El A Kompartí Su Kreensia ku e Muchanan di Su Klas

ABO lo tin gana di yuda e muchanan den bo klas haña un mihó komprondementu di bo kreensianan basá riba Beibel? Magdalena, un alumno di 18 aña di skol sekundario na Polonia, hopi bes sa papia ku e muchanan di su klas tokante su kreensianan komo un Testigu di Yehova. Debí na esei e muchanan hopi biaha tabata hasié preguntanan manera: ‘Kiko ke men ser un Testigu di Yehova?’ i ‘Boso no ta kere den Hesukristu?’ Kon e por a yuda e muchanan den su klas? Magdalena a hasi orashon pidi Yehova gui’é, anto el a hasi esfuerso pa logra loke el a pidi den orashon.—Santiago 1:5.

Un dia Magdalena a pidi un dosente ku a respetá su kreensianan, si e tabatin mag di mustra e klas e vidio Testigonan di Jehova—E Organisacion Tras dje Nomber. * E dosente a bai di akuerdo ku esaki. Magdalena e ora ei a bisa e muchanan di su klas: “Mi ta hasiendo areglo pa un amigu bin presentá un programa di 90 minüt pa e klas. Lo e tin un presentashon di vidio i un diskushon riba Testigunan di Yehova. Boso lo ke bin?” Tur hende a bisa sí. Magdalena ku Wojciech, un predikadó eksperensiá di tempu kompletu, a kuminsá prepará pa e proyekto.

E plan tabata pa habri e presentashon ku un diskurso di 20 minüt basá riba e foyeto Testigonan di Jehova—Ken Nan Ta? Kico Nan Ta Kere? * siguí pa un diskushon a base di pregunta i kontesta. Despues nan lo a pasa e vidio den biblioteka di skol. Kada alumno den e klas lo a risibí un regalo: un ènvelòp grandi ku a kontené un par di foyeto, e buki Loke hovenan sa puntra—Contesta práctica * i algun tratado i revista.

Riba e dia di e presentashon, tabatin presente den e biblioteka 14 mucha di su klas, e dosente i 4 otro alumno ku pa kasualidat tabata den biblioteka. Promé, Wojciech a splika ku vários poëta i eskritor polako a usa e nòmber di Dios, Yehova, den nan obranan. El a menshoná tambe ku algun buki bieu di katisashi katóliko tabatin e nòmber di Dios. Ora di splika e aktividat di Testigunan di Yehova den tempu moderno, el a mustra foyetonan di vários sukursal i potrèt di algun Salòn di Asamblea.

Despues a sigui un diskushon animá. Magdalena ku Wojciech a usa Beibel pa kontestá e preguntanan. Esaki a impreshoná e ouditorio i a konvensé nan ku Testigunan di Yehova no ta predikando nan propio ideanan. Kua tabata algun pregunta ku nan a hasi, i kon nan a ser kontestá?

Pregunta: Beibel tin hopi ekspreshon vago i idioma figurativo, kosnan ku bo por interpretá den vários manera. Kon ta posibel pa biba na armonia ku Beibel?

Kontesta: Tin hende ta bisa ku Beibel ta manera un violin riba kua bo por toka ki melodia ku bo ke. Pero pensa un ratu: Si bo ke haña sa kiko e deklarashonnan di un eskritor ta nifiká, e mihó kos no ta pa djis puntr’é? Distinto for di eskritornan morto di bukinan humano, e  Outor di Beibel, Yehova Dios, sí ta na bida. (Romanonan 1:20; 1 Korintionan 8:5, 6) E konteksto di un teksto bíbliko por indiká kiko ta e interpretashon korekto. Ademas, Beibel hopi bes ta trata ku e mesun tópiko den vários lugá, p’esei ta bon pa kompará e pasashinan ei ku otro. Asina nos por laga Dios guia nos pensamentu, i ta komo si fuera e mes ta splikando nos e teksto bíbliko. Dor di hasi esei, nos por haña sa su boluntat i biba na armonia kuné manera el a ser revelá den Beibel, no ta asina?

Pregunta: Kiko ta e diferensia entre kristiannan i Testigunan di Yehova?

Kontesta: Nos ta kristian! Pero en bes di djis bisa ku nan ta kristian, Testigunan di Yehova ta hasi esfuerso pa biba na armonia ku loke nan ta kere i ku loke Dios ta siña nan pa nan propio benefisio. (Isaias 48:17, 18) Ya ku tur nan siñansanan ta basá riba Beibel, nan sa ku nan tin e bèrdat.—Mateo 7:13, 14, 21-23.

Pregunta: Dikon boso ta abordá hende ku boso no konosé mes, i ta insistí pa papia ku nan? Boso no ta obligando hende asina di aseptá boso kreensia?

Kontesta: Ke men, boso ta haña ku no ta bon ora un hende riba kaya papia ku bo kortesmente i puntra bo kiko bo ta pensa di algu? (Jeremias 5:1; Sofonias 2:2, 3) (Wojciech ku Magdalena e ora ei a demostrá kon nan ta puntra un hende riba kaya si Dios ta interesá den e personanan ku a sufri den un inundashon resien ku tabatin na Polonia.) Despues di skucha e persona su opinion, nos ta mustr’é kiko Beibel ta bisa. Si un hende no ke papia, nos ta yam’é ayó i sigui. (Mateo 10:11-14) Boso ta haña ku hasiendo esaki nos ta obligá hende pa kòmbersá ku nos? Òf hende no tin mag di kòmbersá ku otro mas?

Pregunta: Dikon boso no ta selebrá dianan di fiesta?

Kontesta: Nos ta selebrá e úniko akontesimentu ku Beibel ta manda nos konmemorá: e Memorial di e morto di Hesukristu. (1 Korintionan 11:23-26) Pa loke ta dianan di fiesta, boso por haña informashon tokante nan orígen dor di konsultá ensiklopedianan i otro fuentenan fidedigno. Si boso hasi esei, boso lo komprondé mesora dikon nos no ta selebrá nan.—2 Korintionan 6:14-18.

E ouditorio a hasi hopi pregunta mas i a haña kontesta riba nan tur. E diskushon a dura asina largu ku nan mester a posponé presentashon di e vidio.

Kon e alumnonan a reakshoná? Laga Magdalena konta nos: “Mi a keda sorprendí ku algun alumno ku normalmente ta hasi ko’i kèns i bofon di otro hende, a hasi preguntanan serio. Ounke nan tabata pretendé di ta ateista, durante e diskushon nan a ekspresá fe den Dios!” Esnan presente gustosamente a aseptá e regalonan, i en total a laga 35 buki, 63 foyeto i 34 revista ku nan.

Esei sí tabata resultadonan maravioso di un proyekto di skol! Magdalena no solamente a yuda e muchanan den su klas siña konosé i komprondé Testigunan di Yehova mas mihó, sino tambe ku esei a stimulá hopi di e hóbennan pa pensa riba e propósito di bida. Dikon abo no ta purba yuda e muchanan den bo klas pa siña mas tokante loke bo ta kere?

[Nota]

[Plachi na página 31]

Magdalena ku Wojciech preparando pa e presentashon