“Tene Tierno Kariño pa Otro”

“Den amor fraternal tene tierno kariño pa otro.”—ROMANONAN 12:10, NW.

1, 2. Ki relashon un misionero di nos tempu i apòstel Pablo tabatin ku nan rumannan?

DURANTE e 43 añanan ku Don a sirbi komo misionero den Lehano Oriente, e tabata konosí pa e kariño ku el a demostrá pa esnan ku el a sirbi. Awor ku e tabata hiba su último bataya ku malesa, algun di e personanan ku el a studia Beibel kuné a biaha míles di kilometer pa bin bishit’é na kama i pa bis’é: “Kamsahamnida, kamsahamnida!” (“Danki, danki!” na koreano). Ta Don su tierno kariño a konmové nan kurason.

² E ehèmpel aki di Don no ta úniko. Den promé siglo, apòstel Pablo a ekspresá kariño profundo pa esnan ku el a sirbi. Pablo a sakrifiká su mes pa nan. Ounke Pablo tabata un hòmber di konvikshon firme, e tabata tambe suave i kariñoso, “manera [ora] un mènchi ta kuida su mes yunan ku ternura.” El a skirbi e kongregashon na Tesalónika: “Teniendo pues un amor grandi [“tierno kariño,” NW] pa boso, a agradá nos pa no solamente kompartí e evangelio di Dios ku boso, ma tambe nos mes bida, pasobra boso a bira masha stimá pa nos.” (1 Tesalonisensenan 2:7, 8) Despues, ora Pablo a bisa e rumannan di Efeso ku nan lo no mir’é mas, “nan a kuminsá yora duru i a brasa Pablo i a sunch’é bes tras bes.” (Echonan 20:25, 37) Ta bisto anto ku e relashon ku tabatin entre Pablo i su rumannan tabata mas profundo ku djis un amistat pasobra nan tabatin mesun kreensia. Nan tabatin tierno kariño pa otro.

Tierno Kariño i Amor

3. Kon e palabranan bíbliko pa kariño i amor ta ligá ku otro?

³ Den e Skritura, tierno kariño, kariño fraternal i kompashon ta estrechamente ligá ku e  kualidat kristian di mas noble: amor. (1 Tesalonisensenan 2:8, NW; 2 Pedro 1:7) Meskos ku e fasetanan di un bunita djamanta, tur e kualidatnan aki ku ta agradá Dios ta traha huntu pa produsí un bunita resultado. Nan no solamente ta hala kristiannan mas serka di otro, sino tambe mas serka di nan Tata selestial. P’esei apòstel Pablo a urgi su rumannan den fe: “Laga boso amor ser sin hipokresia. . . . Den amor fraternal tene tierno kariño pa otro.”—Romanonan 12:9, 10, NW.

4. Kiko e ekspreshon “tierno kariño” ta nifiká?

⁴ E palabra griego ku Pablo a usa pa “tierno kariño” ta konsistí di dos parti, un parti ku ta nifiká amistat i e otro parti ku ta referí na kariño natural. Manera un eksperto bíbliko a splika, esaki ta nifiká ku kristiannan “mester por ser identifiká na un deboshon ku ta karakterisá un famia amoroso, hopi uní i ku ta apoyá otro.” Ta asina abo ta sinti pa ku bo rumannan kristian? Den e kongregashon kristian mester reina un ambiente kaluroso, un sintimentu di ta famia di otro. (Galationan 6:10) P’esei Beibel na papiamentu koriente ta tradusí Romanonan 12:10: “Stima otro di kurason, ku amor di ruman.” Sí, kristiannan no ta stima otro djis pasobra esei ta nan deber òf pasobra esei ta lógiko. Ku “un amor sinsero,” nos mester “stima otro fervientemente di kurason.”—1 Pedro 1:22.

“Dios Ta Siña Boso Stima Otro”

5, 6. (a) Kon Yehova a usa kongresonan internashonal pa siña su pueblo tokante kariño kristian? (b) Kon e banchi entre rumannan ta bira mas fuerte atraves di tempu?

⁵ Ounke den e mundu aki “amor di hopi hende” ta friando, Yehova ta siña su pueblo di tempu aktual pa nan “stima otro.” (Mateo 24:12; 1 Tesalonisensenan 4:9) Kongresonan internashonal di Testigunan di Yehova ta okashonnan sobresaliente pa haña e entrenamentu aki. Na e kongresonan aki, Testigunan lokal ta topa rumannan di paisnan leu, i hopi a yega di habri nan kas pa delegadonan for di eksterior. Na un kongreso resien, algun ruman a bin di paisnan kaminda hende no ta ekspresá nan emoshon abiertamente. Un ruman ku a yuda ku akomodashon a konta: “Na promé instante ora e delegadonan aki a yega, nan tabata nervioso i tímido. Pero solamente seis dia despues ora nan a yama ayó, nan i nan anfitrionnan tabata brasa otro i yora. Nan a disfrutá di un tipo di amor kristian ku nunka mas nan lo lubidá.” Pues anto, mustra hospitalidat na nos rumannan, sin importá nan antesedente, por saka na kla lo mihó di tantu e huéspet komo di e anfitrion.—Romanonan 12:13.

⁶ Pa emoshonante ku tal eksperensianan di kongreso ta, kristiannan ta desaroyá un amistat asta mas íntimo ora nan ta sirbi Yehova huntu atraves di un periodo di tempu. Ta ora nos siña konosé nos rumannan bon, nos por apresiá nan kualidatnan atraktivo mas plenamente, por ehèmpel, ku semper nan ta papia  bèrdat, ta digno di konfiansa, leal, bondadoso, generoso, komprensivo, kompasivo i inegoista. (Salmo 15:3-5; Proverbionan 19:22) Mark, kende a sirbi komo misionero na Ost Afrika, a bisa: “Trahando skouder ku skouder ku nos rumannan ta forma un banchi indestruktibel.”

7. Kiko ta nesesario pa nos por disfrutá di kariño kristian den kongregashon?

⁷ Pa logra un banchi asina den kongregashon i manten’é, e rumannan mester hala serka di otro. Nos ta fortalesé e kariño ei ku nos tin pa nos rumannan dor di asistí ku regularidat na nos reunionnan kristian. Tambe dor di ta presente i asosiá promé i despues di reunion i partisipá durante reunion, nos ta animá i stimulá otro “pa stima i hasi bon obra.” (Hebreonan 10:24, 25) Un ansiano na Merka a konta: “Ku plaser mi ta kòrda kon tempu ku mi tabata mucha, mi famia semper tabata entre e últimonan pa bai for di Salòn di Reino, disfrutando mas largu posibel di e kòmbersashon amistoso i signifikativo.”

Abo Lo Tin Ku ‘Hancha Bo Kurason’?

8. (a) Kiko Pablo tabata ke men ora el a urgi e korintionan pa ‘habri nan kurason hanchu’? (b) Kiko nos por hasi pa stimulá kariño den kongregashon?

⁸ Pa nos por demostrá tal kariño plenamente, kisas nos tin ku ‘hancha’ nos kurason. Apòstel Pablo a skirbi e kongregashon na Korinto: “Nos kurason ta hanchu habrí. Boso no ta wòrdu limitá dor di nos.” Pablo a urgi nan pa nan na nan turno hancha òf ‘habri nan kurason hanchu.’ (2 Korintionan 6:11-13) Abo tambe por ‘hancha’ den mustramentu di kariño? Bo no tin nodi warda pa otro hende tuma e inisiativa. Den su karta na e romanonan, Pablo a konektá e nesesidat di tin tierno kariño ku e konseho aki: “Den mustra onor na otro hiba delantera.” (Romanonan 12:10, NW) Pa mustra onor na otro hende, bo por tuma e inisiativa pa kumindá nan na reunion. Kisas tambe bo por invitá nan pa kompañá bo den sirbishi di vèlt òf pa prepará pa un reunion. Hasiendo e kosnan ei ta habri kaminda pa tierno kariño krese.

9. Kiko algun ruman a hasi pa bira amigu mas íntimo ku nan kompañeronan kristian? (Inkluí ehèmpelnan lokal.)

⁹ Famianan i personanan individual den kongregashon por ‘hancha nan kurason’ dor di bishitá otro, kisas komiendo un kuminda simpel huntu i dor di partisipá huntu den aktividatnan sano. (Lukas 10:42; 14:12-14) Hakop sa organisá de bes en kuando piknik pa gruponan chikí. El a konta: “Rumannan di tur edat sa ta presente, i tambe mayornan soltero. Tur hende ta bai kas ku dushi rekuerdo, i nan ta sinti nan mas uní ku otro.” Komo kristian, nos mester hasi esfuerso pa nos no ta solamente kompañeronan den fe sino tambe berdadero amigu di otro.—3 Juan 14.

10. Kiko nos por hasi ora nos tin problema ku nos rumannan?

¹⁰ Sin embargo, tin biaha imperfekshon por forma un opstákulo pa kultivá amistat i kariño. Kiko nos por hasi? Na promé lugá, nos por pidi den orashon pa nos tin bon relashon ku nos rumannan. Ta Dios su boluntat pa su sirbidónan sali bon ku otro, i lo e kontestá tal orashon sinsero. (1 Juan 4:20, 21; 5:14, 15) Pero tambe nos tin ku aktua di akuerdo ku nos orashon. Ric, un superintendente biahero na Ost Afrika, ta kòrda un ruman hòmber ku tabatin un lenga skèrpi i sin konsiderashon i p’esei tabata difísil pa sali bon kuné. Ric a splika: “En bes di evitá e ruman, mi a disidí di siña  konos’é mihó. A resultá ku e ruman su tata tabata un hòmber ku tabata duna disiplina severo. Unabes mi a komprondé kon duru e ruman a lucha pa superá su antesedente i kuantu progreso el a hasi, mi a bin atmir’é. Nos a bira bon amigu.”—1 Pedro 4:8.

Habri Bo Kurason!

11. (a) Kiko ta nesesario pa kariño krese den kongregashon? (b) Dikon nos por ser perhudiká spiritualmente si nos no ta ekspresá nos emoshon na otro hende?

¹¹ Awendia tin hopi hende ku ta hiba nan bida sin ku nunka nan tin un amistat será. Esta tristu no! Esaki no tin nodi ni no mester ta e kaso den e kongregashon kristian. Berdadero amor fraternal no ta simplemente kòmbersashon kortes i bon manera; tampoko e no ta nifiká ser demasiado demostrativo den desplegá emoshon na otro hende. Mas bien, nos mester ta dispuesto pa habri nos kurason, manera Pablo a hasi pa ku e korintionan, i demostrá nos rumannan den fe ku nos ta berdaderamente interesá den nan bienestar. Ounke no ta tur hende di naturalesa ta sosial i ekspresivo, nos por ser perhudiká si nos ta demasiado reservá. Beibel ta spièrta: “Esun ku isolá su mes ta buska su mes deseo; su furia ta lanta kontra tur sabiduria sano.”—Proverbionan 18:1.

12. Dikon bon komunikashon ta masha importante pa por tin amistatnan íntimo den kongregashon?

¹² Komunikashon onesto ta fundamental pa berdadero amistat. (Juan 15:15) Nos tur tin mester di bon amigunan ku nos por konfia nos sintimentunan i pensamentunan di mas profundo. Ademas, mas mihó nos konosé otro, mas fásil ta pa nos satisfasé e nesesidatnan di otro. Ora ku nos ta demostrá interes den bienestar di otro di e manera aki, nos ta stimulá mas tierno kariño den kongregashon, i nos lo eksperensiá ku Hesus tabatin rason ora el a bisa: “Ta mas bendishoná pa duna ku pa risibí.”—Echonan 20:35; Filipensenan 2:1-4.

13. Kiko nos por hasi pa demostrá ku nos tin berdadero kariño pa nos rumannan?

¹³ Pa nos kariño por logra hasi mas tantu bon, nos tin ku ekspres’é. (Proverbionan 27:5) Ora nos kariño ta sinsero, nos kara probablemente ta reflehá esaki, i esei lo por motivá e kurason di otro hende pa reakshoná. Un proverbio bíbliko ta bisa: “Wowo ku ta bria ta alegrá kurason.” (Proverbionan 15:30) Aktonan atento tambe ta promové tierno kariño.  Ounke ningun hende no por kumpra berdadero kariño, un regalo duná di kurason por ta masha signifikativo. Un karchi, un karta i “un palabra papiá na ora apropiá,” tur e kosnan aki por ekspresá profundo kariño. (Proverbionan 25:11; 27:9) Unabes nos a logra haña e amistat di otro hende, nos tin ku manten’é dor di sigui demostrá kariño inegoista. Foral den tempu di nesesidat, nos lo ke apoyá nos amigunan. Beibel ta bisa: “Un amigu ta stima tur ora bai, i un ruman ta nasí pa tempu di atversidat.”—Proverbionan 17:17.

14. Kiko nos por hasi si un persona aparentemente no ta reakshoná riba nos kariño?

¹⁴ Pero pa nos ta realista, nos no por ferwagt ku nos lo tin amistat será ku tur hende den kongregashon. Di mes lo tin algun ruman ku nos ta sinti nos mes mas yegá na nan ku otronan. P’esei, si un persona aparentemente no ta será ku bo manera lo bo tin gana, no sea lihé pa konkluí ku mester tin algu robes ku bo òf ku e persona. I no purba fòrs’é pa sera un amistat íntimo ku bo. Si simplemente bo ta amigabel ku e persona te asina leu ku e ta permití, esei lo yuda bo tene e porta habrí pa un amistat mas será den futuro.

“Den Bo Mi Tin Goso”

15. Ki efekto elogio—òf falta di elogio—tin riba otro hende?

¹⁵ Hesus lo mester a keda hopi kontentu ora ku na su boutismo, el a tende for di shelu e palabranan: “Den bo mi tin goso”! (Marko 1:11) E ekspreshon aki di aprobashon lo mester a konvensé Hesus mas ainda ku su Tata stim’é. (Juan 5:20) Lamentablemente, tin hende ku nunka ta tende tal elogio for di personanan ku nan ta respetá i stima. Un mucha muhé ku yama Ann a bisa: “Hopi hóben manera mi no tin miembronan di famia ku ta kompartí nan kreensia kristian. Na kas ta krítika so nos ta tende. Esei ta hasi nos hopi tristu.” Sin embargo, ora nan bira parti di e kongregashon, nan ta sinti e kalor di un famia spiritual amoroso ku ta apoyá nan; nan ta haña tata, mama, ruman hòmber i ruman muhé den fe.—Marko 10:29, 30; Galationan 6:10.

16. Dikon un aktitut krítiko pa ku otro hende no ta bon?

¹⁶ Den algun kultura, mayornan, hende grandi i maestronan masha poko biaha ta ekspresá aprobashon sinsero na hóbennan, pensando ku tal elogio lo por hasi nan floho òf susha nan kabes. Tal pensamentu por afektá asta famianan kristian i e kongregashon. Komentando riba un parti òf kualke esfuerso ku un hóben a hasi, hende grandi kisas ta bisa: “E no tabata malu, pero bo por mihó!” Òf den un manera òf otro nan por asta indiká di ta malkontentu ku un hóben. Hopi hende ta kere ku asina nan ta motivá e hóbennan pa alkansá nan pleno potensial. Pero e método aki hopi bes ta logra nèt lo kontrario, ya ku e hóbennan lo por hala atras òf sinti ku nan no por kumpli ku loke ta ferwagt di nan.

17. Dikon nos mester buska oportunidat pa elogiá otro hende?

 ¹⁷ Sin embargo, nos no mester usa elogio solamente komo un introdukshon pa duna konseho. Elogio sinsero ta promové tierno kariño den famia i den kongregashon, i asina e ta stimulá hóbennan pa buska konseho serka rumannan ku eksperensia. Pues, en bes di laga kultura dikta kon nos ta trata otro hende, laga nos “bisti e hende [òf, personalidat] nobo, ku a wòrdu kreá segun Dios den hustisia i santidat berdadero.” Elogiá otro hende meskos ku Yehova ta hasi.—Efesionan 4:24.

18. (a) Hóbennan, kon boso mester mira konseho for di hende grandi? (b) Dikon hende grandi ta tene kuidou kon nan ta duna konseho?

¹⁸ Di otro banda, boso ku ta hóben, ora rumannan grandi duna boso korekshon òf konseho, no pensa ku esei ke men ku nan no gusta boso. (Eklesiastés 7:9) Al kontrario! Probablemente ta nan interes i kariño profundo pa boso ta loke a motivá nan. Si no ta asina, pakiko nan ta molestiá nan mes pa papia ku boso tokante e asuntu? Hende grandi—foral ansianonan di kongregashon—sa ki impakto palabra por tin, ta p’esei hopi bes nan ta dediká basta tempu na pensa i hasi orashon tokante e konseho ku nan lo bai duna, ya ku ta bon so nan ke hasi.—1 Pedro 5:5.

“Yehova Ta Masha Tierno di Kariño”

19. Dikon kristiannan ku a sufri desepshon por akudí na Yehova pa haña sosten?

¹⁹ Mal eksperensia kisas a duna algun kristian e sintimentu ku mustramentu di tierno kariño ta hiba solamente na mas desepshon. Nan tin mester di kurashi i fe firme pa bolbe habri nan kurason pa otro hende. Pero nan no mester lubidá nunka ku Yehova “no ta leu di kada un di nos.” E ta invitá nos pa hala serka dje. (Echonan 17:27; Santiago 4:8) Tambe Yehova ta komprondé nos miedu di wòrdu di hùrt, i e ta primintí ku lo e sostené nos i yuda nos. Salmista David ta sigurá nos: “SEÑOR ta serka di e hende di kurason kibrá, i ta salba esnan di spiritu abatí.”—Salmo 34:18.

20, 21. (a) Kon bin nos sa ku nos por tin un relashon será ku Yehova? (b) Kiko ta ser rekerí pa nos por tin un amistat íntimo ku Yehova?

²⁰ Un amistat íntimo ku Yehova ta e relashon mas importante ku nos por kultivá. Pero ta realmente posibel pa tin un banchi asina ku Dios? Sí. Beibel ta konta di hòmber- i muhénan hustu ku a sinti nan hopi serka di nos Tata selestial. Nan ekspreshonnan kaluroso a keda konserbá pa duna nos e konfiansa ku nos tambe por hala serka Yehova.—Salmo 23, 34, 139; Juan 16:27; Romanonan 15:4.

²¹ Yehova su rekisitonan pa nos por tin un amistat íntimo kuné ta na tur hende su alkanse. David a puntra: “O SEÑOR, ken por biba den bo tabernakel?” E mes a kontestá: “Esun ku ta kana den rektitut i ta hasi hustisia, i ta papia bèrdat den su kurason.” (Salmo 15:1, 2; 25:14) Segun ku nos ta mira ku sirbishi na Dios ta produsí bon fruta i ta duna nos Yehova su guia i protekshon, nos lo bin sa ku “Yehova ta masha tierno di kariño.”—Santiago 5:11, NW.

22. Ki klase di relashon Yehova ke pa su pueblo tin?

²² Nos ta realmente bendishoná ku Yehova ta deseá di tin un relashon personal asina ku hende imperfekto! Nos awor, no mester desplegá tierno kariño na otro? Ku Yehova su yudansa, nos kada un por kontribuí na e tierno kariño ku ta un karakterístika di nos hermandat kristian i disfrutá di dje. Bou di e Reino di Dios, tur hende riba tera lo risibí i mustra e kariño aki pa semper.

Bo Por Splika?

• Ki klase di ambiente mester reina den e kongregashon kristian?

• Kon nos kada un por kontribuí na tierno kariño den kongregashon?

• Kon elogio sinsero ta stimulá kariño kristian?

• Kon Yehova su tierno kariño ta apoyá nos i sostené nos?

[Preguntanan di Estudio]

[Plachi na página 15]

Amor entre kristiannan ta reflehá mas ku simplemente deber

[Plachi na página 16, 17]

Abo por ‘hancha’ den mustramentu di kariño?

[Plachi na página 18]

Bo ta un persona krítiko òf animante?