Pregunta di Lektor

Ora Hesus a instruí su siguidónan pa “fia sin spera di haña nada bèk,” e tabata ke men ku nan no mag di pidi bèk ni sikiera e suma inisial di e fiansa?

E mihó manera pa komprondé e palabranan ei di Hesus ku ta pará skirbí na Lukas 6:35, ta dor di tene e Lei di Moisés na mente. Den e Lei ei, Dios a manda e israelitanan pa duna fiansa sin kobra interes na paisanonan pober ku tabatin mester di yudansa finansiero. (Eksodo 22:25; Levítiko 25:35-37; Mateo 5:42) E fiansanan aki no tabata pa propósito komersial, ke men, pa hasi ganashi. Mas bien, fiansa sin kobra interes tabata pa yuda aliviá pobresa òf kalamidat. Kon ku bai bin, lo ta un gran falta di amor pa probechá di e difikultatnan finansiero di bo próhimo. Pero asina mes, esun ku a duna e fiansa tabatin derecho di haña bèk e suma inisial, i tin biaha tabata tuma un garantia ku lo paga e fiansa bèk.

Hesus a apoyá e Lei, pero a la bes el a dun’é un aplikashon mas amplio dor di bisa ku esun ku ta duna yudansa no mester spera “di haña nada bèk.” Meskos ku e israelitanan, kristiannan tin biaha ta sufri di difikultatnan finansiero òf otro sirkunstansianan ku por laga nan den pobresa òf asta desampará. Si un ruman kristian den tal situashon desesperá ta buska yudansa finansiero, lo no ta un muestra di bondat pa yud’é? Sí, amor berdadero lo motivá un kristian di ke yuda un ruman ku debí na faktornan for di su kontròl a hañ’é den problema finansiero serio. (Proverbionan 3:27) Podisé ta posibel pa duna un ruman den nesesidat un kontribushon, maske e suma kisas ta ménos di loke lo bo a duna komo fiansa.—Salmo 37:21.

Den e promé siglo di nos era, apòstel Pablo i Barnabas a keda enkargá pa hiba kontribushon for di e kristiannan na Asia Menor pa nan rumannan na Judea kaminda tabata reina un hamber. (Echonan 11:28-30) Di igual manera awe, ora un desaster tuma lugá, kristiannan hopi biaha ta manda regalo i kontribushon pa nan rumannan den nesesidat. Dor di hasi esei, nan ta duna tambe un bon testimonio na otro hende. (Mateo 5:16) Klaru ku mester tene kuenta ku e aktitut i situashon di e persona ku ta buska yudansa. Kon bin e ta den pèrtá? Ta bon pa tuma nota di e palabranan aki di Pablo: “Si un hende no kier traha, no lag’é kome tampoko.”—2 Tesalonisensenan 3:10.

Si un ruman ku ta pidi un fiansa no ta den nesesidat serio sino simplemente e ke un yudansa temporal pa e por para bèk riba su pia despues di un òf otro kontratempu finansiero, lo por ta apropiá pa dun’é un fiansa sin kobra interes. Si den tal sirkunstansia bo dun’é un fiansa ku e intenshon ku lo e paga bèk henter e suma, lo bo no ta aktuando kontrario na e palabranan di Hesus ku tin pará na Lukas 6:35. Pero mester sera un akuerdo por eskrito, i e persona ku haña e fiansa mester hasi tur esfuerso pa pag’é bèk manera a keda stipulá den e akuerdo. De echo, amor kristian lo mester motivá esun ku a fia pa paga e fiansa bèk meskos ku amor a motivá e otro pa duna e fiansa.

Esun ku tin pensá di duna e fiansa (òf kontribushon) lo tin ku analisá tambe e situashon di su propio famia. Por ehèmpel, si e duna e plaka, esei lo strob’é di perkurá pa e nesesidatnan di su famia, lokual segun Beibel ta un prioridat? (2 Korintionan 8:12; 1 Timoteo 5:8) Pero kon ku bai bin, kristiannan ta buska oportunidat pa mustra amor na otro, ekspresando e amor ei den maneranan práktiko ku ta na armonia ku prinsipionan bíbliko.—Santiago 1:27; 1 Juan 3:18; 4:7-11.