Ken Awe Ta Duna Gloria na Dios?

“Digno bo ta, nos Señor i nos Dios, pa risibí gloria i onor i poder.” —Revelashon 4:11.

1, 2. (a) Ki ehèmpelnan ta ilustrá e kampo di siensia ku yama biomimétika? (b) Ki pregunta ta surgi, i kiko ta e kontesta?

UN DIA den dékada di 1940, e ingeniero suiso George de Mestral a bai kana ku su kachó. Ora el a yega kas bèk, el a ripará ku su paña i tambe lana di e kachó tabata yen di pegasaya. Pa kuriosidat, el a eksaminá e pegasayanan bou di mikroskop i a keda fasiná ku e haknan chikí ku tabata pega na tur kos ku tabatin un renchi. Ku tempu, el a imitá e diseño di pegasaya pa traha un tipo nobo di tape re-usabel ku por a pega tela òf kos huntu rápidamente: Velcro òf klittenband. De Mestral no tabata e úniko persona ku a kopia diseño for di naturalesa. Na Merka, e ruman hòmbernan Wright a diseñá un avion despues di a studia kon paranan grandi ta bula. E ingeniero franses Alexandre-Gustave Eiffel a diseñá e toren na Paris ku ta karga su nòmber, usando e prinsipionan básiko ku ta hasi posibel ku hende su wesu di bèl di pia por karga e peso di e kurpa.

² E ehèmpelnan aki ta ilustrá bon loke nan ta yama biomimétika, esta, e kampo di siensia ku ta purba imitá diseñonan ku tin den naturalesa. * Sin embargo, un pregunta rasonabel ku ta surgi ta: Kuantu biaha inventornan ta duna mérito na Esun ku a diseñá pegasaya, paranan grandi, wesu di bèl di pia humano i tur e otro kreashonnan original briante riba kua hopi invento humano ta basá? Ta tristu pero bèrdat, den e mundu djawe rara bes hende ta duna Dios e mérito òf gloria ku e meresé.

3, 4. Kiko e palabra hebreo tradusí komo “gloria” ta indiká, i na kiko e mester ta referí ora us’é pa Yehova?

³ Pero kisas tin hende ta puntra nan mes: ‘Pakiko ta nesesario pa duna gloria na Dios? Dios no ta glorioso kaba?’ Ta bèrdat ku Yehova ta e Personahe mas glorioso den universo, pero esei no ke men ku e ta glorioso den bista di tur hende. Den Beibel, e palabra hebreo tradusí komo “gloria” ta referí na kualke kos ku ta laga un persona parse importante i prominente den bista di otro hende. Ora usa e palabra ei pa Dios, e ta referí na loke ta hasi Dios impreshonante den bista di hende.

⁴ Ta masha poko hende awe ta tuma nota di loke ta hasi Dios impreshonante. (Salmo 10:4;  14:1) De echo, asta si figuranan prominente den komunidat ta kere den Dios, hopi bes nan a influensiá hende pa trata e glorioso Kreadó di universo sin rèspèt. Den ki maneranan nan a hasi esei?

“Nan No Tin Èksküs”

5. Ki splikashon hopi sientífiko ta duna pa e maravianan di kreashon?

⁵ Hopi sientífiko ta para ariba ku Dios no ta eksistí. Kon anto nan ta splika e maravianan di kreashon, entre nan hende? Nan ta bisa ku e kreashonnan maravioso ei ta produkto di evolushon, esta, un forsa impersonal ku pa kasualidat a krea kos. Por ehèmpel, evolushonista Stephen Jay Gould a skirbi: “Nos ta akinan pasobra tabatin un grupo di piská straño ku un tipo di ala masha pekuliar ku por a transformá den pia pa kriaturanan riba tera . . . Kisas nos ta anhelá pa haña un kontesta mas ‘elevá,’ pero no tin.” Asina tambe evolushonistanan Richard E. Leakey i Roger Lewin a skirbi: “Tal bes e rasa humano ta djis un fayo biológiko garafal.” Asta algun sientífiko ku ta elogiá e beyesa i diseño ku tin den naturalesa no ta duna e mérito na Dios.

6. Kiko ta deskurashá hopi hende di duna Dios e mérito ku e meresé komo Kreadó?

⁶ Ora hende eduká ta deklará ku siguransa ku evolushon ta un echo, nan ta indiká indirektamente ku ta hende ignorante so no ke kere den evolushon. Kon hopi hende ta reakshoná riba tal deklarashon? Algun aña pasá un hòmber versá den evolushon a entrevistá hende ku a aseptá e teoria di evolushon. El a bisa: “Mi a deskubrí ku mayoria hende ku ta kere den evolushon, ta kere den dje pasobra a bisa nan ku tur persona inteligente ta kere den esei.” Sí, ora ku personanan eduká ekspresá nan punto di bista ateista, nan ta deskurashá otro hende di duna Dios e mérito ku e meresé komo Kreadó.—Proverbionan 14:15, 18.

7. Segun Romanonan 1:20, kiko nos por mira klaramente pa medio di e kreashon visibel, i dikon?

⁷ Akaso sientífikonan a yega na e konklushon ku tur kos a bin di evolushon pasobra echo i evidensia ta proba esei? Definitivamente ku nò! Tur kaminda rònt di nos tin prueba di un Kreadó. Apòstel Pablo a skirbi tokante e Kreadó: “Desde kreashon di mundu [di humanidat] su atributonan invisibel, su poder eterno i naturalesa divino, a wòrdu mirá klaramente, siendo komprendí dor di loke a wòrdu trahá, asina ku nan [esnan ku no ke kere] no tin èksküs.” (Romanonan 1:20) E Kreadó a laga su marka bon kla riba su kreashon. Pues Pablo tabata ke men ku for di prinsipio di humanidat, tabata posibel pa hende ‘mira’ evidensia ku Dios ta eksistí pa medio di e kreashon visibel. Unda e evidensia aki ta?

8. (a) Kon e shelu literal ta konfirmá Dios su poder i sabiduria? (b) Ki indikashon tin ku universo tabatin un Promé Kousa?

⁸ Nos ta mira evidensia di Dios den e shelu yen di strea. Salmo 19:1 ta bisa: “E shelunan ta konta di e gloria di Dios.” “E shelunan”—solo, luna i strea—ta konfirmá Dios su poder i sabiduria. E kantidat inmenso di strea so kaba ta yena nos ku rèspèt profundo. I tur e kuerponan selestial aki no ta move pa loko den espasio, sino segun leinan físiko masha eksakto. * (Isaias 40:26) Ta rasonabel pa atribuí tal presishon na puru kasualidat?  Un punto interesante ta ku hopi sientífiko ta bisa ku universo tabatin un komienso repentino. Splikando e implikashonnan di esaki un profèser a skirbi: “Un universo ku semper a eksistí ta muchu mas aseptabel pa un [punto di bista] ateista òf agnóstiko. Asina tambe, un universo ku tabatin un komienso ta eksigí aparentemente un promé kousa; pasobra ken lo por imaginá un efekto asina grandi sin sufisiente kousa?”

9. Kon Yehova su sabiduria ta bisto den mundu di animal?

⁹ Riba tera tambe nos ta mira evidensia di Dios. E salmista a deklará: “O SEÑOR, ki numeroso bo obranan ta! Ku sabiduria bo a traha tur; tera ta yen di loke bo a krea.” (Salmo 104:24) E loke Yehova a “krea”—ku ta enserá mundu animal—ta duna evidensia di su sabiduria. Manera nos a menshoná na prinsipio, e diseño di kosnan bibu ta di kalidat asina haltu ku hopi bes sientífikonan ta purba imitá nan. Konsiderá algun ehèmpel mas. Investigadónan ta studiando kachu di biná, ku e meta pa traha hèlm mas fuerte; nan ta analisando espesienan di muskita ku tin oido skèrpi, pa por mehorá aparatonan di oido; i nan ta saminá e plumanan di ala di palabrua, ku e idea di mehorá avionnan ku no ta ser detektá pa radar. Pero maske kuantu hende purba, nan no por realmente dupliká e originalnan perfekto ku tin den naturalesa. E buki Biomimicry—Innovation Inspired by Nature (Biomimétika—Inovashon Inspirá pa Naturalesa) ta bisa: “Kosnan bibu a hasi tur loke nos tin gana di hasi, pero sin usa demasiado kombustibel natural, sin kontaminá e planeta òf hipoteká nan futuro.” Esei ta sabiduria!

10. Dikon no ta lógiko pa nenga ku ta eksistí un Gran Diseñadó? Ilustrá esei.

¹⁰ Sea ku bo hisa bo kara wak na shelu òf fiha bo atenshon riba kreashon aki riba tera, tin evidensia bon kla di e Kreadó. (Jeremias 10:12) Nos lo mester ta kompletamente di akuerdo ku e kriaturanan selestial ku ta deklará: “Digno bo ta, nos Señor i nos Dios, pa risibí gloria i onor i poder; pasobra abo a krea tur kos.” (Revelashon 4:11) Sin embargo, tin hopi sientífiko ku no ta mira e evidensia aki ku ‘e wowonan di nan kurason,’ maske podisé nan ta keda impreshoná pa e diseño ku nan ta mira ku nan wowonan literal. (Efesionan 1:18) Nos por ilustrá e situashon asin’aki: Atmirá e beyesa i diseño ku tin den naturalesa anto kaba nenga ku ta eksistí un Gran Diseñadó ta mesun ilógiko ku atmirá un kuadro masha bunita i tòg nenga ku tabatin un artista ku a transformá e kuadro bashí den un obra maestro. P’esei no ta un sorpresa ku Beibel ta bisa di esnan ku ta nenga di kere den Dios “ku nan no tin èksküs”!

“Guiadó Siegu” Ta Pone Hopi Hende Dual

11, 12. E doktrina di predestinashon ta basá riba ki suposishon, i kiko ta mustra ku e doktrina aki no ta glorifiká Dios?

¹¹ Hopi hende religioso sinseramente ta kere ku nan forma di adorá ta duna gloria na Dios. (Romanonan 10:2, 3) Sin embargo, religion en general ta forma un otro sektor di sosiedat humano ku bon mirá, a stroba miónes di hende di glorifiká Dios. Kon asina? Laga nos konsiderá dos manera.

¹² Na promé lugá, religionnan ta kita gloria for di Dios dor di nan siñansanan falsu. Tuma por ehèmpel e siñansa di predestinashon. E doktrina aki ta basá riba e suposishon ku komo ku Dios tin e poder pa sa futuro, e mester sa di antemano e resultado di tur kos. Pues e doktrina di predestinashon ta sugerí ku for di hopi tempu pasá kaba Dios a predestiná e futuro di delaster un persona, sea ku e futuro lo ta bon òf malu. Segun e konsepto aki, ta Dios ta responsabel pa tur sufrimentu i maldat ku ta sosodé awe na mundu. Definitivamente hende no ta glorifikando Dios ora nan ta kulp’é pa loke eigenlijk Satanas ta responsabel p’e! Satanas ta Dios su Atversario prinsipal, i t’e Beibel ta yama e gobernante òf “prens di e mundu aki.”—Juan 14:30; 1 Juan 5:19.

13. Dikon ta bobo pa pensa ku Dios no por frena su kapasidat di sa futuro? Ilustrá esei.

¹³ Predestinashon ta un siñansa no-bíbliko ku ta kalumniá Dios. E siñansa ei ta bruha dos kos  den otro, esta, loke Dios por hasi i loke en realidat e ta hasi. Beibel ta deklará bon kla ku Dios por sa di antemano kiko ta bai pasa. (Isaias 46:9, 10) Sin embargo, ta ilógiko pa pensa ku Dios no por frena su mes di sa kiko ta bai pasa den futuro òf ku e ta responsabel pa tur kos ku sosodé. Un ehèmpel: Suponé ku bo tabatin masha hopi forsa. Esei lo duna bo gana di hisa delaster un opheto pisá ku bo mira? Klaru ku nò! Meskos tambe, e echo ku Dios tin e kapasidat di sa futuro no ta pon’é bou di obligashon pa predestiná òf buska pa sa tur kos di antemano. E ta usa su kapasidat di sa futuro na un manera selektivo i ku diskreshon. * Ta bisto anto ku siñansanan falsu, entre nan esun di predestinashon, no ta glorifiká Dios.

14. Den ki manera religion organisá a desonrá Dios?

¹⁴ Un di dos manera ku religion organisá ta desonrá Dios ta mediante e kondukta di su fielnan. Ta ser ferwagt di kristiannan ku nan ta sigui e siñansanan di Hesus. Hesus a siña su siguidónan pa entre otro kos, nan “stima otro” i pa nan ‘no ta parti di mundu.’ (Juan 15:12; 17:14-16) Kiko di e miembronan di klero di kristiandat? Nan realmente a sigui e siñansanan aki?

15. (a) Ki registro klero tin pa loke ta guera di e nashonnan? (b) Ki efekto e kondukta di klero tabatin riba miónes di hende?

¹⁵ Konsiderá klero su registro pa loke ta guera. Nan a apoyá, dispensá i asta hiba delantera den hopi guera di e nashonnan. Nan a bendishoná tropanan i a hustifiká e matansanan. Nos no por keda sin puntra nos mes: ‘Nunka no a dal den mente di e kleronan ei ku otro klero di nan religion ku ta di e kontrapartida ta hasiendo e mesun kos?’ (Wak e kuadro “Na Ken Su Banda Dios Ta?”) Miembronan di klero no ta glorifiká Dios ora nan ta pretendé ku Dios ta apoyá nan den gueranan sangriento; ni nan no ta glorifik’é ora nan ta deklará ku normanan di Beibel ta antikuá, i nan ta sera wowo pa kualke tipo di inmoralidat seksual. Nan ta laga nos kòrda riba e lidernan religioso ku Hesus a yama “guiadó siegu” i hende ku a “hasi inikidat” òf maldat! (Mateo 7:15-23; 15:14) E kondukta di klero a pone miónes di hende su amor pa Dios fria.—Mateo 24:12.

Ken Ta Esnan Ku Sí Ta Duna Gloria na Dios?

16. Dikon nos tin ku bai den Beibel pa kontestá e pregunta ta ken sí ta duna gloria na Dios?

¹⁶ Ya ku personanan prominente i di hopi influensia den mundu por lo general no a duna gloria na Dios, ta ken ta hasiendo esei anto? Pa kontestá e pregunta ei, nos tin ku bai den Beibel. Ta lógiko ku Dios tin derecho di bisa kon e ke ser glorifiká, i el a fiha e normanan den su Palabra, Beibel. (Isaias 42:8) Laga nos konsiderá tres manera pa glorifiká Dios, i den kada kaso nos ta  trata tambe e pregunta ta ken awe realmente ta hasiendo esei.

17. Kon Yehova mes a indiká ku glorifikashon di su nòmber ta un aspekto importante di su boluntat, i ta ken awe ta alabando Dios su nòmber rònt mundu?

¹⁷ Na promé lugá, nos por glorifiká Dios dor di alabá su nòmber. Un kos ku ta indiká bon kla ku esei ta un aspekto importante di e boluntat di Dios ta loke Yehova a bisa Hesus. Un par di dia promé ku Hesus a muri, el a pidi den orashon: “Tata, glorifiká bo nòmber.” E ora ei un bos a kontestá: “Mi a glorifik’é, i lo mi bolbe glorifik’é.” (Juan 12:28) No tin duda, ta Yehova mes a papia. For di su kontesta ta bisto ku glorifikashon di su nòmber ta importante p’e. Pues, ken awe ta glorifiká Yehova dor di hasi su nòmber konosí i dor di alab’é rònt mundu? Ta e Testigunan di Yehova, i nan ta hasiendo esei den 235 pais!—Salmo 86:11, 12.

18. Kon nos por identifiká esnan ku ta adorá Dios ku “bèrdat,” i kua ta e grupo ku tin mas ku un siglo ta siña hende bèrdatnan bíbliko?

¹⁸ Na di dos lugá, nos por glorifiká Dios dor di siña hende e bèrdat tokante Dios. Hesus a bisa ku adoradónan berdadero lo a ‘adorá Dios den bèrdat.’ (Juan 4:24) Kon nos por identifiká esnan ku ta adorá Dios ku “bèrdat”? Wèl, nan mester rechasá doktrinanan ku no ta basá riba Beibel i ku ta duna informashon robes tokante Dios i su boluntat. Anto mas bien, nan mester siña hende e bèrdatnan puru di e Palabra di Dios, entre otro: Yehova ta e Dios Haltísimo, i ta e so ta meresé e gloria di ta e Haltísimo (Salmo 83:18); Hesus ta e Yu di Dios i e Gobernante nombrá di Dios su Reino Mesiániko (1 Korintionan 15:27, 28); e Reino di Dios lo santifiká Yehova su nòmber i kumpli ku su propósito pa ku e tera aki i pa ku e hendenan riba dje (Mateo 6:9, 10); e bon notisia tokante e Reino aki tin ku ser prediká den henter mundu. (Mateo 24:14) Pa mas ku un siglo kaba tin un solo grupo ku fielmente ta siña hende e bèrdatnan presioso ei: Testigunan di Yehova!

19, 20. (a) Dikon un kristian su bon kondukta por duna gloria na Dios? (b) Ki preguntanan por yuda nos determiná ken awe ta glorifiká Dios dor di mantené bon kondukta?

¹⁹ Na di tres lugá, nos por glorifiká Dios dor di biba na armonia ku su normanan. Apòstel Pedro a skirbi: “Laga boso kondukta ta ekselente meimei di e paganonan, asina ku ora nan kalumniá boso komo malechor, nan por, pa medio di boso bon obranan ku nan ta opservá, glorifiká Dios den e dia di bishitashon.” (1 Pedro 2:12) E kondukta di un kristian ta onra òf desonrá su religion. Ora opservadónan hasi e konekshon ei—esta, ora nan mira ku un kristian su bon kondukta ta un resultado direkto di su religion—esei ta duna gloria na Dios.

²⁰ Ken awe ta glorifiká Dios dor di mantené bon kondukta? Wèl, ta kua grupo religioso a haña elogio serka hopi gobièrnu pasobra nan ta siudadanonan pasífiko ku ta kumpli ku lei i paga nan belasting? (Romanonan 13:1, 3, 6, 7) Ta kua pueblo ta konosí rònt mundu pa nan union ku nan rumannan den fe—un union ku ta surpasá diferensianan rasial, nashonal i étniko? (Salmo 133:1; Echonan 10:34, 35) Ta kua grupo ta ser rekonosé mundialmente pa nan trabou di duna edukashon bíbliko, un trabou ku ta stimulá rèspèt pa lei, pa norma i balor den famia i pa moralidat bíbliko? Tin un solo grupo kende su bon kondukta den e asuntunan aki i riba otro tereno ta papia pa su mes: Testigunan di Yehova!

 Abo Ta Dunando Gloria na Dios?

21. Dikon nos mester analisá si nos personalmente ta dunando gloria na Yehova?

²¹ Nos kada un ta hasi bon di puntra nos mes: ‘Ami personalmente ta dunando gloria na Yehova?’ Segun Salmo 148, gran parti di kreashon ta duna gloria na Dios. E angelnan, e shelu literal, tera i mundu di animal—tur ta alabá Yehova. (Versíkulo 1-10) Ta masha tristu ku mayoria hende awe sí no ta hasié! Dor di hiba bo bida na un manera ku ta duna Dios gloria, bo ta pone bo mes na armonia ku e restu di kreashon ku ta alabá Yehova. (Versíkulo 11-13) No tin un mihó manera pa usa bo bida.

22. Den ki maneranan bo ta ser bendishoná dor di duna gloria na Yehova, i kiko bo mester ta desididu pa hasi?

²² Dor di duna gloria na Yehova, bo ta ser bendishoná den hopi manera. Segun ku bo ta ehersé fe den Kristu su sakrifisio di reskate, bo ta ser rekonsiliá ku Dios i dor di esei bo ta gosa di un amistat pasífiko i produktivo ku bo Tata selestial. (Romanonan 5:10) Segun ku bo ta buska motibunan pa duna gloria na Dios, bo ta bira mas positivo i gradisidu. (Jeremias 31:12) E ora ei lo bo ta den posishon pa yuda otro hende hiba un bida felis i di satisfakshon, i konsekuentemente abo mes lo haña mayor felisidat. (Echonan 20:35) Nos ta spera ku bo ta entre esnan ku ta desididu pa duna gloria na Dios, awor i pa semper!

[Nota]

Bo Ta Kòrda?

• Dikon nos por bisa ku sientífikonan en general no a yuda hende glorifiká Dios?

• Menshoná dos manera ku religion organisá a stroba hende di duna gloria na Dios.

• Den ki maneranan nos por glorifiká Dios?

• Dikon bo mester analisá si abo personalmente ta dunando gloria na Yehova?

[Preguntanan di Estudio]

[Kuadro na página 12]

“Na Ken Su Banda Dios Ta?”

Segun un hòmber ku a sirbi den Forsa Aéreo di Alemania durante Segundo Guera Mundial, pero ku despues a bira un Testigu di Yehova:

“Loke mas a molestiá mi durante e añanan ei di guera tabata di mira miembronan di klero di kasi tur denominashon—katóliko, luterano, anglikano, etcetera—bendishoná e avionnan i nan tripulashon promé ku nan sali riba nan mishon pa benta nan karga mortal. Hopi bes mi tabata pensa: ‘Na ken su banda Dios ta?’

Sòldánan aleman tabata bisti un faha ku un hèspu riba kua tabatin skirbí e palabranan Gott mit uns (Dios ta ku nos). Pero mi tabata puntra mi mes: ‘Dikon Dios lo no ta ku e sòldánan di e otro banda ku tabata di e mesun religion i ku tabata resa na e mesun Dios?’”

[Plachi na página 10]

Rònt mundu, Testigunan di Yehova realmente ta duna gloria na Dios