Informe di Proklamadónan di Reino

Un Karta di Alejandra

SKIRBIMENTU DI KARTA, ya pa hopi tempu ta un manera efektivo pa duna testimonio. Ounke tin biaha bo no sa sigur ta ki resultado esei lo tin, esnan ku a persistí den usa e método aki a ser bendishoná rikamente. Nan ta kòrda e konseho sabí di Beibel: “Sembra bo simia mainta, i no keda sin hasi nada atardi; pasobra bo no sa si sembramentu di mainta òf di atardi lo tin éksito, òf si nan tur dos lo ta bon.”—Eklesiastés 11:6.

Alejandra, un Testigu hóben ku tabatin 10 aña ta sirbi na e sukursal di Testigunan di Yehova na Mexico, tabata haña kimoterapia pa kanser. Su kondishon a empeorá, i el a bira muchu suak pa kumpli ku su rutina diario. Pero komo ku Alejandra no kier a neglishá su sirbishi, el a disidí di skirbi karta. Den e kartanan el a splika e areglo di haña un studio di Beibel grátis na kas i a inkluí e number di telefon di su mama. Anto el a duna su mama e kartanan pa e mama laga na kas di hende ku no tabat’ei ora e mama bai prediká di kas pa kas.

Miéntras tantu, Diojany, un hobensita di Guatemala, a bai traha komo kriá di kas na Cancún, Mexico. Einan el a bini den kontakto ku Testigunan di Yehova i tabata gusta e konsiderashonnan bíbliko ku e tabatin ku nan. Despues Diojany su dunadónan di trabou a disidí di muda pa Siudat di Mexico i nan tabata ke p’e bai ku nan. Diojany a vasilá pa hasié pasobra esei lo a nifiká ku lo e pèrdè kontakto ku e Testigunan.

Su dunadónan di trabou a sigur’é: “No wòri, tin Testigu di Yehova tur kaminda. Nos lo buska nan asina ku nos yega.” Ku e perspektiva felis ei, Diojany a bai ku nan. Unabes na Siudat di Mexico, Diojany su dunadónan di trabou a trata di drenta den kontakto ku e Testigunan. Pero pa un motibu òf otro, nan no por a haña nan, apesar ku den e stat ei tabatin mas ku 41.000 Testigu di Yehova i 730 kongregashon.

Diojany a kuminsá pèrdè ánimo pasobra e no por a haña e Testigunan pa reanudá su konsiderashonnan bíbliko. Riba un dia, e señora di kas a bin serka dje i a bis’é: “Sorpresa! Bo Dios a skucha bo orashonnan.” El a duna Diojany un karta i a bisa: “E Testigunan a laga e karta aki pa bo.” Tabata un karta di Alejandra.

Diojany a drenta den kontakto ku Alejandra su mama i su ruman muhé, Blanca, i a aseptá un studio di Beibel. Despues di algun siman, el a topa Alejandra i nan tabata masha kontentu di por a sera konosí ku otro. Alejandra a animá Diojany pa sigui hasi su bèst ku su studio di Beibel ya asina e por a hasi progreso spiritual.

Un par di luna despues, na yüli 2003, Alejandra a bin fayesé, lagando atras un ekselente ehèmpel di fe i kurashi pa su rumannan den fe. Na su entiero, hopi hende a keda profundamente konmoví ora nan a topa Diojany i a tend’é bisa: “Alejandra ku su famia tabata un maravioso ehèmpel pa mi. Mi ta desididu pa sirbi Yehova i pa batisá pronto. Mi ta anhelá di mira Alejandra atrobe den e binidero Paradeis!”

Sí, un karta por ta un kos chikí. Pero e por tin efektonan faborabel i duradero!