E Huisio di Yehova Lo Bin Kontra e Malbadonan

“Prepará pa kontra ku bo Dios.”—AMOS 4:12.

1, 2. Dikon nos por tin konfiansa ku Dios lo kaba ku maldat?

YEHOVA lo kaba un dia ku maldat i sufrimentu ku tin riba e tera aki? Awe, na prinsipio di siglo 21, e pregunta ei ta parse mas na su lugá ku nunka. Ta manera kos ku unda ku nos bira, nos ta mira evidensia di hende su trato inhumano pa ku otro. Nos ta anhelá mashá pa mira un mundu sin violensia, terorismo i korupshon!

² E bon notisia ta ku nos por tin pleno konfiansa ku Yehova lo kaba ku maldat. E kualidatnan ku Dios tin ta sigurá nos ku lo e tuma akshon kontra e malbadonan. Yehova ta hustu i rekto. Na Salmo 33:5, su Palabra ta bisa nos: “E ta stima hustisia i huisio.” Anto un otro salmo ta bisa: “Esun ku ta gusta violensia [Yehova] su alma ta odia.” (Salmo 11:5) Siguramente anto, Yehova, e Dios todopoderoso, ku ta stima hustisia i huisio, lo no keda tolerá pa semper loke e ta odia.

3. Kiko lo keda enfatisá den un konsiderashon mas a fondo di e profesia di Amos?

³ Konsiderá un motibu mas pakiko nos por tin sigur ku Yehova lo eliminá maldat. Registro di su tratonan den pasado ta garantisá esaki. Den e buki bíbliko di Amos nos ta haña ehèmpelnan impreshonante di Yehova su manera konsistente di trata ku hende malbado. Un konsiderashon mas a fondo di e profesia di Amos lo enfatisá tres aspekto di huisio divino. Promé, semper e ta un huisio meresí. Di dos, ningun malbado no por skapa di dje. I di tres, e ta selektivo, pasobra Yehova ta ehekutá huisio riba malechornan pero e ta mustra miserikòrdia na personanan arepentí i ku tin e disposishon korekto.—Romanonan 9:17-26.

Huisio Divino Semper Ta Meresí

4. Unda Yehova a manda Amos bai, i pa ki propósito?

⁴ Den tempu di Amos, e israelitanan ya tabata partí kaba den dos reino. Unu tabata e reino di dos tribu di Huda den zùit, i e otro tabata e reino di dies tribu di Israel den nort. Yehova a enkargá Amos pa sirbi komo profeta, i a mand’é for di su stat natal na Huda pa bai Israel. Dios lo a us’é einan pa proklamá huisio divino.

5. Kontra kua nashon Amos a profetisá promé, i kua tabata un motibu ku nan a meresé Dios su huisio desfaborabel?

⁵ Amos no a kuminsá su asignashon ku proklamashon di Yehova su huisio kontra e reino rebelde di nort di Israel. Mas bien, el a kuminsá proklamá huisio divino kontra seis nashon  bisiña di Israel. E nashonnan aki tabata Siria, Filistea, Tiro, Edòm, Amon i Moab. Pero di bèrdat e nashonnan ei a meresé Dios su huisio desfaborabel? Sigur ku sí! Pa kuminsá, nan tabata enemigu mortal di e pueblo di Yehova.

6. Dikon Dios lo a bai trese kalamidat riba Siria, Filistea i Tiro?

⁶ Por ehèmpel, Yehova a kondená e sirionan ‘pasobra nan a bati su pueblo na Galaad.’ (Amos 1:3) E sirionan a hòrta teritorio for di Galaad—un region di Israel pariba di Riu Hordan—i a kousa gran aflikshon pa e pueblo di Dios einan. Kiko di Filistea i Tiro? E filisteonan tabata kulpabel di a deportá israelita—esta, a hiba nan prezu—i bende nan ku e edomitanan, i algun israelita a kai den man di Tiro su trafikantenan di esklabo. (Amos 1:6, 9) Figurá bo, nan a bende Dios su pueblo komo katibu! P’esei no ta un sorpresa ku Yehova lo a bai trese kalamidat riba Siria, Filistea i Tiro.

7. Kiko Edòm, Amon i Moab tabatin en komun ku Israel, pero kon nan a trata e israelitanan?

⁷ Edòm, Amon i Moab tabatin algu en komun ku otro i ku Israel. Tur tres nashon tabata famia di e israelitanan. E edomitanan tabata desendiente di Abraham via Jakòb su pia di ohochi Esau. Di manera ku den un sentido nan tabata ruman di Israel. E amonitanan i e moabitanan tabata desendiente di Abraham su subrino Lòt. Pero, Edòm, Amon i Moab a trata nan famianan israelita manera ruman? Niun ora so! Edòm a usa spada di un manera sin miserikòrdia kontra “su ruman hòmber,” i e amonitanan tabata hopi kruel den e manera ku nan a trata prezu israelita. (Amos 1:11, 13) Ounke Amos no ta menshoná direktamente kon Moab a maltratá e pueblo di Dios, e moabitanan tin un registro largu di oposishon kontra Israel. E kastigu kontra e tres nashonnan ei ku a bini di e mesun antepasado, lo ta hopi severo. Yehova a primintí di destruí nan ku kandela.

Malbadonan No Por Skapa di Huisio Divino

8. Dikon e seis nashonnan bisiña di Israel no por a skapa for di Dios su kastigu?

⁸ Un kos ta sigur, e seis nashonnan menshoná anteriormente den e profesia di Amos a meresé Dios su huisio desfaborabel. Ademas, no tabatin ningun manera pa nan skapa di dje. For di Amos kapítulo 1, versíkulo 3, te na kapítulo 2, versíkulo 1, Yehova ta bisa seis biaha: “Lo mi no revoká su kastigu.” I Yehova a kumpli ku su palabra. E no a hala atras i keda sin kastigá e nashonnan ei. Historia skirbí ta proba ku mas despues kada un di nan a  sufri kalamidat. Anto por lo ménos kuater di nan—Filistea, Moab, Amon i Edòm—ku tempu a stòp di eksistí mes komo nashon!

9. Kiko e habitantenan di Huda a meresé, i dikon?

⁹ Siguientemente, e profesia di Amos a enfoká atenshon riba e di shete nashon: su pais natal Huda. Amos su oyentenan den e reino di nort di Israel kisas lo a keda sorprendí di tend’é proklamá huisio kontra e reino di Huda. Dikon e habitantenan di Huda a meresé huisio desfaborabel? “Pasobra nan a rechasá e lei di SEÑOR,” Amos 2:4 ta bisa. Pa Yehova, ta algu masha serio ora hende deliberadamente ta neglishá su Lei. Segun Amos 2:5, el a predisí: “Lo mi manda kandela riba Huda, i esaki lo kaba ku e sitadèlnan di Yerusalèm.”

10. Dikon Huda lo no por a skapa di kalamidat?

¹⁰ Huda infiel lo no por a skapa e binidero kalamidat. Pa di shete biaha, Yehova a bisa: “Lo mi no revoká su kastigu.” (Amos 2:4) Huda a risibí e kastigu predisí ora e babilonionan a hasié desolá na aña 607 promé ku nos era. Un biaha mas nos ta mira ku pa e malbadonan no tin skapatorio for di e huisio di Dios.

11-13. Amos a profetisá prinsipalmente kontra kua nashon, i ki tipo di opreshon tabata tuma lugá einan?

¹¹ Profeta Amos a kaba di proklamá Yehova su huisio kontra shete nashon. Pero ken ku a pensa ku Amos a terminá ku su trabou di profetisá, tabata mal kiboká. Amos tabata leu for di kla! Amos su enkargo prinsipal tabata pa proklamá un mensahe skèrpi di huisio kontra e reino di nort di Israel. Anto Israel a meresé Dios su huisio desfaborabel pasobra e nashon tabata den un deterioro moral i religioso hopi deplorabel.

¹² Amos su profesianan a eksponé e opreshon ku a bira komun den e reino di Israel. Relashoná ku esaki, Amos 2:6 i 7 ta bisa: “Asina SEÑOR ta bisa: ‘Pa tres transgreshon di Israel, sí pa kuater, lo mi no revoká su kastigu, pasobra nan ta bende e hustu pa plaka, i esnan den nesesidat pa un par di sandalia. Esnan ku ta anhelá pa tira stòf riba kabes di e pobernan tambe ta trose kaminda di e humildenan.’”

¹³ Nan a bende hende hustu pa “plaka.” Esei kisas a nifiká ku e huesnan ku a aseptá plaka komo soborno tabata sentensiá hende inosente. Kobradónan tabata bende hende pober komo katibu pa e preis di “un par di sandalia,” podisé djis pa paga un debe chikitu. Hòmbernan sin heful tabata “anhelá,” òf tabata loko pa haña “e pobernan” den un estado asina desesperá ku e pobernan tabata tira stòf riba nan mes kabes, komo señal di aflikshon, rou òf humiashon. Korupshon tabata asina plamá  ku “e humildenan” no tabatin ningun speransa di haña hustisia.

14. Ken tabata esnan maltratá den e reino di dies tribu di Israel?

¹⁴ Tuma nota ta ken tabata esnan ku a ser maltratá. Tabata e habitantenan hustu, den nesesidat, pober i humilde. Yehova su pakto di Lei ku e israelitanan a eksigí pa nan mustra kompashon na hende vulnerabel i den nesesidat. Pero pa e personanan ei den e teritorio di e reino di dies tribu di Israel, kos no por tabata pió.

“Prepará pa Kontra ku Bo Dios”

15, 16. (a) Dikon e israelitanan a haña e spièrtamentu: “Prepará pa kontra ku bo Dios”? (b) Kon Amos 9:1 i 2 ta mustra ku e malbadonan no por skapa di e ehekushon di huisio divino? (c) Kiko a pasa ku e reino di dies tribu di Israel na aña 740 promé ku nos era?

¹⁵ Ya ku tabata reina inmoralidat i otro pikánan den Israel, profeta Amos ku bon motibu a spièrta e nashon rebelde: “Prepará pa kontra ku bo Dios.” (Amos 4:12) Israel infiel lo no por a skapa e binidero ehekushon di huisio divino pasobra pa di ocho biaha Yehova a deklará: “Lo mi no revoká su kastigu.” (Amos 2:6) Relashoná ku e malbadonan ku kisas lo a trata di skonde, Dios a bisa: “Nan lo no tin ningun fugitivo ku lo hui, ni ningun refugiado ku lo skapa. Maske nan koba bai te den Seol, for di ayanan mi man lo kohe nan; i maske nan subi bai na shelu, for di ayanan lo mi baha nan.”—Amos 9:1, 2.

¹⁶ Malbadonan no por a hui pa Yehova su huisio dor di koba “bai te den Seol,” un manera figurativo pa indiká intentonan pa skonde den e partinan mas hundu di tera. Ni nan no por a skapa di huisio divino dor di “subi bai na shelu,” esta, tratando di haña refugio den e serunan haltu. Yehova su spièrtamentu tabata masha kla: No tin ningun lugá di skonde ku ta for di su alkanse. Hustisia divino a rekerí pa e reino di Israel duna kuenta di su aktonan malbado. Anto e tempu ei en bèrdat a yega. Na aña 740 promé ku nos era—rònt di 60 aña despues ku Amos a skirbi su profesia—e reino di Israel a ser derotá dor di e asirionan viktorioso.

Huisio Divino Ta Selektivo

17, 18. Kiko Amos kapítulo 9 ta revelá tokante Dios su miserikòrdia?

¹⁷ E profesia di Amos a yuda nos mira ku e huisio di Dios semper ta meresí i ku malbadonan no por skapa di dje. Pero e buki di Amos ta indiká tambe ku Yehova su huisio ta selektivo. Dios por haña e malbado unda ku e bai skonde i ehekutá huisio riba dje. Meskos tambe e por haña hende rekto i arepentí, kual ta esnan ku e ta skohe pa mustra miserikòrdia na dje. E lès aki ta bin dilanti masha bunita mes den e último kapítulo di e buki di Amos.

¹⁸ Segun Amos kapítulo 9, versíkulo 8, Yehova a bisa: “Lo mi no destruí e kas di Jakòb kompletamente.” Segun versíkulonan 13 te ku 15, Yehova a primintí ku e lo ‘trese su pueblo bèk for di koutiverio.’ Nan lo risibí miserikòrdia i lo disfrutá di siguridat i prosperidat. Yehova a primintí ku “e plugdó lo alkansá e kosechadó.” Djis imaginá esei: lo tin un kosecha asina abundante ku ainda tabatin kosecha pa trese aden ora e próksimo temporada pa plug i sembra yega!

19. Kiko a pasa ku un restu for di Israel i Huda?

 ¹⁹ Nos por bisa ku Yehova su huisio kontra e malbadonan den tantu Huda komo Israel tabata selektivo pasobra el a mustra miserikòrdia na e hendenan arepentí i ku tabatin e disposishon korekto. Komo kumplimentu di e promesa di restorashon ku tin pará skirbi na Amos kapítulo 9, un restu arepentí for di Israel i Huda en bèrdat a bolbe for di koutiverio na Babilonia na aña 537 promé ku nos era. Unabes bèk den nan pais natal stimá, nan a restorá adorashon puru. I den un ambiente sigur nan a rekonstruí nan kasnan i planta hòfi i kunuku di wendrùif.

Yehova Su Huisio Desfaborabel Lo Bin!

20. Nos konsiderashon di e mensahenan di huisio proklamá dor di Amos mester hasi nos sigur di kiko?

²⁰ Nos konsiderashon di e mensahenan di huisio divino ku Amos a proklamá mester duna nos e siguransa ku Yehova lo pone un fin na maldat den nos tempu. Dikon nos por kere esei? Na promé lugá, e ehèmpelnan aki di pasado di Dios su trato ku hende malbado ta indiká kon e ta bai aktua den nos tempu. Na di dos lugá, e ehekushon di huisio divino riba e reino apóstata di Israel ta duna nos e garantia ku Dios lo trese destrukshon riba kristiandat, e parti mas kulpabel di ‘Babilonia e Grandi,’ e imperio mundial di religion falsu.—Revelashon 18:2.

21. Dikon kristiandat ta meresé Dios su huisio desfaborabel?

²¹ No tin duda ku kristiandat meresé Dios su huisio desfaborabel. Su kondishon deplorabel riba tereno religioso i moral ta papia pa su mes. Yehova su huisio kontra kristiandat—i kontra e restu di e mundu di Satanas—ta meresí. Ademas nan no por skapa di dje. Pasobra ora e momentu yega pa ehekutá huisio, e palabranan di Amos kapítulo 9, versíkulo 1, lo resultá di ta sierto: “Nan lo no tin ningun fugitivo ku lo hui, ni ningun refugiado ku lo skapa.” Sí, unda ku e malbadonan bai skonde, Yehova lo haña nan.

22. Ki puntonan relashoná ku huisio divino 2 Tesalonisensenan 1:6-8 ta mustra bon kla?

²² Huisio divino semper ta meresí, no por skapa di dje i e ta selektivo. Nos por komprondé esaki for di e palabranan di apòstel Pablo: “Ta hustu dilanti di Dios pa paga ku aflikshon esnan ku ta afligí boso, i pa duna alivio na boso ku ta wòrdu afligí i na nos tambe ora Señor Hesus wòrdu manifestá for di shelu ku su angelnan poderoso den kandela tur na vlam, pa duna pago meresí na esnan ku no konosé Dios i na esnan ku no ta obedesé e evangelio di nos Señor Hesus.” (2 Tesalonisensenan 1:6-8) “Ta hustu dilanti di Dios” pa duna pago na esnan ku ta meresé huisio desfaborabel pasobra nan a afligí su ungínan. E malbadonan no por skapa for di e huisio ei, pasobra nan lo no sobrebibí ‘ora Hesus wòrdu manifestá ku su angelnan poderoso den kandela tur na vlam.’ Tambe huisio divino lo ta selektivo dor ku Hesus lo duna pago meresí “na esnan ku no konosé Dios i na esnan ku no ta obedesé e evangelio.” I ehekushon di huisio divino lo trese konsuelo pa hende temeroso di Dios ku ta sufri aflikshon.

Speransa pa Hende Rekto

23. Ki speransa i konsuelo nos por saka for di e buki di Amos?

²³ E profesia di Amos ta kontené un mensahe maravioso di konsuelo i speransa pa personanan ku tin e disposishon korekto. Manera a keda profetisá den e buki di Amos, Yehova no a kaba kompletamente ku su pueblo di antigwedat. Ku tempu el a reuní e prezunan di Israel i Huda huntu atrobe, i a laga nan bolbe na nan pais natal i a bendishoná nan ku hopi siguridat i prosperidat. Kiko esaki ta nifiká pa nos tempu? Nos por tin sigur ku durante e binidero ehekushon di huisio divino, Yehova lo haña e malbadonan na unda ku nan bai skonde, i tambe lo e lokalisá e personanan ku e ta konsiderá ku meresé su miserikòrdia na unda ku nan ta biba riba e tera aki.

24. Den ki maneranan e sirbidónan di Yehova di tempu aktual a ser bendishoná?

 ²⁴ Miéntras ku nos ta warda riba Yehova pa ehekutá huisio kontra e malbadonan, kiko nos ta eksperensiá komo su fiel sirbidónan? Wèl, Yehova ta bendishonando nos ku un abundansia di prosperidat spiritual! Nos ta disfrutá di un forma di adorashon ku ta liber di e engañonan i mal representashonnan ku a resultá for di e siñansanan falsu di kristiandat. Tambe Yehova a bendishoná nos ku alimento spiritual na abundansia. Pero no lubidá: huntu ku e bendishonnan riku aki for di Yehova ta bin tambe un gran responsabilidat. Dios ta ferwagt ku nos ta spièrta otro hende tokante e binidero huisio. Nos ke hasi tur loke ta na nos alkanse pa buska esnan ku tin “e disposishon korekto pa bida eterno.” (Echonan 13:48, NW) Sí, nos kier yuda mas tantu hende posibel pa benefisiá di e prosperidat spiritual ku nos ta disfrutá di dje awor. I nos ke pa nan sobrebibí e binidero ehekushon di huisio divino kontra e malbadonan. Klaru ku pa por haña e bendishonnan aki, nos mester tin e kondishon korekto di kurason. Manera nos ta bai mira den e siguiente artíkulo, esaki tambe ta algu ku e profesia di Amos ta enfatisá.

Kon Lo Bo Kontestá?

• Kon e profesia di Amos ta mustra ku Yehova su huisionan desfaborabel semper ta meresí?

• Ki prueba Amos ta duna pa mustra ku malbadonan no por skapa di huisio divino?

• Kon e buki di Amos ta mustra ku Dios su ehekushon di huisio ta selektivo?

[Preguntanan di Estudio]

[Plachi na página 17]

E reino di Israel no a skapa di huisio divino

[Plachi na página 18]

Na aña 537 promé ku nos era, un restu di Israel i Huda a regresá for di koutiverio na Babilonia