Historia di Bida

Un Edukashon Ku A Sigui Henter Mi Bida

SEGUN E RELATO DI HAROLD GLUYAS

Pa mas ku 70 aña mi ta kòrda un esena di mi infansia. Mi ta kòrda kon mi tabata sintá den kushina di Mama, mirando un etikèt ku tabata bisa “Ceylon Tea” (Te di Ceylon). E etikèt tabatin tambe un plachi di algun muhé pikiendo blachi di te den e kunukunan bèrdè i bunita di Ceylon (awor Sri Lanka). E esena aki ku tabata masha leu mes for di nos área seku di Sur Oustralia, a stimulá mi imaginashon masha hopi. Ceylon lo mester ta un pais bunita i eksitante! E tempu ei mi no por a imaginá ku lo mi a pasa 45 aña di mi bida komo misionero riba e isla presioso ei.

NA APREL 1922, mi a nase den un mundu hopi distinto for di esun djawe. Mi famia tabatin un kunuku isolá di grano serka di e stat remoto Kimba, situá den e region sentral di e inmenso kontinente di Oustralia i na e rant sur di e gran desierto den interior. Bida tabata yen di peliger, i a enserá un bataya konstante ku sekura, plaganan di insekto i kalor sofokante. Mi mama a traha duru pa kuida Tata i nos seis yu den un kas den mondi ku eigenlijk tabata djis un kasita di zim.

Pero pa mi, e mondi tabata un lugá eksitante i di libertat. Mi ta kòrda kon impreshoná mi tabata komo mucha mirando timnan di toro rosa mondi òf skuchando tormentanan fuerte di santu poderá di e kunukunan. Pues, mi edukashon den bida realmente a kuminsá hopi promé ku mi a kuminsá bai skol; un skol chikí  di un solo maestro ku a keda sinku kilometer for di nos kas.

Mi mayornan tabata religioso, maske nunka nan no a bai misa, prinsipalmente debí na e distansia di nos kunuku pa stat. No opstante, na prinsipio di dékada di 1930, Mama a kuminsá skucha charlanan di Beibel duná dor di Hues Rutherford, ku nan tabata transmití tur siman na un emisora di radio di Adelaide. Ami a kere ku Hues Rutherford tabata un pastor na Adelaide, i mi no tabata masha interesá. Pero tur siman Mama tabata spera ansiosamente riba e transmishonnan di Rutherford i a skucha atentamente segun ku su stèm tabata sali ku interferensia for di nos radio antikuá di bateria.

Un atardi kayente, ku hopi stòf, un pikòp bieu a yega para dilanti di nos kas, i dos hòmber bon bistí a baha. Nan tabata Testigu di Yehova. Mama a skucha nan mensahe i a kontribuí pa vários buki, ku el a kuminsá lesa mesora. E bukinan aki a hasi un impreshon asina profundo riba dje ku poko despues el a pidi Tata hib’é serka nos bisiñanan pa asina e por a papia ku nan tokante loke el a siña.

E Benefisio di Bon Influensia

No muchu despues di esaki e bida pisá di mondi a obligá nos muda bai na e stat di Adelaide, 500 kilometer leu. Nos famia a kuminsá asosiá ku Kongregashon Adelaide di Testigunan di Yehova i a hasi progreso spiritual. Nos mudansa a pone un fin tambe na mi edukashon eskolar. Mi a kaba skol ku 13 aña so, i a yega te ku klas shete. Mi tabatin un karakter trankil, i esaki fásilmente lo por a desviá mi for di metanan spiritual si no tabata pa e yudansa di vários ruman hòmber ekselente—ku tabata pionero òf predikadó di tempu kompletu—ku a mustra un interes personal den mi.

Ku transkurso di tempu e influensia di e rumannan seloso aki a stimulá mi interes den kosnan spiritual ku tabata komo si fuera na soño. Mi a gusta nan kompania i tabata atmirá nan spiritu trahadó. P’esei ora ku na un kongreso na Adelaide na 1940 nan a hasi un anunsio pa stimulá sirbishi di tempu kompletu, mi a sorprendé mi mes dor di duna mi nòmber. Mi no tabata ni batisá e tempu ei i mi tabatin masha tiki eksperensia den e predikashon. No opstante, un par di dia despues, mi a haña e invitashon pa djòin un grupo chikí di pionero na Warrnambool, un pueblo ku a keda rònt di 500 kilometer for di Adelaide, den e estado bisiña Victoria.

Apesar di e komienso indesiso aki, no a tarda hopi ku mi a desaroyá un amor pa sirbishi di vèlt. I mi ta kontentu di por bisa ku e amor ei no a fria atraves di añanan. De echo, esei tabata un punto desisivo pa mi, i mi a kuminsá hasi berdadero progreso spiritual. Mi a siña e balor di hala serka di personanan ku tin un  amor pa kosnan spiritual. Mi a deskubrí kon nan bon influensia por saka lo mihó ku tin den nos sin importá nos edukashon, i tambe kon loke nos siña di e manera aki por benefisiá nos durante henter nos bida.

Fortalesé dor di Prueba

Mi tabatin un tempu kòrtiku den e sirbishi di pionero ora ku nan a prohibí e obra di Testigunan di Yehova na Oustralia. Komo ku mi no tabata sa sigur kiko mi tin ku hasi, mi a buska guia serka e rumannan, ku a mustra mi ku no tabata prohibí pa papia ku hende tokante Beibel. Pues huntu ku e otro pioneronan, mi a kuminsá bai di kas pa kas ku un mensahe simpel for di Beibel. Esaki a fortalesé mi pa pruebanan ku tabatin djis mi dilanti.

Kuater luna despues mi a hasi 18 aña i nan a manda yama mi pa drenta servisio militar. Esaki a duna mi oportunidat pa defendé mi fe dilanti di vários ofisial militar i un hues. E tempu ei tabatin mas o ménos 20 ruman hòmber den prizon di Adelaide debí na nan posishon neutral, i poko despues mi a djòin nan. Nos a ser asigná pa hasi trabou fòrsá, konstrukshon di karetera i kobamentu di piedra. Esaki a yuda mi desaroyá kualidatnan manera perseveransia i determinashon. Nos bon komportashon i posishon firme ku tempu a pone ku hopi di e wardadónan di prezu a kuminsá respetá nos.

Ora mi a sali liber vários luna despues, mi a disfrutá di un bon kuminda i a kuminsá traha pionero atrobe. Sin embargo, no tabatin hopi partner pa traha pionero kuné, p’esei e rumannan a pidi mi pa mi so bai traha den un área remoto di kunuku den Sur Oustralia. Mi a bai di akuerdo i a sali ku barku rumbo pa e Península Yorke, ekipá ku solamente mi kosnan di predikashon i un baiskel. Ora mi a yega, un famia interesá a dirigí mi na un penshon chikí kaminda un señora bondadoso a trata mi manera su yu. Den dia, mi tabata bai ku baiskel riba kamindanan di tera, predikando den e pueblitonan plamá tur rònt di e península. Pa por a prediká na lugánan leu, de bes en kuando mi tabata keda drumi den hotèlnan chikí òf penshon. Den e manera aki mi a kore sientos di kilometer i tabatin hopi eksperensia dushi. Nunka mi no a wòri muchu ku mi tabata mi so den sirbishi, i segun ku mi tabata eksperensiá kon Yehova a perkurá pa mi, mi a hala mas serka di dje.

Kon Mi A Trata ku Sintimentunan di Inkapasidat

Na 1946, mi a haña un karta di invitashon pa drenta den e trabou biahero komo un sirbidó di e rumannan (ku awor yama superintendente di sirkuito). Esaki a enserá ku mi mester a bishitá un kantidat di kongregashon den un sierto sirkuito. Mi tin ku atmití ku mi a haña e responsabilidatnan di e asignashon aki hopi difísil. Un dia mi a tende un ruman bisa un otro: “Harold no ta masha bon riba plataforma, pero den sirbishi e ta tremendo.” E komentario aki a animá mi masha hopi. Mi tabata bon konsiente ku mi kapasidatnan di duna diskurso i di organisá tabata limitá, pero pa mi, ta e trabou di prediká tabata e aktividat prinsipal pa kristiannan.

Na 1947, nos tabata masha emoshoná ku e bishita di Ruman Nathan Knorr i Milton Henschel for di e sede di Testigunan di Yehova na Brooklyn. Esaki tabata e promé bishita asina desde ku Ruman Rutherford a bini na 1938.  Nos a tene un kongreso grandi na Sydney pareu ku e bishita aki. Meskos ku hopi otro pionero hóben, mi tabata interesá den e entrenamentu pa misionero ku nan tabata duna na e Skol Bíbliko di Galaad di Watchtower ku a kuminsá resientemente na South Lansing, New York, Merka. Vários di nos presente tabata puntra nos mes si e skol tabata eksigí pa bo tin hopi edukashon pa bo por inskribí. Sin embargo, Ruman Knorr a splika ku si nos por a lesa un artíkulo den e revista Toren di Vigilansia i kòrda e puntonan klave, probablemente nos lo tin éksito na Galaad.

Ami a sinti ku mi edukashon limitá lo a deskualifiká mi. Pero pa mi sorpresa, vários luna despues mi a haña invitashon pa inskribí pa e entrenamentu di Galaad. Despues mi a ser aseptá komo studiante, i mi a asistí na e di 16 klas ku nan a tene na 1950. E skol aki a resultá di ta un eksperensia maravioso ku a duna mi masha hopi konfiansa. Esei a siña mi ku logro akadémiko no ta e faktor prinsipal pa éksito. E rekisitonan prinsipal ta mas bien diligensia i obedensia. Nos instruktornan a animá nos pa hasi nos bèst. Segun ku mi a hasi kaso di nan konseho, mi a progresá konstantemente i mi por a sigui e kurso hopi bon.

Di un Kontinente Seku pa un Isla Presioso

Despues di graduashon, ami ku dos otro ruman hòmber di Oustralia a keda asigná na Ceylon (awor Sri Lanka). Nos a yega na e siudat kapital, Colombo, na sèptèmber 1951. E lugá tabata kayente i sofokante, i nos sentidonan a haña un avalancha di bista, zonidu i aroma nobo. Ora nos a baha for di e barku, un di e misioneronan ku tabata sirbi kaba den e pais a yama mi bonbiní ku un pamfleta den su man ku a anunsiá un diskurso públiko pa e siguiente djadumingu riba e plenchi di stat. Pa mi sorpresa, mi nòmber tabata riba e pamfleta komo e oradó! Bo por imaginá kon nervioso mi tabata. Pero e añanan ku mi a traha pionero na Oustralia a siña mi pa aseptá tur asignashon ku mi haña. Pues ku Yehova su yudansa, mi a duna e diskurso públiko ku éksito. Huntu ku e kuater ruman hòmbernan soltero ku ya kaba tabata den e kas di misionero na Colombo, nos tres a kuminsá siña e idioma difísil singala i partisipá den sirbishi di vèlt. Mayoria biaha nos tabata traha nos so, i nos tabata kontentu ku e hendenan lokal tabata respetuoso i hospitalario. No a tarda muchu ku asistensia na reunion a kuminsá oumentá.

Segun ku tempu a pasa, mi a kuminsá pensa seriamente riba Sybil, un ruman muhé pionero masha atraktivo ku mi a topa ora mi tabata riba barku bayendo Skol di Galaad. E tabata rumbo pa e kongreso internashonal na New York. Despues, el a asistí na e di 21 klas i a ser asigná na Hong Kong na 1953. Mi a disidí di skirbié, i nos a sigui korespondé ku otro te ku 1955 ora ku Sybil a djòin mi na Ceylon, kaminda nos a kasa.

Nos promé asignashon huntu komo pareha misionero tabata Jaffna, un stat leu den nort di Sri Lanka. Meimei di dékada di 1950, diferensianan polítiko a kuminsá dividí e komunidatnan singales i tamil, lokual a forma e base pa konfliktonan armá den dékadanan despues. Tabata masha alentador pa mira Testigunan singales i tamil protehá otro pa lunanan largu durante e añanan difísil ei! E pruebanan aki a refiná i fortalesé e fe di e rumannan.

 E Trabou di Prediká i Siña Hende na Sri Lanka

Nos tabatin mester di pasenshi i perseveransia pa ahustá na e komunidatnan hindú i mòslem. Asina mes, nos a bin komprondé ámbos kultura i nan kualidatnan atraktivo. Komo ku normalmente stranheronan no tabata usa bùsnan lokal, hopi bes hende tabata keda wak nos ku kuriosidat ora nos ta den bùs. Sybil a disidí ku ora nan keda wak, e ta smail ku nan. Nos tabata keda hopi kontentu ora ku e karanan yen di kuriosidat kontestá nos ku un bunita smail!

Na un okashon, nan a para nos na un kontròl riba kaminda. Despues ku e bewaker na warda a puntra nos di unda nos ta i na unda nos ta bai, su preguntanan a bira mas personal.

“Ken e muhé aki ta?”

“Mi kasá,” mi a kontestá.

“Kuantu tempu bo tin kasá?”

“Ocho aña.”

“Boso tin yu?”

“Nò.”

“Lag’i nèk! Anto boso a bai dòkter?”

Na prinsipio e kuriosidat natural aki a sorprendé nos, pero ku tempu nos a mir’é komo un ekspreshon di berdadero interes personal ku e pueblo lokal tabatin den otro hende. De echo, esei tabata un di nan kualidatnan mas atraktivo. Si un persona djis para un ratu den un lugá públiko, un hende ta aserk’é i puntr’é bondadosamente si e por a yud’é ku algu.

Kambionan i Reflekshon

Atraves di añanan, nos a disfrutá di vários asignashon fuera di nos trabou di misionero na Sri Lanka. Mi a ser asigná pa sirbi den e trabou di sirkuito i di distrito i komo miembro di e Komité di Sukursal. Pa 1996, mi tabatin 70 i piku aña. Mi tabatin e goso di a sirbi pa 45 aña komo misionero na Sri Lanka. Na e promé reunion ku mi a asistí na Colombo, tabatin rònt di 20 hende presente. E kantidat ei a oumentá awor te na mas ku 3.500! Ami ku Sybil ta konsiderá hopi di e rumannan stimá aki komo nos yunan i nietunan spiritual. No opstante, ainda tabatin hopi trabou mas pa hasi den e pais, trabou ku a eksigí e energia i abilidat di personanan mas yòn ku nos. Ku esaki na mente, nos a aseptá un invitashon di e Kuerpo Gobernante pa bolbe bèk Oustralia. Esaki a permití parehanan kualifiká i mas yòn drenta Sri Lanka komo misionero i tuma nos lugá.

Awor mi tin 83 aña, i tantu ami komo Sybil ta kontentu ku ainda nos salú ta sufisiente bon ku nos por sigui den sirbishi di pionero spesial na mi teritorio bieu na Adelaide. Nos sirbishi ta mantené nos mentalmente alerta i fleksibel. Tambe el a yuda nos reahustá na un estilo di bida hopi distinto den e pais aki.

Yehova a sigui perkurá pa tur nos nesesidatnan material, i e rumannan den nos kongregashon lokal ta duna nos hopi amor i apoyo. Resientemente mi a haña un asignashon nobo. Awor mi ta sirbi komo sekretario di nos kongregashon. Pues, mi a deskubrí ku segun ku mi ta hasi esfuerso pa sirbi Yehova fielmente, mi entrenamentu ta sigui. Ora mi wak bèk riba e añanan ku a pasa, konstantemente mi ta keda asombrá ku un mucha simpel i trankil di kunuku por a risibí un edukashon asina maravioso, unu ku a sigui durante henter su bida.

[Plachi na página 26]

Dia nos a kasa, 1955

[Plachi na página 27]

Den sirbishi di vèlt ku Rajan Kadirgamar, un ruman lokal, 1957

[Plachi na página 28]

Ami ku Sybil awe