E Splendor di Yehova Su Kreashon

“E Abundansia di e Lamannan”

ATARDI ora solo ta baha, tin un dushi brisa ta supla riba laman, i e olanan ta laba suavemente bin kantu. E zonidu trankilisante di olanan ta atraé un kantidat di hende ku ta basha bin kantu di laman pa haña sosiegu i trankilidat. *

Míles di kilometer di kosta rònt mundu ta konsistí di playanan asina. E liña di divishon aki entre santu i awa ta marka te na unda laman tin kontròl. Ta asina e Kreadó a diseñ’é. Refiriendo na su mes, Dios a deklará ku el a “pone santu komo un frontera pa laman.” Anto el a agregá: “Maske e olanan lora bai laira, nan no por prevalesé; maske nan ronka, nan no por pasa over di dje.”—Jeremias 5:22; Jòb 38:8; Salmo 33:7.

Nos planeta Tera en bèrdat ta un planeta di awa, no tin ningun otro manera dje den nos sistema solar. Mas ku 70 porshento di e globo ta kubrí ku awa. Ora ku Yehova tabata prepará e tera pa hende biba ariba, el a dekretá: “Laga e awanan ku tin bou di e shelunan bin huntu na ún lugá i laga tera seku aparesé.” I, “asina tabata.” E relato ta agregá: “E parti seku Dios a yama Tera, i tur e awanan ku a bin huntu el a yama Lamannan. I Dios a mira ku esaki tabata bon.” (Génesis 1:9, 10) Ki trabou presis e oséanonan ta hasi?

Den un kantidat di manera remarkabel, Dios a diseñá e awa di oséano pa sostené bida. Por ehèmpel, awa tin e kapasidat di almasená kayente. Pues, e oséanonan ta fungi komo un depósito inmenso di kayente, lokual ta yuda baha e friu ekstremo di wenter.

Awa tin un otro kapasidat mas ku ta sostené bida. Mas ku kualke otro líkido, awa por disolvé otro supstansianan fásilmente. Siendo ku ta reakshonnan kímiko ta hasi prosesonan di bida posibel, e presensia di awa ta nesesario pa por disolvé e supstansianan ku ta reakshonando i kombiná nan molekülnan pa forma otro komponente. Hopi di e komponentenan kímiko ku tin den tehido bibu ta kontené awa. E buki The Sea (Laman) a remarká: “Tur forma di bida tin mester di awa; awa ku na final di kuenta mester bin di e oséanonan, asta awa pa mata i bestia ku ta biba riba tera seku.”

E oséanonan di mundu ta hunga tambe un papel importante den purifikashon di e atmósfera. Planktòn den oséano ta apsorbá kooldioxide i ta saka oksígeno. Segun un investigadó, “70 porshento di e oksígeno ku pa aña ta ser agregá na e atmósfera ta bini di planktòn den laman.”

Un otro kos ku e oséanonan ta produsí ta remedinan natural pa trata malesa. Pa siglonan hende a usa ekstrakto di piská komo remedi. Por ehèmpel, ya pa hopi tempu hende konosé zeta di bakiou. Último tempu, hende a kuminsá usa kímikonan saká for di piská i otro kriaturanan di laman pa trata asma i pa kombatí vírus i kanser.

Ekspertonan a purba kalkulá e balor ekonómiko di produkto- i servisionan relashoná ku oséano. Ounke ta imposibel pa bin ku  sifranan eksakto, investigadónan a kalkulá ku kasi dos tersera parti di e balor di servisionan ekológiko mundial ta bini di oséano. Esaki ta konfirmá e echo ku laman a ser kreá ku un propósito: pa akomodá i sostené bida. Esaki ta kuadra ku e loke Beibel ta yama e rikesa òf “abundansia di e lamannan.”—Deuteronomio 33:19.

Yehova ta ser glorifiká komo e Gran Diseñadó i Trahadó di e rikesa aki. Nehemias a sintié konmoví pa alabá Yehova ku e siguiente palabranan: “Ta abo so ta SEÑOR. Abo a traha e shelunan, . . . e lamannan i tur loke tin den nan. Ta abo ta duna bida na nan tur.”—Nehemias 9:6.

[Nota]

[Kuadro/Plachinan na página 9]

Awa, Bientu i Ola

Awa ku bientu ta forma olanan grandi ku ta dal ku masha bochincha kontra baranka, manera esnan aki na California, Merka. Ola semper tabata un rasgo maravioso di oséano, i a demostrá e oséano su poder impreshonante. Ola ta tambe un rekordatorio asombroso di e Kreadó su poder magnífiko. Yehova ta esun ku “ta kana riba e olanan di laman.” “El a agitá laman ku su poder, i pa medio di su komprondementu el a destrosá e atakadó na pida-pida.” (Jòb 9:8; 26:12, NW) Sí, Yehova “den e halturanan ta poderoso, mas ku e zonidunan di hopi awanan, mas ku e olanan poderoso di laman.”—Salmo 93:4.

Eskulturanan di Santu

Playanan sa fungi de bes en kuando komo e esenario di eskulturanan impreshonante di santu, manera e dùinnan aki na kosta di Namibia, den parti zùit di Afrika. Bientu ta e forsa prinsipal ku ta duna e santu formanan úniko. Ounke algun dùin por parse djis bultonan chikí, otronan por alkansá un haltura di 400 meter. E kantidatnan grandi ei di santu ta yuda nos komprondé e ekspreshon bíbliko “manera e santu ku tin kantu di laman.” Beibel ta usa esei pa indiká algu inkontabel, difísil pa midi. (Génesis 22:17) Nos ta sinti un rèspèt profundo pa e Kreadó, kende a diseñá un barera di santu asina ingenioso pa para e invashon di laman brutu.

[Plachi na página 9]

Bahada di solo kantu di kosta, Bahia di Biafra, Camerun