Bo Ke Biba pa Semper?

“MI NO tin miedu di muri,” un señora di edat na Hapon a bisa. “Pero mi ta sinti masha tristu ku mi tin ku bai laga e flornan aki.” Un ruman muhé kristian ku tabata di bishita a komprondé e remarke aki pasobra e señora tabatin un bunita hardin na su kas. Hopi hende ku ta bisa ku nan no tin miedu di muri ta disfrutá mashá di e maravianan di kreashon i eigenlijk lo ta deseá di biba pa semper.

Biba pa semper? Hopi hende lo deskartá e idea ei. Algun asta por bisa ku nan no ta interesá mes den biba pa semper. Pakiko un hende lo pensa asina?

 Bida Eterno Lo Ta Laf?

Tin hende ta pensa ku bida eterno lo ta laf. Kisas nan ta mustra riba e bida monótono di hopi hende penshoná ku no ta hasi nada otro ku sinta wak televishon henter dia. Si ta asina bo ta pensa, wak kiko e astrónomo Robert Jastrow a bisa ora a puntr’é si bida eterno lo ta un bendishon òf un maldishon. E di: “Lo e ta un bendishon pa hende ku tin un mente kurioso i un hamber insasiabel pa siña kosnan. E idea ku nan lo por sigui haña konosementu pa eternidat lo ta un gran konsuelo pa nan. Pero pa otronan ku ta kere ku ya nan a siña kaba tur loke tin di siña i ku tin un mente será, lo e ta un maldishon spantoso. Nan lo no sa kiko hasi ku nan tempu.”

Pues ta dependé hopi di bo aktitut si lo bo haña bida eterno laf òf nò. Si bo tin “un mente kurioso i un hamber insasiabel pa siña kosnan,” pensa kuantu kos lo bo por logra riba tereno di arte, músika, arkitektura, hardineria òf kualke aktividat ku ta bale la pena i ku ta interesá bo. Bida eterno riba tera lo duna bo e speransa maravioso pa desaroyá bo potensial riba vários tereno di interes spesial pa bo.

Otro kos ku lo duna nos hopi satisfakshon den bida eterno ta e echo ku nos lo por mustra i eksperensiá amor pa semper. Dios a krea nos ku e kapasidat pa mustra amor, i ora nos ta sinti ku hende stima nos, nos ta sinti nos hopi bon. Ora nos ta kompartí berdadero amor ku otro hende nos ta haña un satisfakshon profundo ku, ni maske kuantu tempu pasa, no ta kaba na nada. Bida eterno lo ofresé un oportunidat sinfin pa kultivá amor no solamente pa nos próhimo sino spesialmente pa Dios. Apòstel Pablo a bisa: “Si un hende ta stima Dios, e ta konosí pa Dios.” (1 Korintionan 8:3) Esta un perspektiva maravioso: konosé i bira konosí p’e Soberano di universo! Ademas, nos no ta kaba di siña tokante nos Kreadó amoroso. Kon anto bida eterno por ta laf i sin nada di ofresé?

Bida Ta Presioso Djis Pasobra E Ta Kòrtiku?

Tin hende ta pensa ku ta pasobra bida ta kòrtiku e ta asina presioso. Tal bes nan ta kompará bida ku oro, lokual ta masha skars. Segun nan, si bo por a haña oro tur kaminda, lo e no tin muchu balor. Pero esei no ta kita sí ku oro ta keda bunita. I meskos ta konta pa bida.

Nos por kompará bida eterno ku un abundansia di airu. Nabegantenan den un  supmarino ku a daña bou di awa lo konsiderá airu komo algu di hopi balor. Despues ku nan ser reskatá, bo ta kere ku nan ta asina malagradesí di keha ku nan tin un abundansia di airu atrobe? Nò, tòg!

Meskos ku e nabegantenan ei, nos por wòrdu reskatá pero ku un prospekto asta mas grandi ainda, esta di haña bida eterno. Apòstel Pablo a skirbi: “Pago di piká ta morto, ma e don di grasia di Dios ta bida eterno den Kristu Hesus, nos Señor.” (Romanonan 6:23) Pa medio di Hesus su sakrifisio di reskate, Dios lo eliminá imperfekshon humano i morto, i lo drama riba humanidat obediente e don di bida eterno. Nos mester ta hopi gradisidu pa un areglo amoroso asina!

Kiko di Nos Sernan Kerí?

Algun hende por pensa: ‘Kiko di mi sernan kerí? Si nan no ta huntu ku mi, bida eterno riba tera lo no tin muchu sentido pa mi.’ Tal bes bo a haña konosementu di Beibel i bo a siña tokante e posibilidat di disfrutá di bida eterno den un paradeis riba tera. (Lukas 23:43; Juan 3:16; 17:3) Klaru ku bo ke pa bo famia yegá, otro sernan kerí i amigunan stimá tambe t’ei, pa nan haña e mesun goso ku bo ta spera di haña den e mundu nobo di hustisia ku Dios a primintí.—2 Pedro 3:13.

Pero ke tal si bo amigunan i sernan kerí no ta mustrando interes pa biba pa semper den un paradeis riba tera? No laga esei desanimá bo. Sigui gana konosementu eksakto di Beibel i aktua na armonia ku e konosementu ei. Apòstel Pablo a skirbi: “Kon bo sa, esposa, ku kisas lo bo salba bo esposo? Òf kon bo sa, esposo, ku kisas lo bo salba bo esposa?” (1 Korintionan 7:16) Hende por kambia. Por ehèmpel, un hòmber ku un tempu tabata oponé kristianismo a kambia i despues a bira ansiano den e kongregashon kristian. El a bisa: “Mi ta masha gradisidu ku mi famia stimá a para fielmente riba nan prinsipionan di Beibel durante tur mi oposishon.”

Dios ta hopi interesá den bo bida i e bida di bo sernan kerí. De echo, Yehova “no kier pa ningun hende bai pèrdí, ma pa tur bin na repentimentu.” (2 Pedro 3:9) Yehova Dios ke pa abo i bo sernan kerí biba pa semper. Su amor ta mas grandi ku esun di hende imperfekto. (Isaias 49:15) Pues pakiko no kultivá un bon relashon ku Dios? E ora ei lo bo por yuda bo sernan kerí hasi meskos. Maske aworakí nan no tin e speransa di biba pa semper, nan aktitut por kambia ora nan mira bo aktua na armonia ku konosementu eksakto di Beibel.

Kiko di bo sernan kerí ku no t’ei mas? Pa miónes di hende ku a muri, Beibel ta ofresé e speransa maravioso di un resurekshon. Nan lo lanta for di morto i biba den Paradeis riba tera. Hesukristu a primintí: “E ora lo yega den kua tur ku ta den graf lo . . . sali.” (Juan 5:28, 29) Asta esnan ku a muri sin konosé Dios lo bini bèk na bida, pasobra Beibel ta deklará: “Lo tin un resurekshon di tantu e hustunan komo e malbadonan.” (Echonan 24:15) Esta un goso di por risibí e hendenan ei bèk na bida!

Bida Eterno—Un Perspektiva Gososo

Si bo por ta felis i kontentu aworakí apesar di tur difikultat den e mundu aktual, sigur lo bo por disfrutá di bida eterno den un paradeis riba tera. Sin embargo, ora un Testigu di Yehova a papia ku un señora di e bendishonnan ku bida eterno lo trese kuné, e señora a bis’é: “Mi no ke biba pa semper. E bida aki di 70 òf 80 aña ta sufisiente pa mi.” Un ansiano kristian ku pa kasualidat tabata einan a puntr’é: “Bo a yega di puntra bo mes kon bo morto lo por afektá bo yunan?”  Ora e señora a pensa kon tristu nan lo keda si nan mester pèrdè nan mama, awa a basha for di su wowo. El a atmití: “Pa promé biaha, mi a realisá kon egoista mi tabata, i mi por a mira ku bida eterno no ta un speransa egoista sino ku e ta enserá biba pa otro hende.”

Kisas algun hende ta pensa ku ningun hende no tin kunes si nan biba òf nan muri. Pero Esun ku a duna nos bida sí ta interesá pasobra el a bisa: “Manera mi ta biba . . . mi no tin plaser den e morto di e malbado, ma mas bien ku e malbado bira for di su kaminda i biba.” (Ezekiel 33:11) Siendo ku Dios tin tantu interes den bida di asta e malbadonan, siguramente lo e mester ta profundamente interesá den hende ku ta stim’é.

Rei David di Israel di antigwedat tabatin konfiansa den e kuido amoroso di Yehova. David a bisa un biaha: “Maske mi tata i mi mama bandoná mi, SEÑOR lo rekohé mi.” (Salmo 27:10) Probablemente David tabatin sigur ku su mayornan a stim’é. Pero asta si su mayornan—e personanan mas yegá na dje—lo a bandon’é, e tabata sa ku Dios sí lo no a lag’é na kaya. Pa motibu di su amor i interes den nos, Yehova ta ofresé nos bida eterno i su amistat pa semper. (Santiago 2:23) Nos no mester aseptá e regalonan maravioso aki ku un kurason gradisidu?

[Plachi na página 7]

Amor pa Dios i pa próhimo lo hasi bida eterno algu ku ta bale la pena