Pregunta di Lektor

Ora ku apòstel Juan a skirbi ku “amor perfekto ta kore ku miedu,” kiko e tabata ke men ku “amor perfekto,” i kua ta e “miedu” ku e ta kore kuné?

Apòstel Juan a skirbi: “Amor no konosé miedu; ma amor perfekto ta kore ku miedu, pasobra miedu tin di hasi ku kastigu, i esun ku tin miedu no a wòrdu hasí perfekto den amor.”—1 Juan 4:18.

E konteksto ta mustra ku Juan tabata papia di tin konfiansa òf frankesa di ekspreshon, spesífikamente di e relashon ku tin entre amor pa Dios i frankesa di ekspreshon pa ku Dios. Nos por mira esaki for di loke nos ta lesa na versíkulo 17: “Pa medio di esaki amor a wòrdu perfekshoná den nos, pa nos por tin konfiansa [“frankesa di ekspreshon,” NW] den e dia di huisio.” E grado ku un kristian ta stima Dios i ta sinti ku Dios ta stim’é tin un efekto direkto riba su frankesa di ekspreshon—òf falta di esei—ora e ta aserká Dios den orashon.

E ekspreshon “amor perfekto” ta importante. E palabra “perfekto” manera e ta ser usá den Beibel, no ta nifiká tur biaha perfekshon den e sentido apsoluto, es desir, na e grado total, mas bien e ta ser usá hopi bes den e sentido relativo. Por ehèmpel, den Hesus su Sermon Riba Seru, el a bisa: “Boso mester ta perfekto, meskos ku boso Tata selestial ta perfekto.” Einan Hesus tabata bisa su siguidónan ku si nan ta stima solamente hende ku stima nan, nan amor lo ta inkompletu, defisiente, ku defekto. Nan mester a perfekshoná nan amor, òf hib’é na e grado kompletu, dor di stima asta nan enemigunan. Di igual manera anto, ora Juan a skirbi tokante “amor perfekto,” el a referí na un amor pa Dios ku ta di henter alma, plenamente desaroyá i ku ta enserá tur aspekto di un hende su bida.—Mateo 5:46-48; 19:20, 21.

Ora un kristian ta papia ku Dios den orashon, e kristian ta bon konsiente ku e ta pekaminoso i imperfekto. Sin embargo, si su amor pa Dios i su sintimentu di ku Dios ta stim’é ta plenamente desaroyá, miedu di ser kondená òf rechasá lo no strob’é. Al kontrario, e tin frankesa di ekspreshon pa bisa loke tin den su kurason i pa pidi pordon a base di e sakrifisio di reskate ku Dios amorosamente a perkurá mediante Hesukristu. E kristian tin konfiansa ku Dios ta skucha su petishonnan faborablemente.

Kon un persona por “wòrdu hasí perfekto den amor” i asina ‘kore ku e miedu’ di ser kondená òf rechasá? Apòstel Juan a bisa: “Esun ku warda [Dios] su palabra, den dje e amor di Dios a wòrdu perfekshoná berdaderamente.” (1 Juan 2:5) Pensa riba esaki: Si Dios a stima nos tempu ku nos tabata pekadó ainda, lo e no stima nos mas tantu ainda si realmente nos a repentí i diligentemente ta “warda su palabra”? (Romanonan 5:8; 1 Juan 4:10) Sí, tanten ku nos keda fiel, nos por tin e mesun konfiansa ku apòstel Pablo tabatin ora el a bisa tokante Dios: “Esun ku no a spar ni su mes Yu, ma a entreg’é pa nos tur, lo e no duna nos tur-tur kos tambe huntu kuné?”—Romanonan 8:32.