Mulinanan Ku Ta Pone Pan Riba Mesa

HENDE a yega di yam’é “e kuminda básiko di bida,” “e alimento prinsipal,” i “e sosten prinsipal i kontinuo di hende desde hopi tempu pasá.” Sí, desde antigwedat pan ta un alimento básiko. De echo, un di hende su nesesidatnan mas urgente ta di perkurá pa su pan di kada dia.

E ingrediente básiko di pan ta hariña. I pa haña hariña mester mula grano. P’esei mulamentu ta un fishi masha bieu. Sin e fasilidat di mashin, lo mester tabata un trabou inmenso pa kombertí e grano den hariña fini. Den tempu bíbliko, tabata relashoná e zonidu di mulina di man ku un situashon normal i pasífiko, lo kontrario tabata un indikashon di desolashon.—Jeremias 25:10, 11, BPK.

Kiko mulamentu a enserá atraves di siglonan? Kua ta algun di e método- i ophetonan ku hende a usa pa mula grano? I ki tipo di mulina ta pone pan riba bo mesa awendia?

Dikon Nan Ta Nesesario?

Yehova a bisa e promé pareha humano, Adam ku Eva: “Mira, mi a duna boso tur mata ku ta duna simia riba superfisie di henter tera i tur palu ku tin fruta ku ta duna simia; esei lo ta kuminda pa boso.” (Génesis 1:29) Un di e alimentonan ku Yehova Dios a duna hende ta simia di yerbanan di grano. E fuente di alimento aki tabata esensial pa hende su eksistensia, ya ku tur grano—inkluso trigu, puspas gròf, rogge, avena, aros, millet, sorghum i maishi—ta kontené karbohidrato riku na zetmeel ku e kurpa por kombertí den su fuente prinsipal di energia, esta, glucose.

Sin embargo, hende no por digerí grano gròf i kurú. Ta hopi mas fásil pa nan kome e granonan aki ora nan ta mulá i kushiná. E manera mas simpel pa kombertí un sierto kantidat di grano den hariña ta dor di batié den un pilon, mul’é entre dos piedra òf usa un kombinashon di e dos métodonan aki.

Mulina Ku Ta Funshoná ku Forsa di Hende

Estatuanan chikí di antiguo grafnan egipsio ta ilustrá e uso di un di e promé tiponan di mulina di grano, esun ku ta parse un sia. E mulina a konsistí di dos piedra, esun djabou tabata un poko hòl i ta subi un tiki parti patras i e otro riba dje tabata mas chikitu. E trahadó, ku por lo general tabata un hende muhé, tabata riba su rudia tras di e opheto i tabata tene e piedra mas chikitu ku ámbos man. Kaba e tabata pusha e piedra aki bai-bin ku tur e forsa di e parti ariba di su kurpa, i asina mula e grano entre e dos piedranan. Esta un opheto simpel pero efektivo!

Sin embargo, e echo ku hende tabata pasa oranan largu riba rudia tabatin su mal konsekuensianan pa e kurpa. E trahadó tabatin ku pusha e piedra djariba te na e punta dilanti riba e piedra di mulina ku forma di sia i despues hal’é bèk.  Esei a kousa un preshon konstant riba su lomba, brasa-, bèl-, rudia- i dedenan di pia. Estudionan di deformashon di wesu di skelètnan di antiguo Siria a pone ekspertonan riba tereno di fosil yega na e konklushon ku uso di mulinanan similar a kousa ku hende muhénan yòn a haña leshon debí ku nan ta hasi e mesun moveshon konstantemente. Por ehèmpel, buskuchi di rudia deformá, daño na e último parti di e wes’i lomba i artrítis degenerativo na e dede grandi di pia. Den Egipto di antigwedat, ta parse ku ta mucha muhé esklabo tabatin ku hasi trabou di mula grano. (Eksodo 11:5) * Tin eksperto ta kere ku ora e israelitanan a sali for di Egipto, nan a hiba e tipo di mulina ku tin forma di sia huntu ku nan.

Ku tempu e ophetonan di mula a bira mas efisiente dor ku nan a hasi e partinan ku ta raspa riba otro di ámbos piedra gròf. Tambe nan a traha un buraku den forma di un kaska di papurèshi den e piedra djariba di tal manera ku un hende por a basha grano aden, ku di mes tabata drenta meimei di e dos piedranan. Den siglo 4 òf 5 promé ku nos era, Gresia a inventá un mashin di mula masha simpel. Nan a pega un banda di un bara òf man horizontal na e piedra djariba. Dor di drei e otro banda di e man aki ku no tabata pegá, bai-bin den forma di un bog chikitu, e piedra djariba ku ta fungi komo trèktu tabata raspa riba e otro piedra djabou.

Tur e mulinanan ya menshoná tabatin un limitashon ku no tabata fásil pa solushoná. Nan tabata dependé di e movementu di bai-bin ku ningun bestia no por a siña hasi. P’esei e mulinanan aki mester a dependé di forsa di hende. Mas despues teknologia a produsí algu nobo: mulina ku ta drei. E ora ei sí a bira posibel pa usa bestia.

Mulinanan Ku Ta Drei Ta Fasilitá e Trabou

Maske fuentenan di informashon ta varia, ta posibel ku a inventá e mulina ku ta drei den e paisnan rònt di Laman Mediteráneo, mas o ménos den siglo 2 promé ku nos era. Rònt di e promé siglo di nos era, hudiunan na Palestina ya tabata konosé e tipo di mulina ei, pasobra Hesus a papia di “un piedra di mulina tal komo buriku ta drei.”—Marko 9:42, NW.

A usa e mulina ku bestia por a drei na Roma i na un gran parti di e Imperio Romano. Te ainda hopi di e mulinanan aki ta eksistí na Pompei. Nan ta konsistí di un piedra pisá djariba ku tin forma di zandloper i ku a fungi komo un trèktu i tambe di un piedra djabou ku tin forma di kaska di papurèshi. Segun ku e piedra djariba tabata drei rònt riba e piedra djabou, e pipitanan di grano tabata drenta meimei di e dos piedranan i tabata garna. E tipo di piedranan djariba aki ku ta eksistí ainda tin un diameter ku ta varia entre 45 pa 90 centimeter. E mulinanan aki por a alkansá un haltura di 1,8 meter.

No ta sigur ku ta mulinanan di man ku ta drei a desaroyá for di mulina di bestia òf si ta visevèrsa. En todo kaso, e mulina di man ku ta drei tabatin e bentaha ku por a karg’é i e tabata fásil pa usa. E tabata konsistí di dos piedra rondó ku kisas tabatin un diameter di entre 30 pa 60 centimeter. E parti ariba di e piedra djabou tabata hòl [forma di “U”] i e parti abou di e piedra djariba tabata bòl, di manera ku e tabata pas nèt-nèt den e piedra djabou. E piedra djariba tabata hinká den un shaft òf pènchi, anto ku un man di palu por a bir’é rònt. Normalmente, dos hende muhé tabata sintá kara pa otro, kada un ku un man riba e man di palu pa drei e piedra djariba. (Lukas 17:35) Ku e otro man, un di e hende muhénan tabata  yena e grano tiki-tiki den e buraku di e piedra djariba, i e otro hende muhé tabata saka e hariña ku tabata sali na banda i pon’é den un baki òf riba un paña poné bou di e mulina. E tipo di mulina aki a satisfasé e nesesidat di sòldá-, nabegante- òf famia chikí ku tabata biba leu di e establesimentu di mula grano.

Mulina di Awa òf di Bientu

Alrededor di aña 27 promé ku nos era, e ingeniero romano Vitruvio a duna un deskripshon di un mulina di awa di su tempu. Awa ku tabata basha kontra un wil vertikal ku tabata pegá riba un shaft horizontal, tabata pone e wil drei. E gearnan òf djentenan di e wil tabata pasa e moveshon aki over pa un shaft vertikal. En turno, e shaft aki tabata pone un piedra grandi di mulina djariba drei.

Kuantu grano e mulina di awa tabata produsí na komparashon ku e otro mulinanan? Ta ser kalkulá ku mulina di man tabata mula ménos ku 10 kilo di grano pa ora, i e mulina di bestia mas efisiente tabata produsí te ku 50 kilo. Di otro banda, e mulina di awa di Vitruvio por a mula un 150 pa 200 kilo pa ora. Pa siglonan despues ekspertonan di mulina a sigui usa e prinsipio básiko deskribí dor di Vitruvio, ounke nan a kambi’é i mehor’é masha hopi mes.

Awa no tabata e úniko fuente natural di energia ku hende a usa pa pone piedra di mulina drei. Si hende a remplasá wilnan di awa ku paña di belanan na un mulina di bientu, nan lo por a logra e mesun meta. Probablemente nan a kuminsá usa mulina di bientu na Europa den siglo 12 di nos era. Na Alemania, Bèlgika, Hulanda i na otro partinan a usa nan generalmente pa mula grano. A usa nan te ora ku gradualmente mulinanan di stom i otro fuentenan di energia moderno a remplasá tur e otro fuentenan di energia di ántes.

“Nos Pan di Kada Dia”

Apesar di progreso, hopi método di mula grano di pasado ainda ta eksistí den algun parti di mundu. Te ainda nan ta usa pilon ku stamper den sierto parti di Afrika i Oceania. Na Mexico i Sentroamérika, nan ta usa e mulina di man ku tin forma di sia pa mula maishi pa tortiya. I aki-aya tin vários mulina di awa i di bientu ta funshoná ainda.

Sin embargo, den e mundu desaroyá djawe, hende ta usa mulinanan di silinder kompletamente mekanisá i outomatisá pa produsí hariña pa traha pan. Gradualmente pipitanan di grano ta bira hariña segun ku nan ta pasa dor di silindernan di heru ku ta gròf i ku ta drei riba otro na diferente velosidat. E sistema aki ta hasi posibel pa produsí diferente tipo di hariña na un preis abou.

No kabe duda ku no ta nesesario mas pa pasa tantu trabou manera ántesnan aya pa haña hariña pa prepará kuminda kuné. Tòg, nos por ta gradisidu na nos Kreadó pa e echo ku el a duna nos tantu grano komo e kreatividat pa kombertié den “nos pan di kada dia.”—Mateo 6:11.

[Nota]

[Plachi na página 23]

Mulina egipsio ku forma di sia

[Rekonosementu]

Soprintendenza Archeologica per la Toscana, Firenze

[Plachi na página 23]

Den un mulina ku bestia a drei, tabata près oleifi pa haña zeta dushi

[Rekonosementu pa Potrèt na página 22]

For di e Self-Pronouncing Edition of the Holy Bible, ku ta kontené e vershon King James i e esun Revisá