Pregunta di Lektor

Pakiko despues ku Hesus a resusitá el a invitá Tomas pa mishi kuné siendo ku mas promé el a taha Maria Magdalena di hasi esei?

Algun tradukshon mas bieu di Beibel ta duna e impreshon ku Hesus a bisa Maria Magdalena pa no mishi kuné. Por ehèmpel, King James Version ta tradusí Hesus su palabranan komo lo siguiente: “No mishi ku mi; pasobra ainda mi no a subi bai serka mi Tata.” (Juan 20:17) Pero e verbo original griego, ku normalmente ta ser tradusí komo “mishi,” ta nifiká tambe “pega na, kologá na, gara, tene.” Hesus no por tabatin nada kontra pa Maria Magdalena simplemente mishi kuné, siendo ku el a permití otro hende muhé ku tabata n’e graf “koh’é tene na su pianan.”—Mateo 28:9.

Hopi tradukshon moderno, manera e Tradukshon di Mundu Nobo di e Santu Skritura, Beibel na papiamentu koriente i Beibel Santu ta yuda nos komprondé e berdadero nifikashon di e palabranan di Hesus dor di tradusí nan: “No tene mi.” Pakiko Hesus lo a bisa Maria Magdalena esei, siendo ku e tabata hopi yegá na dje?—Lukas 8:1-3.

Probablemente, Maria Magdalena tabatin miedu ku Hesus tabata serka di subi bai shelu. Motivá pa su deseo fuerte pa ta huntu ku su Señor, el a kue Hesus tene duru sin ke lag’é bai. Pa garantisá Maria ku su ora di bai no a yega ainda, Hesus a bis’é pa stòp di ten’é i pa en bes di esei bai duna su disipelnan e bon notisia di su resurekshon.—Juan 20:17.

E kòmbersashon entre Hesus i Tomas tabata un poko diferente. Un biaha ku Hesus a aparesé na algun di su disipelnan, Tomas no tabat’ei. Despues, Tomas a ekspresá su dudanan tokante e resurekshon di Hesus, bisando ku lo e no kere esei sino te ora e mira e heridanan di Hesus kousá pa klabu i hinka su man den e kustia heridá di Hesus. Ocho dia despues, Hesus a bolbe aparesé n’e disipelnan. E biaha aki sí Tomas tabat’ei i Hesus a invit’é p’e mishi ku su heridanan.—Juan 20:24-27.

Pues, den e kaso di Maria Magdalena, Hesus a trata ku un deseo ekiboká pa strob’é di bai; den e kaso di Tomas, Hesus a yuda un persona ku tabatin duda. Den ámbos kaso, Hesus tabatin bon motibu pa aktua den e manera ku el a aktua.