Nos Lo Biba un Dia den Berdadero Siguridat?

KEN lo no keda enkantá pa mira yunan hunga kontentu di nan huntu ku nan mayornan amoroso? Yunan ta sinti nan kompletamente sigur den kompania di mayornan ku ta stima nan. Sin embargo, pa hopi mucha, e momentunan ei di felisidat kasi no ta eksistí. Na lugá di esei, algun tin ku pasa trabou tur dia pa haña un lugá pa drumi anochi. Tin speransa pa muchanan asina ku no tin ni un dak riba nan kabes i tambe pa otro muchanan ku ta bibando den insiguridat awe?

Ounke futuro por ta pinta skur, e Palabra di Dios ta duna speransa. Profeta Isaias a predisí ku lo yega e dia ku tur hende lo biba den siguridat total. El a skirbi: “Nan lo traha kas i biba den nan; tambe nan lo planta kunukunan di wendrùif i kome nan fruta. Nan lo no traha kas pa otro hende biba aden, ni planta pa otro hende kome.”—Isaias 65:21, 22.

Pero e speransa aki ta tin base sólido? Esei ta un bon pregunta pasobra “speransa” no ta nifiká tur biaha ku algu lo kumpli sigur. Por ehèmpel, den algun pais hopi bes bo ta tende e ekspreshon, “Speransa ta e último kos ku bo ta pèrdè.” Esaki ta nifiká ku hopi hende ta keda karga speransa asta ora no tin un bon base pa esei. Ma e speransa ku e Dios bibu ta pone nos dilanti ta diferente. Apòstel Pablo a skirbi: “Ningun hende ku pone su fe den [Dios] lo keda desapuntá.” (Romanonan 10:11, NW) Profesianan di Beibel ku a kumpli kaba ta duna nos e konfiansa ku tur otro promesa ku Yehova Dios a hasi, tambe lo ser realisá. Ora e promesanan ei bira realidat, e situashonnan ku ta obligá muchanan biba riba kaya lo pasa pa historia.

Pero for di awor kaba e konseho práktiko ku nos ta haña den Beibel por yuda e personanan ku no tin speransa pa nan por bai dilanti den bida i haña berdadero siguridat. Kon esei ta posibel? Gustosamente Testigunan di Yehova den bo komunidat lo yuda bo haña e kontesta riba e pregunta aki.