Bo Ta Wardando Riba Yehova na e Manera Korekto?

MAYORIA hende den e mundu djawe ta pèrdè pasenshi si nan tin ku warda riba un hende òf riba algu. Sin embargo, e Skritura ta animá e pueblo di Dios pa kultivá un aktitut di spera òf “warda.” Na kontraste ku e hendenan rònt di dje, profeta Mikeas a deklará: “Lo mi warda ku speransa riba SEÑOR; lo mi spera riba e Dios di mi salbashon.”—Mikeas 7:7; Lamentashon 3:26.

Pero kiko ke men warda riba Yehova? Kon un kristian mester warda riba Dios? Tin maneranan korekto i inkorekto di hasi esaki? E eksperensia di profeta Jonas di siglo 9 promé ku nos era ta siña nos un lès den e asuntu aki.

Un Kaso di Warda ku e Motibu Inkorekto

Yehova Dios a manda Jonas bai i prediká na e hendenan di Nínive, kapital di e Imperio Asirio. Nínive tabata konosí komo “e stat tur na sanger” debí na su krueldat i brutalidat flagrante, un echo bon konfirmá pa historiadó i arkeólogo. (Nahum 3:1) Na promé instante Jonas a purba bula pipa pa e asignashon aki, pero Yehova a sòru pa finalmente e profeta bai Nínive tòg.—Jonas 1:3–3:2.

“Jonas a kuminsá pasa dor di e stat riba e promé dia di kaminda; i el a prediká i a bisa: ‘Aki kuarenta dia Nínive lo wòrdu destruí.’” (Jonas 3:4) E esfuerso di Jonas a kousa un reakshon remarkabel: “E hendenan di Nínive a kere den Dios, i nan a proklamá un yunamentu i a bisti paña-di-saku, for di esun di mas haltu te na esun di mas humilde.” (Jonas 3:5) Por lo tantu, Yehova, un Dios ku “no kier pa ningun hende bai pèrdí, ma pa tur bin na repentimentu,” a spar e stat.—2 Pedro 3:9.

Kon Jonas a reakshoná? E relato ta bisa: “Ma esaki a disgustá Jonas mashá, i el a rabia.” (Jonas 4:1) Dikon? Podisé Jonas a sinti ku el a pèrdè kredibilidat komo profeta, ya ku el a proklamá e destrukshon pa un sierto fecha i esei no a sosodé. Evidentemente, Jonas a bira mas preokupá ku su reputashon ku el a preokupá ku miserikòrdia i salbashon di otro hende.

Klaru ku Jonas no a bai asina leu di bandoná su trabou komo profeta. No opstante, el a warda pa “mira kiko lo a bai pasa den e stat.” Sí, el a desaroyá un tipo di aktitut renkoroso i di ‘sinta mira.’ Ora el a realisá ku kosnan no a sosodé manera el a ferwagt, el a traha un ramada, kai sinta den e sombra i warda rabiá pa mira kiko lo a bai pasa. Pero Yehova no  a aprobá Jonas su aktitut, p’esei amorosamente el a korigí e manera robes di pensa di su profeta.—Jonas 4:5, 9-11.

Dikon Yehova Tin Pasenshi

Ounke Nínive a repentí i a keda di spar, despues e stat a bolbe kai den maldat. Mediante profeta Nahum i Sofonias, Yehova a predisí su destrukshon. Papiando di “e stat tur na sanger,” Yehova a deklará ku lo e destruí Asiria i kombertí Nínive den un desolashon. (Nahum 3:1; Sofonias 2:13) Na aña 632 promé ku nos era, Nínive a ser destruí pa semper.

Den un manera similar e mundu djawe ta kulpabel di dramamentu di sanger pa loko, anto na un eskala hopi mas grandi ku antiguo Nínive. Pa e motibu aki i otronan mas, Yehova a dekretá ku e mal sistema di kosnan aktual lo yega na su fin den un “gran tribulashon” sin presedente.—Mateo 24:21, 22.

Pero te ainda Yehova a wanta e destrukshon primintí di manera ku hende sinsero djawe por arepentí i keda di spar, meskos ku esnan arepentí di Nínive. Apòstel Pedro a referí na Dios su pasenshi ku e siguiente palabranan: “Señor no ta tarda ku su promesa manera algun tin esaki pa tardansa, ma e tin pasenshi pa ku boso, i no kier pa ningun hende bai pèrdí, ma pa tur bin na repentimentu.”—2 Pedro 3:9, 10, 13.

Warda na e Manera Korekto

Pedro ta sigui bisa: “Siendo ku tur e kosnan aki lo ser disolvé asina, ki klase di persona boso mester ta den aktonan santu di kondukta i echonan di deboshon na Dios, sperando i teniendo bon na mente e presensia di e dia di Yehova!” (2 Pedro 3:11, 12, NW) Tuma nota ku segun ku nos ta sperando e dia di Yehova, nos lo mester ta demostrando “aktonan santu di kondukta i echonan di deboshon na Dios.” Pues, ta na su lugá pa nos ta aktivo, no inaktivo.

Sí, ora nos ta warda ku e aktitut korekto nos lo desplegá pleno konfiansa ku e dia di Yehova lo bin presis na e momentu ku ta Yehova su propósito. E tipo di fe ei ta produsí aktonan santu i echonan di deboshon na Dios, i un di esnan prinsipal ta e predikashon di e bon nobo di e Reino di Dios. Hesus a pone un bon ehèmpel pa loke ta e predikashon, i el a instruí su siguidónan ungí: “Mira pa boso hep ta fahá, i pa boso lampinan ta sendí. I sea manera hòmbernan ku ta warda riba nan shon, pa ora ku e bolbe di e fiesta di kasamentu i e bin bati, nan por habri p’e mesora. Bendishoná ta e esklabonan ei ku e shon lo haña ta vigilá ora ku e bin.”—Lukas 12:35-37.

Esklabonan di promé siglo tabatin kustumber di ‘faha nan hep’ dor di kue e puntanan di nan mantel i want’é bou di nan faha pa asina ta mas fásil pa nan por hasi trabou pisá. Pues, un kristian mester ta aktivo, seloso pa bon obra. E mester resistí kualke tendensia pa “flakia” i bira inaktivo den kosnan spiritual, kisas dor ku e ta hinka su energia  den plaser i aktividatnan materialista. Mas bien, e mester tin hopi di hasi, “abundando den e trabou di Señor,” segun ku e ta warda e dia grandi i temibel di Yehova.—Romanonan 12:11; 1 Korintionan 15:58.

Keda Aktivo Segun Ku Nos Ta Warda

Testigunan di Yehova a keda hopi aktivo segun ku nan ta warda riba e dia di Yehova. Por ehèmpel, durante aña di sirbishi 2003, nan a dediká un promedio di 3.383.000 ora pa dia n’e predikashon di Yehova su palabra. Figurá bo, un persona lo tin ku prediká nònstòp pa 386 aña pa logra loke nan a hasi den un dia!

No opstante, ta bon pa nos puntra nos mes: ‘Ki klase di aktitut di warda ami personalmente tin?’ Hesus a duna un komparashon ku ta deskribí e diligensia ku e ta ferwagt di fiel kristiannan ungí. El a papia di tres esklabo: “Na esun [e shon] a duna sinku talento, na e otro dos, i na e otro ún, kada un segun su kapasidat; i despues el a bai hasi un biahe. Mesora esun ku a risibí e sinku talentonan a bai i a negoshá ku nan, i a gana sinku talento mas. Di e mesun manera esun ku a risibí e dos talentonan a gana dos mas. Ma esun ku a risibí ún talento a bai, a koba un buraku den tera, i a skonde e plaka di su shon. Awor despues di hopi tempu e shon di e esklabonan ei a bolbe i a regla kuenta ku nan.”—Mateo 25:15-19.

Tur tres esklabo a warda riba regreso di nan shon. E dosnan ku a keda aktivo segun ku nan tabata warda riba nan shon, a tende ora el a yega: “Hopi bon, mi bon i fiel esklabo”! Sin embargo, esun ku a warda sin hasi nada, a risibí un otro trato. E shon a bisa: “Tira e esklabo ku no ta sirbi pa nada den e skuridat di pafó.”—Mateo 25:20-30.

Ounke e komparashon aki ta apliká na kristiannan ungí, e tin un lès pa nos tur, sin importá nos speransa. E Shon, Hesukristu, ta ferwagt ku nos kada un lo traha diligentemente den su sirbishi segun ku nos ta warda su yegada riba e gran dia di Yehova. E ta apresiá e labor di “kada un segun su kapasidat” i sirkunstansia. Lo ta un gran goso pa tende e Shon bisa “hopi bon” ora ku porfin nos no tin ku warda mas!

 E Pasenshi di Nos Señor Ta Nifiká Salbashon

Kiko si e sistema di kosnan aki a dura mas largu di loke nos a pensa òf spera ku lo el a dura? No ta pòrnada el a dura asina largu. Apòstel Pedro a skirbi: “Konsiderá e pasenshi di nos Señor komo salbashon.” (2 Pedro 3:15) Konosementu eksakto di Dios su propósito i rekonosiendo humildemente ku nos no ta dje importante ei kompará ku e kumplimentu di Dios su propósito, lo yuda nos tene pasenshi tanten ku Yehova mes ta haña ta bon pa tene pasenshi ku e sistema bieu aki.

Pa stimulá kristiannan pa tene pasenshi, e eskritor bíbliko Santiago a konta e ilustrashon aki. El a skirbi: “At’e kunukero ta spera e produkto presioso di e tera, teniendo pasenshi kuné, te ora ku e haña e áwaserunan trempan i lat. Boso tambe tene pasenshi; fortalesé boso kurason, pasobra e binida di Señor ta serka.”—Santiago 5:7, 8.

Yehova Dios no ke pa nos kansa òf entregá segun ku nos ta warda. E tin trabou pa nos hasi i e ta keda kontentu si nos ta usa e tempu di espera pa traha diligentemente den e trabou ei. E ke pa nos ta entre esnan ku apòstel Pablo ta deskribí den su karta na e hebreonan: “Nos ta deseá ku kada un di boso lo mustra e mesun diligensia pa asina realisá e siguransa kompletu di speransa te na fin, pa boso no flakia, ma pa boso ta imitadónan di esnan ku pa medio di fe i pasenshi ta heredá e promesanan.”—Hebreonan 6:11, 12.

Pues anto, laga nos no kansa. Mas bien, laga nos relashon personal ku Yehova Dios, nos fe den e sakrifisio di reskate di Hesus i nos speransa briante den e sistema nobo di kosnan, ser e kosnan ku ta yena nos bida ku energia. Meskos ku e esklabonan “bon i fiel” di Hesus su komparashon, laga nos demostrá di ta digno di elogio i rekompensa dor di keda aktivo den dunamentu di alabansa na nos Dios, meskos ku e salmista ku a deklará lo siguiente: “Pa loke t’ami, lo mi spera kontinuamente, i lo mi alabá bo ainda mas i mas.”—Salmo 71:14.

[Plachi na página 21]

Desepshoná, Jonas a warda pa wak kiko lo bai pasa ku Nínive

[Plachinan na página 22, 23]

Laga nos desplegá deboshon na Dios segun ku nos ta warda riba e dia di Yehova