Fiel i Firme—Ántes i Awor

Den parti zùit di Polonia, serka di e frontera ku Slovakia i Repúblika Cheko, tin un stat chikí ku yama Wisła. Ounke podisé bo no a tende nunka di Wisła, e tin un historia ku kristiannan berdadero probablemente lo haña fasinante. E ta un historia karakterisá pa integridat i selo pa e adorashon di Yehova. Kon asina?

WISŁA ta situá den un region bunita yen di seru, ku un bista espektakular riba naturalesa. E koriente rápido di vários riu chikí ta djòin Riu Vistula, ku ta pasa dor di seru- i vayenan ku hopi mondi. E poblashon lokal amabel i e klima úniko ta hasi Wisła un sentro médiko popular, un sitio pa pasa fakansi den zomer i un sentro turístiko pa den wenter.

Parse ku e promé poblashon ku a karga e nòmber Wisła a keda establesí den dékada di 1590. Nan a lanta un fábrika di zag palu, i poko despues tabatin hende ta biba den e áreanan habrí riba seru, kaminda nan a kria karné i baka i a kultivá e tera. Pero e hendenan humilde aki a haña nan enbolbí den un warwarú di kambio religioso. E region tabata profundamente afektá dor di e reformanan religioso ku Martin Luther a inisiá, i religion luterano a bira “e religion di Estado na 1545,” segun e investigadó Andrzej Otczyk. Sin embargo, e Guera di Trinta Aña i e Kontra-Reformashon ku a sigui despues, a kambia e situashon drástikamente. Otczyk a sigui bisa: “Na 1654 outoridatnan a kita tur misa for di e protestantnan, prohibí nan di tene servisio religioso i konfiská tur Beibel i otro bukinan religioso.” Pero tòg mayoria di e poblashon lokal a keda luterano.

Promé Simianan di Bèrdat Bíbliko

Felismente, tabatin un reformashon religioso mas importante na kaminda. Na aña 1928, dos Studiante di Beibel (manera tabata yama  Testigunan di Yehova e tempu ei) yen di entusiasmo a sembra e promé simianan di bèrdat bíbliko. E siguiente aña, Jan Gomola a bin Wisła ku un tokadisko ku kua e tabata toka grabashonnan di diskurso bíbliko. Despues el a muda pa un vaye no masha leu kaminda el a haña un oyente atento i ku un kurason reseptivo, Andrzej Raszka, un hòmber kurpa kòrtiku i diki ku tabata biba den seru. Raszka mesora a bai kue su Beibel pa konfirmá loke e diskursonan grabá tabata bisa. Anto el a deklará: “Mi ruman, porfin mi a haña e bèrdat! Mi tabata en buska di kontesta for di tempu ku mi tabata bringa den Promé Guera Mundial!”

Yen di entusiasmo Raszka a hiba Gomola serka su amigunan Jerzy i Andrzej Pilch, kendenan tambe a reakshoná entusiasmá riba e mensahe di Reino. Andrzej Tyrna, ku a siña e bèrdat bíbliko na Fransia, a yuda e hòmbernan aki profundisá nan konosementu di e mensahe di Dios. Poko despues nan a batisá. Pa yuda e grupo chikí aki di Studiantenan di Beibel na Wisła, rumannan for di statnan bisiña tabata bishitá nan meimei di dékada di 1930. E resultado tabata asombroso.

Un kantidat impreshonante di hende interesá a kuminsá asosiá ku e kongregashon. Famianan luterano lokal tabatin e kustumber di lesa Beibel na kas. Pues, unabes nan a mira argumentunan bíbliko konvinsente relashoná ku e doktrina di fièrnu di kandela i di Trinidat, hopi di nan por a distinguí e bèrdat for di falsedat. Hopi famia a disidí di kibra ku siñansanan religioso falsu. Pues, e kongregashon na Wisła a krese, i pa 1939 e tabatin 140 miembro. Pero sorprendentemente mayoria di e adultonan den e kongregashon ei no tabata batisá. “Esaki no a nifiká ku e publikadónan no-batisá aki no por a tuma nan posishon na fabor di Yehova,” segun Helena, un di e promé Testigunan ei. El a agregá: “Durante e pruebanan di fe ku despues di poko tempu nan a konfrontá, nan a demostrá nan integridat.”

Kiko di e muchanan? Nan a mira ku nan mayornan a haña e bèrdat. Franciszek Branc a konta: “Ora ku mi tata a realisá ku el a haña e bèrdat, el a kuminsá inkulk’é den ami ku mi ruman hòmber. Nos tabatin respektivamente ocho i dies aña. Tata tabata hasi nos preguntanan simpel, manera: ‘Ken Dios ta, i kon ta su nòmber? Kiko bo sa di Hesukristu?’ Anto nos tabatin ku skirbi nos kontestanan riba papel i apoyá nan ku versíkulonan for di Beibel.” Un otro Testigu a konta: “Mi mayornan a reakshoná ku buena gana riba e mensahe di Reino i a bandoná Iglesia Luterano na 1940, debí na esei mi a sufri oposishon i maltrato na skol. Mi ta gradisidu ku mi mayornan a inkulká prinsipionan bíbliko den mi. Esei tabata un faktor krusial ku a yuda mi sobrebibí e tempu difísil ei.”

 Fe bou di Prueba

Ora ku Segundo Guera Mundial a kuminsá i e nazinan a okupá e área, nan tabata determiná pa kaba ku Testigunan di Yehova. Na prinsipio, nan a enkurashá adultonan—spesialmente tatanan—pa firma un lista ku a bisa ku nan tabata di nashonalidat aleman pa asina nan por haña sierto privilegio. E Testigunan a nenga di sostené e nazinan. Hopi ruman i persona interesá ku tabatin edat di drenta servisio militar tabata den un dilema: Nan por a drenta den ehérsito òf nan por a keda kompletamente neutral i risibí kastigu severo. Andrzej Szalbot, kende a keda arestá pa Gestapo na 1943, a splika: “Nenga di drenta servisio militar a nifiká ku nan lo a mandá bo un kampo di konsentrashon, normalmente Auschwitz. Ami no a batisá ainda, pero mi tabata sa di e garantia ku Hesus a duna na Mateo 10:28 i 29. Mi tabata sa ku si mi muri pa motibu di mi fe den Yehova, lo e por resusitá mi.”

Na prinsipio di 1942, e nazinan a arestá 17 ruman hòmber di Wisła. Den tres luna, 15 di nan a muri na Auschwitz. Ki efekto esaki tabatin riba e Testigunan ku a resta na Wisła? En bes di bandoná nan fe, esaki a animá nan pa pega mas duru na Yehova sin komprometé nan fe! Durante e siguiente seis lunanan, e kantidat di publikadó na Wisła a bira dòbel. Poko despues tabatin mas aresto. Hitler su ehérsito devastador a afektá en total 83 ruman, persona interesá i mucha. E nazinan a manda 53 di nan na kampo di konsentrashon (prinsipalmente Auschwitz) òf na kampo di trabou fòrsá den minanan na Polonia, Alemania i Bohemia.

Fiel i Firme

Na Auschwitz, e nazinan a purba tenta e Testigunan ku e prospekto di haña libertat inmediato. Un bewaker di SS a bisa un ruman: “Si bo djis firma un papel den kua bo ta renunsiá e Studiantenan di Beibel, nos lo saka bo liber i bo por bai kas.” Nan a ripití e promesa ei hopi biaha, ma e ruman no a komprometé su lealtat na Yehova. Komo resultado, nan a gòlpi’é i hasi bofon di dje i e mester a hasi trabou di katibu, tantu na Auschwitz komo na Mittelbau-Dora, Alemania. Djis promé ku liberashon, e ruman aki a skapa na wowo di angua di e bombardeo di e kampo kaminda e tabata será.

Paweł Szalbot, un Testigu ku a muri poko tempu pasá, a yega di konta: “Durante interogashonnan Gestapo tabata puntra mi bes tras bes dikon mi a nenga di sirbi den e ehérsito aleman i di deklará heil Hitler.” Despues di a splika e base bíbliko pa su neutralidat kristian, nan a sentensi’é pa traha den un fábrika di arma. El a bisa: “Ta mas ku klaru ku mi konsenshi no a permití mi aseptá e tipo di trabou aki, e ora ei nan a manda mi bai traha den un mina.” Pero tòg, el a keda fiel.

E Testigunan ku no tabata enkarselá—hende muhé i mucha—tabata manda paki di kuminda pa esnan na Auschwitz. Un ruman hòmber ku e tempu ei tabata un hóben a konta: “Den zomer nos tabata piki cranberry den mondi i troka nan pa trigu. E ruman muhénan tabata traha pan chikí i papa nan ku res. Despues nos tabata manda e pannan aki na kantidat chikí pa nos rumannan enkarselá.”

 En total outoridatnan a manda 53 Testigu adulto di Wisła na kamponan di konsentrashon i pa hasi trabou fòrsá. Trintiocho di nan a muri.

Un Generashon Mas Hóben Ta Lanta

E medidanan opresivo di e nazinan a afektá tambe e yunan di Testigunan di Yehova. Algun mucha, nan a manda kamponan temporal na Bohemia huntu ku nan mama. Otronan, nan a kita for di nan mayornan i manda nan na e notorio kampo di mucha na Lodz.

Tres di e muchanan ei ta kòrda: “Den e promé transporte pa Lodz, e alemannan a bai ku dies di nos, di sinku pa nuebe aña. Nos a animá otro dor di hasi orashon i papia riba temanan bíbliko. No tabata fásil pa perseverá.” Na 1945 tur e muchanan ei a regresá kas. Nan tabata bibu pero flaku-flaku i troumatisá. Pero tòg, nada no por a kibra nan integridat.

Kiko A Sosodé Despues?

Miéntras ku Segundo Guera Mundial tabata yegando su fin, fe di e Testigunan di Wisła ainda tabata fuerte i nan tabata kla pa reanudá nan aktividat di prediká ku selo i determinashon. Gruponan di ruman tabata bai bishitá hende ku a biba te ku 40 kilometer for di Wisła, i nan a prediká i laga literatura bíbliko ku e hendenan. Segun Jan Krzok, “den poko tempu tabatin tres kongregashon aktivo den nos stat.” Sin embargo, libertat religioso no a dura largu.

E gobièrnu komunista, ku a bin na lugá di e nazinan, a prohibí tur aktividat di Testigunan di Yehova na Polonia na 1950. P’esei e rumannan lokal mester tabata hopi ingenioso den nan sirbishi. Tin biaha nan tabata bishitá hende na kas ku e preteksto di ke kumpra bestia òf grano. Por lo general nan tabata tene reunionnan kristian anochi den gruponan chikí. No opstante, agentenan di siguridat a logra arestá hopi adoradó di Yehova, i a akusá nan di ta traha pa un servisio di inteligensia stranhero, un akusashon kompletamente sin base. Sierto funshonarionan sarkástikamente a menasá Paweł Pilch: “Hitler no a kibra bo, pero nos sí lo hasié.” Sin embargo, el a keda fiel na Yehova, siendo enkarselá pa sinku aña. Ora algun Testigu hóben a nenga di firma un dokumento polítiko sosialista, outoridatnan a kita nan for di skol òf nan a pèrdè nan trabou.

Yehova A Sigui Sostené Nan

Aña 1989 a trese un otro klima polítiko, i Testigunan di Yehova a haña rekonosementu legal na Polonia. Na Wisła, adoradónan firme di Yehova a oumentá nan aktividat, manera por a mira na e kantidat di pionero òf predikadó di tempu kompletu. Rònt di 100 ruman for di e área aki a drenta den sirbishi di pionero. P’esei no ta straño ku e stat tin e beinam Fábrika di Pionero.

Beibel a bisa di e apoyo ku Yehova a duna su siguidónan di pasado: “Si no tabata pa SEÑOR, kende tabata na nos banda, ora hende a lanta kontra nos, nan lo a traga nos bibu.” (Salmo 124:2, 3) Den nos tempu, apesar di e indiferensia ku ta reina i e tendensianan mundano inmoral ku tin den e poblashon general, adoradónan di Yehova na Wisła ta hasi esfuerso pa mantené nan integridat i ta ser rekompensá rikamente. Generashon tras generashon di Testigunan di Yehova den e área ei por konfirmá ku e deklarashon aki di apòstel Pablo ta bèrdat: “Si Dios ta pa nos, ken por ta kontra nos?”—Romanonan 8:31.

[Plachi na página 26]

Nan a manda Emilia Krzok huntu ku su yunan Helena, Emilia i Jan na un kampo temporal na Bohemia

[Plachi na página 26]

Ora ku Paweł Szalbot a nenga di drenta servisio militar, nan a mand’é bai traha den un mina

[Plachi na página 27]

Maske nan a manda e rumannan Auschwitz, i hopi a muri ei, e obra no a stòp di krese na Wisła

[Plachi na página 28]

Paweł Pilch i Jan Polok a ser hibá na un kampo pa hóbennan na Lodz

[Rekonosementu pa Potrèt na página 25]

Bèshi i flor: © R.M. Kosinscy/www.kosinscy.pl