Pregunta di Lektor

Kon e kongregashon kristian ta mira golosidat?

E Palabra di Dios ta kondená buracheria i golosidat komo komportashonnan inaseptabel pa hende ku ke sirbi Dios. P’esei, e kongregashon kristian ta mira un hende ku tin kustumber di hasi ko’i haragan golos meskos ku e ta mira un buraché. Ni un buraché ni un haragan golos no por ta parti di e kongregashon kristian.

Proverbionan 23:20 i 21 ta deklará: “No anda ku esnan ku ta gusta dal nan biña, ni ku esnan ku ta golos pa kome karni. Pasobra e buraché i e hende golos lo bira pober, i kabishamentu lo hasi un hende bisti paña kibrá.” Na Deuteronomio 21:20, nos ta lesa tokante un persona “kabesura i rebelde” ku a meresé kastigu di morto bou di e Lei di Moisés. E versíkulo ei ta menshoná dos karakterístika di e persona rebelde aki ku no a repentí: e tabata “un golos i un buraché.” Pues ta bisto ku den antiguo Israel, golosidat a ser konsiderá un práktika inaseptabel pa hende ku kier a sirbi Dios.

Pero ki ora un hende ta golos, i kiko e Skritura Griego Kristian ta bisa di e tópiko aki? Un hende golos ta un hende ku tin kustumber di hocha òf kome i bebe na un manera haragan. Pa kuminsá, e Palabra di Dios ta bisa nos ku personanan “golos pa kos” ta e sorto di personanan  ku lo no heredá e Reino di Dios. (1 Korintionan 6:9, 10, BPK; Filipensenan 3:18, 19; 1 Pedro 4:3) Ademas, ora ku apòstel Pablo a spièrta kristiannan pa no praktiká “e obranan di karni,” el a menshoná “buracheria, parandiamentu, i kosnan asin’aki.” (Galationan 5:19-21) Hopi bes buracheria i parandiamentu ta bai kompañá ku komementu di mas. Ademas, ser haragan ta kai bou di e ekspreshon ku Pablo a usa: “kosnan asin’aki.” Meskos ku ta konta pa e otro “obranan di karni,” un kristian ku ta konosí tur kaminda pa su komementu di mas i ku na un manera kabesura ta nenga di kambia su komportashon golos, mester ser saká for di e kongregashon.—1 Korintionan 5:11, 13, BPK. *

Ounke e Palabra di Dios ta pone un buraché den e mesun kategoria ku un hende golos, ta muchu mas fásil pa identifiká un buraché ku un hende golos. Normalmente e señalnan di buracheria ta hopi bisto. Di otro banda, ta muchu mas difísil pa determiná ki ora un persona a bira un haragan persistente pasobra bo no por determiná esei djis a base di su aparensia. Pa e motibu ei, ora ansianonan den kongregashon ta atendé e tipo di kasonan aki nan tin ku tene masha kuidou i usa bon disernimentu.

Por ehèmpel, obesidat (demasiado sobrepeso) por ta un señal di golosidat, pero no ta tur biaha esei ta e kaso. E por wòrdu kousá pa un malesa. Faktornan hereditario tambe por kontribuí na obesidat. Ademas, nos tin ku kòrda ku obesidat ta un asuntu físiko, miéntras ku ora un hende ta haragan esei ta un asuntu di aktitut. Obesidat ta ora e kurpa tin demasiado vèt, miéntras ku ser haragan ta ora un persona ta kome òf bebe di mas òf na un manera golos. Pues, no ta e peso di un persona ta determiná si e ta un haragan sino su aktitut pa ku kuminda. Un persona por tin un kurpa normal òf por ta asta delegá i tòg ser un haragan. Ademas, loke hende ta konsiderá e peso òf figura ideal ta varia konsiderablemente di un lugá pa otro.

Na kiko bo ta mira ku un persona ta haragan? Mayoria biaha un persona haragan no tin dominio propio, i ta bai asina leu di pròp su kurpa ku kuminda te ora e kuminsá sinti su mes inkómodo òf e bira malu. Su falta di dominio propio ta indiká ku e no ta preokupá mes ku e reproche ku e ta trese riba Yehova i riba e bon reputashon di Yehova su pueblo. (1 Korintionan 10:31) Di otro banda, no ta asina ku outomátikamente lo konsiderá un persona ku de bes en kuando ta kome di mas un ‘persona haragan.’ (Efesionan 5:5, BPK) No opstante, den e spiritu di Galationan 6:1 [NW], kisas un kristian asina tin mester di yudansa. Pablo a deklará: “Rumannan, ounke un hòmber dal un paso robes promé ku e realisá esei, boso ku tin kualidatnan spiritual, trata na reahustá e hòmber ei ku un spiritu di suavedat.”

Dikon Beibel su konseho pa no kome di mas ta spesialmente importante awe? Pasobra Hesus a spièrta spesialmente relashoná ku nos tempu: “Tene kuidou pa boso kurason no ta kargá pa kousa di paranda [“komementu di mas,” NW] i buracheria i e preokupashonnan di bida, i e dia ei no bin diripiente riba boso manera un trampa.” (Lukas 21:34, 35) Un manera importante pa evitá un estilo di bida spiritualmente dañino ta di evitá di kome di mas.

Moderashon ta un birtut kristian. (1 Timoteo 3:2, 11) P’esei, Yehova sigur lo yuda tur persona ku sinseramente ta trata na apliká Beibel su konseho pa ta moderá den komementu i bebementu.—Hebreonan 4:16.

[Nota]