Loke Yehova Su Humildat Ta Nifiká pa Nos

DAVID aki sí a yega di haña su mes ku kontratempu. El a sufri maltrato na man di su suegro yalurs, Rei Saul. Tres biaha Saul a purba mata David ku lansa i pa años el a persiguié sin stòp, obligando David di biba komo fugitivo. (1 Samuel 18:11; 19:10; 26:20) Sin embargo, Yehova a resultá di ta ku David. Yehova no solamente a salb’é for di Saul sino tambe for di otro enemigunan. Pues, nos por komprondé e sintimentunan ku David a ekspresá den su kantika: “[Yehova] ta mi baranka i mi fòrti, i mi Libertadó . . . Bo a duna mi e eskudo di bo salbashon, i bo gentilesa [“humildat,” NW] ta hasi mi grandi.” (2 Samuel 22:2, 36) En bèrdat David a bira un hòmber grandi den Israel. Pero kiko esei tabatin di haber ku Yehova su humildat?

Ora e Skritura ta bisa ku Yehova ta humilde, e no ke men ku Yehova tin un ke otro limitashon òf ku e ta sometí na otro persona. Mas bien, e bunita kualidat aki ta indiká ku e tin un gran kompashon pa hende ku sinseramente ta hasi esfuerso pa haña su aprobashon i ku e ta ekstendé miserikòrdia na nan. Na Salmo 113:6 i 7 nos ta lesa: “[Yehova] ta humiá su mes pa mira e kosnan ku ta den shelu i riba tera . . . E ta lanta hende pober for di stòf.” E echo ku Yehova “ta humiá su mes pa mira” ta nifiká ku e ta baha su mes òf “bùig pa mira.” (Today’s English Version) Pues for di shelu Yehova mes a “bùig,” òf “humiá su mes,” pa e por a presta atenshon na David, un hòmber imperfekto pero humilde ku tabatin e deseo di sirbi Dios. P’esei David ta sigurá nos: “Ounke SEÑOR ta halsá, tòg e ta atendé e hende humilde.” (Salmo 138:6) E miserikòrdia, pasenshi i kompashon ku Yehova tabatin ku David mester ta un animashon pa tur hende ku ta trata na hasi e boluntat di Dios.

Ounke Yehova komo Soberano ta okupá e puesto di mas elevá den universo, e ta dispuesto pa trata ku kada un di nos. Esaki ta duna nos e konfiansa ku nos por konta ku su yudansa infalibel den asta e sirkunstansianan di mas difísil. Nos no tin nodi teme ku lo e lubidá nos. Relashoná ku su pueblo di  antiguo Israel, Beibel ta papia aptamente di Yehova komo esun “kende a kòrda riba [nan] den [nan] humiashon, pasobra su miserikòrdia ta pa semper.”—Salmo 136:23.

Komo Yehova su sirbidónan di tempu aktual, nos tambe meskos ku David por haña nos ku hopi kontratempu. Podisé hende ku no konosé Dios ta hasi bofon di nos, òf kisas nos ta luchando ku nos salú òf nos a pèrdè un ser kerí. Sea kual sea nos situashon, si nos kurason ta sinsero, nos por aserká Yehova den orashon, i apelá na su miserikòrdia. Yehova lo “bùig” pa tuma nota di nos i skucha nos orashonnan. E salmista inspirá a skirbi: “E wowonan di SEÑOR ta riba e hustunan, i su oreanan ta atento pa skucha nan sklamashon.” (Salmo 34:15) Ora bo reflekshoná riba Yehova su bunita kualidat di humildat, bo no ta keda konmoví?

[Plachinan na página 30]

Meskos ku Yehova a skucha e orashonnan di David, asina e ta dispuesto pa skucha nos orashonnan awe