Historia di Bida

Mi A Konfia den Yehova Su Kuido Amoroso

SEGUN E RELATO DI ANNA DENZ TURPIN

“Tur ora bai bo ta ‘DIKON?’!” mi mama a bisa ku un sonrisa. Na mucha, mi tabata bombardiá mi mayornan ku pregunta. Pero Mama ku Papa nunka no a skual mi pa mi kuriosidat infantil. Al kontrario, nan a siña mi kon pa rasoná i tuma mi propio desishonnan basá riba un konsenshi bíblikamente entrená. Mas despues e edukashon ei a resultá sumamente balioso! Un dia, tempu ku mi tabatin 14 aña, e nazinan a kita mi mayornan stimá for di mi, i nunka mas mi a bolbe mira nan.

MI PAPA, Oskar Denz, i mi mama, Anna Maria, tabata biba na Lörrach, un stat aleman pegá ku frontera ku Suisa. Tempu nan tabata yòn nan tabata aktivo den polítika, i hende den komunidat tabata konosé nan i respetá nan. Pero na 1922, djis despues ku nan a kasa, mi mayornan a kambia nan punto di bista di polítika i nan metanan den bida. Mama a kuminsá studia Beibel ku e Studiantenan di Beibel (manera Testigunan di Yehova tabata yama e tempu ei) i el a keda masha enkantá di siña ku e Reino di Dios lo a trese pas riba tera. Poko despues Papa a djòin Mama den e studio, i nan a kuminsá asistí na e reunionnan di e Studiantenan di Beibel. Papa asta a duna Mama un buki pa studia Beibel, E Harpa di Dios, komo regalo di Pasku e aña ei. Mi tabata nan úniko yu, i mi a nase dia 25 di mart 1923.

Esta dushi rekuerdo mi tin di nos bida di famia! Mi ta kòrda nos kaminatanan den zomer den e ambiente trankil  di Selva Pretu i kon Mama tabata siña mi hasi trabou di kas. Ainda mi por mir’é pará den kushina ta supervisá su kòki chikitu. Mas importante ainda, mi mayornan a siña mi stima Yehova Dios i konfia den dje.

Nos kongregashon tabata konsistí di mas o ménos 40 predikadó di Reino hopi aktivo. Mi mayornan tabatin un don spesial pa krea oportunidat pa papia tokante e Reino. Debí na nan aktividatnan anterior den komunidat, nan tabata sinti nan mes kómodo serka otro hende, i hende tabata risibí nan bon. Ora mi a hasi shete aña, mi tambe tabata kier a prediká di kas pa kas. Riba mi promé dia, mi kompañera a duna mi algun literatura, mustra riba un kas, i a djis bisa mi: “Bai wak si nan ke esaki.” Na 1931, nos a asistí na un kongreso di Studiantenan di Beibel na Basel, Suisa. Einan mi mayornan a batisá.

Di Turbulensia pa Tirania

Alemania tabata den gran turbulensia e tempu ei, i vários frakshon polítiko tabata klèsh ku otro violentamente riba kaya. Un anochi, gritamentu ku tabata bin for di kas di un bisiña a lanta mi for di soño. Dos mucha hòmber tiner a mata nan ruman hòmber ku pènki òf fòrki pa hoi, pasobra nan no tabata di akuerdo ku su punto di bista polítiko. Tambe tabatin un kresiente hostilidat kontra hende hudiu. Na skol, un mucha muhé mester a para su so den huki djis pasobra e tabata hudiu. Mi a sinti hopi duele di dje, sin sa ku poko tempu despues mi tambe lo a sinti kiko ke men ora tur hende kita pia for di bo.

Dia 30 di yanüari 1933, Adolf Hitler a bira kansier di Alemania. For di un par di kuadra leu nos a wak kon e nazinan triunfantemente a subi e bandera di suástika riba stadhuis. Na skol, nos maestro entusiasmá a siña nos pa bisa e saludo “Heil Hitler!” E atardi ei mi a konta Papa tokante esei. E kos a molesti’é. El a bisa: “Mi no gusta e kos ei. ‘Heil’ ta nifiká salbashon. Si nos mester bisa ‘Heil Hitler,’ esei ke men ku nos ta atribuí salbashon na dje en bes di na Yehova. Mi no ta kere ku esei ta korekto, pero abo disidí pa bo mes kiko bo mester hasi.”

Mi kompañeronan di skol a kuminsá trata mi manera un persona indeseá pasobra mi a disidí di no duna e saludo di Hitler. Algun mucha hòmber asta tabata dal mi ora ku e maestronan no tabata wak. Ku tempu, nan a laga mi na pas, pero mi amiganan a bisa mi ku nan tatanan a taha nan di hunga ku mi. Mi tabata muchu peligroso.

 Dos luna despues ku e nazinan a tuma poder na Alemania, nan a prohibí e trabou di Testigunan di Yehova pasobra nan lo ta un peliger pa Estado. Sòldánan di atake a sera e ofisina na Magdeburg i a prohibí nos reunionnan. Pero komo ku nos famia a biba serka di frontera, Papa a haña pèrmit ku nos por a krusa frontera bai Basel, kaminda nos tabata asistí na e reunionnan di djadumingu. Hopi bes e tabata bisa ku mare nos rumannan na Alemania por a risibí tal kuminda spiritual pa yuda nan enfrentá futuro ku kurashi.

Kaminatanan Peligroso

Despues ku outoridatnan a sera e ofisina di Magdeburg, Julius Riffel, un ruman hòmber ku ántes tabata traha einan, a bin Lörrach, su stat natal, pa organisá e trabou di prediká den sekreto. Mesora Papa a ofresé pa yuda. El a pone ami ku Mama kai sinta i a splika nos ku el a bai di akuerdo pa yuda trese literatura bíbliko Alemania for di Suisa. El a bisa ku esaki lo ta algu sumamente peligroso i ku nan lo por arest’é un ora pa otro. E no tabata ke pa nos sinti nos preshoná pa partisipá den esaki pasobra lo ta algu hopi riskante pa nos tambe. Mesora Mama a bisa: “Ami ta ku bo.” Nan tur dos a bira wak mi, i ami a bisa: “Mi tambe ta ku boso!”

Mama a hak un tas tamaño di un revista Toren di Vigilansia. E tabata hinka e literatura den un habrí na banda di e tas i kaba hak e tas ser’é. Tambe el a kose sakunan sekreto den e pañanan di Papa i el a kose dos kòrsèt den kua ami kuné diskretamente por a karga bukinan chikí pa studia Beibel. Kada biaha ku nos a logra yega kas ku nos tesoro sekreto, nos tabata hala un rosea di alivio i gradisí Yehova. Nos tabata skonde e literatura den nos zòlder.

Na prinsipio, e nazinan no a sospechá nos di nada. Nan no a interogá nos ni listra nos kas. No opstante, nos a palabrá un seña ku nos por a usa pa spièrta nos rumannan spiritual den kaso di problema: e number 4711, ku ta e nòmber di un kolonia famoso. Si tabata peligroso pa bin nos kas, nos lo a spièrta nan di un manera òf otro usando e number ei. Tambe Papa a bisa nan pa hisa kara wak nos bentananan di sala promé ku nan drenta den e edifisio. Si e bentana na banda robes tabata habrí, esei a nifiká ku un kos no ta bon, i ku nan mester keda leu.

Durante 1936 i 1937, Gestapo a tene arestonan masal i a sera míles di Testigu den prizon i kampo di konsentrashon, kaminda nan a sufri un trato sumamente kruel i sadístiko. E ofisina di sukursal na Bern, Suisa, a kuminsá kompilá e informenan—inkluso algun informe ku nan a logra saka den sekreto for di e kamponan di konsentrashon—pa por publiká un buki ku yama Kreuzzug gegen das Christentum (Krusada Kontra Kristianismo), un denunsia di e krímennan di nazismo. Nos a kuminsá ku e trabou peligroso di hiba e informenan sekreto na Basel, n’e otro banda di frontera. Si e nazinan lo a gara nos ku e dokumentonan sekreto ei, nan lo  a enkarselá nos mesora. Mi tabata yora ora mi lesa tokante e tormento ku nos rumannan tabata sufri. Sin embargo, mi no a sinti miedu. Mi a konfia ku Yehova i mi mayornan, mi mihó amigunan, lo a kuida mi.

Mi a kaba skol ku 14 aña i a haña trabou di ofisina den un hardware. Normalmente, nos tabata hasi nos trabou di mensahero riba djasabra atardi òf djadumingu, ora ku Papa tabata liber di trabou. Komo promedio, nos tabata bai kada dos siman. Nos a parse un famia komun i koriente ku a sali bai keiru den wikènt, i durante kasi kuater aña, e bewakernan di frontera no a stòp nos ni listra nos, esta, te riba un dia den febrüari 1938.

Deskubrí!

Nunka lo mi lubidá e ekspreshon riba mi papa su kara ora ku nos a yega na e sitio pa rekohé e literatura pegá ku Basel i nos a mira e stapel grandi di literatura ku tabata warda nos. Komo ku outoridatnan a arestá un otro famia ku tabata fungi komo mensahero, nos tabatin èkstra buki pa bai kuné. Na e frontera un funshonario di duana a wak nos ku sospecho i a ordená pa listra nos. Ora nan a haña e bukinan, el a pone nos kana bai bou di menasa di skopèt na e outonan di polis ku tabatin pará kla ta warda. Ora e polisnan tabata kore bai ku nos, Papa a primi mi man i flùister: “No sea un traidó. No duna nòmber di niun hende!” “Lo mi no hasié,” mi a sigur’é. Ora nos a yega bèk na Lörrach, nan a bai ku mi papa stimá. Mi a mir’é pa último biaha segun ku e porta di prizon a sera su tras.

Kuater ora largu, kuater hòmber di Gestapo a interogá mi, eksigiendo pa mi bisa nan nòmber i adrès di otro Testigunan. Ora mi a nenga, un di nan a rabia i menasá mi: “Nos tin otro métodonan pa pone bo papia!” Mi no a konta nan nada. E ora ei nan a hiba ami ku Mama bèk na nos kas, i nan a listra nos kas pa promé biaha. Nan a arestá mi mama i ami nan a manda kas di mi tanta i hasi mi tanta mi voogd, sin realisá ku e tambe tabata Testigu. Ounke mi tabatin mag di bai traha, tabatin kuater hòmber di Gestapo sintá den un auto dilanti di e kas pa kontrolá delaster un moveshon ku mi hasi, miéntras ku un polis tabata patruyá riba asera.

Un par di dia despues rònt di ora di kome mèrdia, mi a sali for di kas i a mira un ruman muhé hóben riba baiskel biniendo den mi direkshon. Segun ku e tabata yega serka, mi por a mira ku e ta bai benta un pida papel pa mi. Asina ku mi a fangu e papel, mi a bira wak si e Gestapo a mira loke mi a hasi. Pa mi sorpresa, na e mesun momentu ei nan tur a manda nan kabes atras den harimentu!

E nota di e ruman a duna mi instrukshon pa bai na kas di su mayornan 12 or di mèrdia. Pero siendo ku Gestapo tabata vigilá mi, kon lo mi por a riska inkriminá su mayornan? Mi a bira wak e kuater agentenan di Gestapo den outo i despues mi a wak e polis ku tabata kana bai bin riba kaya. Mi no tabata sa kiko pa hasi, i a kuminsá resa fervientemente na Yehova p’e yuda mi. Diripiente, e polis a kana bai na e outo di Gestapo i papia ku e hòmbernan. Kaba el a drenta den nan outo, i nan a kore bai!

Nèt na e momentu ei mi tanta tabata kana bin for di e skina di kaya. Ya kaba tabata despues di 12 or di mèrdia. El a lesa e nota i a haña ku nos mester bai na e kas manera nan a manda nos, ya ku su idea a dun’é ku kisas e rumannan a hasi areglo pa hiba mi Suisa. Ora nos a yega, e famia a introdusí mi na un hòmber ku mi no tabata konosé, Heinrich Reiff. E di ku mi ku e ta kontentu ku mi a yega sano i salvo i ku el a bin pa yuda mi skapa bai Suisa. El a duna mi mei ora pa top’é den un mondi.

Bida den Eksilio

Mi a topa Ruman Reiff ku awa ta basha for di mi wowo, hopi tristu ku mi tabatin ku bai laga mi mayornan atras. Tur kos a sosodé asina lihé. Despues di algun momentunan di tenshon, nos a meskla ku un grupo di turista i a krusa e frontera di Suisa sano i salvo.

Ora mi a yega na e ofisina di sukursal na  Bern, mi a tende ku ta e rumannan einan a hasi areglo pa mi skapa. Bondadosamente nan a duna mi un lugá di keda. Mi tabata traha den kushina, i mi a gusta esei sinfin. Pero esta duru e tabata pa biba den eksilio, sin sa kiko lo a pasa ku mi mayornan, ya ku ámbos a ser sentensiá na dos aña di prizon! Tabatin biaha ku tristesa i ansiedat tabata poderá di mi, i mi tabata sera mi mes den baño pa yora. Pero via karta mi tabatin kontakto regular ku mi mayornan, i nan a enkurashá mi pa keda fiel.

Motivá pa mi mayornan su ehèmpel di fe, mi a dediká mi bida na Yehova i a batisá dia 25 di yüli 1938. Despues di un aña na Bètel, mi a bai traha na Chanélaz, un boerderij ku e sukursal di Suisa a kumpra pa perkurá kuminda pa e famia di Bètel i pa hospedá rumannan ku tabata hui di persekushon.

Ora mi mayornan a kaba di sinta nan sentensia na 1940, e nazinan a ofresé pa libra nan si nan renunsiá nan fe. Nan a keda firme i e nazinan a manda nan kampo di konsentrashon, Papa a bai Dachau i Mama a bai Ravensbrück. Durante e wenter di 1941, mi mama ku otro Testigunan femenino den e kampo a nenga di traha pa e militarnan. Komo kastigu, nan a pone nan para den friu 3 dia i 3 anochi, pa despues sera nan den sèlnan skur pa 40 dia i duna nan masha tiki kumindá pa nan sufri di hamber. Despues nan a bati nan. Mama a muri dia 31 di yanüari 1942, tres siman despues di a ser batí malamente.

Nan a transferí Papa for di Dachau pa Mauthausen na Oustria. Den e kampo aki e nazinan sistemátikamente a asesiná prizoneronan dor di laga nan muri di hamber i dor di pone nan hasi trabou físiko demasiado pisá. Seis luna despues ku Mama a muri, e nazinan a mata mi papa usando un otro método: eksperimentunan médiko. E dòkternan di e kampo deliberadamente tabata inyektá hende ku tuberkulósis pa nan sirbi komo ‘proefkonijn.’ Despues, e prezunan tabata haña un inyekshon mortal den kurason. E registro ofisial ta bisa ku Papa a muri di “un múskulo suak di kurason.” E tabatin 43 aña. Ta despues di vários luna mi a haña sa di e asesinatonan kruel. Te ainda mi wowo ta yena ku awa ora mi kòrda riba mi mayornan stimá. Sin embargo, loke ta konsolá mi awor meskos ku e tempu ei, ta di sa ku Mama ku Papa, kendenan tabatin e speransa di bida selestial, ta safe den man di Yehova.

Despues di Segundo Guera Mundial, mi tabatin e privilegio di asistí na e di 11 klas di e Skol Bíbliko di Galaad di Watchtower na New York. Tabata un gran goso di por a pasa sinku luna apsorbá den studio di e Skritura! Despues di graduashon na 1948, mi a ser asigná na Suisa pa sirbi komo misionero. No muchu tempu despues mi a topa James L. Turpin, un ruman hòmber fiel ku a gradua for di e di sinku klas di Galaad. El a sirbi komo superintendente di e promé ofisina di sukursal ku nan a habri na Turkia. Nos a kasa na mart 1951, i poko despues  nos a haña sa ku nos ta bai bira mama ku tata. Nos a muda bai Merka i a yama nos yu muhé, Marlene, bonbiní na mundu den desèmber di e aña ei.

Atraves di añanan, ami ku Jim a haña hopi goso den nos sirbishi di Reino. Mi tin grato rekuerdo di un studiante di Beibel, un mucha muhé chines ku yama Penny, kende tabata gusta studia Beibel sinfin. El a batisá i despues a kasa ku Guy Pierce, kende awor ta sirbi komo miembro di e Kuerpo Gobernante di Testigunan di Yehova. Personanan stimá asina a yuda yena e bashí ku e pèrdida di mi mayornan a kousa.

Na prinsipio di aña 2004, e rumannan na Lörrach, e stat natal di mi mayornan, a traha un Salòn di Reino nobo den Kaya Stich. Komo rekonosementu pa loke Testigunan di Yehova a hasi, e konseho munisipal a disidí di kambia e nòmber di kaya pa Denzstraße (Kaya Denz) na onor di mi mayornan. E korant lokal, Badische Zeitung, tabatin e titular “Nòmber Nobo di Kaya na Memoria di e Pareha Asesiná, Denz.” E korant a bisa ku mi mayornan “a ser asesiná den un kampo di konsentrashon durante e Terser Reino [di Hitler] pa motibu di nan fe.” Pa mi, e akshon ei di e konseho munisipal tabata un kambio di sirkunstansia inesperá i sumamente konmovedor.

Papa tabatin kustumber di bisa ku nos mester plania pa futuro komo si fuera Armagedón lo no a bin durante nos bida pero hiba nos bida komo si fuera lo el a bin mañan. Esei ta un ekselente konseho ku semper mi a purba apliká. No ta semper fásil pa haña un balansa entre tene pasenshi i warda ku gran antisipashon, spesialmente awor ku debí na e mal efektonan di behes mi no por sali for di kas. Sin embargo, nunka mi no a duda den Yehova su promesa na tur su fiel sirbidónan: “Konfia den SEÑOR ku henter bo kurason . . . Den tur bo kamindanan rekonos’é, i e lo dirigí bo bereanan.”—Proverbionan 3:5, 6.

[Kuadro/Plachi na página 29]

PALABRANAN PRESIOSO FOR DI PASADO

Un señora di un pueblito ku ta keda basta leu for di Lörrach a bishitá e stat den dékada di 1980. E tempu ei, habitantenan di Lörrach tabata trese nan pertinensianan indeseá na un área públiko kaminda otro hende por a pasa dor di nan i bai ku loke nan tabata deseá. E señora aki a haña un kahita di ko’i kose i a bai kas kuné. Despues, den bòm di e kaha el a haña algun potrèt di un mucha muhé chikí i kartanan skirbí riba papel di kampo di konsentrashon. E señora tabata intrigá ku e kartanan i tabata puntra su mes ta ken e mucha muhé chikí ku flègtu lo ta.

Un dia na aña 2000, e señora a mira un artíkulo den korant tokante un ekshibishon históriko na Lörrach. E artíkulo a deskribí e historia di Testigunan di Yehova durante e añanan di nazi, inkluso e historia di nos famia. E artíkulo tabatin potrèt di mi komo tiner. Ora e señora a mira ku e potrètnan a parse esnan ku e tabatin, el a tuma kontakto ku e reportera i a kont’é tokante e kartanan: 42 en total! Un par di siman despues, mi tabatin nan den mi man. Skirbí den handschrift di mi mayornan, mi por a lesa kon nan tabata puntra mi tanta konstantemente pa mi. Nan interes amoroso pa mi nunka a mengua. Ta un maravia ku e kartanan aki a sobrebibí i bolbe aparesé despues di mas ku 60 aña!

[Plachinan na página 25]

Nos famia felis a keda ranká for di otro ora ku Hitler a bin na poder

[Rekonosementu]

Hitler: U.S. Army photo

[Plachinan na página 26]

1. E ofisina di Magdeburg

2. Gestapo a arestá míles di Testigu

[Plachi na página 28]

Ami ku Jim a haña hopi goso den nos sirbishi di Reino