Mas ku Wega

MUCHA gusta hunga. Pero e buki The Developing Child (Desaroyo di Mucha) ta splika ku “esaki no ta un aktividat insignifikante òf sin sentido. Aparentemente esei ta e kos ku mas ta permití e mucha siña for di loke e ta opservá rònt di dje.” Dor di hunga, mucha ta siña usa su sentidonan, komprondé su ambiente i anda ku otro hende.

For di kuater òf sinku aña, mucha ta kuminsá imitá hende grandi den nan weganan. Hesus a papia un biaha tokante mucha ku tabata hunga. Algun kier a hunga “kasamentu,” otronan kier a hasi komo si fuera nan ta dirigí un “entiero” i, manera muchanan sa hasi hopi, nan ku nan tabata pleita pasobra algun no kier a partisipá. (Mateo 11:16, 17) E sorto di weganan aki por yuda graba ròlnan signifikativo den mente di e mucha ku ta desaroyando.

E muchanan ku ta riba e potrètnan aki ta hunga maestro i studiante di Beibel. Nan no ta ègt den un studio di Beibel, pero e idea di siña otro hende e mensahe di Beibel ta bon kla den nan mente. I e lès aki ta masha importante pasobra Hesus a manda tur su siguidónan hasi disipel i siña hende warda tur e kosnan ku el a siña nan.—Mateo 28:19, 20.

Mayornan kende nan yunan gusta hunga komo si fuera nan ta dirigí studio di Beibel, duna diskurso òf prediká di kas pa kas tin motibu pa sinti nan orguyoso, pasobra di naturalesa yunan ta imitá loke nan ta mira hende grandi rònt di nan hasi. E weganan basá riba Beibel ku nan ta hunga ta indiká ku nan ta hañando “e klase di edukashon i konseho ku Señor ta aprobá.”—Efesionan 6:4, Charles B. Williams.

Yehova ke pa mucha tambe partisipá den adorashon berdadero. El a bisa Moisés ku “mucha” tambe mester a tende ora e Lei a wòrdu lesá. (Deuteronomio 31:12) Si mucha yòn sinti ku nan tambe ta toka parti den un sierto aktividat, probablemente nan weganan lo reflehá esei. I e mucha ku ta hunga sirbidó di Dios ta bezig ta dal e promé paso pa bira unu di bèrdè.