Benefisiá dor di Buska pa Alkansá Balornan Spiritual

“Esun ku ta stima plaka lo no keda satisfecho ku plaka, ni esun ku ta stima abundansia, ku su entrada.”—Eklesiastés 5:10.

DEMASIADO trabou por hiba na strès, i strès por kousa problemanan di salú ku tin biaha ta hiba na morto. Den hopi pais, famianan ta kibra pa motibu di divorsio. Hopi biaha e motibu pa tal tragedia ta ku hende ta demasiado preokupá ku kos material. En bes di disfrutá di loke e tin, un persona ku ta apsorbá den buskamentu di poseshon material semper ke haña mas, sin importá si esei ta bai a kosto di su bienestar. Un buki pa desaroyo personal a deklará: “Un pasatempu nashonal ta ku hende ta kompetí ku nan bisiña pa nan no keda atras, asta si Shon Bisiña ta adikto na su trabou i a punto di haña un atake di kurason na edat di 43 aña.”

Tin biaha un persona ta sigui buska mas kos sin nunka keda satisfecho, i esaki ta strob’é di disfrutá di kualke goso ku di otro manera lo e tabatin. Tin un forsa potente ku hopi bes ta probechá di nos debilidatnan humano relashoná ku esaki: propaganda! Propagandanan na radio ku televishon konstantemente ta urgi bo pa  kumpra kos ku probablemente bo no tin mester i ku kisas ni sikiera bo por afòrt. Tur esaki por hiba na bastante daño.

E búskeda desenfrená pa haña satisfakshon propio por tin un efekto sutil pero devastador riba nos, tantu den sentido físiko komo moral. Por ehèmpel, rei sabí Salomon a remarká: “Un kurason trankil ta bida pa e kurpa.” (Proverbionan 14:30) Na kontraste, nos por kaba ku nos salú i felisidat dor di fòrsa nos mes di mas, dor di demasiado preokupashon i dor di e preshon pa akumulá rikesa material. Ora metanan materialista ta dominá nos bida, nos relashon ku otro hende tambe ta sufri daño. Anto ora un persona su bida sosial i di famia bai atras, su kalidat di bida en general tambe ta bai atras.

E Superioridat di Balornan Spiritual

“No sea konforme e mundu aki,” apòstel Pablo a spièrta siglonan pasá. (Romanonan 12:2) Mundu stima esnan ku ta biba konforme su norma- i balornan. (Juan 15:19) Mundu ta purba hasi un apelashon riba bo sentidonan—bo bista, takto, smak, olfato i oido—sí, e ta purba konvensé bo pa sigui un estilo di bida materialista. E énfasis ta riba “e deseo di wowo” ya asina abo i otro hende lo buska pa alkansá ganashi material.—1 Juan 2:15-17.

Pero tin kos di balor ku ta surpasá plaka, prominensia i rikesa material. Siglonan pasá, Rei Salomon a akumulá tur loke mundu tabatin di ofresé materialmente. El a traha kas i tabatin kantidat di hardin, hòfi, esklabo, krio di bestia, kantante femenino i maskulino, i tambe masha hopi oro i plata. Promé ku Salomon no tabatin ningun hende ku asina tantu rikesa. E tabata masha, masha riku mes. Salomon tabatin kasi tur kos ku un hende por a deseá. Sin embargo, ora el a wak e kosnan ku el a logra, el a bisa: “Tur tabata banidat i korementu tras di bientu.”—Eklesiastés 2:1-11.

Ku e sabiduria spesial ku Yehova a dun’é, Salomon tabata sa ku hende ta haña mas satisfakshon dor di buska pa alkansá balornan spiritual. El a skirbi: “E konklushon di tur loke ku a wòrdu tendí, ta: teme Dios i warda su mandamentunan, pasobra esaki ta aplikabel na kada persona.”—Eklesiastés 12:13.

Loke tin mas balor ku oro òf plata ta e tesoro ku nos por haña den e páginanan di e Palabra di Dios, Beibel. (Proverbionan 16:16) Den Beibel tin bèrdatnan profundo pa bo deskubrí ku ta meskos ku hoya. Abo lo buska i koba pa haña nan? (Proverbionan 2:1-6) Nos Kreadó, e Fuente di kosnan di berdadero balor, ta urgi bo pa hasi esei, i lo e yuda bo. Kon asina?

Yehova ta perkurá bèrdatnan presioso mediante su Palabra, su spiritu i su organisashon. (Salmo 1:1-3; Isaias 48:17, 18; Mateo 24:45-47; 1 Korintionan 2:10) Dor di eksaminá e hoyanan presioso aki ku ta di balor inkalkulabel, bo ta  haña e oportunidat di skohe inteligentemente e estilo di bida di mas mihó i ku ta duna mas rekompensa. Anto lo no ta difísil pa skohe esei pasobra Yehova, nos Kreadó, sa kiko nos mester pa nos ta berdaderamente felis.

Beibel Ta Promové e Balornan di Mas Elevá

E bon konseho ku tin disponibel den Beibel ta práktiko i inkomparabel. E normanan moral ku e ta enkurashá nos pa sigui ta sin igual. Su konseho semper ta probechoso, i a demostrá di ta bèrdat i práktiko atraves di siglonan. Algun bon konseho ku Beibel ta duna ta entre otro pa traha duru, ser onesto, usa bo plaka na un manera sabí i no ser floho.—Proverbionan 6:6-8; 20:23; 31:16.

Na armonia ku esei, Hesus a bisa: “No montoná tesoro pa boso mes riba tera, kaminda mòt i frustu ta destruí nan, i kaminda ladron ta kibra drenta i hòrta; ma montoná tesoro pa boso mes den shelu, kaminda ni mòt ni frustu no ta destruí nan, i kaminda ladron no ta kibra drenta ni hòrta.”—Mateo 6:19, 20.

E spièrtamentu oportuno ei ta mesun aplikabel awe ku e tabata 2.000 aña pasá. En bes di bira kompletamente apsorbá den un búskeda pa rikesa material, nos por benefisiá awor dor di buska pa alkansá un estilo di bida superior. E faktor krusial ta pa montoná tesoro spiritual, lokual ta hiba na un bida di berdadero felisidat i satisfakshon. Kon nos por hasi esei? Dor di lesa Dios su Palabra, Beibel, i dor di apliká loke e ta siña.

Balornan Spiritual Ta Duna Rekompensa

Ora nos apliká balornan spiritual na e manera korekto, nan ta benefisiá nos den sentido físiko, emoshonal i spiritual. Meskos ku e kapa di ozon ku ta kubri e tera ta protehá nos kontra e rayonan dañino di solo, asina prinsipionan moral sano ta yuda protehá nos dor di hasi nos konsiente di e efektonan peligroso di materialismo. Apòstel kristian Pablo a skirbi: “Esnan ku kier bira riku ta kai den tentashon i den trampa i den hopi deseonan loko i dañino, kualnan ta hundi hende den ruina i destrukshon. Pasobra amor pa plaka ta rais di tur sorto di maldat, i algun hende, dor di deseá esaki, a desviá for di e fe, i a traspasá nan mes ku hopi doló.”—1 Timoteo 6:9, 10.

Amor pa rikesa ta tenta hende pa buska mas plaka, posishon i poder. Hopi bes nan ta usa medionan tramposo i desonesto pa alkansá e metanan aki. Korementu tras di kos material por pone nos malgastá nos tempu, forsa i abilidatnan. E por asta stroba nos di drumi bon anochi. (Eklesiastés 5:12) Algu ku sigur e búskeda pa mas kos material ta stroba ta progreso spiritual. Hesukristu, e hòmber mas importante ku hamas a biba, a mustra klaramente kua ta e mihó manera: “Felis ta esnan ku ta konsiente di nan nesesidat spiritual.” (Mateo 5:3, NW) E tabata sa ku rikesa spiritual ta hiba na rekompensanan permanente i ta hopi mas importante ku ganashi material temporal.—Lukas 12:13-31.

Buska Rikesa Spiritual Realmente Ta Benefisiá Nos?

“Mi mayornan a hasi hopi esfuerso pa konvensé mi ku balornan spiritual no ta práktiko,”  segun Greg. “Sin embargo, mi a gana un tremendo pas mental dor di sigui tras di metanan spiritual ya ku mi no tin e strès ku bo ta haña ora bo ta kompetí pa rikesa.”

Balornan spiritual ta yuda promové mihó relashonnan personal tambe. Amigunan berdadero ta ser atraí na bo pa e klase di persona ku bo ta, no pa loke bo tin. Beibel ta rekomendá: “Esun ku anda ku hende sabí lo ta sabí.” (Proverbionan 13:20) Ademas, un bon bida di famia ta fundá riba sabiduria i amor, no riba poseshonnan material.—Efesionan 5:22–6:4.

Nos no ta nase konsiente di kiko ta realmente balioso. Nos tin ku siña esei for di nos pareunan òf for di un fuente superior. Ta p’esei un edukashon basá riba Beibel por transformá henter nos manera di mira kosnan material. Don, un eks-bankero, a bisa: “Esei a yuda mi rekonsiderá loke mi tabata haña ta balioso, i mi a siña keda kontentu ku e kosnan básiko.”

Buska pa Alkansá Rikesa Spiritual Duradero

Balornan spiritual ta pone énfasis riba rekompensanan di plaso largu, no riba e satisfakshon di término kòrtiku. Pablo a skirbi: “Pasobra e kosnan [material] ku ta wòrdu mirá ta temporal, ma e kosnan [spiritual] ku no ta wòrdu mirá ta eterno.” (2 Korintionan 4:18) Ta bèrdat ku aktividatnan materialista kisas ta satisfasé deseonan momentánio, pero ser golos pa kos lo no benefisiá un persona permanentemente. Balornan spiritual ta eterno.—Proverbionan 11:4; 1 Korintionan 6:9, 10.

Beibel ta kondená e manera ku hende ta enfoká solamente riba kos material den e tempu aki. E ta siña nos kon pa frena e deseo konstante pa  haña mas kos: dor di mantené nos wowo simpel, enfokando riba e kosnan mas importante, esta, rikesa spiritual. (Filipensenan 1:10, NW) Beibel ta revelá kiko golosidat realmente ta: adorashon di bo mes. Segun ku nos ta apliká loke nos ta siña for di e Palabra di Dios, nos ta haña mayor felisidat. Nos ta transformá nos manera di pensa for di ke haña so i ta kuminsá konsentrá riba duna. Esaki ta un insentivo fuerte pa remplasá satisfakshon di bo mes ku balornan spiritual!

Ta bèrdat ku te na sierto grado, plaka por sirbi komo un protekshon. (Eklesiastés 7:12) Pero Beibel realístikamente ta deklará: “Rikesa siguramente ta kria hala pa su mes, manera un águila ku ta bula bai laira.” (Proverbionan 23:5) Hende a sakrifiká hopi kos importante—salú, famia, asta un bon konsenshi—pa nan por haña mas kos material, anto ku resultadonan desastroso. Di otro banda, si nos tin un interes den asuntunan relashoná ku Dios, esei ta satisfasé nos nesesidatnan di mas importante: e nesesidat di amor, e nesesidat di tin un propósito i e nesesidat di adorá e Dios amoroso, Yehova. Tambe esei ta mustra nos e kaminda pa haña bida eterno den perfekshon humano den un paradeis riba tera. Esaki ta e speransa ku Dios ta ofresé nos.

Pronto e prosperidat ku humanidat ta soña kuné lo ser realisá kompletamente den Dios su mundu nobo. (Salmo 145:16) E tempu ei henter e tera lo ‘ta yen di e konosementu di Yehova.’ (Isaias 11:9) Balornan spiritual lo oumentá. Materialismo i su efektonan dañino lo keda kompletamente eliminá. (2 Pedro 3:13) E ora ei e kosnan ku ta hasi bida hopi mas balioso—manera salú perfekto, trabou ku ta duna satisfakshon, aktividatnan sano di rekreo, relashonnan kaluroso di famia i amistat duradero ku Dios—lo duna humanidat berdadero felisidat pa semper.

[Kuadro/Plachi na página 6]

Usa Bo Plaka na un Manera Sabí!

Determiná bo nesesidatnan. Hesus a siña nos resa: “Duna nos awe nos pan di kada dia.” (Lukas 11:3) No kuminsá mira kos ku bo tin gana di dje komo kos ku bo mester tin. Kòrda ku no ta e kosnan ku bo tin ta duna bo bida.​—Lukas 12:​16-21.

Traha un presupuesto òf budget. No kumpra kos sin pensa òf riba impulso. Beibel ta deklará: “E plannan di hende balente siguramente ta kondusí na abundansia, ma tur esnan ku tin purá, siguramente ta resultá den pobresa.” (Proverbionan 21:5) Hesus a konsehá su oyentenan pa kalkulá e gastu promé ku nan kuminsá kualke proyekto finansiero.​—Lukas 14:​28-30.

No hasi debe innesesario. Ki ora ku ta posibel, spar pa bo por kumpra un kos en bes di kumpr’é na krédito. E proverbio ta ekspres’é asin’aki: “E fiadó ta bira esklabo di esun ku ta fi’é.” (Proverbionan 22:7) Dor di ehersé dominio propio i keda denter di bo presupuesto, bo por asta plania kompranan grandi ku éksito.

No dispidí. E kosnan ku bo tin kaba, laga nan dura mas largu dor di kuida nan bon, i asina bo ta dispidí ménos. Hesus tabata un ehèmpel den konserbá loke el a usa.​—Juan 6:​10-13.

Duna prioridat na loke ta mas importante. Un persona sabí lo hasi ‘bon uso di su tempu’ pa purba alkansá metanan mas importante.​—Efesionan 5:​15, 16.

[Kuadro/Plachi na página 7]

Tin un Mihó Manera Ku Siña di Eksperensia

Eksperensia personal—tantu bon komo malu—por siña nos lèsnan balioso. Pero ta bèrdat ku eksperensia ta mama di sabiduria, manera hende sa bisa? Nò, tin un fuente superior di guia. E salmista a identifiká e fuente ei ora el a bisa den orashon: “Bo palabra ta un lampi pa mi pia i un lus pa mi kaminda.”​—Salmo 119:105.

Dikon ta muchu mas mihó pa siña for di Dios su instrukshon ku di eksperensia personal? Un motibu ta ku siña solamente di eksperensia—dor di kai lanta—por ta kostoso i tambe doloroso. Tambe esei ta innesesario. Dios a bisa e israelitanan di pasado: “Mara bo a pone atenshon na mi mandamentunan! E ora ei bo pas lo tabata manera un riu, i bo hustisia manera ola di laman.”​—Isaias 48:18.

Un motibu ku e Palabra di Dios ta sobresalí komo fuente di instrukshon ta pasobra e tin e relato mas bieu i mas eksakto di eksperensia humano. Probablemente bo ta realisá ku ta preferibel pa siña sin doló for di e éksitonan i frakasonan di otro hende, ku kometé e mesun erornan ku nan. (1 Korintionan 10:​6-11) Mas importante ainda, den Beibel, Dios ta duna nos leinan magnífiko i prinsipionan pa guia nos ku ta totalmente konfiabel. “E lei di Yehova ta perfekto . . . E rekordatorio di Yehova ta digno di konfiansa, e ta hasi hende sin eksperensia sabí.” (Salmo 19:7, NW) Definitivamente anto, e mihó manera pa siña ta for di e sabiduria di nos amoroso Kreadó.

[Plachinan na página 4]

Mundu ke pa bo sigui su estilo di bida materialista

[Plachi na página 5]

E tesoro ku tin den Beibel ta mas balioso ku oro òf plata