ta di mi, ma di Esun ku a manda mi.” (Juan 7:16) Pa nos por imitá Hesus su manera ábil di siña hende, nos mester di training. E historiadó Hosefo a skirbi di e sòldánan romano: “Tur sòldá a train tur dia, i nan tabata hasié ku gran diligensia, komo si fuera nan tabata den tempu di guera. Ta p’esei nan por a soportá e kansansio di bataya asina fásilmente.” Den nos guera spiritual, nos tin ku usa e Beibel. Ademas, nos mester ‘hasi tur nos esfuerso pa presentá nos mes aprobá dilanti di Dios manera un trahadó ku no tin motibu pa tin bèrgwensa, ku ta parti e palabra di bèrdat na un manera korekto.’ (2 Timoteo 2:15) I nos ta sinti un gran satisfakshon ora nos usa e Skritura pa kontestá un pregunta sinsero di un persona interesá!

Hasi Orashon Tur Ora Bai

17, 18. (a) Ki papel orashon ta hunga den resistí Satanas? (b) Duna un ehèmpel pa ilustrá e balor di orashon.

¹⁷ Despues di a konsiderá e armadura spiritual kompletu, Pablo a agregá un otro konseho importante. Ora di resistí Satanas, kristiannan tin ku hasi uso di ‘tur forma di orashon i súplika.’ Ku ki frekuensia? Pablo a skirbi pa hasi orashon òf “pidi tur ora bai den spiritu.” (Efesionan 6:18) Ora nos ta konfrontá tentashon, prueba òf desanimashon, orashon por fortifiká nos masha hopi. (Mateo 26:41) Hesus a “ofresé orashon i súplika ku gran sklamashon i lágrima na Esun ku ta kapas pa salb’é for di morto, i el a wòrdu tendé pa motibu di su piedat.”—Hebreonan 5:7.

¹⁸ Milagros tabatin ku kuida su kasá ku tabata krónikamente enfermo pa mas ku 15 aña. Milagros a bisa: “Ora mi ta sinti mi desanimá, mi ta akudí na Yehova den orashon. Ningun hende por yuda mi mas kuné. Ta bèrdat ku tin momentunan ku mi ta sinti ku gewon mi no por sigui mas. Pero bes tras bes despues di a hasi orashon na Yehova, mi a sinti ku mi a bolbe haña forsa i ku mi ánimo a lanta.”

19, 20. Kiko nos tin ku hasi pa nos por resultá viktorioso den nos lucha kontra Satanas?

¹⁹ Diabel sa ku su tempu ta kòrtiku, i e ta intensifiká su esfuersonan pa konkistá nos. (Revelashon 12:12, 17) Nos tin ku resistí e enemigu poderoso aki i “lucha e bon lucha di fe.” (1 Timoteo 6:12) Esaki ta rekerí forsa mas ayá di loke ta normal. (2 Korintionan 4:7) Tambe nos tin mester di e yudansa di Dios su spiritu santu i p’esei nos mester pidi p’e. Hesus a bisa: “Si boso anto, siendo malbado, sa di duna kosnan bon na boso yunan, kuantu mas boso Tata selestial lo duna e spiritu santu na esnan ku pidié!”—Lukas 11:13.

²⁰ Klaramente anto, ta masha importante pa nos bisti e armadura kompletu ku Yehova ta suministrá. Pa nos por bisti e armadura aki nos mester desaroyá kualidatnan ku ta agradá Dios, kualidatnan manera fe i hustisia. Tambe nos mester stima e bèrdat komo si fuera nos tiné fahá na nos kurpa, nos mester ta kla pa plama e bon nobo na tur okashon i nos mester tene tur ora bai na mente e speransa nos dilanti. Nos tin ku siña usa e spada di spiritu ábilmente. Dor di bisti e armadura kompletu di Dios, nos por resultá viktorioso den nos lucha kontra forsanan spiritual malbado i en bèrdat trese gloria pa Yehova su nòmber santu.—Romanonan 8:37-39.

[Nota]

Kon Lo Bo Kontestá?

• Ken ta e mihó ehèmpel di bisti e armadura spiritual, i dikon nos mester konsiderá su ehèmpel ku sumo atenshon?

• Kon nos por protehá nos mente i nos kurason figurativo?

• Kon nos por bira ábil den usa e spada di spiritu?

• Dikon nos tin ku hasi orashon tur ora bai?

[Preguntanan di Estudio]

[Plachinan na página 17]

Studia Beibel diligentemente por motivá nos pa deklará e bon nobo na tur okashon

[Plachinan na página 18]

Nos speransa firme ta yuda nos konfrontá prueba

[Plachinan na página 19]

Abo ta usa “e spada di e spiritu” den sirbishi?