Pregunta di Lektor

Unda e demoñonan lo ta durante Kristu su Reinado di Mil Aña?

Beibel no ta duna un kontesta spesífiko riba e pregunta aki. Pero tòg nos por yega na un konklushon lógiko tokante unda e demoñonan lo ta durante Kristu su Reinado di Mil Aña.

Ora apòstel Juan tabata duna un bista adelantá di loke lo tuma lugá na prinsipio i fin di e Reino di Mil Aña aki, el a deklará: “Mi a mira un angel ta baha for di shelu ku e yabi di e abismo i un kadena grandi den su man. I el a gara e dragon, e kolebra di antigwedat, kende ta Diabel i Satanas, i a mar’é pa mil aña, i a tir’é den e abismo, i a sera i seya esaki over di dje, pa e no gaña e nashonnan mas, te ora ku e mil añanan a keda kumplí; despues di e kosnan aki e mester wòrdu gelòs pa un tempu kòrtiku.” (Revelashon 20:1-3) E versíkulonan aki ta menshoná solamente e tiramentu di Satanas den abismo i ku despues lo lòs e pa un tempu kòrtiku. Ounke Juan no ta hasi menshon di e demoñonan, ta parse rasonabel ku ora e angel ku e yabi di abismo—Hesukristu glorifiká—ta gara Diabel i ser’é den abismo, lo e hasi esei ku e demoñonan tambe.—Revelashon 9:11.

Ora ku Hesukristu a bira Rei den shelu na aña 1914, el a dal un paso ku tabatin un efekto profundo tantu riba Satanas komo e demoñonan. Revelashon 12:7-9 ta bisa: “Tabatin guera den shelu, Miguel i su angelnan tabata hasi guera kontra e dragon. I e dragon i su angelnan [e demoñonan] tabata hasi guera, i nan no a prevalesé, i no tabatin lugá mas pa nan den shelu. I e gran dragon a wòrdu tirá abou, e kolebra di antigwedat, kende ta wòrdu yamá Diabel i Satanas, kende ta gaña henter mundu; el a wòrdu tirá abou riba tera, i su angelnan a wòrdu tirá abou huntu kuné.” For di e tempu ei en adelante, Satanas i su demoñonan a keda restringí na e bisindario di tera. Lógikamente nos por asumí ku na momentu ku Hesukristu bai limitá e aktividat di Satanas mas ainda pa asina libra tera di su influensia malbado, lo E hasi esei ku e demoñonan tambe.

Konsiderá tambe e promé profesia di Beibel. E ta bisa: “Lo mi [Dios] pone enemistat entre abo [Satanas] i e muhé [Yehova su organisashon selestial], i entre bo simia [di Satanas] i su simia [Hesukristu]; e lo heridá bo kabes, i abo lo heridá su hilchi di pia.” (Génesis 3:15) E kousamentu di herida na kabes di e kolebra ta enserá e seramentu di Satanas den abismo durante Kristu su Reinado di Mil Aña. Ademas, e profesia ta bisa ku lo tin enemistat entre Esun ku ta kousa e herida i e simia di Satanas. E simia aki, òf organisashon, ta inkluí un parti invisibel ku ta konsistí di e angelnan malbado, esta, e demoñonan. P’esei ta rasonabel pa konkluí anto ku ora Hesus tira Satanas den e abismo, e ta mara i tira e demoñonan tambe den e abismo. E echo ku e spiritunan malbado ei a mustra ku nan tin hopi miedu di e abismo ta indiká ku nan ta konsiente di e binidero restrikshon aki.—Lukas 8:31.

 Pero, ta posibel ku Revelashon 20:1-3 no ta hasi menshon di e demoñonan pasobra nan a ser destruí na Armagedón huntu ku e parti visibel di e simia di Satanas? Beibel ta mustra ku probablemente esaki lo no ta e kaso. Beibel ta deklará tokante Satanas su destino final: “I Diabel, kende a gaña nan, a wòrdu tirá den e lago di kandela i suafel, kaminda e bestia i e profeta falsu tambe ta; i nan lo wòrdu tormentá di dia i anochi pa semper i semper.” (Revelashon 20:10) E bestia i e profeta falsu ta entidatnan polítiko i nan ta forma parti di Satanas su organisashon visibel. (Revelashon 13:1, 2, 11-14; 16:13, 14) Nan ta ser destruí na Armagedón, ora ku e Reino di Dios garna i pone un fin na tur e reinonan di mundu. (Daniel 2:44) Beibel ta referí na “e kandela eterno ku a wòrdu prepará pa Diabel i su angelnan.” (Mateo 25:41) Lo tira Satanas i su demoñonan den e mesun “lago di kandela i suafel” ku e bestia i e profeta falsu, lokual ta nifiká ku nan tambe lo ser destruí pa semper. Si tabata asina ku e spiritunan invisibel, e parti mas poderoso di e simia di Satanas, a ser destruí na Armagedón, anto Beibel sigur lo a menshoná ku e demoñonan ta den e lago simbóliko ei kaba huntu ku e bestia i e profeta falsu. E echo ku Revelashon 20:10 no ta hasi menshon di nan ta indiká ku e demoñonan no ta ser destruí na Armagedón.

Pero komo ku Beibel no ta bisa spesífikamente ku e demoñonan ta ser tirá den e abismo, tampoko e ta bisa spesífikamente ku nan ta ser saká for di dje. Sin embargo, nan tin mesun destino ku Diabel. Despues ku e demoñonan sali for di e abismo huntu ku Diabel i koperá kuné durante e prueba final ku lo bin riba humanidat na fin di e mil aña, nan tambe lo ser tirá den e lago di kandela i asina nan lo eksperensiá destrukshon eterno.—Revelashon 20:7-9.

Pues anto, maske Revelashon 20:1-3 ta papia solamente di e echo ku ta Satanas ta ser gará i tirá den e abismo di inaktividat, nos por konkluí lógikamente ku lo mara i tira su angelnan tambe den e abismo. Dios lo no permití Satanas ni su demoñonan interferí ku e kumplimentu di su propósito di transformá e tera den un paradeis i restorá humanidat na perfekshon durante Kristu su Reinado di Mil Aña.