“Sea Fuerte den Señor”

“Sea fuerte den Señor, i den e forsa di su poder.”—EFESIONAN 6:10.

1. (a) Ki kombate ekstraordinario a tuma lugá un 3.000 aña pasá? (b) Dikon David a resultá viktorioso?

UN 3.000 aña pasá, dos kontrinkante a enfrentá otro riba kampo di bataya meimei di dos ehérsito enemigu. Esun mas yòn tabata un mucha hòmber wardadó di karné ku yama David. Su dilanti tabatin pará Goliat, un hòmber di un estatura i forsa ekstraordinario. Goliat su korasa tabata pisa rònt di 57 kilo, i e tabatin un lansa inmenso i un spada grandi. David no tabatin ningun armadura bistí, i su úniko arma tabata un slenger. E gigante filisteo Goliat a sinti su mes ofendí ora el a mira ku su retadó israelita tabata un hóben. (1 Samuel 17:42-44) Pa e mirónes di ámbos ehérsito, e resultado lo mester a parse inevitabel. Pero no ta tur biaha ta esnan poderoso òf e guereronan ta gana e bataya. (Eklesiastés 9:11) David a resultá viktorioso pasobra el a bringa den e poder di Yehova. El a bisa: ‘E bataya ta di Yehova.’ E relato bíbliko ta bisa ku “David a prevalesé riba e filisteo ku un slenger i un piedra.”—1 Samuel 17:47, 50.

2. Den ki klase di lucha kristiannan ta partisipá?

² Kristiannan no ta partisipá den guera físiko. Ounke nan ta na pas ku tur hende, nan ta den un bataya spiritual kontra kontrinkantenan masha poderoso. (Romanonan 12:18) Den e último kapítulo di Pablo su karta na e efesionan, el a deskribí un pelea den kua tur kristian ta enbolbí. Pablo a skirbi: “Nos lucha no ta kontra karni i sanger, sino kontra e gobernantenan, kontra e podernan, kontra e forsanan mundial di e skuridat aki, kontra e forsanan spiritual di maldat den e lugánan selestial.”—Efesionan 6:12.

3. Segun Efesionan 6:10, kiko nos tin mester pa garantisá ku nos lo tin éksito?

³ E “forsanan spiritual di maldat” ei ta Satanas i e demoñonan, kendenan ke destruí nos relashon ku Yehova Dios. Ya ku nan ta hopi mas fuerte ku nos, nos ta den un situashon paresido na esun di David, i nos no por tin éksito a ménos ku nos dependé riba Dios pa fortalesé nos. De echo, Pablo ta urgi nos pa ta “fuerte den Señor, i den e forsa di su poder.” (Efesionan 6:10) Despues di a duna e konseho ei, e apòstel a deskribí e perkurashonnan spiritual i e kualidatnan kristian ku lo yuda nos sali viktorioso.—Efesionan 6:11-17.

4. Kua ta e dos puntonan prinsipal ku nos lo konsiderá den e artíkulo aki?

⁴ Laga nos ban analisá kiko e Skritura ta bisa tokante e puntonan fuerte i e  táktikanan di nos enemigu. Kaba nos lo konsiderá ki strategia nos por usa pa defendé i protehá nos mes. Si nos sigui Yehova su instrukshon, nos por tin sigur ku nos enemigunan lo no prevalesé kontra nos.

Un Lucha Kontra Forsanan Spiritual di Maldat

5. Kon e manera ku nan a deskribí e lucha di Efesionan 6:12 den e idioma original ta yuda nos komprondé Satanas su strategia?

⁵ Pablo a splika ku ‘nos lucha ta kontra forsanan spiritual di maldat den e lugánan selestial.’ Naturalmente e spiritu malbado mas prinsipal ta Satanas e Diabel, e gobernante òf “prens di demoñonan.” (Mateo 12:24-26) Den e idioma original, Beibel ta kompará nos bataya ku lucha libre, esta, un bringamentu man na man. Den e peleanan di lucha libre di antiguo Gresia, kada partisipante tabata purba pone su kontrinkante pèrdè balansa pa asina e por a dal e abou. Di igual manera, Diabel ke pa nos pèrdè nos balansa spiritual. Kon e por pone nos hasi esei?

6. Usa e Skritura pa mustra kon Diabel por usa diferente táktika pa debilitá nos fe.

⁶ Diabel por aktua manera un kolebra òf un leon ku ta gruña òf asta manera un angel di lus. (2 Korintionan 11:3, 14; 1 Pedro 5:8) E por usa hende pa persiguí nos òf deskurashá nos. (Revelashon 2:10) Siendo ku Satanas tin henter e mundu bou di su kontròl, e por hasi pleno uso di e deseonan i atrakshonnan di mundu pa kue nos den trampa. (2 Timoteo 2:26; 1 Juan 2:16; 5:19) E por usa e manera di pensa di mundu òf di apóstatanan pa gaña nos meskos ku el a gaña Eva.—1 Timoteo 2:14.

7. Ki limitashonnan e demoñonan tin, i ki bentahanan nos tin?

⁷ Ounke e armanan i e poder di Satanas i su demoñonan por parse aplastante, nan tin nan limitashonnan. E spiritunan malbado aki no por obligá nos hasi kosnan malu ku ta desagradá nos Tata selestial. Nos a ser kreá ku boluntat liber, i nos por kontrolá nos pensamentunan i akshonnan. Es mas, no ta nos so ta bringa. Den nos tempu tambe, meskos ku tabata e kaso den tempu di Eliseo, “esnan ku ta ku nos ta mas ku esnan ku ta ku nan.” (2 Reinan 6:16) Beibel ta sigurá nos ku si nos someté nos mes na Dios i resistí Diabel, lo e hui for di nos.—Santiago 4:7.

Sea Konsiente di e Trikinan di Satanas

8, 9. Ki pruebanan Satanas a trese riba Jòb pa kibra su integridat, i ki peligernan spiritual nos ta konfrontá awe?

⁸ Satanas su trikinan no ta deskonosí pa nos pasobra e Skritura ta revelá su táktikanan básiko. (2 Korintionan 2:11) Por ehèmpel, kontra e hòmber hustu Jòb, Diabel a usa problemanan ekonómiko severo, morto di su sernan kerí, oposishon di famia, sufrimentu físiko i krítika infundá di amigunan falsu. Jòb  a bira deprimí i el a sinti ku Dios a bandon’é. (Jòb 10:1, 2) Ounke awe Satanas kisas no ta kousa e problemanan aki direktamente, e tipo di difikultatnan ei ta afektá hopi kristian, i Diabel por usa nan pa su probecho.

⁹ Peligernan spiritual a oumentá den e tempu di fin aki. Nos ta biba den un mundu kaminda metanan materialista ta haña mas prioridat ku metanan spiritual. Medionan di komunikashon konstantemente ta presentá sèks ilísito komo un fuente di felisidat en bes di un fuente di doló di kurason. I mayoria hende a bira ‘stimadó di plaser mas bien ku stimadó di Dios.’ (2 Timoteo 3:1-5) E manera di pensa aki por ta un menasa pa nos balansa spiritual, a ménos ku nos “lucha seriamente pa e fe.”—Hudas 3.

10-12. (a) Menshoná un spièrtamentu ku Hesus a duna den su komparashon di e sembradó. (b) Ilustrá kon aktividatnan spiritual por ser restringí.

¹⁰ Un di Satanas su táktikanan mas eksitoso ta di pone nos bira totalmente enbolbí den e mundu aki i su aktividatnan materialista. Den Hesus su komparashon di e sembradó, el a spièrta ku den algun kaso “e preokupashonnan di e mundu aki i e engaño di rikesa ta hoga e palabra [di e Reino].” (Mateo 13:18, 22) E palabra griego tradusí akinan ku “hoga” ta nifiká “choka” òf “strangulá kompletamente.”

¹¹ Den selvanan tropikal bo por haña e mata Ficus aurea, òf fíkus stranguladó. E ta krese lentamente i ta mara rònt di tronkon di un palu anfitrion. Pokopoko e fíkus ku ta rama aki ta lora rònt di e palu anfitrion miéntras ku su raisnan ta bira mas i mas fuerte. Ku tempu e tantísimo raisnan di e fíkus stranguladó ta apsorbá mayor parti di e nutrishon ku tin den suela na pia di e palu anfitrion, miéntras ku su blachinan ta kita lus di solo for di e anfitrion. Finalmente, e palu anfitrion ta muri.

¹² Den un manera similar, e preokupashonnan di e mundu aki i e buskamentu di rikesa i di un estilo di bida kómodo, pokopoko por apsorbá mas i mas di nos tempu i energia. Unabes nos atenshon desviá bai na e kosnan di mundu, fásilmente nos lo por neglishá nos studio personal di Beibel i tuma pa kustumber pa pèrdè reunionnan kristian, i asina nos ta ser kòrtá for di nutrishon spiritual. E ora ei metanan materialista ta remplasá aktividatnan spiritual, i finalmente nos ta bira un víktima fásil pa Satanas.

Nos Tin Ku Para Firme

13, 14. Ki posishon nos tin ku tuma ora ku Satanas ta oponé nos?

¹³ Pablo a urgi rumannan den fe pa “para firme kontra e trampanan di Diabel.” (Efesionan 6:11) Ta mas ku klaru ku nos no por konkistá Diabel i su demoñonan. Dios a duna Hesukristu e tarea ei. (Revelashon 20:1, 2) Sin embargo, tanten ku Satanas t’ei, nos tin ku “para firme” pa su atakenan no vense nos.

¹⁴ Apòstel Pedro tambe a enfatisá e nesesidat di para firme kontra Satanas. Pedro a skirbi: “Sea sobrio, sea alerta. Boso atversario, e  Diabel, ta kana rònt manera un leon ku ta gruña, buskando ken e por devorá. Ma resistié, firme den boso fe, sabiendo ku boso rumannan den henter mundu ta pasando dor di e mesun eksperensianan di sufrimentu.” (1 Pedro 5:8, 9) De echo, e sosten di nos rumannan spiritual ta krusial pa nos por para firme ora ku Diabel ta ataká manera un leon ku ta gruña.

15, 16. Duna un ehèmpel bíbliko pa mustra kon e sosten di rumannan den fe por yuda nos para firme.

¹⁵ Den sabana afrikano, ora un leon gruña den bisindario, antilopnan ta reakshoná dor di sali na kareda te ora nan ta fuera di peliger. Sin embargo, olefantenan ta un bon ehèmpel di duna sosten mutuo. E buki Elephants—Gentle Giants of Africa and Asia (Olefante—Gigantenan Mansu di Afrika i Asia) a splika: “Un medio di defensa ku un trupa di olefante normalmente ta usa ta di forma un sírkulo ku nan kurpa. E adultonan ta para ku kara pafó kontra e menasa i e olefantenan yòn ta ser protehá paden di e sírkulo.” Ora leonnan topa tal manifestashon di poder i sosten, kasi nunka nan no ta ataká, ni sikiera e olefantenan yòn.

¹⁶ Ora nos ta ser menasá dor di Satanas i su demoñonan, nos tambe tin ku keda huntu, skouder ku skouder huntu ku nos rumannan ku ta firme den fe. Pablo a rekonosé ku sierto kristiannan a resultá di ta “un enkurashamentu” p’e durante su enkarselashon na Roma. (Kolosensenan 4:10, 11) E palabra griego tradusí “enkurashamentu” ta aparesé un solo biaha den e Skritura Griego Kristian. Segun Vine su Expository Dictionary of New Testament Words, “un forma verbal di e palabra ta nifiká remedi ku ta suavisá iritashon.” Meskos ku un krema refreskante, e sosten di adoradónan maduro di Yehova por aliviá e doló kousá pa sufrimentu emoshonal òf físiko.

17. Kiko por yuda nos keda fiel na Dios?

¹⁷ Enkurashamentu for di nos rumannan kristian djawe por fortalesé nos determinashon pa sirbi Dios fielmente. Spesialmente ansianonan kristian ta ansioso pa duna yudansa spiritual. (Santiago 5:13-15) Algun kos ku por yuda nos keda fiel ta entre otro, studia Beibel ku regularidat i asistí na reunionnan kristian, i na asamblea- i kongresonan. E amistat será ku nos tin ku Dios tambe ta yuda nos keda fiel na dje. Sí, sea ku nos ta kome, bebe òf kiko ku nos ta hasi, nos lo ke hasi tur pa e gloria di Dios. (1 Korintionan 10:31) Naturalmente ta masha importante pa nos dependé riba Yehova mediante orashon afin di por sigui den un rumbo ku ta agrad’é.—Salmo 37:5.

18. Dikon nos no mester entregá asta si sirkunstansianan angustioso ta debilitá nos fortalesa?

¹⁸ Tin biaha Satanas su atakenan ta bin ora ku nos no ta sinti nos mes spiritualmente fuerte. Leon ta bula ataká bestia ku ta suak. Problema den famia, difikultatnan ekonómiko òf malesa por debilitá òf kaba ku nos fortalesa spiritual. Pero laga nos no kansa di hasi loke ta agradá Dios, pasobra Pablo a  bisa: “Ora mi ta débil, e ora ei mi ta fuerte.” (2 Korintionan 12:10; Galationan 6:9; 2 Tesalonisensenan 3:13) Kiko Pablo tabata ke men? E tabata ke men ku e poder di Dios por kompensá nos debilidatnan humano, basta ku nos akudí na Yehova pa haña fortalesa. David su viktoria riba Goliat ta mustra ku Dios por—i ta—fortalesé su pueblo. Testigunan di Yehova den nos tempu por konfirmá ku den tempu di krísis ekstremo, nan a sinti Dios su man fortalesedor.—Daniel 10:19.

19. Duna un ehèmpel ku ta mustra kon Yehova por fortalesé su sirbidónan.

¹⁹ Un pareha kasá a skirbi lo siguiente relashoná ku e sosten ku Dios a duna nan: “Den transkurso di añanan, nos a sirbi Yehova komo esposo i esposa i a disfrutá di hopi bendishon i a yega na konosé hopi hende maravioso. Pero tambe nos a ser entrená i fortalesé dor di Yehova pa wanta kontratempunan ku éksito. Meskos ku Jòb, no ta semper nos tabata komprondé pakiko kosnan a bai manera nan a bai, pero nos tabata sa sí ku Yehova semper tabat’ei pa yuda nos.”

20. Kon e Skritura ta mustra ku Yehova semper ta sostené su pueblo?

²⁰ Yehova su man no ta muchu kòrtiku pa sostené i fortalesé su pueblo fiel. (Isaias 59:1) Salmista David a kanta: “SEÑOR ta sostené tur ku kai, i ta lanta tur ku ta abatí.” (Salmo 145:14) Sí, nos Tata selestial “dia tras dia ta karga nos karganan” i ta perkurá loke realmente nos tin mester.—Salmo 68:19.

Nos Tin Mester di “e Armadura Kompletu di Dios”

21. Kon Pablo a enfatisá ku nos tin mester di un armadura spiritual?

²¹ Nos a konsiderá algun di e métodonan di Satanas i nos a mira ku ta nesesario pa para firme apesar di su atakenan. Awor nos tin ku konsiderá un otro perkurashon masha importante pa nos por defendé nos fe ku éksito. Dos biaha den e karta di apòstel Pablo na e efesionan, el a menshoná un faktor esensial pa por para firme kontra e trampanan di Satanas i sali viktorioso den nos lucha kontra forsanan spiritual malbado. Pablo a skirbi: “Bisti e armadura kompletu di Dios, pa boso por para firme kontra e trampanan di Diabel. . . . Tuma e armadura kompletu di Dios, pa boso por resistí den e dia malu, i despues di a hasi tur kos, para firme.”—Efesionan 6:11, 13.

22, 23. (a) Kiko nos armadura spiritual ta inkluí? (b) Kiko nos lo konsiderá den e siguiente artíkulo?

²² Sí, nos tin ku bisti “e armadura kompletu di Dios.” Tempu ku Pablo a skirbi su karta na e efesionan, tabatin un sòldá romano ta vigil’é, i kisas e sòldá aki a yega di bisti su armadura kompletu. Sin embargo, ta Dios a inspirá e apòstel pa papia tokante e armadura  spiritual ku ta sumamente nesesario pa tur sirbidó di Yehova.

²³ E armadura aki ku Dios ta duna ta inkluí kualidatnan ku un kristian mester tin i tambe perkurashonnan spiritual ku Yehova a hasi. Den e siguiente artíkulo, nos lo analisá kada parti di e armadura spiritual. Esaki lo por yuda nos determiná kon bon ekipá nos ta pa nos guera spiritual. Na mesun tempu, nos lo mira kon e maravioso ehèmpel di Hesukristu ta yuda nos pa nos por tin éksito den resistí Satanas e Diabel.

Kon Lo Bo Kontestá?

• Ki lucha tur kristian tin?

• Deskribí algun táktika di Satanas.

• Kon e sosten di nos rumannan den fe por fortalesé nos?

• Riba ken su forsa nos tin ku dependé, i dikon?

[Preguntanan di Estudio]

[Plachinan na página 11]

Kristiannan tin ‘un lucha kontra forsanan spiritual di maldat’

[Plachi na página 12]

Preokupashonnan di e mundu aki por hoga òf strangulá e palabra di e Reino

[Plachi na página 13]

Rumannan kristian por ta “un enkurashamentu”

[Plachi na página 14]

Bo ta resa pidi Dios forsa?